नि.29 मे. जिल्‍हा ग्राहक तक्रार निवारण मंच, सातारा यांचेसमोर तक्रार क्र. 231/2010 नोंदणी तारीख – 1/10/2010 निकाल तारीख – 3/2/2011 निकाल कालावधी – 122 दिवस श्री विजयसिंह दि. देशमुख, अध्‍यक्ष श्रीमती सुचेता मलवाडे, सदस्‍या श्री सुनिल कापसे, सदस्‍य (श्री सुनिल कापसे, सदस्‍य यांनी न्‍यायनिर्णय पारीत केला) ------------------------------------------------------------------------------------ श्री सुनिल शामराव कणसे रा.शेणोली, ता.कराड जि. सातारा ----- अर्जदार ( वकील श्री जे.पी.शिंदे ) विरुध्‍द 1. दी ओरिएन्‍टल इन्‍शुरन्‍स कं.लि.करीता डीव्‍हीजनल मॅनेजर, श्री नरेश कांकरिया, डिव्‍हीजनल ऑफिस, नं.1, 15, ए.डी.कॉम्‍प्‍लेक्‍स, पहिला मजला, माऊंट रोड, सदर, नागपूर 2. दी ओरिएन्‍टल इन्‍शुरन्‍स कं.लि. शाखा सातारा करिता ब्रँच मॅनेजर श्री के.एस.उत्‍तेकर, जीवनतारा बिल्‍डींग, तळमजला, जिल्‍हाधिकारी ऑफिससमोर, ----- जाबदार क्र.1 व 2 सातारा (वकील श्री कालीदास माने) 3. जाईका इन्‍शुरन्‍स ब्रोकरेज प्रा.लि. करीता सी.यजूलू जाईका बिल्‍डींग, सिव्‍हील लाईन्‍स, नागपूर-01 ----- जाबदार क्र.3 (एकतर्फा) 4. पशुवैद्यकीय अधिकारी वर्ग-1, पशुवैद्यकीय दवाखाना, श्रेणी-1, करीता डॉ ए.पी.माळी रा.शेरे, ता.कराड जि. सातारा ----- जाबदार क्र.4 न्‍यायनिर्णय अर्जदार यांनी प्रस्‍तुतचा अर्ज ग्राहक संरक्षण कायदा, 1986 चे कलम 12 नुसार केलेला आहे. अर्जदार यांचे अर्जातील कथन थोडक्‍यात खालीलप्रमाणे - 1. अर्जदार ही मौजे शेणोली ता.कराड येथील कायमचे रहिवासी आहे. अर्जदार यांचा शेती हा व्‍यवसाय असून त्‍याला पूरक दुग्‍ध व्‍यवसाय आहे. अर्जदार यांनी त्‍यांचे मालकीच्‍या मुरा जातीच्‍या म्‍हैशीचा विमा जाबदार यांचेकडे उतरविला आहे. सदरचे पॉलिसीचे कालावधीत अर्जदार यांची संबंधीत म्‍हैस दि. 19/2/2009 जादा रक्‍तस्‍त्राव झाल्‍याने मरण पावली. तदनंतर जाबदार यांचे सूचनेप्रमाणे मृत म्‍हैशीचे शवविच्‍छेदन करण्‍यात आले. सदर म्‍हैशीचे नुकसानीपोटी भरपाई मिळावी म्‍हणून अर्जदार यांनी जाबदार यांचेकडे विमा दावा प्रस्‍ताव म्‍हैशीचे कानातील बिल्‍ला आवश्‍यक त्‍या कागदपत्रांसोबत दाखल केला. परंतु जाबदार यांचेकडून त्‍याबाबत कोणताही प्रतिसाद मिळाला नाही. सबब अर्जदार यांनी वकीलांचे मार्फत नोटीसही पाठविली परंतु तरीही जाबदार यांनी त्‍याबाबत कोणतीही तजवीज केली नाही. सबब म्‍हैशीचे नुकसान भरपाईपोटी विमा दावा रक्‍कम रु.20,000/- व्‍याजासह मिळावेत, मानसिक, शारिरिक त्रासापोटी व अर्जाचे खर्चापोटी रक्‍कम मिळावी म्‍हणून अर्जदार यांनी या मंचासमोर दाद मागितली आहे. 2. जाबदार क्र.1 व 2 यांनी नि.21 कडे म्‍हणणे देऊन तक्रार नाकारली आहे. जाबदार यांचे कथनानुसार महाराष्‍ट्र शासनाचे महाराष्‍ट्र लाईव्‍हस्‍टॉक डेव्‍हलपमेंट बोर्ड, अकोला यांनी व जाईका इन्‍शुरन्‍स ब्रोकरेज प्रा.