புகார்  கோப்புக்கு எடுக்கப்பட்ட நாள்: 03-07-2017 (Chennai South)

                     உத்தரவு  பிறப்பித்த  நாள்   : 06-01-2023  

மாவட்ட  நுகர்வோர்  குறைதீர்  ஆணையம், அரியலூர்.

முன்னிலை  : திரு   டாக்டர் வீ.ராமராஜ்,.எம்.எல்.,பி.எச்.டி.  தலைவர்.

திரு  என்.பாலு.பி..ஏ.பி.எல்.,      உறுப்பினர்.  I

நுகர்வோர் புகார்  எண் (RBT CC No):  102/2022.

            சென்னை, பெரும்பாக்கம், 24வது தெரு, சௌமியா நகர், பிளாட் எண் 13 ஏ-ல் வசிக்கும் கிருஷ்ணமோகன்                                                       -முறையீட்டாளர்

1.         சென்னை, தியாகராய நகர், ரங்கநாதன் தெரு, இலக்கம் 27 -ல் உள்ள ஜெயச்சந்திரன் மஹால் மற்றும் ஜெயச்சந்திரன் டெக்ஸ்டைல்ஸ் உரிமையாளர்/ நிர்வாக இயக்குனர்                              

2.         சென்னை, மேடவாக்கம், பிரதான சாலை, கணேஷ் நகர் பிளாட் எண்கள் 1-3  -ல் உள்ள ஜெயச்சந்திரன் மஹால் மேலாளர்.

3.         சென்னை, ராஜகீழ்பாக்கம், ரங்க காலனி, இலக்கம் 40 -ல் உள்ள தாம்பரம் முதலாவது கோட்டத்தின் 1200 மற்றும் மத்திய கலால் மற்றும் சேவை வரி துணை ஆணையர்                                          - எதிர் தரப்பினர்கள்

01        இந்த  புகாரில் முறையீட்டாளருக்கு அவரே முன்னிலையாகியும் முதலாம்,  இரண்டாம் எதிர்தரப்பினர்களுக்கு திருவாளர்கள் ஆர். காமராஜ், ஜீ. தமிழ் அரசன், வழக்கறிஞர்கள் முன்னிலையாகியும் மூன்றாம் எதிர் தரப்பினர் மீது ஒருதலைப்பட்ச ஆணை பிறப்பிக்கப்பட்டு தோன்றா தரப்பினராக முடிவு செய்யப்படும் இருந்த நிலையில் இந்த ஆணையத்தின்  முன்பாக      21-12-2022 அன்று இறுதியாக  விசாரணை  ஏற்பட்டு இது நாள்  வரையில்   இந்த ஆணையத்தின்    பரிசீலனையில்  இருந்து வந்து, அமலில் உள்ள சட்டத்தின் அடிப்படையிலும் முறையீட்டாளரின் புகார், அவரது சாட்சியம்-01, அவரது சான்றாவணங்கள் – 02, முதலாம்,  இரண்டாம் எதிர் தரப்பினர்களின் பதில் உரை, சாட்சியம்-01, சான்றாவணம் – 03,  வாதங்கள் மற்றும் சமர்ப்பிக்கப்பட்ட முன் தீர்ப்பு நகல்கள் ஆகியவற்றிலுள்ள சங்கதிகளின் அடிப்படையிலும்  இன்று  இவ்வாணையம்   வழங்கும் 

உறுப்பினரின் ஒப்புதலோடு ஆணைய தலைவரால் பிறப்பிக்கப்பட்ட ஆணையுரை

02 நுகர்வோர்பாதுகாப்புசட்டம் 1986, பிரிவு 12-ன்படிமுறையீட்டாளர் எதிர்தரப்பினர்கள் மீது புகார் தாக்கல் செய்து, தாம் முதலாம் மற்றும் இரண்டாம் எதிர் தரப்பினரிடம் செலுத்திய தொகை ரூ 2,58,750/- ஐ முதலாம் மற்றும் இரண்டாம் எதிர்தரப்பினர்கள் தமக்கு திரும்ப வழங்க வேண்டும் என்றும் தாம் செலுத்திய தொகையில் மூன்றாம் எதிர் தரப்பினருக்கு செலுத்தப்பட்ட வரியை வட்டியுடன் திரும்ப வழங்க வேண்டும் என்றும் தமக்கு ஏற்பட்ட மன உளைச்சல் மற்றும் சிரமங்களுக்கு எதிர் தரப்பினர்கள் ரூ 5 லட்சம் இழப்பீடு வழங்க வேண்டும்  என்றும் முறையீட்டாளர் இந்த ஆணையத்தை அணுகியுள்ளார்.

