न्‍या य नि र्ण य
व्‍दाराः- मा. सौ. सविता प्र. भोसले, अध्‍यक्षा
1. तक्रारदाराने प्रस्‍तुत तक्रार अर्ज ग्राहक सरंक्षण कायदा, 1986 चे कलम 11 प्रमाणे दाखल केला आहे. तक्रार अर्जातील थोडक्‍यात कथन पुढीलप्रमाणे—
तक्रारदार हे वर नमूद पत्‍त्‍यावरील कायमचे रहिवासी असून त्‍यांचे स्‍वतःचे मालकीचे फिटनेस सेंटर आहे. वि.प. हे ए.सी. तसेच अन्‍य इलेक्‍ट्रॉनिक्‍स माल पुरविणेचा व्‍यवसाय करतात. तक्रारदार व वि.प. यांचे दरम्‍यान झालेल्‍या बोलणीप्रमाणे वि.प. यांनी तक्रारदार यांना प्रत्‍येकी 4 टनी क्षमता असलेले डायकीन कंपनीचे टॉवर ए.सी. चे 2 नग त्‍याची किंमत प्रत्‍येकी रक्‍कम रु.90,000/- अशी एकूण किंमत रक्‍कम रु.1,80,000/- या रकमेस देणचे मान्‍य केले होते व त्‍याप्रमाणे तक्रारदार यांनी रक्‍कम रु.1 लाख अॅडव्‍हान्‍स म्‍हणून अदा केले होते व उर्वरीत रक्‍कम ए.सी. बसविल्‍यानंतर देण्‍याचे मान्‍य केले होते. परंतु रक्‍कम मिळालेनंतर वि.प. यांनी ए.सी. देण्‍यास टाळाटाळ सुरु केली. म्‍हणून तक्रारदारांनी फेब्रुवारी 2017 मध्‍ये वि.प. यांना दिलेली ऑर्डर रद्द केली असलेबाबतचे व तक्रारदारांची रक्‍कम परत करणेबाबत वि.प. यांना कळविले होते. परंतु वि.प. सदरची रक्‍कम परत केलेली नाही. म्‍हणून तक्रारदारांनी वि.प. यांना वकीलामार्फत दि. 12/5/17 रोजी नोटीस पाठविली. परंतु त्‍यास कोणताही प्रतिसाद वि.प. यांनी दिलेला नाही. म्‍हणून तक्रारदाराने प्रस्‍तुत तक्रारअर्ज मंचात दाखल केला आहे.
2. तक्रारदाराने प्रस्‍तुतकामी वि.प. यांचेकडून ए.सी. खरेदीसाठी दिलेली रक्‍कम रु.1,00,000/- व सदर रकमेवर द.सा.द.शे. 18 टक्‍के प्रमाणे व्‍याज, मानसिक त्रासापोटी रु.25,000/-, नुकसानीची रक्‍कम रु.20,000/-, व तक्रारअर्जाचा खर्च रु. 20,000/- वि.प. कडून वसूल होवून मिळावे अशी विनंती याकामी केली आहे.
3. तक्रारदाराने प्रस्‍तुतकामी अॅफिडेव्‍हीट, कागदयादीसोबत अ.क्र.1 ते 3 कडे अनुक्रमे वि.प. यांना पाठविलेली नोटीस, नोटीसीची पोहोचपावती, वि.प. यांना रक्‍कम अदा केल्‍याबाबत बँकेचा खातेउतारा, पुराव्‍याचे शपथपत्र व लेखी युक्तिवाद वगैरे कागदपत्रे तक्रारदाराने याकामी दाखल केली आहेत.
4. प्रस्‍तुत कामी वि.प. यांना नोटीस लागू होऊनही सदर वि.प. याकामी गैरहजर राहिलेने वि.प. यांचेविरुध्‍द एकतर्फा आदेश नि.1 वर पारीत झालेला आहे.
