(आदेश पारीत व्दारा- श्रीमती.चारु वि.डोंगरे, मा.सदस्या)
1. तक्रारदार यांनी सदरील तक्रार ग्राहक सरंक्षण कायदा 1986 कलम 12 अन्वये सामनेवाला यांनी द्यावयाचे सेवेत त्रुटी ठेवली आहे. म्हणून नुकसान भरपाई मिळणेसाठी दाखल केलेली आहे.
2. तक्रारदार यांची तक्रार थोडक्यात येणे खालील प्रमाणेः-
तक्रारदार हे राहुरी ता.राहुरी जि.अहमदनगर येथील रहिवासी आहेत. तक्रारदाराला बजाज एक्स सिडी 135 सी.सी. ही मोटार सायकल रक्कम रुपये 39,900/- रुपयास घ्यावयाची होती. तक्रारदाराने सामनेवाला नं.1 यांचे सांगणेवरुन रक्कम रु.9,199/- रुपये भरुन सदर मोटार सायकलचे लोन करुन देतो या शब्दावर विश्वास ठेऊन त्यांनी कोपरगांव शाखेतून शिरोडे अॅटोमोबाईल्स मधून सदरचे वाहन खरेदी केले. सामनेवाला नं.3 यांचेकडे कर्ज प्रकरण करुन त्यांनी 24 हप्ते पाडून प्रत्येक हप्त्यापोटी 1995/- असे भरुन दिले. त्यानुसार तक्रारदाराने भारतीय स्टेट बँक ऑफ इंडिया शाखा राहुरी मधून तक्रारदाराचे खात्याचे 24 चेक सामनेवाला नं. 1व 3 यांचेकडे तक्रारदाराने दिले. त्यानंतर सदर वाहनाचा ताबा तक्रारदाराला देण्यात आला. सदरचे वाहन तक्रारदाराचे ताब्यात दिनांक 21.09.2009 रोजी देण्यात आले. तक्रारदाराचे खाते असलेले स्टेट बँक ऑफ इंडिया शाखा राहुरी येथील खाते क्र.30749819561 या खात्यातून हप्त्यापोटीचे चेक सामनेवाला नं.2 व 3 यांनी पास केलेले आहेत. केवळ 2 हप्त्याची रक्कम थकीत असताना तक्रारदाराचे खात्यात 4,000/- शिल्लक होती. सामनेवालाने तक्रारदाराचे खात्यामध्ये चेक भरले. परंतू सदरचे चेक वटवले नाहीत. त्यानंतर सामनेवाला नं.3 यांनी वकीलामार्फत दिनांक 14.03.2011 रोजी नोटीस पाठवून रक्कम रु.20,305/- भरण्यास सांगितले. त्यानंतर तक्रारदाराने सामनेवाला नं.3 यांचे ऑफिसमध्ये जाऊन चौकशी केली व सामनेवाला नं.2 ने दोन चेकची रक्कम रु.4,000/- स्विकाले नाहीत. त्यानंतर सामनेवाला नं.3 यांनी शिवाजीनगर कोर्टात लोक अदालत प्रकरण दाखल केले. त्याची नोटीस तक्रारदाराला प्राप्त झाल्यानंतर त्या पत्रामध्ये 24,319/- एवढी थकबाकी दाखवली आहे. परंतू तक्रारदाराला केवळ 4,000/- रुपये एवढी थकबाकी असतांना सामनेवाला यांनी ज्यादा थकबाकी दाखवली आहे. तक्रारदार यांचे सामनेवालाकडे हप्त्याची थकबाकी कधीही नव्हती. केवळ 4,000/- एवढी रक्कम थकबाकी आहे व पुढे तक्रारदार सामनेवाला नं.3 कडे भरण्यास गेले. परंतू त्यांनी स्विकाली नाही. तक्रारदारास सदर वाहनाचे आर.सी.बुक व इतर कागदपत्रे मागण्यास गेले असता सामनेवाला न1 ते 3 यांनी ते देण्यास नकार दिला. सामनेवाला नं.1 हा सामनेवाला नं.2 चे बजाज फायनान्स मध्ये काम पहातात. सामनेवाला नं.3 मुख्य शाखा आहे. सामनेवाला नं.2 ही शाखा असून सामनेवाला नं.1 व 2 हे सामनेवाला नं.3 चे अधिपत्याखाली फायनान्सचे काम पाहातात. तक्रारदाराने संपुर्ण हप्त्याची रक्कम भरलेली आहे. व उर्वरीत रक्कम रु.4,000/- भरण्यास तयार असताना सामनेवालाने ते स्विकारले नाहीत व उलट तक्रारदाराकडे थकबाकी असल्याचे चुकीचे सांगितले आहे. तक्रारदाराचे वाहनाची कागदपत्रे दिली नाहीत व सेवा देणेत त्रुटी केलेली आहे. त्यामुळे तक्रारदाराने मंचात सदर तक्रार दाखल करुन परीच्छेद क्र.10 प्रमाणे मागणी केली आहे.
