नि. 23 मे. जिल्‍हा ग्राहक तक्रार निवारण मंच, सातारा यांचेसमोर तक्रार क्र. 133/2010 नोंदणी तारीख – 6/5/2010 निकाल तारीख – 3/8/2010 निकाल कालावधी – 87 दिवस श्री विजयसिंह दि. देशमुख, अध्‍यक्ष श्रीमती सुचेता मलवाडे, सदस्‍या श्री सुनिल कापसे, सदस्‍य (श्री विजयसिंह दि. देशमुख, अध्‍यक्ष यांनी न्‍यायनिर्णय पारीत केला) ------------------------------------------------------------------------------------ श्री चांगदेव विठोबा वाघमोडे रा. गोंदवले बुद्रुक, ता.माण जि. सातारा ----- अर्जदार (अभियोक्‍ता श्री.आनंद कदम) विरुध्‍द 1. श्रीराम सहकारी साखर कारखाना लि. फलटण ता. फलटण जि.सातारा तर्फे चेअरमन संजीवराजे विजयसिंह नाईक-निंबाळकर 2. श्रीराम सहकारी साखर कारखाना लि. फलटण ता. फलटण जि.सातारा तर्फे चेअरमन संजीवराजे विजयसिंह नाईक-निंबाळकर 3. श्रीराम सहकारी साखर कारखाना लि. फलटण ता. फलटण जि.सातारा तर्फे कार्यकारी संचालक ज्ञानेश्‍वर यशवंत मोहिते नं.2 व 3 चा पत्‍ता - श्रीराम सहकारी साखर कारखाना लि. फलटण ता. फलटण जि.सातारा ----- जाबदार (अभियोक्‍ता श्री व्‍ही.एस.खताळ) न्‍यायनिर्णय अर्जदार यांनी प्रस्‍तुतचा अर्ज ग्राहक संरक्षण कायदा, 1986 चे कलम 12 नुसार केलेला आहे. अर्जदार यांचे अर्जातील कथन थोडक्‍यात खालीलप्रमाणे - 1. अर्जदार यांनी जाबदार संस्‍थेमध्‍ये दोन वेगवेगळया ठेवपावत्‍यांन्‍वये वेगवेगळया रकमा मुदत ठेव योजनेअंतर्गत रक्‍कम ठेव म्‍हणून ठेवलेल्‍या आहेत. सदरच्‍या ठेवींची मुदत संपलेली आहे. मुदत ठेव पावतीची मुदत संपलेनंतर देय होणा-या रकमेची मागणी अर्जदार यांनी जाबदार यांचेकडे केली. तथापि जाबदार यांनी अर्जदार यांना ठेवीवर व्‍याजसहित देय झालेली रक्‍कम देण्‍यास टाळाटाळ केली. अर्जदार यांनी जाबदार यांना दि. 26/12/2007 रोजी रजिस्‍टर्ड पोस्‍टाने पत्र पाठवून रकमेची मागणी केली. सदरचे पत्र जाबदार यांना मिळाले. तथापि जाबदार यांनी पत्रास उत्‍तर दिले नाही अथवा अर्जदार यांची रक्‍कमही परत दिलेली नाही. थोडक्‍यात जाबदार यांनी अर्जदार यांना देण्‍यात यावयाची रक्‍कम न दिल्‍यामुळे सेवेत त्रुटी केली आहे. अर्जदार हे जाबदार संस्‍थेचे ग्राहक आहेत. त्‍यामुळे जाबदार संस्‍थेकडून मुदत ठेव पावतीची एकूण देय रक्‍कम वसूल होऊन मिळण्‍यासाठी अर्जदार यांनी प्रस्‍तुतचा अर्ज केला आहे. सदरचे अर्जामध्‍ये अर्जदार यांनी एकूण रक्‍कम रु.49,000/- व त्‍यावरील व्‍याज तसेच मानसिक त्रासापोटी रक्‍कम रु. 15,000/- व अर्जाचे खर्चापोटी रक्‍कम रु.5,000/- ची मागणी केलेली आहे. 2. प्रस्‍तुत तक्रारअर्जाचे कामी जाबदार यांनी नि.13 ला म्‍हणणे/कैफियत दाखल करुन अर्जदारचे तक्रारअर्जातील मजकूर नाकारला आहे. जाबदार संस्‍था ही ऊसापासून साखर निर्माण करणारी संस्‍था आहे. त्‍यामुळे अर्जदार हे जाबदार यांचे ग्राहक नाहीत. जाबदार यांनी वादातील ठेवपावत्‍यांपोटी रकमेची कधीही मागणी केली नाही. महाराष्‍ट्र सहकारी संस्‍था अधिनियम कलम 164 नुसार प्रस्‍तुतचा अर्ज दाखल करता येत नाही. सबब तक्रारअर्ज फेटाळणेत यावा असे जाबदार यांनी कथन केले आहे. 3. अर्जदार यांनी या अर्जाचे कथनातील सिध्‍दतेसाठी नि. 2 ला शपथपत्र दिलेले आहे. ते शपथपत्र पाहिले. अर्जदार यांनी नि. 