न्‍या य नि र्ण य
व्‍दाराः- मा. सौ. सविता प्र. भोसले, अध्‍यक्षा
1. तक्रारदाराने प्रस्‍तुत तक्रार अर्ज ग्राहक सरंक्षण कायदा, 1986 चे कलम 12 प्रमाणे दाखल केला आहे. तक्रार अर्जातील थोडक्‍यात कथन पुढीलप्रमाणे—
तक्रारदार हे वर नमूद पत्‍त्‍यावरील कायमचे रहिवासी असून वि.प.क्र.1 ही नामांकीत इलेक्‍ट्रॉनिक उपकरणे उत्‍पादित करणारी कंपनी आहे तर वि.प.क्र.2 हे वि.प.क्र.1 यांचे अधिकृत विक्रेते आहेत. तक्रारदारांनी वि.प. क्र.2 यांचेडून वि.प.क्र.1 यांनी उत्‍पादित केलेला SMN42QHOZSA SMART SR.NO. 111015110286604129 हा 42 इंची टीव्‍ही रक्‍कम रु.43,000/- या किंमतीला खरेदी केला. सदर टीव्‍हीस कंपनीमार्फत 1 वर्षाची वॉरंटी होती तसेच वि.प. क्र.1 यांनी सॅन्‍सुई कंपनीच्‍या 20 इंचाच्‍या पुढील सर्व एल.ई.डी. टीव्‍हीच्‍या मॉडेलना दि. 21/1/15 ते 30/11/15 या मुदतीत खरेदी केला असता त्‍याला मोफत 1+ 2 वर्षाची वॉरंटी वि.प.क्र.1 यांनी दिलेली होती. त्‍यामुळे तक्रारदाराचे टीव्‍हीस दि.10/11/18 पर्यंत वॉरंटी होती व आहे. तक्रारदार यांचा टीव्‍ही 12 ते 18 महिन्‍यांनी अचानक बंद पडला असता तक्रारदार यांनी सदरची बाब वि.प.क्र.2 यांना कळविली. त्‍यांनी वि.प.क्र.3 यांचेशी संपर्क साधण्‍यास तक्रारदार यांना सांगितले. त्‍यानुसार तक्रारदारांनी वि.प. क्र.3 यांचेकडे दि. 25/11/17 रोजी टीव्‍ही दुरुस्‍तीसाठी जमा केला. तदनंतर वि.प. क्र.3 यांनी सदरचे टीव्‍हीचा एक पार्ट निकामी झाला आहे व तो मिळत नाही. त्‍यामुळे टीव्‍ही दुरुस्‍त होऊ शकत नाही असे तक्रारदारांना सांगितले. त्‍यानंतर अचानक एक दिवस वि.प.क्र.3 चे अधिकृत इसम दिलीप सुतार यांनी तक्रारदार यांना सांगितले की, तुम्‍ही तुमच्‍या मॉडेलपेक्षा पुढील मॉडेल खरेदी करा व वरील फरकाची रक्‍कम द्या. तक्रारदार यांनी हा प्रस्‍ताव स्‍वीकारला परंतु तदनंतर तक्रारदारांनी अनेक वेळा वि.प. क्र.3 शी संपर्क साधला असता वि.प. क्र.3 यांनी कोणताही प्रतिसाद दिलेला नाही. अशा प्रकारे वि.प.क्र.2 व 3 यांनी उत्‍पादित दोष असलेला टीव्‍ही तक्रारदारास दिला आहे व तो त्‍यांचेकडून दुरुस्‍त करुन दिलेला नाही अथवा नवीन टीव्‍ही दिलेला नाही व त्‍याद्वारे वि.प. क्र. 2 व 3 यांनी सेवेत त्रुटी ठेवून अनुचित व्‍यापारी प्रथेचा अवलंब केलेला आहे. म्‍हणून तक्रारदाराने प्रस्‍तुत तक्रारअर्ज मंचात दाखल केला आहे.
2. तक्रारदाराने प्रस्‍तुतकामी वि.प. यांचेकडून टीव्‍हीची रक्‍कम रु.43,000/-, दंडापोटी रु.25,000/-, मानसिक व शारिरिक त्रासापोटी रु.25,000/- वि.प. कडून वसूल होवून मिळावे व सदर रकमेवर द.सा.द.शे. 18 टक्‍के प्रमाणे व्‍याज मिळावे अशी विनंती तक्रारदाराने याकामी केली आहे.
3. तक्रारदाराने प्रस्‍तुतकामी अॅफिडेव्‍हीट, कागदयादीसोबत अ.क्र.1 ते 10 कडे अनुक्रमे टीव्‍ही खरेदीचे बिल, वॉरंटी कार्ड, वाढीव कालावधीच्‍या वॉरंटीचा मेल, तक्रारदार यांनी वि.प. क्र.1 यांचेकडे टीव्‍ही जमा केलेची पावती, तक्रारदार यांनी वि.प.क्र.3 यांना पाठविलेली मेलची प्रत, वि.प. क्र.1 यांना मिळालेल्‍या तक्रारीची पोहोच, तक्रारदार यांनी वि.प. यांना पाठविलेली पत्रे, पुराव्‍याचे शपथपत्र वगैरे कागदपत्रे तक्रारदाराने याकामी दाखल केली आहेत.