3. सामनेवाला नं.1 यांना प्रकरणाची नोटीस बजावणी होऊनही ते प्रकरणात हजर झाले नाही. म्हणून सामनेवाला नं.1 यांचे विरुध्द निशाणी 1 वर सदर प्रकरण एकतर्फा चालविण्याचा आदेश पारीत करण्यात आला.
4. सामनेवाला नं.2 व 3 यांनी त्यांची लेखी कैफियत प्रकरणात दाखल केली आहे. त्यामध्ये सामनेवाला नं.2 व 3 यांनी असे कथन केले की, तक्रारदाराने सामनेवाला नं.2 यांचेकडून वाहन खरेदी केले व सामनेवाला नं.3 यांचेकडून सदर वाहनाचे कर्ज प्रकरण केले आहे हे मान्य कलेले आहे. तक्रारदाराला कर्ज हप्त्यापोटीची रक्कम रु.1,995/- अशी प्रतिमहा 24 हप्त्यामध्ये भरण्याबाबत करारनामा करण्यात आला. सदरच्या करारनाम्यामधील अटी व शर्ती या सामनेवाला व तक्रारदाराला मान्य आहेत. तक्रारदाराने हप्त्याची रक्कम भरताना कधीही उशीर न करता हप्त्याची रक्कम भरावयाची आहे असे करारामध्ये नमुद आहे. तक्रारदाराने 24 हप्त्यापैकी केवळ 14 हप्त्याची रक्कम भरलेली आहे. व तक्रारदाराने सामनेवाला यांना दिलेले 10 धनादेश हे वटलेले नाहीत. अशा प्रकारे तक्रारदाराकडे थकबाकीची रक्कम रु.5,985/- व त्यावर ओव्हर डयुज चार्जेसचे रुपये 24,454/- बाकी आहेत. या बाबतचे पत्र सामनेवाला यांनी तक्रारदाराला पाठविले व सदरची रक्कम भरण्याबाबत विनंती केली. परंतु तक्रारदाराने ती रक्कम भरलेली नाही. त्यानंतर पुन्हा स्मरणपत्र पाठवण्यात आले. डिमांड नोटीस दिनांक 19.11.2012 रोजी तक्रारदाराला पाठवून ओव्हर डयुज चार्जेसची थकबाकी रक्कम भरण्यास सांगितले. तक्रारदाराने सदरची रक्कम भरली नाही. उलट चुकीच्या कारणाने मंचात तक्रार दाखल केलेली आहे. सबब सदर तक्रार खर्चासह खारीज करण्यात यावी अशी विनंती सामनेवाला नं.2 व 3 यांनी मंचाला केली आहे.
5. तक्रारदार यांनी दाखल केलेली तक्रार, कागदपत्र, शपथपत्र यांचे अवलोकन केले. तसेच तक्रारदार यांचे वकील श्री.शेळके यांचा युक्तीवाद ऐकला. तसेच सामनेवाल नं.2 व 3 यांनी दाखल केलेली कैफियत, कागदपत्रे, शपथपत्र व त्यांचे वकील श्री.पादीर यांनी केलेला युक्तीवाद ऐकला. व न्याय निर्णयासाठी खालील मुद्दे उपस्थित होतात.
| मुद्दे | उत्तर |
1. | सामनेवाला यांनी तक्रारदार यांना सेवा देण्यात त्रुटी ठेवली आहे काय.? | ... नाही. |
2. | तक्रारदार हे सामनेवाला यांचेकडूननुकसान भरपाई मिळण्यास पात्र आहे काय.? | ... नाही. |
3. | आदेश काय ? | ...अंतीम आदेशानुसार. |
का र ण मि मां सा
6. मुद्दा क्र.1 व 2 ः- तक्रारदार यांनी बजाज एक्स सी.डी. 135 सी.सी. हे वाहन सामनेवाला नं.1 यांच्या सांगण्यावरुन सामनेवाला नं.2 कडून खरेदी केले. सदर वाहन खरेदी करण्यासाठी सामनेवाला नं.3 यांचेकडून 39,900/- रुपयाचे कर्ज प्रकरण केले. सदरचे कर्ज प्रकरणाप्रमाणे तक्रारदाराला 24 हप्त्यामध्ये दरमहा रक्कम रुपये 1,995/- एवढे ठरवण्यात आले. त्यानुसार तक्रारदाराला स्टेट बँक ऑफ इंडिया राहुरी येथील तक्रारदाराचे खात्याचे 24 चेक घेतले. 