जिल्‍हा ग्राहक तक्रार निवारण मंच, सोलापूर.
ग्राहक तक्रार क्रमांक : 185/2013.
तक्रार दाखल दिनांक : 13/08/2013.
तक्रार आदेश दिनांक : 19/12/2014. निकाल कालावधी: 01 वर्षे 04 महिने 06 दिवस
श्री. प्रशांत नरसिंग कुणे, वय 35 वर्षे, व्‍यवसाय : नोकरी,
रा. द्वारा : श्री. हरिदास शंकर बत्‍तुल, अ-195, साखर पेठ,
निलकंठेश्‍वर मंदिराशेजारी, श्रध्‍दा बुक डेपोजवळ,
कन्‍ना चौक, सोलापूर. तक्रारदार
विरुध्‍द
सचिन विठ्ठल घनाते, वय 33 वर्षे, व्‍यवसाय : बिल्‍डर,
रा. 35/357, न्‍यू पाच्‍छा पेठ, सोलापूर. विरुध्‍द पक्ष
गणपुर्ती :- श्री. मिलिंद बी. पवार (हिरुगडे), अध्‍यक्ष
श्री. ओंकारसिंह जी. पाटील, सदस्‍य
सौ. बबिता एम. महंत-गाजरे, सदस्‍य
तक्रारदार स्‍वत: उपस्थित
विरुध्‍द पक्ष अनुपस्थित / एकतर्फा
आदेश
सौ. बबिता एम. महंत-गाजरे, सदस्‍य यांचे द्वारा :-
1. तक्रारदार यांनी प्रस्‍तुत तक्रारीमध्‍ये उपस्थित केलेला विवाद थोडक्‍यात असा आहे की, दि.3/7/2012 रोजी घनोते ग्रुप, बिल्‍डर्स अन्‍ड डेव्‍हलपर्स यांच्‍या राज पॅलेस अपार्टमेंटमध्‍ये 1 बी.एच.के. फ्लॅट नोंदणी केला. त्‍यावेळी फ्लॅटचे काम अपूर्ण असल्‍यामुळे सन 2012 च्‍या श्रावण महिन्‍यामध्‍ये फ्लॅटचा ताबा देण्‍यात येईल, असे सांगण्‍यात आले. परंतु त्‍या महिन्‍यामध्‍ये फ्लॅटचा ताबा दिला नाही आणि विचारणा केली असता फ्लॅटचे काम पूर्ण न झाल्‍यामुळे सन 2012 च्‍या गणेशोत्‍सव, दसरा व दिवाळीमध्‍ये व त्‍यानंतर सन 2013 च्‍या गुढीपाडवा व अक्षय तृतीयेला ताबा देण्‍यात येईल, असे सांगण्‍यात आले. परंतु त्‍यावेळीही तक्रारदार यांना फ्लॅटचा ताबा मिळाला नाही. तक्रारदार यांनी पुढे असे कथन केले आहे की, दि.8/11/2012 रोजी त्‍यांनी बँक ऑफ महाराष्‍ट्र, शाखा अशोक चौक यांच्‍याकडून कर्ज घेतले असून ते अदा केले आहे. त्‍याच दिवशी फ्लॅटचे खरेदीपत्र व गहाणपत्र करण्‍यात आले आहे. विरुध्‍द पक्ष यांनी फ्लॅटचा ताबा देण्‍याबाबत प्रतिसाद न दिल्‍यामुळे फ्लॅटचा ताबा मिळावा आणि फ्लॅट ताब्‍यात देईपर्यंतचे मुद्दल व व्‍याज हप्‍ते विरुध्‍द पक्ष यांच्‍याकडून वसूल करावेत, अशी विनंती केली आहे.
2. विरुध्‍द पक्ष यांना मंचाच्‍या नोटीसची बजावणी झाल्‍यानंतर उचित संधी देऊनही ते मंचासमोर अनुपस्थित आहेत आणि लेखी म्‍हणणे दाखल केले नाही. त्‍यामुळे त्‍यांच्‍याविरुध्‍द एकतर्फी चौकशीचे आदेश करण्‍यात येऊन सुनावणी पूर्ण करण्‍यात आली.
3. तक्रारदार यांची तक्रार व दाखल कागदपत्रांचे अवलोकन केले असता, तसेच तक्रारदार यांचा युक्तिवाद ऐकल्‍यानंतर वादविषयाचे अनुषंगाने खालील मुद्दे उपस्थित होतात.
मुद्दे उत्‍तर
1. विरुध्‍द पक्ष यांनी तक्रारदार यांना त्रुटीयुक्‍त सेवा
दिली आहे काय ? होय.
2. तक्रारदार हे फ्लॅटचा ताबा मिळविण्‍यास पात्र आहेत काय ? होय.
3. काय आदेश ? अंतिम आदेशाप्रमाणे.