4. प्रस्‍तुत कामी वि.प. क्र.1 ते 3 यांना नोटीस लागू होऊनही सदर वि.प. याकामी गैरहजर राहिलेने वि.प. नं.1 ते 3 यांचेविरुध्‍द एकतर्फा आदेश नि.1 वर पारीत झालेला आहे.
5. वर नमूद तक्रारदार यांनी दाखल केले सर्व कागदपत्रांचे काळजीपूर्वक अवलोकन करुन मे. मंचाने सदर तक्रार अर्जाचे निराकरणार्थ पुढील मुद्दे विचारात घेतले.
अ. क्र. | मुद्दा | उत्‍तरे |
1 | तक्रारदार व वि.प. हे नात्‍याने ग्राहक व सेवापुरवठादार आहेत काय ? | होय. |
2 | वि.प. कंपनीने तक्रारदाराला सदोष सेवा पुरविली आहे काय ? | होय. |
3 | तक्रारदार वि.प. यांचेकडून टी.व्‍ही. खरेदी रक्‍कम व नुकसान भरपाई मिळणेस पात्र आहेत काय ? | होय. |
4 | अंतिम आदेश काय ? | खालील नमूद आदेशाप्रमाणे. |
वि वे च न –
6. वर नमूद मुद्दा क्र.1 चे उत्‍तर आम्‍ही होकारार्थी दिले आहे कारण दि. 10/11/15 रोजी तक्रारदाराने वि.प. क्र.1 ने उत्‍पादित केलेला SMN42QHOZSA SMART SR.NO. 111015110286604129 हा 42 इंची टीव्‍ही रक्‍कम रु.43,000/- या किंमतीला खरेदी केला. प्रस्‍तुत टीव्‍ही खरेदीचे बिल तक्रारदाराने याकामी दाखल केले आहे. वि.प.क्र.1 ते 3 यांनी याकामी हजर होवून प्रस्‍तुत बाब नाकारलेली नाही. सबब, तक्रारदार व वि.प. हे नात्‍याने ग्राहक व सेवापुरवठादार आहेत ही बाब निर्विवादपणे स्‍पष्‍ट सिध्‍द झाली आहे. सबब, मुद्दा क्र.1 चे उत्‍तर आम्‍ही होकारार्थी दिले आहे.
7. वर नमूद मुद्दा क्र.2 चे उत्‍तर आम्‍ही होकारार्थी दिले आहे, कारण तक्रारदाराने वर नमूद मुद्दा क्र.1 मध्‍ये नमूद केलेला वादातील टी.व्‍ही. वि.प. क्र.2 कडून खरेदी केला. तक्रारदार यांचा टीव्‍ही 12 ते 18 महिन्‍यांनी अचानक बंद पडला असता तक्रारदार यांनी तो वि.प. क्र.3 यांचेकडे दि. 25/11/17 रोजी टीव्‍ही दुरुस्‍तीसाठी जमा केला. परंतु वि.प. क्र.3 यांनी, सदरचे टीव्‍हीचा एक पार्ट निकामी झाला आहे व तो मिळत नाही, त्‍यामुळे टीव्‍ही दुरुस्‍त होऊ शकत नाही, असे तक्रारदारांना सांगितले. त्‍यानंतर अचानक एक दिवस वि.प.क्र.3 चे अधिकृत इसम दिलीप सुतार यांनी तक्रारदार यांना सांगितले की, तुम्‍ही तुमच्‍या मॉडेलपेक्षा पुढील मॉडेल खरेदी करा व वरील फरकाची रक्‍कम द्या. तक्रारदार यांनी हा प्रस्‍ताव स्‍वीकारला परंतु तदनंतर वि.प. क्र.3 यांनी टी.व्‍ही. दुरुस्‍त करुन देणेबाबत अथवा नवीन टीव्‍ही देणेबाबत काहीही प्रतिसाद दिलेला नाही असे तक्रारदाराचे कथन आहे. या सर्व बाबी वि.प. नं.1 ते 3 यांनी याकामी हजर होवून नाकारलेल्‍या नाहीत. वि.प. क्र.1 ते 3 यांना तक्रारअर्जाची नोटीस लागू होऊनसुध्‍दा ते याकामी मंचात हजर झाले नाहीत. म्‍हणून, वि.प. नं.1 ते 3 विरुध्‍द नि.1 वर एकतर्फा आदेश पारीत झालेला आहे. म्‍हणजेच वि.प. क्र.1 ते 3 यांनी तक्रारदाराचे तक्रारअर्जातील कोणतेही कथन खोडून काढलेले नाही. सबब, तक्रारदाराने तक्रारअर्जात केले कथनांवर विश्‍वासार्हता ठेवणे न्‍यायोचित वाटते.