5. वर नमूद तक्रारदार यांनी दाखल केले सर्व कागदपत्रांचे काळजीपूर्वक अवलोकन करुन मे. मंचाने सदर तक्रार अर्जाचे निराकरणार्थ पुढील मुद्दे विचारात घेतले.
अ. क्र. | मुद्दा | उत्‍तरे |
1 | तक्रारदार व वि.प. हे नात्‍याने ग्राहक व सेवापुरवठादार आहेत काय ? | होय. |
2 | वि.प. कंपनीने तक्रारदाराला सदोष सेवा पुरविली आहे काय ? | होय. |
3 | तक्रारदार वि.प. यांचेकडून ए.सी. खरेदीसाठी दिलेली रक्‍कम व नुकसान भरपाई मिळणेस पात्र आहेत काय ? | होय. |
4 | अंतिम आदेश काय ? | खालील नमूद आदेशाप्रमाणे. |
वि वे च न –
6. वर नमूद मुद्दा क्र.1 चे उत्‍तर आम्‍ही होकारार्थी दिले आहे कारण वि.प. यांनी तक्रारदार यांना प्रत्‍येकी 4 टनी क्षमता असलेले डायकीन कंपनीचे टॉवर ए.सी. चे 2 नग, किंमत प्रत्‍येकी रक्‍कम रु.90,000/- अशी एकूण किंमत रक्‍कम रु.1,80,000/- या रकमेस देणचे मान्‍य केले होते व त्‍याप्रमाणे तक्रारदार यांनी रक्‍कम रु.1 लाख अॅडव्‍हान्‍स म्‍हणून अदा केले होते. सदरची रक्‍कम नेफ्टद्वारे वि.प. यांना अदा केलेबाबतचा बँकेचा खातेउतारा तक्रारदार यांनी याकामी दाखल केला आहे. वि.प. यांनी याकामी हजर होवून प्रस्‍तुत बाब नाकारलेली नाही. सबब, तक्रारदार व वि.प. हे नात्‍याने ग्राहक व सेवापुरवठादार आहेत ही बाब निर्विवादपणे स्‍पष्‍ट सिध्‍द झाली आहे. सबब, मुद्दा क्र.1 चे उत्‍तर आम्‍ही होकारार्थी दिले आहे.
7. वर नमूद मुद्दा क्र.2 चे उत्‍तर आम्‍ही होकारार्थी दिले आहे, कारण तक्रारदाराने वर नमूद मुद्दा क्र.1 मध्‍ये नमूद केल्‍याप्रमाणे दोन ए.सी. नगांसाठी रक्‍कम रु.1 लाख वि.प. यांना अदा केले होते. परंतु वि.प. यांनी ठरल्‍याप्रमाणे तक्रारदार यांना ए.सी. चा पुरवठा केला नाही व ए.सी. देण्‍यास टाळाटाळ सुरु केली. म्‍हणून तक्रारदारांनी फेब्रुवारी 2017 मध्‍ये वि.प. यांना दिलेली ऑर्डर रद्द केली असलेबाबत व तक्रारदारांची रक्‍कम परत करणेबाबत वि.प. यांना कळविले होते. परंतु तरीही वि.प. सदरची रक्‍कम परत केलेली नाही. म्‍हणून तक्रारदारांनी वि.प. यांना वकीलामार्फत दि. 12/5/17 रोजी नोटीस पाठविली. परंतु त्‍यास कोणताही प्रतिसाद वि.प. यांनी दिलेला नाही. तक्रारदारांनी पाठविलेल्‍या सदरचे नोटीसीची प्रत व सदरची नोटीस वि.प. यांना प्राप्‍त झालेची पोहोच याकामी तक्रारदार यांनी दाखल केली आहे. या सर्व बाबी वि.प. यांनी याकामी हजर होवून नाकारलेल्‍या नाहीत. वि.प. यांना तक्रारअर्जाची नोटीस लागू होऊनसुध्‍दा ते याकामी मंचात हजर झाले नाहीत. सबब, वि.