निकालपत्र
(द्वारा मा.अध्यक्ष : श्री.विजय चंद्रलाल प्रेमचंदानी)
___________________________________________________________
१. तक्रारदाराने ग्राहक संरक्षण कायदा १९८६ कलम १२ प्रमाणे सदर तक्रार दाखल केलेली आहे.
२. तक्रारदाराची तक्रार थोडक्यात अशी की, तक्रारदार यांनी तीन चाकी अॅपे माल वाहतुक टॅम्पोची मुळ किंमत रूपये १,८०,६००/-, इन्शुरन्स रुपये ८,०००/-, आर.टी.ओ. टॅक्स व हॅन्डलींग चार्जेस रूपये १५,७००/- असे एकुण मिळुन रक्कम रूपये २,०४,३००/- असे सामनेवालेने स्विकारून सामनेवाले क्र.१ कडुन खरेदी केली. सदर वाहन व्यवसाय करण्यासाठी गाडीची बॉडी तयार करणे गरजेचे होते, म्हणुन बॉडी तयार केल्यास आर.टी.ओ. पासिंग करण्यास अडचण येण्याची शक्यता सामनेवाले क्र.१ च्या लक्षात आणुन दिली. सामनेवाले क्र.१ ने सदर गाडीचे पासिंग करून देऊ, असे सांगितले व वारंवार पाठपुरावा करुनसुध्दा त्यांनी गाडीचे पासिंग करून दिले नाही व फोनवर फक्त MH16-AY-6963 हा नंबर तक्रारदाराच्या गाडीचा मिळालेला आहे, असे कळविले. त्याप्रमाणे तक्रारदाराने सदर गाडीचे पेपर बॅंकेत जमा करण्यासाठी गेले असतांना तुम्ही नंबर चुकीचा टाकला आहे व नंबर MH16-AY-5963 असा सुधारुन घ्यावा, असे सांगितले. सदर सुधारणा झाल्यानंतर तक्रारदाराच्या गाडीचे फायनान्स करता आले नाही व सामनेवाले क्र.२ यांचे कर्मचारी श्री.बैरागी यांनी दिनांक ०४-११-२०१६ रोजी फोन करून तक्रारदाराला सांगितले की, तक्रारदाराच्या गाडीचा नंबर फ्रॉड आहे व सामनेवाले क्र.१ यांनी तक्रारदाराच्या गाडीचे पासींग केलेले नाही. सदर नंबरची पडताळणी करतांना असे दिसुन आले की, आर.टी.ओ. कार्यालयाकडे तो नंबर युवराज बाळासाहेब टेमकर, पाथर्डी यांच्या बोलेरो गाडीचा आहे. सामनेवाले क्र.१ व २ यांनी तक्रारदाराची फसवणुक केली व नोंदणीकरीता रक्कम स्विकारूनही त्यांनी तक्रारदाराच्या वाहनाची आर.टी.ओ.कडे नोंदणी करून दिली नाही. म्हणुन सदर तक्रार नुकसान भरपाई मिळणेसाठी दाखल केली आहे.
३. तक्रारदाराने अशी मागणी केली आहे की, तक्रारदाराला प्रतिमहा रूपये १५,०००/- चे नुकसान झालेले आहे. तसेच तक्रारदाराला इन्शुरन्स आणि अधिकची रक्कम अशी एकुण रक्कम रूपये २,८४,७९०/- नुकसान झालेले असुन त्यांना शारीरीक व मानसीक त्रास सहन करावा लागला आहे. म्हणुन सदरची नुकसान भरपाई मिळावी, अशी विनंती तक्रारदार यांनी केली आहे.
४. तक्रारदाराची तक्रार स्विकृत करून सामनेवाले यांना नोटीस काढण्यात आली. सामनेवाले क्र.१ प्रकरणात हजर झाले नाही, म्हणुन त्यांच्याविरूध्द प्रकरण एकतर्फा चालविण्याचा आदेश पारीत करण्यात आला. सामनेवाले क्र.२ प्रकरणात हजर झाले व नि.१२ वर त्यांची कैफीयत दाखल केली. सामनेवाले यांनी असे कथन केले आहे की, तक्रारदाराने सामनेवाले क्र.२ विरुध्द लावलेले तक्रारीतील आरोप खोटे असुन त्यांनी नाकारले आहे. सामनेवाले क्र.२ ने पुढे असे कथन केले की, सामनेवाले क्र.२ हे पियागो कंपनीचे अधिकृत विक्रेते आहे. सामनेवाले क्र.२ यांनी तक्रारदारास टेंम्पररी रजिस्ट्रेशन पेपर व इन्शुरन्स दिनांक २८-०७-२०१५ रोजी दिला. त्यावेळी तक्रारदार यांनी असे सांगितले की, मी स्वतः गाडी पासींग करुन घेतो व त्यांनी तसे न करता खोटी तक्रार दाखल केली आहे. तक्रारदार यांचा संपुर्ण व्यवहार हा सामनेवाले क्र.१ बरोबर झालेला होता. श्री. बैरागी हे भन्साळी ऑटोमोटीव्हचे कर्मचारी नाहीत ते प्रवरा बॅंकेचे कर्मचारी आहेत. तक्रारदाराच्या गाडीचा नवीन नंबर हा सामनेवाले क्र.१ यांनी दिलेला आहे. प्रवरा बॅंकेने सामनेवाले क्र.२ यांना डी.डी. दिल्यानंतर लगेच सामनेवाले क्र.२ यांनी सर्व पेपर्स व पासिंगसाठी असलेले कागदपत्र तक्रारदाराला दिलेले होते. सामनेवाले क्र.२ यांनी तक्रारदाराप्रती कोणतीही सेवेत त्रुटी अथवा अनुचीत व्यापारी प्रथेचा अवलंब केलेला नाही. सामनेवाले क्र.२ यांच्याविरूध्दची तक्रार खर्चासह रद्द करण्यात यावी, अशी विनंती सामनेवाले क्र.२ यांनी केली आहे.