முறையீட்டாளர் தாக்கல் செய்துள்ள புகாரின் சுருக்கம் பின்வருமாறு:

03.       கடந்த 19-09-2016 அன்று ரூ 2,58,750/- செலுத்தி 02-02-2017, 03-02-2017 & 04-02-2017 ஆகிய தேதிகளில் நடக்க திட்டமிட்ட தனது மகளின் திருமணத்துக்கு முதலாம் மற்றும் இரண்டாம் எதிர் தரப்பினரின் சென்னையில் உள்ளஜெயச்சந்திரன் மகாலை பதிவு செய்தேன் என்றும் இதில் ரூ 2,25,000/- மண்டபத்திற்கான வாடகை என்றும் ரூ 33,750/- மத்திய கலால் மற்றும் சேவை வரிக்காக தன்னிடமிருந்து பெறப்பட்டது என்றும் தவிர்க்க இயலாத சூழ்நிலை காரணமாக மேற்படி திருமணத்தை ரத்து செய்ய வேண்டிய நிலை ஏற்பட்டதால் கடந்த 12-12-2016 ஆம் தேதி எதிர் தரப்பினரிடம் தாம் முன்பதிவு செய்ததை ரத்து செய்து தமக்கு வேறு ஒரு நாளில் மண்டபத்தை வழங்குமாறு அல்லது தாம் செலுத்திய மேற்படி தொகையை திரும்ப வழங்குமாறு கேட்டேன் என்றும் இரண்டாம் எதிர் தரப்பினரிடம் கடிதம் வழங்கினேன் என்றும் ஆனால் இதற்கு முதலாம் மற்றும் இரண்டாம் எதிர்த் தரப்பினர்கள் ஒப்புக்கொள்ளவில்லை என்றும் மண்டபத்தை உபயோகிக்காமல் சேவை வரியையும் எதிர் தரப்பினர்கள் தமக்கு திரும்ப வழங்கவில்லை என்றும் எதிர் தரப்பினர்களின் இத்தகைய செய்கைகள் நியாயமற்ற வர்த்தக நடைமுறை என்றும் இதனால் எதிர் தரப்பினர்களுக்கு எவ்வித சிரமமும் ஏற்படவில்லை என்றும் இதனால் தமக்கு மன உளைச்சலும் இழப்பும் ஏற்பட்டுள்ளது என்றும் இன்னும் பல சங்கதிகளை முறையீட்டாளர் தனது புகாரில் தெரிவித்துள்ளார்.

04.       எனவே, தாம் முதலாம் மற்றும் இரண்டாம் எதிர் தரப்பினரிடம் செலுத்திய தொகை ரூ 2,58,750/- ஐ முதலாம் மற்றும் இரண்டாம் எதிர்தரப்பினர்கள் தமக்கு திரும்ப வழங்க வேண்டும் என்றும் தாம் செலுத்திய தொகையில் மூன்றாம் எதிர் தரப்பினருக்கு செலுத்தப்பட்ட வரியை வட்டியுடன் திரும்ப வழங்க வேண்டும் என்றும் தமக்கு ஏற்பட்ட மன உளைச்சல் மற்றும் சிரமங்களுக்கு எதிர் தரப்பினர்கள் ரூ 5 லட்சம் இழப்பீடு வழங்க வேண்டும்  என்றும் தமது புகாரில் முறையீட்டாளர் தெரிவித்துள்ளார்.

முதலாம்,  இரண்டாம் எதிர் தரப்பினர்களின் தாக்கல் செய்துள்ள பதில் உரையின் சுருக்கம் பின்வருமாறு:

05.       முறையீட்டாளர் தாக்கல் செய்துள்ள புகாரில் சொல்லப்பட்டுள்ள குற்றச்சாட்டுகள் தவறானவை என்றும் இங்கு வெளிப்படையாக தங்களால் ஒப்புக்கொள்ளப்படும் சங்கதிகளை தவிர மற்றவற்றை முறையீட்டாளர் நிரூபிக்க கடமைப்பட்டவர் என்றும் எதிர்தரப்பினர் தமது உரையில் தெரிவித்துள்ளார்கள்.