लि. यांचेबरोबर जाबदार यांनी समझोता करार केला असून सदरचे करारानुसार जनावरांसाठी जाबदार यांचेकडे विमा उतरविण्‍यात आला आहे. त्‍यामध्‍ये अर्जदार यांचे जनावराचा समावेश आहे. सदरचे पॉलिसीची मुलभूत अटीनुसार तसेच समझोता करारातील अट क्र.6 नुसार जर विमा उतरविलेल्‍या जनावराचा मृत्‍यू झाला तर त्‍याचे कानात बसविलेला टॅग हा intact स्‍वरुपात जाबदार यांचेकडे संबंधीत मालकाने सादर करणे आवश्‍यक आहे. सदरचे अटीनुसार अर्जदारने त्‍यांचे संबंधीत जनावराचा मृत्‍यू झालेनंतर कानाच्‍या तुकडयासह टॅग जाबदार यांचेकडे सादर करणे आवश्‍यक होते. परंतु अर्जदार यांनी मृत म्‍हैशीचे कानातील टॅग कानाच्‍या तुकडयासह जाबदार यांना सादर केलेल्‍या नसल्‍याने अर्जदारने पॉलिसीचे अटींचा भंग केलेला आहे. अर्जदारने महाराष्‍ट्र लाईव्‍हस्‍टॉक डेव्‍हलपमेंट बोर्ड यांना व जाईका इन्‍शुरन्‍स ब्रोकरेज प्रा.लि. यांना याकामी पक्षकार म्‍हणून सामील केलेले नाही. सबब जाबदार यांनी सेवा देण्‍यामध्‍ये कोणतीही त्रुटी ठेवलेली नसल्‍याने तक्रारअर्ज फेटाळणेत यावा असे जाबदार क्र.1 व 2 यांनी कथन केले आहे. 3. जाबदार क्र.4 यांनी नि.16 ला लेखी म्‍हणणे दाखल करुन अर्जदारचे तक्रारअर्जातील कथन मान्‍य केले आहे. अर्जदारचे म्‍हैशीचा विमा उतरविण्‍यात आलेला होता व ती आजारी पडलेनंतर तिच्‍यावर उपचार करीत असताना ती म्‍हैस मृत झाली. अर्जदारने अर्जासोबत दाखल केलेली कागदपत्रे खरी आहेत. त्‍यामुळे जाबदार क्र.1 ते 3 कडून अर्जदारचे म्‍हैशीचा क्‍लेम देववावा असे कथन जाबदार क्र.4 यांनी केले आहे. 4. प्रस्‍तुत तक्रारअर्जाचे नोटीसची बजावणी जाबदार क्र.3 यांना झालेली आहे. नोटीस मिळालेची पोचपावती प्रस्‍तुतकामी दाखल आहे. परंतु जाबदार क्र.3 हे या प्रकरणात हजर झालेले नाहीत वा त्‍यांनी त्‍यांचे लेखी म्‍हणणे/कैफियत व शपथपत्र दाखल केलेले नाही. सबब याबाबतचा योग्‍य असा आदेश नि.1 वर पारीत केला आहे. 5. अर्जदारतर्फे वकील श्री शिंदे व जाबदारतर्फे वकील श्री माने यांचा युक्तिवाद ऐकला. तसेच अर्जदार व जाबदार यांनी दाखल केलेली कागदपत्रे पाहिली. 6. प्रस्‍तुतचे कामी प्रामुख्‍याने खालीलप्रमाणे मुद्दे उपस्थित होत आहेत. हे मुद्दे व त्‍यांना दिलेली उत्‍तरे खालीलप्रमाणे आहेत. मुद्दे उत्‍तरे अ) अर्जदार व जाबदार यांचे दरम्‍यान ग्राहक व सेवा देणारे असे नाते आहे काय ? होय. ब) जाबदार यांनी अर्जदार यांना सेवा देण्‍यामध्‍ये कमतरता केली आहे काय ? नाही. क) अंतिम आदेश - खाली दिलेल्‍या कारणास्‍तव अर्जदार यांचा तक्रारअर्ज नामंजूर करणेत येत आहे. कारणे 7. जाबदार यांनी त्‍यांचे कैफियतीमध्‍ये असे कथन केले आहे की, महाराष्‍ट्र शासनाचे महाराष्‍ट्र लाईव्‍हस्‍टॉक डेव्‍हलपमेंट बोर्ड, अकोला यांनी व जाईका इन्‍शुरन्‍स ब्रोकरेज प्रा.