तक्रारदार क्रमांक 1 राजन शर्मा त्‍यांच्या वकीलांसह हजर. त्‍यांनी तक्रार एकतर्फा चालविण्‍याचा आदेश झाल्‍याने आज रोजी पुराव्‍याचे प्रतिज्ञापत्र दाखल केले. त्‍यातील मजकुराची छाननी करतांना जेव्‍हा या मंचाने तक्रारदार डॉ. राजन शर्मा यांचेकडे विचारणा केली असता त्‍यांनी सांगितले की, सदनिका क्रमांक 401, सी विंग, 4था मजला, क्षेत्रफळ 918 चौरस फूट ही     रेसिडेन्‍सी, चिपळे, ता. पनवेल, जि. रायगड येथे असून तिची एकूण किंमत रक्‍कम रुपये 28,00,000/- असल्‍याचे चौकशी दरम्‍यान सांगितले, त्‍याबाबतीत त्‍यांनी प्रतिज्ञापत्रात नोंद केली. अशी वस्‍तुस्थिती असतांनाही तक्रारदाराचे वकील श्री. विजय शिंदे, श्रीमती सरला शिंदे व श्रीमती शर्मिला यांनी वादातीत सदनिकेची एकूण किंमत रक्‍कम रुपये 10,00,000/- असल्‍याचे तक्रारीत नमूद करुन उभय तक्रारदार व या न्‍याय मंचाची दिशाभूल करुन तक्रार दिनांक 24/07/2018 रोजी स्विकृत केली असल्‍याचे आढळून आले. सबब तक्रारदार स्‍वतः जे वैद्यकिय अधिकारी आहेत, त्‍यांनी या मंचाला पुराव्‍याचे प्रतिज्ञापत्रा बाबतीत चौकशी करतांना सदनिकेची एकूण किंमत 28,00,000/- असल्‍याचे सांगितले तेव्‍हा त्‍याबाबतची दखल घेऊन तक्रार मा. राज्‍य आयोगाकडे दाखल करणेकामी परत देण्‍याशिवाय दुसरा पर्याय नाही. तसेच तक्रारदाराने त्‍याबाबतीत अर्ज न दिल्‍यास तक्रार चालविण्‍याचे आर्थिक अधिकार या न्‍याय मंचास नसल्‍याने वरील कारणास्‍तव सदर तक्रार रद्द करण्‍याशिवाय दुसरा पर्याय नाही. तक्रारदाराने तक्रार मा. राज्‍य आयोगाकडे दाखल करण्‍यासाठी अर्ज दिल्‍याने तक्रार या मंचाच्‍या वादसूचीवरुन रद्द करण्‍यात आली. सबब तक्रारीचे कागदपत्र परत देण्‍यात आले.