2 सोबत दाखल केलेल्‍या दोन मूळ ठेवपावत्‍या तसेच नि.5/2 व 5/3 ला अर्जदार यांनी जाबदार यांना पाठविलेली पत्रे पाहिली. जाबदार यांचे शपथपत्र नि.14 तसेच नि.15 सोबतचे कागद पाहिले. तसेच अर्जदारतर्फे दाखल प्रतिउत्‍तर नि.17 पाहिले व जाबदार यांचा लेखी युक्तिवाद नि. 19 पाहिला. 4. जाबदार यांनी त्‍यांचे कैफियतीमध्‍ये असे कथन केले आहे की, जाबदार संस्‍था ही ऊसापासून साखर निर्माण करणारी संस्‍था आहे सबब अर्जदार व जाबदार यांचेमध्‍ये ग्राहक व सेवा देणारे नाते निर्माण होत नाही. परंतु अर्जदार यांनी नि.22 सोबत मूळ ठेवपावत्‍या दाखल केल्‍या आहेत. सदरचे ठेवपावत्‍यावंर जाबदार संस्‍थेचे नाव नमूद आहे व त्‍याखाली मुदत ठेवीची पावती असे नमूद आहे. सदरचे ठेवपावत्‍यांमध्‍ये अर्जदारचे नाव, ठेवीची मुदत, व्‍याजदर इ. तपशील नमूद आहे. सदरची बाब विचारात घेता जाबदार यांनी अर्जदार यांचेकडून ठेवीची रक्‍कम स्‍वीकारली आहे हे स्‍पष्‍ट दिसून येते. सबब ठेवीदार या नात्‍याने अर्जदार हे जाबदार यांचे ग्राहक आहेत असे या मंचाचे मत आहे. तसेच जाबदार यांनी पुढे असे कथन केले आहे की, महाराष्‍ट्र सहकारी संस्‍था अधिनियम कलम 164 नुसार प्रस्‍तुतचा अर्ज दाखल करता येत नाही. परंतु सदरच्‍या तरतुदी ग्राहक संरक्षण कायद्यातील तरतुदींस लागू होत नाहीत. सबब जाबदार यांचे कथन ग्राहय मानता येणार नाही. 5. अर्जदार यांनी दाखल केलेली वर नमूद कागदपत्रे पाहिली असता असे स्‍पष्‍ट दिसून येते की, अर्जदार यांनी जाबदार पतसंस्‍थेमध्‍ये दोन वेगवेगळया ठेवपावत्‍यांन्‍वये वेगवेगळया रकमा मुदत ठेव योजनेअंतर्गत ठेव म्‍हणून ठेवलेल्‍या होत्‍या व आहेत. सदरच्‍या ठेवींची मुदत पूर्ण झालेनंतर जाबदार यांनी अर्जदार यांना ठेवीची रक्‍कम व त्‍यावर ठेव पावतीमध्‍ये नमूद केल्‍याप्रमाणे होणा-या व्‍याजाची रक्‍कम देण्‍याची होती. तथापि, अर्जदार यांचे शपथपत्र व अर्जदार यांनी दाखल केलेली कागदपत्रे तसेच जाबदार यांची कैफियत पाहता असे दिसून येते की, जाबदार यांनी अर्जदार यांना देय असलेली रक्‍कम देण्‍यास टाळाटाळ केलेली आहे. थोडक्‍यात जाबदार यांनी अर्जदार यांना द्यावयाच्‍या सेवेत कमतरता केलेली आहे. सबब या प्रकरणी मंचाचे असे स्‍पष्‍ट मत झाले आहे की, अर्जदार यांना जाबदार यांनी कबूल केलेली सेवा म्‍हणजे ठेव म्‍हणून ठेवलेल्‍या रकमेवर व्‍याजासहित देय झालेली रक्‍कम ठेवींची मुदत संपलेनंतर दिलेली नाही. अशा प्रकारे अर्जदार हे जाबदार क्र.1 ते 3 यांचेकडून रक्‍कम मिळणेस पात्र आहेत असे दिसून येत आहे. 6. या सर्व कारणास्‍तव खालीलप्रमाणे अंतिम आदेश करण्‍यात येत आहे. आदेश 1. अर्जदार यांचा तक्रारअर्ज अंशतः मंजूर करणेत येत आहे. 2. आजपासून 30 दिवसांचे आत जाबदार क्र.1 ते 3 यांनी वैयक्तिकरित्‍या व संयुक्‍तरित्‍या अर्जदार यांना खालीलप्रमाणे रकमा द्याव्‍यात. 1. ठेवपावती क्र.675 व 1229 वरील मूळ रक्‍कम ठेवपावतीमध्‍ये नमूद केल्‍याप्रमाणे देय होणा-या व्‍याजासह द्यावी तसेच ठेवीची मुदत संपलेनंतरचे तारखेपासून संपूर्ण रक्‍कम पदरी पडेपर्यंत द.सा.द.शे. 9 टक्‍केंप्रमाणे व्‍याजासह द्यावी. 2. मानसिक त्रासापोटी रक्‍कम रु. 3,000/- द्यावेत. 3. अर्जाचे खर्चापोटी रक्‍कम रु. 2,000/- द्यावेत. 3. सदरचा न्‍यायनिर्णय खुल्‍या न्‍यायमंचात जाहीर करणेत आला. सातारा दि. 3/8/2010 (सुनिल कापसे) (सुचेता मलवाडे) (विजयसिंह दि. देशमुख) सदस्‍य सदस्‍या अध्‍यक्ष
| | Smt. S. A. Malwade, MEMBER | HONABLE MR. Vijaysinh D. Deshmukh, PRESIDENT | Mr. Sunil K Kapse, MEMBER | | 