24 चेक सामनेवालाकडे दिलेले आहेत असे कथन केलेले आहे. सामनेवाला यांनी त्यांचे लेखी कैफियतीमध्ये या सर्व बाबी मान्य केलेल्या आहेत. तसेच तक्रारदाराने त्यांचे तक्रारीमध्ये कथन केलेले आहे की, हप्त्यापोटी तक्रारदाराचे खात्यातून चेक पास झालेले आहेत. केवळ 2 हप्त्याची रक्कम थकीत असताना तक्रारदाराचे खात्यात 4,000/- रुपये शिल्लक असताना दोन चेक वटले नाहीत. सदरचे कथनाला सामेनवाला यांनी त्यांचे लेखी कैफियतीमध्ये असा बचाव घेतला की, तक्रारदाराने 24 हप्त्यापैकी केवळ 14 हप्त्याची रक्कम सामनेवालाकडे भरलेली आहे. 10 चेक त्यांनी न वटता परत केले आहेत. सामनेवालानी ही बाब स्पष्ट करण्यासाठी न वटलेले चेक व त्यासंबंधी कागदपत्रे प्रकरणात दाखल केलेले आहेत. यावरुन ही बाब स्पष्ट होते की, सामनेवालाने घेतलेला बचाव चेक न वटता परत आले ही बाब स्पष्ट होते. तसेच सामनेवाला यांनी तक्रारदाराने किती व कोणते हप्ते भरलेले आहेत. यासाठी खाते उतारा दाखल केलेला आहे. सदरचा खाते उता-याचे अवलोकन केले असता, त्यामध्ये नमुद केलेले आहे की, तक्रारदाराने किती रकमेचे कर्ज प्रकरण केले आहे व त्यानुसार किती हप्त्याची रक्कम शिल्लक आहे. सदरचे दस्ताचे अवलोकन केले असता रक्कम रु.5,985/- एवढी रक्कम बाकी असल्याचे व ओव्हर डयुज चार्जेसचे रु.24,454/- एवढी रक्कम बाकी असल्याचे दर्शविले आहे. यावरुन ही बाब स्पष्ट होते की, तक्रारदाराकडे थकबाकीची रक्कम व ओव्हर डयुज चार्जेस बाकी आहे. तक्रारदाराने सुध्दा प्रकरणामध्ये त्यांनी भरलेल्या हप्त्याचे रकमेचा तपशिल दाखल केलेला आहे. त्यामुध्ये सुध्दा कशा प्रकारे रक्कम देण्यात आलेली आहे ही बाब कथन केलेली आहे. संपर्ण्ुापणे हप्त्याची रक्कम भरलेबाबतचे दस्त प्रकरणात दाखल नाही. व तक्रारदार स्वतःच तक्रारीमध्ये रक्क्म रु.4,000/- बाकी असल्याचे प्रकरणात नमुद करीत आहे. यावरुन तक्रारदाराकडे थकबाकीची रक्कम असल्याचे स्पष्ट होते. सदरची रक्कम तक्रारदाराने वेळेत सामनेवालाकडे भ्रलेली नाही. त्यामुळे त्यांचेवर ओव्हर डयुज चार्जेस लावलेले आहेत. हे सामनेवालाने दाखल केलेल्या दस्तावरुन सिध्द होते. तक्रारदाराने कशी रक्कम भरावी याबाबतचे करारनाम्यामध्ये सर्व शर्ती व अटी नमुद केलेल्या आहेत. सदरचा करारानामा तक्रारदार व सामनेवाला नं.2 व 3 यांचेमध्ये झालेला आहे. त्यामुळे ते तक्रारदारावरही बंधनकारक आहे असे मंचाचे मत आहे. सामनेवालाने दाखल केलेले खातेउत-यावरुन तक्रारदाराकडे थकबाकीची रक्कम व ओव्हर डयुज चार्जेस निघतात ही बाब स्पष्ट होते. सदरची रक्कम भरण्यसाठी सामनेवालाने तक्रारदाराला कायदेशिर नोटीस पाठविली होती. सदरचे दस्त प्रकरणात दाखल केलेले आहे. तसेच वकीलामार्फत नोटीस पाठविलेली आहे. मात्र तक्रारदाराने सदरची थकबाकीची रक्कम आणि ओव्हर डयुज चार्जेसची रक्कम सामनेवालाकडे भरलेली नाही. ही बाब दाखल कागदपत्रावरुन स्पष्ट होते. त्यामुळे सदरची तक्रार ही खारीज करण्याचे निष्कर्षाप्रत हे मंच येत आहे. सबब मुद्दा क्र.1 व 2 चे उत्तर नकारार्थी देण्यात येते.
7. मुद्दा क्र.3 – मुद्दा क्र.1 व 2 चे विवेचनावरुन मुद्दा क्र.3 चे उत्तरार्थ खालील प्रमाणे अंतिम आदेश पारीत करण्यात येत आहे.
- अं ति म आ दे श –
1. तक्रारदाराची तक्रार नामंजूर करण्यात येते.
2. उभय पक्षकार यांनी या तक्रारीचा खर्च स्वतः सहन करावा.
3. या आदेशाची प्रथम प्रत उभय पक्षकार यांना निःशुल्क देण्यात यावी.
4. तक्रारदार यांना या प्रकरणाची “ब” व “क” फाईल परत करावी.