06.       முறையீட்டாளர் புகாரில் கூறியுள்ளபடி முறையீட்டாளர் கடந்த 19-09-2016 அன்று ரூ 2,58,750/- செலுத்தி 02-02-2017, 03-02-2017 & 04-02-2017ஆகிய தேதிகளில் நடக்க திட்டமிட்ட தனது மகளின் திருமணத்துக்கு திருமண மண்டபத்தை முன்பதிவு செய்தது உண்மை என்றும் முறையீட்டாளர் தங்களது திருமண மண்டபத்தை வாடகைக்கு முன் பதிவு செய்தபோது ஒப்பந்தத்தில் கையொப்பம் செய்துள்ளார் என்றும் அந்த ஒப்பந்தத்தில் உள்ள விதி எண் 17 -ன் படி முன்பதிவு ரத்து செய்யப்பட்டால் செலுத்தப்பட்ட தொகை திரும்ப வழங்கப்படமாட்டாது என்றும் மேற்படி விதிகளின்படி முறையீட்டாளரின் கோரிக்கை நிராகரிக்கப்பட்டு   ஒப்பந்தப்படி அவர் செலுத்திய பணம் திரும்ப பெறுவதற்கு வழங்கப்படமாட்டாது என்றும் அவர் முன்பதிவு செய்து இருந்த நாட்களில் வேறு எந்த நபருக்கும் தாங்கள் திருமண மண்டபத்தை வாடகைக்கு விடவில்லை என்றும் முன்பதிவு செய்து ரத்து செய்வதால் தங்களுக்கு பெருத்த பொருளாதார இழப்பு ஏற்படும் என்பதால் பணத்தை திரும்ப வழங்குவதில்லை என்றும் தங்கள் தரப்பில் எவ்வித நியாயமற்ற வர்த்தக நடைமுறை, சேவை குறைபாடும் ஏற்படவில்லை என்றும் முறையீட்டாளரின் புகார் தள்ளுபடி செய்ய வேண்டியது என்றும் இன்னும் பிற விவரங்களை தெரிவித்தும் எதிர்த் தரப்பினர் தங்கள் பதில் உரையை தாக்கல் செய்துள்ளார்.

07.  தீர்மானிக்க வேண்டிய எழு வினாகள்:

            1)  முறையீட்டாளர்  கூறுவது  போல்  எதிர் தரப்பினர்கள்   நியாயமற்ற வர்த்தக நடைமுறை, சேவை   குறைபாடு   புரிந்து உள்ளாரா?

            2)         எதிர் தரப்பினர்கள், சேவை குறைபாடு புரிந்துள்ளார் எனில் முறையீட்டாளர் கேட்கும் பரிகாரம் வழங்கப்பட வேண்டுமா? முறையீட்டாளருக்கு இழப்பீடு வழங்கப்பட வேண்டுமா?  ஆம் எனில் எவ்வளவு தொகை வழங்கப்பட வேண்டும்?

            3)         இம் முறையீட்டாளர்  பெற தக்க இதர பரிகாரங்கள்  என்ன?

எழு வினா எண் – 1

08.       முறையீட்டாளர் புகாரில் கூறியுள்ளபடி முறையீட்டாளர் கடந்த 19-09-2016 அன்று ரூ 2,58,750/- செலுத்தி 02-02-2017, 03-02-2017 & 04-02-2017ஆகிய தேதிகளில் நடக்க திட்டமிட்ட தனது மகளின் திருமணத்துக்கு திருமண மண்டபத்தை முன்பதிவு செய்தார் என்பதை முதலாம்,  இரண்டாம் எதிர் தரப்பினர்கள் ஒப்புக்கொண்டுள்ளார்கள். இந்நிலையில் முறையீட்டாளர் முதலாம்,  இரண்டாம் எதிர் தரப்பினரின் நுகர்வோர் என்பது ஒப்புக்கொள்ளப்பட்ட  சங்கதி ஆகும். முதலாம் மற்றும் இரண்டாம் எதிர் தரப்பினர்களுக்கு வாடகை தொகையுடன் மத்திய கலால் மற்றும் சேவை வரியை தாம் செலுத்தியதாக முறையீட்டாளர் கூறும் நிலையில் அதனை முதலாம் இரண்டாம் எதிர்த் தரப்பினர்கள் மூன்றாம் எதிர் தரப்பினருக்கு செலுத்தினார் என்பதை நிரூபிக்க முறையீட்டாளர் எவ்வித ஆதாரங்களையும் வழங்கவில்லை. எவ்வாறு இருப்பினும் முறையீட்டாளர் நேரடியாக மூன்றாம் எதிர் தரப்பினரின் நுகர்வோராக இல்லை என்றும் இதனால் மூன்றாம் எதிர்தரப்பினர் மீது மீதான புகார் தள்ளுபடி செய்ய வேண்டியது என்றும் இந்த ஆணையம் தீர்மானிக்கிறது.