लि. यांचेबरोबर जाबदार यांनी केलेल्‍या समझोता करारातील अट क्र.6 नुसार जर विमा उतरविलेल्‍या जनावराचा मृत्‍यू झाला तर संबंधीत विमाधारकाने जाबदार यांचेकडे त्‍यांचे संबंधीत जनावराच्‍या कानाच्‍या तुकडयासह टॅग सादर करणे आवश्‍यक आहे, परंतु अर्जदार यांनी संबंधीत म्‍हैशीचे कानातील टॅग कानाच्‍या तुकडयासह जाबदार यांना सादर केलेला नसल्‍याने अर्जदारने पॉलिसीचे अटींचा व समझोता करारातील अटीचा भंग केलेला आहे. अर्जदार यांनी त्‍यांचे तक्रारअर्जामध्‍ये असे कथन केले आहे की, त्‍यांनी जाबदार यांना म्‍हैशीचे कानातील टॅग सादर केला आहे. परंतु सदरचे कथनाचे पृष्‍ठयर्थ अर्जदार यांनी कोणताही पुरावा दाखल केलेला नाही. अर्जदार यांनी संबंधीत म्‍हैशीचे कानातील टॅग कानाच्‍या तुकडयासह जाबदार यांना सादर केला होता ही बाब पुराव्‍यानिशी सिध्‍द झालेली नाही. जरी जाबदार क्र.4 यांनी त्‍यांचे लेखी म्‍हणणेमध्‍ये अर्जदारची मृत म्‍हैस हीचा विमा उतरविलेला होता व अर्जदारने दाखल केलेली कागदपत्रे सत्‍य आहेत असे कथन केले असले तरी वर नूद समझोता करार व पॉलिसीचे अटी नुसार अर्जदारने म्‍हैशीच्‍या कानातील टॅग कानाच्‍या तुकडयासह जाबदार यांना सादर केला होता ही बाब अर्जदार सिध्‍द करु शकलेले नाहीत. सदरची बाब विचारात घेता वर नमूद समझोता करारातील अट क्र.6 चे तसेच विमा पॉलिसीचे संबंधीत अट क्र.8 चे पालन अर्जदार यांनी केलेले नाही हे स्‍पष्‍टपणे दिसून येते. सबब अर्जदार हे जाबदार यांचेकडून म्‍हैशीचे मृत्‍यूबाबत विमा रक्‍कम मिळणेस पात्र नाहीत असे या मंचाचे मत आहे. वरील बाबींचा विचार करता जाबदार यांनी अर्जदार यांना सेवा देण्‍यामध्‍ये कोणतीही त्रुटी केलेली नाही असे या मंचाचे मत आहे. 8. प्रस्‍तुत तक्रारअर्जाचे कामी जाबदार यांनी तक्रारअर्जदार यांचे नावे उतरविलेल्‍या संबंधीत म्‍हैशीची विमा पॉलिसी नं.एसटीआरए 100735 सादर केलेली आहे. सदरच्‍या पॉलिसीतील अट क्र.9 नुसार यदाकदाचित संबंधीत व्‍यक्‍तीला प्रस्‍तुतच्‍या पॉलिसीअंतर्गत संबंधीत जनावरासाठी विमा रक्‍कम देय झाल्‍यास विमा कंपनी त्‍यांचेकडून देय असलेल्‍या रेटेबल प्रपोर्शनमध्‍ये रक्‍कम देणेस जबाबदार राहतील. अर्थातच मृत जनावराचे विम्‍याची काही रक्‍कम संबंधीत करारास पक्षकार असलेल्‍या महाराष्‍ट्र शासनास द्यावी लागणार आहे. परंतु प्रस्‍तुत कामी समझोता करारातील महत्‍वाचे पक्षकार महाराष्‍ट्र लाईव्‍हस्‍टॉक डेव्‍हलपमेंट बोर्ड यांनी त्‍यांचे लेखी म्‍हणणे/कैफियत दाखल केली नसल्‍याने जरी जाबदार क्र.1 व 2 हे संबंधीत विमा पॉलिसीअंतर्गत अर्जदारास काही रक्‍कम देणे लागत आहे अशा निष्‍कर्षाप्रत हा मंच आला तरी नेमकी किती रक्‍कम देणे जरुर आहे ही बाब निश्चित करता येत नाही. पर्यायाने प्रस्‍तुतचा अर्ज नामंजूर करणे योग्‍य ठरणारे आहे. 9. या सर्व कारणास्‍तव व वर नमूद मुद्दयांच्‍या दिलेल्‍या उत्‍तरास अनुसरुन अर्जदार यांचा तक्रारअर्ज नामंजूर करणेत येत आहे. आदेश 1. अर्जदार यांचा तक्रारअर्ज फेटाळणेत येत आहे. 2. खर्चाबाबत काहीही आदेश करणेत येत नाहीत. 3. सदरचा न्‍यायनिर्णय खुल्‍या न्‍यायमंचात जाहीर करणेत आला. सातारा दि. 3/2/2011 (सुनिल कापसे) (सुचेता मलवाडे) (विजयसिंह दि. देशमुख) सदस्‍य सदस्‍या अध्‍यक्ष
| | Smt. S. A. Malwade, MEMBER | HONABLE MR. Vijaysinh D. Deshmukh, PRESIDENT | Mr. Sunil K Kapse, MEMBER | | 