तक्रारदारांनी याकामी कागदयादीसोबत वि.प. यांनी त्‍यांचे टीव्‍हीकरिता वाढीव कालावधीसाठी वॉरंटी दिल्‍याबाबतच्‍या मेलची प्रत दाखल केली आहे. तसेच तक्रारदारांनी सदरचा वादातील टी.व्‍ही. वि.प.क्र.3 यांचेकडे दुरुस्‍तीसाठी दिल्‍याबाबतचे जॉबशीटची प्रत याकामी दाखल केली आहे. तसेच तक्रारदारांनी याकामी वि.प.क्र.1 यांना पाठविलेल्‍या दि.3/02/18 व 8/02/18 च्‍या तक्रारअर्जांच्‍या प्रती तसेच वि.प.क्र.3 यांना दि. 26/2/18 रोजी दिलेल्‍या तक्रारअर्जाची प्रत दाखल केली आहे. सदरच्‍या तिन्‍ही तक्रारअर्जांना वि.प. यांनी कोणताही प्रतिसाद दिल्‍याचे अभिलेखावरुन दिसून येत नाही. तक्रारदारांचे सदरचे तिन्‍ही तक्रारअर्ज व त्‍यातील कथने वि.प. यांनी याकामी हजर होवून नाकारलेले नाहीत. सबब, वि.प. क्र.1 ते 3 यांनी तक्रारदाराला वारंवार मागणी करुनही वादातील टी.व्‍ही. दुरुस्‍त करुन दिलेला नाही अथवा नवीन टी.व्‍ही. बदलून दिलेला नाही ही बाब स्‍पष्‍टपणे शाबीत झाली आहे असे या मंचाचे मत आहे. सबब, वि.प. क्र.1 ते 3 यांनी तक्रारदाराला सदोष सेवा दिली आहे या निष्‍कर्षाप्रत हे मंच येत आहे.
8. सबब, वि.प. क्र.1 ते 3 यांचेकडून वैयक्तिक व संयुक्तिकरित्‍या तक्रारदाराला वादातील टी.व्‍ही. ची खरेदी किंमत रु.43,000/- परत मिळणेस तसेच प्रस्‍तुत रकमेवर अर्ज दाखल तारखेपासून रक्‍कम हाती पडेपर्यंत द.सा.द.शे. 9 टक्‍के व्‍याजाची रक्‍कम वसूल होवून मिळणेस तक्रारदार पात्र आहेत. तसेच मानसिक त्रासापोटी रक्‍कम रु. 5,000/- व अर्जाचे खर्चापोटी रु.3,000/- अशी रक्‍कम वि.प. क्र.1 ते 3 यांचेकडून वैयक्तिक व संयुक्तिकरित्‍या वसूल होवून मिळणेस तक्रारदार पात्र आहेत या निष्‍कर्षाप्रत हे मंच येत आहे.
सबब, प्रस्‍तुत कामी आम्‍ही पुढीलप्रमाणे अंतिम आदेश पारीत करीत आहोत.
- आ दे श -
1) तक्रारदाराचा तक्रार अर्ज अंशत: मंजूर करणेत येतो.
2) वि.प.क्र.1 ते 3 यांनी वैयक्तिक व संयुक्तिकरित्‍या तक्रारदार यांना वादातील टी.व्‍ही.ची रक्‍कम रु.43,000/- अदा करावी. प्रस्‍तुत रकमेवर तक्रारअर्ज दाखल केले तारखेपासून रक्‍कम प्रत्‍यक्ष तक्रारदाराचे हाती पडेपर्यंत द.सा.द.शे. 9 टक्‍के दराने व्‍याज वि.प. क्र.1 ते 3 यांनी तक्रारदाराला अदा करावे.
3) मानसिक त्रासापोटी रक्‍कम रु.5,000/- (रक्‍कम रुपये पाच हजार फक्‍त) व तक्रार अर्जाचे खर्चापोटी रक्‍कम रु.3,000/- (रक्‍कम रुपये तीन हजार फक्‍त) वि.प.क्र.1 ते 3 यांनी वैयक्तिक व संयुक्तिकरित्‍या तक्रारदाराला अदा करावेत.
4) वर नमूद सर्व आदेशांची पुर्तता वि.प.क्र.1 ते 3 यांनी आदेशाची प्रत मिळाले तारखेपासून 45 दिवसांत करावी.
5) विहीत मुदतीत आदेशांची पुर्तता न केलेस ग्राहक सरंक्षण कायदा, 1986 कलम 25 व 27 प्रमाणे वि.प. विरुध्‍द कारवाई करणेची मुभा तक्रारदाराला देणेत येते.
6) आदेशाच्‍या सत्‍यप्रती उभय पक्षकारांना विनामुल्‍य पाठवाव्‍यात.