9.         முறையீட்டாளர் முதலாம் மற்றும் இரண்டாம் எதிர் தரப்பினரின் மண்டபத்தை முன்பதிவு செய்து பின்னர் மூன்று மாதங்கள் கழித்துதான் ரத்து செய்துள்ளார் என்பதும் இவ்வாறு ரத்து செய்ய தெரிவித்து அவர் வழங்கிய கடிதத்தில் தமக்கு பின்னர் மண்டபத்தில் முன்பதிவு செய்யாத நாட்களில் தமது நிகழ்ச்சிக்கு மண்டபத்தை வழங்குமாறு மட்டும்தான் கேட்டுக் கொண்டுள்ளார் என்பதை முறையீட்டாளரின் இரண்டாவது சான்றாவணம் மூலம் அறிய முடிகிறது.  மாறாக, புகாரில் பணத்தை திரும்ப தருமாறும் அல்லது பின்னர் மண்டபத்தில் முன்பதிவு செய்யாத நாட்களில் தமது நிகழ்ச்சிக்கு வந்த மண்டபத்தை வழங்குமாறும் கேட்டதாக தெரிவித்துள்ளது தவறானதாகும்.

10.       முறையீட்டாளர் தங்களது திருமண மண்டபத்தை வாடகைக்கு முன் பதிவு செய்தபோது ஒப்பந்தத்தில் கையொப்பம் செய்துள்ளார் என்றும் அந்த ஒப்பந்தத்தில் உள்ள விதி எண் 17 -ன் படி முன்பதிவு ரத்து செய்யப்பட்டால் செலுத்தப்பட்ட தொகை திரும்ப வழங்கப்படமாட்டாது என உள்ளது என்றும் முதலாம் மற்றும் இரண்டாம் எதிர் தரப்பினர்கள் தங்கள் பதில் உரையில் தெரிவித்துள்ளார்கள். இதற்கு ஆதாரமாக அவர்களது இரண்டாவது சான்றாவணம் விளங்குகிறது. இந்த ஆவணத்தில் முதலாம் மற்றும் இரண்டாம் எதிர்தரப்பினர்களின் சார்பில் கையொப்பம் செய்யப்படவில்லை என்பதை அறிய முடிகிறது.  திருமண மண்டபத்தை முன்பதிவு செய்துவிட்டு ரத்து செய்தால் செலுத்திய முழு பணத்தையும் திரும்ப வழங்க முடியாது என்ற நிபந்தனைகள் அடங்கிய ஒப்பந்தம் என்பதை நுகர்வோர் பாதுகாப்புச் சட்டம், 2019, பிரிவு 2 (46)-ல் சொல்லப்பட்டுள்ளபடி நியாயமற்ற ஒப்பந்தம் என்று இந்த ஆணையம் தீர்மானிக்கிறது. அதே சமயத்தில் மண்டபத்தை முன்பதிவு செய்து விட்டு மூன்று மாதங்கள் கழித்து ரத்து செய்யும் சூழ்நிலையில் முழு பணத்தையும் திரும்ப வழங்க முடியாது என்றே இந்த ஆணையம் கருதுகிறது. மேலும் முறையீட்டாளர் முதல் இரண்டாம் எதிர் தரப்பினருக்கு வழங்கிய கடிதத்தில் தாம் செலுத்திய பணத்தை திரும்ப கேட்கவில்லை என்பதையும் இந்த ஆணையம் கருத்தில் கொள்கிறது.   மேலும் எதிர்தரப்பினர் முறையீட்டாளர் தங்களது திருமண மண்டபத்தை வாடகைக்கு முன் பதிவு செய்த நாட்களில் தாங்கள் யாருக்கும் மண்டபத்தை வாடகைக்கு விடவில்லை எனகூறும் நிலையில் திருமண மண்டப முன்பதிவு பதிவேட்டை மேற்படி கூற்றை நிரூபிக்கும் வகையில் இந்த ஆணையத்தின் முன்பு சமர்ப்பிக்கவில்லை.

11.       மேற்படி காரணங்களால் முதலாம் மற்றும் இரண்டாம் எதிர் தரப்பினர்கள் நியாயமற்ற வர்த்தக நடைமுறையை பின்பற்றி உள்ளார்கள் என்றும் அதே சமயத்தில் முறையீட்டாளர் உண்மையான விவரங்களை முழுமையாக தெரிவித்து புகார் தாக்கல் செய்யவில்லை என்றும் இந்த ஆணையம் தீர்மானிக்கிறது.