प. यांचेविरुध्‍द नि.1 वर एकतर्फा आदेश पारीत झालेला आहे. म्‍हणजेच वि.प. क्र.1 ते 3 यांनी तक्रारदाराचे तक्रारअर्जातील कोणतेही कथन खोडून काढलेले नाही. सबब, तक्रारदाराने तक्रारअर्जात केले कथनांवर विश्‍वासार्हता ठेवणे न्‍यायोचित वाटते. तक्रारदाराने वि.प. यांना पाठविलेल्‍या नोटीसीस वि.प. यांनी कोणताही प्रतिसाद दिल्‍याचे अभिलेखावरुन दिसून येत नाही. तक्रारदारांचे सदरचे नोटीसीतील कथने अथवा प्रस्‍तुत तक्रारअर्जातील कथने वि.प. यांनी याकामी हजर होवून नाकारलेली नाहीत. सबब, वि.प. यांनी रक्‍कम रु. 1 लाख स्‍वीकारुनही तक्रारदाराला ए.सी. चा पुरवठा केलेला नाही किंवा घेतलेली रक्‍कम परत दिलेली नाही ही बाब स्‍पष्‍टपणे शाबीत झाली आहे असे या मंचाचे मत आहे. सबब, वि.प. यांनी तक्रारदाराला सदोष सेवा दिली आहे या निष्‍कर्षाप्रत हे मंच येत आहे.
8. सबब, वि.प. यांचेकडून तक्रारदार ए.सी. चे खरेदीपोटी दिलेली अॅडव्‍हान्‍स रक्‍कम रु.1,00,000/- परत मिळणेस तसेच प्रस्‍तुत रकमेवर अर्ज दाखल तारखेपासून रक्‍कम हाती पडेपर्यंत द.सा.द.शे. 9 टक्‍के व्‍याजाची रक्‍कम वसूल होवून मिळणेस पात्र आहेत. तसेच मानसिक त्रासापोटी रक्‍कम रु.5,000/- व अर्जाचे खर्चापोटी रु.3,000/- अशी रक्‍कम वि.प. यांचेकडून वसूल होवून मिळणेस तक्रारदार पात्र आहेत या निष्‍कर्षाप्रत हे मंच येत आहे.
सबब, प्रस्‍तुत कामी आम्‍ही पुढीलप्रमाणे अंतिम आदेश पारीत करीत आहोत.
- आ दे श -
1) तक्रारदाराचा तक्रार अर्ज अंशत: मंजूर करणेत येतो.
2) वि.प. यांनी तक्रारदार यांना ए.सी. चे खरेदीपोटी दिलेली अॅडव्‍हान्‍स रक्‍कम रु.1,00,000/- अदा करावी. प्रस्‍तुत रकमेवर तक्रारअर्ज दाखल केले तारखेपासून रक्‍कम प्रत्‍यक्ष तक्रारदाराचे हाती पडेपर्यंत द.सा.द.शे. 9 टक्‍के दराने व्‍याज वि.प. यांनी तक्रारदाराला अदा करावे.
3) मानसिक त्रासापोटी रक्‍कम रु.5,000/- (रक्‍कम रुपये पाच हजार फक्‍त) व तक्रार अर्जाचे खर्चापोटी रक्‍कम रु.3,000/- (रक्‍कम रुपये तीन हजार फक्‍त) वि.प. यांनी तक्रारदाराला अदा करावेत.
4) वर नमूद सर्व आदेशांची पुर्तता वि.प. यांनी आदेशाची प्रत मिळाले तारखेपासून 45 दिवसांत करावी.
5) विहीत मुदतीत आदेशांची पुर्तता न केलेस ग्राहक सरंक्षण कायदा, 1986 कलम 25 व 27 प्रमाणे वि.प. विरुध्‍द कारवाई करणेची मुभा तक्रारदाराला देणेत येते.
6) आदेशाच्‍या सत्‍यप्रती उभय पक्षकारांना विनामुल्‍य पाठवाव्‍यात.