निष्‍कर्ष
4. मुद्दा क्र. 1 व 2 :- तक्रारदार यांनी विरुध्‍द पक्ष यांच्‍याकडून सोलापूर महानगरपालिका हद्दीतील न्‍यू पाच्‍छा पेठ येथील सिटी सर्व्‍हे नं.10388, फा. प्‍लॉट नं.34-अ, सब-प्‍लॉट नं.57, ले-आऊट प्‍लॉट नं.55 क्षेत्रातील ‘राज पॅलेस’ नांवे अपार्टमेंटमधील दुस-या मजल्‍यावरील फ्लॅट नं.9 (1 बी.एच.के.) रक्‍कम रु.14,00,000/- किंमतीस खरेदी केल्‍याचे अभिलेखावर दाखल असणा-या नोंदणीकृत खरेदीदस्‍तावरुन निदर्शनास येते. खरेदीदस्‍ताचे अवलोकन करता, विरुध्‍द पक्ष यांना तक्रारदार यांच्‍याकडून रु.14,00,000/- प्राप्‍त झाल्‍याचा त्‍यामध्‍ये उल्‍लेख आहे. खरेदीदस्‍ताचे कलम क्र. 4 मध्‍ये फ्लॅटचे बांधकाम ठरल्‍याप्रमाणे झाले असून तक्रारदार यांनी फ्लॅटचा ताबा स्‍वीकारल्‍याचा त्‍यामध्‍ये उल्‍लेख आहे. परंतु तक्रारदार यांनी तक्रारीमध्‍ये सन 2012 पासून वेळोवेळी फ्लॅटचा ताबा मागणी करुनही विरुध्‍द पक्ष यांनी त्‍याबाबत दखल घेतली नाही, असे कथन केलेले आहे.
5. विरुध्‍द पक्ष यांना मंचामार्फत नोटीस बजावणी झालेली आहे. त्‍यानंतर उचित संधी देऊनही ते मंचासमोर उपस्थित राहिले नाहीत आणि लेखी म्‍हणणे दाखल केलेले नाही. वास्‍तविक पाहता, तक्रारदार यांच्‍या तक्रारीचे खंडण करण्‍यासाठी लेखी म्‍हणणे व पुराव्‍याची कागदपत्रे दाखल करण्‍यासाठी त्‍यांना उचित संधी उपलब्‍ध होती. परंतु तक्रारदार यांची तक्रार व दाखल कागदपत्रांचे उचित पुराव्‍याद्वारे त्‍यांनी खंडन केलेले नाही. त्‍यामुळे एका अर्थाने तक्रारदार यांची तक्रार, त्‍यातील कथने व दाखल कागदपत्रे विरुध्‍द पक्ष यांना मान्‍य असल्‍याचे अनुमान काढण्‍याकरिता मंचाला कोणतीही हरकत नाही.
6. अभिलेखावर दाखल कागदपत्रांचे अवलोकन करता, तक्रारदार व विरुध्‍द पक्ष यांच्‍यामध्‍ये वादविषयाप्रमाणे फ्लॅट खरेदी-विक्री व्‍यवहार होऊन त्‍याप्रमाणे खरेदीखत झाल्‍याचे निदर्शनास येते. तक्रारदार यांनी फ्लॅटची मोबदला देय रक्‍कम विरुध्‍द पक्ष यांना अदा केलेली आहे. वादविषयाचे अनुषंगाने दखल घेता, खरेदीदस्‍तामध्‍ये तक्रारदार यांना फ्लॅटचा ताबा देण्‍यात आल्‍याचा उल्‍लेख असला तरी तक्रारदार यांनी विरुध्‍द पक्ष यांच्‍याकडून फ्लॅटचा ताबा अप्राप्‍त असल्‍याचा वाद उपस्थित केला आहे. अशा परिस्थितीत, विरुध्‍द पक्ष यांनी मंचासमोर उपस्थित राहून तक्रारदार यांच्‍या तक्रारीचे व दाखल कागदपत्रांचे खंडन करावयास पाहिजे होते आणि जे त्‍यांनी केलेले नाही. त्‍यामुळे तक्रारदार यांना फ्लॅटचा ताबा देण्‍यात आलेला नाही, हे गाह्य धरणे उचित ठरते.
7. तक्रारदार यांनी तक्रारीमध्‍ये फ्लॅटचा ताबा न मिळाल्‍यामुळे बँकेचे व्‍याज व मुद्दल विरुध्‍द पक्ष यांच्‍याकडून वसूल करण्‍याची विनंती केली आहे. वास्‍तविक पाहता, तक्रारदार यांनी विरुध्‍द पक्ष यांच्‍याकडे फ्लॅटचा ताबा अप्राप्‍त असल्‍याबाबत खरेदीदस्‍ताच्‍या दिनांकापासून म्‍हणजेच 6/10/2012 पासून कोणते प्रयत्‍न केले ? याचा कोणताही सुस्‍पष्‍ट उल्‍लेख, स्‍पष्‍टीकरण किंवा ऊहापोह केलेला नाही. त्‍यामुळे फ्लॅटचा ताबा विरुध्‍द पक्ष यांच्‍याकडून देण्‍यात आलेला नाही, असे ग्राह्य धरले तरी तक्रारदार यांनी तो मिळविण्‍यासाठी प्रयत्‍न केल्‍याचे कागदोपत्री निदर्शनास येत नाही. त्‍यामुळे त्‍यांनी केलेली प्रस्‍तुत मागणी मान्‍य करणे उचित ठरत नाही. सबब, आम्‍ही मुद्दा क्र.1 व 2 चे उत्‍तर होकारार्थी दिले आहे. शेवटी आम्‍ही खालील आदेश देत आहोत.
आदेश
(1) तक्रारदार यांची तक्रार अंशत: मंजूर करण्‍यात येते.
(2) विरुध्‍द पक्ष यांनी तक्रारदार यांना आदेशाच्‍या प्राप्‍तीपासून तीस दिवसाचे आत
वादविषयक फ्लॅटचा ताबा द्यावा.
(3) उभय पक्षकारांना आदेशाची प्रथम प्रत नि:शुल्‍क पुरविण्‍यात यावी.
(श्री. ओंकारसिंह जी. पाटील) (सौ. बबिता एम. महंत-गाजरे) (श्री. मिलिंद बी. पवार÷-हिरुगडे)
सदस्‍य सदस्‍य अध्‍यक्ष
जिल्‍हा ग्राहक तक्रार निवारण मंच, सोलापूर.
-00-
(संविक/स्‍व/141218)