எழு வினா எண் – 2 

12.       முதலாவது எழு வினாவை தீர்மானிக்கும் போது முதலாம் மற்றும் இரண்டாம் எதிர் தரப்பினர்கள் நியாயமற்ற வர்த்தக நடைமுறையை பின்பற்றி உள்ளார்கள் என்றும் அதே சமயத்தில் முறையீட்டாளர் உண்மையான விவரங்களை முழுமையாக தெரிவித்து புகார் தாக்கல் செய்யவில்லை என்றும் முடிவு மேற்கொள்ளப்பட்ட நிலையில் முறையீட்டாளருக்கு எவ்வித எவ்வளவு தொகை திரும்ப முதலாம் மற்றும் இரண்டாம் எதிர் தரப்பினர்கள் அளிக்க வேண்டும் என்பதை ஆய்வு செய்ய வேண்டியுள்ளது.  பொதுவாக இத்தகைய முன் பதிவுகளை ரத்து செய்து முன் பணத்தை திரும்ப கேட்கின்ற போது எவ்வளவு நாட்களில் முன்பதிவு ரத்து செய்யப்பட்டால் எவ்வளவு ரத்து கட்டணம் கழித்துக்கொண்டு முன்பதிவு பணம் திரும்ப வழங்கப்படும் என்ற விதிமுறைகள் இருக்க வேண்டும்.  ரயில் பயணச்சீட்டு முன்பதிவை ரத்து செய்கிறபோது குறிப்பிட்ட காலத்திற்கு முன்பாக ரத்து செய்தால் எவ்வளவு தொகை திரும்ப வழங்கப்படும் என்பது பல்வேறு பிரிவுகளாக பிரித்து நிர்ணயம் செய்யப்பட்டுள்ளது. அதைப்போல எதிர் தரப்பினரின் திருமண மண்டபத்தை முன்பதிவு செய்த பின்பு எவ்வளவு நாட்களுக்கு முன்பு ரத்து செய்தால் எவ்வளவு தொகை திரும்ப வழங்கப்படும் என்ற விதிமுறைகள் இருக்க வேண்டியது அவசியமாகும். மாறாக முன்பதிவை ரத்து செய்தால் மொத்த பணமும் திரும்ப வழங்கப்படமாட்டாது என்று கூறுவது ஏற்புடையதாக இல்லை.

13.       உதாரணமாக ஒரு மண்டபத்தை முன்பதிவு தேதிக்கு 6 மாதங்களுக்கு முன்பாக ரத்து செய்தால் 10 சதவீத ரத்து கட்டணம், 5 மாதங்களுக்கு முன்பு ரத்து செய்தால் 20 சதவீத ரத்து கட்டணம், 4 மாதங்களுக்கு முன்பு ரத்து செய்தால் 30 சதவீத ரத்து கட்டணம், 3 மாதங்களுக்கு முன்பு பதிவு செய்து ரத்து செய்தால் 40 சதவீத ரத்து கட்டணம், 2 மாதங்களுக்கு முன்பு ரத்து செய்தால் 50 சதவீத கட்டணம், ஒரு மாதத்திற்கு முன்பு, 2 மாதங்களுக்குள், ரத்து செய்தால் 80 சதவீத கட்டணம் என்றும் ஒரு மாத காலத்திற்கு உள்ளாக ரத்து செய்தால் 90 சதவீத கட்டணம் என்றும் நிர்ணயம் செய்வது சரியானதாக இருக்கும் என்று இந்த ஆணையம் கருதுகிறது.

