द्वारा –  श्रीमती.स्‍नेहा म्‍हात्रे, अध्‍यक्षा

     तक्रारदारातर्फे वकील श्री. अभयकुमार जाधव हजर. सामनेवाले 1 यांचेकरीता वकील श्री.सचिन राजे हजर. सामनेवाले 2 पुकारले असता गैरहजर. सामनेवाले 2 यांनी सदर प्रकरणामध्ये तक्रारदाराच्‍या विलंब माफीच्या अर्जावर त्‍यांचे म्‍हणणे आयोगाच्‍या आवक कक्षात आवक क्र.828 दि.19.09.2022 रोजी दाखल केले असून, तक्रारदार व सामनेवाले 1 यांच्‍या वकीलांचा सदर प्रकरणामध्ये विलंब माफीच्या अर्जावर युक्‍तीवाद दि.13.12.22 रोजी ऐकण्‍यात आला आहे. सदर प्रकरणामध्ये नमूद शेतक-याचा मृत्‍यु दि.15.04.2019 रोजी झाला असून, सामनेवाले यांनी अदयाप सदर प्रकरणामध्ये नमूद विमा दावा बाबतची रक्‍कम तक्रारदारांना दिली नसून त्‍याबाबतचा निर्णय प्रलंबित ठेवला असल्‍याने, तक्रारीचे कारण अदयाप कायम असल्‍याचे तक्रारदार यांचे वकीलांनी नमूद केले. तसेच सदर प्रकरणामध्ये भविष्‍यामध्‍ये कोणत्‍याही तांत्रिक मुदयांमुळे अडचण येऊ नये या हेतुने तक्रारदारांनी सदर प्रकरणामध्‍ये विलंब माफीचा अर्ज दाखल करुन त्‍यामध्‍ये प्रस्‍तूत तक्रार दाखल करण्‍यास 01 वर्ष 02 दिवसांचा विलंब झाला असल्‍याचे नमूद केले आहे व सदर विलंब माफ करण्‍यात यावा अशी प्रार्थना केली आहे. वर नमूद केल्‍या प्रमाणे सदर प्रकरणात नमूद शेतक-याचा मृत्‍यू झाल्‍या पासूनची तारीख विचारात घेतल्‍यास प्रस्‍तूत तक्रार दाखल करण्‍यास मा.सर्वोच्‍च न्‍यायालयाचे SMW/3/2020 मधील विहित मुदतीबाबतच्‍या आदेशाचा विचार केल्‍यास सदर प्रकरणात तक्रार दाखल करण्‍यास विलंब झाल्‍याचे दिसून येत नाही परंतु सदर प्रकरणात तांत्रिक त्रुटी राहू नये याकारणास्‍तव तसेच सदर प्रकरण शेतकरी अपघात विमा योजना बाबतचे असल्‍याने त्‍या मधील सामाजिक हेतु विचारात घेऊन सदर प्रकरणात नमूद विलंब न्‍यायहिताच्‍या दृष्‍टीने माफ करण्‍यात येतो. तक्रारदाराचा विलंब माफीचा अर्ज निकाली काढण्‍यात येतो. पुढील तारीख तक्रार दाखल युक्‍तीवादाकामी तसेच प्रस्‍तूत तक्रारीमध्‍ये उभय पक्षात तडजोडीची शक्‍यता असल्‍यास त्‍याबाबत निवेदन करण्‍यासाठी, तक्रारदार तसेच सामनेवाले यांना लोक अदालती बाबत नोटीस पाठविण्‍यात यावी.त्‍याकामी पु.ने.ता.11/02/2023.