५. तक्रारदाराने दाखल केलेली तक्रार, दस्तऐवज, सामनेवाले क्र.२ ने दाखल केलेले कैफीयत, उभयपक्षांनी दाखल केलेले शपथपत्र, लेखी व तोंडी युक्तिवाद ऐकुन खालील मुद्दे विचारात घेण्यात येतात.
अ.नं. | मुद्दे | निष्कर्ष |
(१) | तक्रारदार हे सामनेवाले क्र.१ व २ यांचे ग्राहक आहेत काय ? | होय |
(२) | सामनेवाले क्र.२ ने तक्रारदाप्रती न्युनतम सेवा दिली आहे काय ? | नाही |
(३) | सामनेवाले क्र.१ ने तक्रारदाप्रती न्युनतम सेवा दिली आहे काय ? | होय |
(३) | आदेश काय | अंतिम आदेशा प्रमाणे |
कारणमिमांसा
६. मुद्दा क्र. (१) : तक्रारदार यांनी सामनेवाले व्यावहार करून तीन चाकी अॅपे माल वाहतुक टॅम्पोची गाडी खरेदी केली व सदर गाडीचे कागदपत्र व टेंम्पररी रजिस्ट्रेशन पेपर सामनेवाले क्र.२ यांनी तक्रारदाराला दिले, ही बाब उभ्यपक्षांना मान्य असून, यावरून तक्रारदर हे सामनेवाले क्र.१ व २ चे ग्राहक आहेत हे सिध्द होते. म्हणुन मुद्दा क्र.१ चे उत्तर होकारार्थी नोंदविण्यात येत आहे.
७. मुद्दा क्र. (२) : सामनेवाले क्र.२ यांनी तक्रारदाराला सर्व पासिंगचे आवश्यक असलेले कागदपत्र तक्रारदाराला दिनांक २८-०६-२०१५ रोजी दिले, ही बाब सामनेवाले क्र.२ चे शपथपत्र पुराव्यावरून सिध्द होते. तसेच तक्रारदाराने सामनेवाले क्र.२ यांच्याकडे वादातील वाहनाचे पासिंगकरीता कोणतीही रक्कम दिली नाही. यावरून सामनेवाले क्र.२ यांनी तक्रारदाराला कोणतीही सेवेत त्रुटी दिली नाही, असे सिध्द होते. म्हणुन मुद्दा क्र.२ चे उत्तर नकारार्थी नोंदविण्यात येत आहे.
८. मुद्दा क्र. (३) : सामनेवाले क्र.१ यांनी तक्रारदारासोबत वादातील वाहनाचा व्यवहार केला होता व त्याकरीता त्यांनी आर.टी.ओ. टॅक्स, इन्शुरन्स व हॅन्डलींग चार्जेस स्विकृत केलेले होते. तसेच पासींग फी स्विकारली होती, ही बाब तक्रारदाराने दाखल निशाणी क्रमांक ३ वरील दाखल केलेली पावती व दस्तऐवजावरून सिध्द होते. सामनेवाले क्रमांक १ यांना नोटीस पाठवुन प्रकरणात हजर झाले नाही व त्यांनी त्यांची बाजु मांडलेली नाही. तक्रारदाराने सामनेवाले क्र.१ विरूध्द लावलेले आरोप शपथपत्र व दस्तऐवजावरून सिध्द होत आहे. सामनेवाले क्र.१ यांनी आर.टी.ओ. टॅक्स व हॅन्डलींग चार्जेस स्विकारून तक्रारदाराला वाहनाची नोंदणी आर.टी.ओ. मध्ये करून दिली नाही, म्हणुन सामनेवाले क्र.१ ने तक्रारदाराप्रती न्युनतम सेवा दिली आहे, असे सिध्द होते. म्हणुन मुद्दा क्र.३ चे उत्तर होकारार्थी नोंदविण्यात येत आहे.
९. मुद्दा क्र. (४) : मुद्दा क्र.१ ते ३ चे विवेचनावरून आम्ही खालीलप्रमाणे आदेश पारीत करीत आहोत.
आदेश
१. तक्रारकर्ताची तक्रार अंशतः मंजुर करण्यात येत आहे. २. तक्रारदार यांच्या वाहनाची नोंदणी करण्याकरीता रक्कम स्विकारूनसुध्दा सामनेवाले क्रमांक १ ने नोंदणी केली नाही, म्हणुन तक्रारदाराचे आर्थिक नुकसान झाले म्हणुन सामनेवाले क्र.१ ने तक्रारदाराला रक्कम रूपये ५०,०००/- (रूपये पन्नास हजार) नुकसान भरपाई, तसेच तक्रारीचा खर्च रूपये २०,०००/- (रूपये वीस हजार) द्यावा. ३. सामनेवाले क्रमांक २ चे विरुध्द तक्रार खारीज करण्यात येत आहे. ४. सामनेवाले क्रमांक १ ने वर नमूद आदेशाची पुर्तता आदेशाची प्रत मिळण्यापासून ३० दिवसाच्या आत करावी. ५. या आदेशाची प्रथम प्रत उभय पक्षकार यांना नि:शुल्क देण्यात यावी. ६. तक्रारकर्ता यांना या प्रकरणाची ‘’ब’’ व ‘’क’’ फाईल परत करावी. |