14.       திருமண மண்டபத்தை முன்பதிவு செய்துவிட்டு ரத்து செய்துள்ள இந்த வழக்கின் தன்மைகளை ஆய்வு செய்து பார்க்கும்போது முன்பண தொகையில் 80 % பிடித்தம் செய்து கொண்டு முதலாம் மற்றும் இரண்டாம் எதிர் தரப்பினர்கள் மீத தொகையை முறையீட்டாளருக்கு வழங்க வேண்டுமென்று அதாவது ரூ 45,000/-முறையீட்டாளருக்கு முதலாம் மற்றும் இரண்டாம் எதிர் தரப்பினர்கள் இந்த ஆணை கிடைக்கப்பெற்ற நான்கு வார காலத்திற்குள் திருப்பி வழங்க வேண்டும் என்றும் தவறினால் 06-01-2023  தேதி முதல் ரூ 100க்கு ஆண்டொன்றுக்கு 6 சதவீத வட்டி கணக்கிட்டு ரூ 45,000/- தொகையுடன் முறையீட்டாளருக்கு முதலாம் மற்றும் இரண்டாம் எதிர் தரப்பினர்கள் வழங்க வேண்டும் என்றும் இந்த ஆணையம் தீர்மானிக்கிறது. மேலும் மண்டபம் உபயோகப்படுத்தப்படாத நிலையில் முதலாம் மற்றும் இரண்டாம் எதிர்தரப்பினரிடம் முறையீட்டாளர் செலுத்திய மத்திய கலால் மற்றும் சேவை வரி ரூ  33,750/- ஐ முறையீட்டாளருக்கு முதலாம் மற்றும் இரண்டாம் எதிர் தரப்பினர்கள் இந்த ஆணை கிடைக்கப்பெற்ற நான்கு வார காலத்திற்குள் திருப்பி வழங்க வேண்டும் என்றும் இந்த ஆணையம் தீர்மானிக்கிறது. எவ்வித இழப்பீடும் வழங்க வேண்டியதில்லை என்றும் இந்த ஆணையம் தக்கது என கருதும் இதர பரிகாரங்கள் எதுவும் இல்லை என்றும் வழக்கின் செலவு தொகையை அவரவர்களே ஏற்றுக்கொள்ள வேண்டும் என்றும் இந்த ஆணையம் தீர்மானிக்கிறது.

இறுதியாக கீழ்க்கண்ட ஆணைகளை இந்த ஆணையம் பிறப்பிக்கிறது.

01.       முன்பண தொகையில் 80 % பிடித்தம் செய்து கொண்டு முதலாம் மற்றும் இரண்டாம் எதிர் தரப்பினர்கள் மீத தொகை  ரூ 45,000/-, முறையீட்டாளருக்கு முதலாம் மற்றும் இரண்டாம் எதிர் தரப்பினர்கள் இந்த ஆணை கிடைக்கப்பெற்ற நான்கு வார காலத்திற்குள் திருப்பி வழங்க வேண்டும். தவறினால் 06-01-2023  தேதி முதல் ரூ 100க்கு ஆண்டொன்றுக்கு 6 சதவீத வட்டி கணக்கிட்டு ரூ 45,000/- தொகையுடன் முறையீட்டாளருக்கு முதலாம் மற்றும் இரண்டாம் எதிர் தரப்பினர்கள் வழங்க வேண்டும்.

02.       மண்டபம் உபயோகப்படுத்தப்படாத நிலையில் முதலாம் மற்றும் இரண்டாம் எதிர்தரப்பினரிடம் முறையீட்டாளர் செலுத்திய மத்திய கலால் மற்றும் சேவை வரி ரூ  33,750/- ஐ முறையீட்டாளருக்கு முதலாம் மற்றும் இரண்டாம் எதிர் தரப்பினர்கள் இந்த ஆணை கிடைக்கப்பெற்ற நான்கு வார காலத்திற்குள் திருப்பி வழங்க வேண்டும்.

03.       மூன்றாம் எதிர்தரப்பினர் மீதான புகார் தள்ளுபடி செய்யப்படுகிறது.

04.       புகாரில் உள்ள தரப்பினர்கள் அவரவர் வழக்கு செலவு தொகைகளை அவரவர்களே ஏற்றுக்கொள்ள வேண்டும். வேறு எந்த பரிகாரங்களும் இல்லை

            இவ்வாணை    சுருக்கெழுத்தாளருக்கு  சொல்ல அவரால்  கணினியில்  தட்டச்சு   செய்து திருத்தப்பட்டு  இந்த  ஆணையத்தில்  இன்று  06-01-2023   ஆம்  நாளன்று பகரப்பட்டது.

                                                                                    தலைவர்.    

                                                                                    உறுப்பினர் – I

முறையீட்டாளர்  தரப்பு சான்றாவணங்கள்:

முதலாம்,  இரண்டாம் எதிர்தரப்பினர்கள் தரப்பு சான்றாவணங்கள்:

முறையீட்டாளர்   தரப்பு  சாட்சி:  திரு கிருஷ்ணமோகன்

1 & 2 எதிர்தரப்பினர்கள் சாட்சி:  திரு சொக்கலிங்கம் பாண்டியன்                                                  

                                                                                    தலைவர்.

                                                                                    உறுப்பினர் – I