जिल्‍हा ग्राहक तक्रार निवारण मंच, सोलापूर. तक्रार दाखल दिनांक : 19/01/2011. तक्रार आदेश दिनांक : 10/05/2011. ग्राहक तक्रार क्रमांक : 01/2011. रतन कुंडलिक तळेकर, वय 27 वर्षे, व्‍यवसाय : शेती व घरकाम, रा. कुर्डू, ता. माढा, जि. सोलापूर. तक्रारदार ग्राहक तक्रार क्रमांक : 02/2011. शोभा संदीपान तळेकर, वय 28 वर्षे, व्‍यवसाय : शेती व घरकाम, रा. कुर्डू, ता. माढा, जि. सोलापूर. तक्रारदार ग्राहक तक्रार क्रमांक : 02/2011. संदीपान सिताराम तळेकर, वय 35 वर्षे, व्‍यवसाय : शेती, रा. कुर्डू, ता. माढा, जि. सोलापूर. तक्रारदार ग्राहक तक्रार क्रमांक : 04/2011. रतन कुंडलिक तळेकर, वय 27 वर्षे, व्‍यवसाय : शेती व घरकाम, रा. कुर्डू, ता. माढा, जि. सोलापूर. तक्रारदार विरुध्‍द डिव्‍हीजनल मॅनेजर, रिलायन्‍स जनरल इन्‍शुरन्‍स कंपनी लि., सन प्‍लाझा, दुसरा मजला, 4516/11, मुरारजी पेठ, लकी चौक, सोलापूर. विरुध्‍द पक्ष गणपुर्ती :- सौ. संगिता एस. धायगुडे, अध्‍यक्ष सौ. संजीवनी एस. शहा, सदस्‍य तक्रारदार यांचेतर्फे अभियोक्‍ता : आर.व्‍ही. पाटील विरुध्‍द पक्ष यांचेतर्फे अभियोक्‍ता : व्‍ही.आर. राव आदेश सौ. संगिता एस. धायगुडे, अध्‍यक्ष यांचे द्वारा :- 1. प्रस्‍तुत सर्व तक्रारींचे स्‍वरुप, विषय, विरुध्‍द पक्ष व त्‍यांचे म्‍हणणे इ. मध्‍ये साम्‍य असल्‍यामुळे सोईच्‍या दृष्‍टीने त्‍यांचा निर्णय एकत्रितरित्‍या देण्‍यात येत आहे. 2. तक्रारदार यांच्‍या तक्रारी थोडक्‍यात अशा आहेत की, ते व्‍यवसायाने शेतकरी असून दुग्‍ध व्‍यवसायाकरिता त्‍यांनी जर्शी गाई खरेदी केल्‍या आहेत. त्‍यांच्‍या जर्शी गाईंचा विरुध्‍द पक्ष (संक्षिप्‍त रुपामध्‍ये 'विमा कंपनी') यांच्‍याकडे तक्रारदार यांच्‍या विमा उतरविण्‍यात आलेला असून त्‍याचा तपशील खालीलप्रमाणे आहे. ग्राहक तक्रार क्रमांक | विमा पॉलिसी क्रमांक | टॅग क्रमांक | विमा रक्‍कम (रुपयामध्‍ये) | जनावराचा मृत्‍यू दिनांक | 01/2011 | 1702-06-3012-000001/4231 | 24273 | 25,000/- | 5/3/10 | 02/2011 | 1702-06-3012-000001/4249 | 24575 | 25,000/- | 21/3/10 | 03/2011 | -- | एम.एल.डी.बी. 24507 | 25,000/- | 30/10/09 | 04/2011 | 1702-06-3012-000001/6859 | जुना 50368 नवीन 15125 | 25,000/- | 26/3/10 |
3. तक्रारदार यांची गाय आजारी पडली आणि उपचारादरम्‍यान त्‍यांचा वरीलप्रमाणे नमूद तारखेस मृत्‍यू झालेला आहे. त्‍यानंतर गाईचे पोस्‍टमार्टेम करण्‍यात येऊन क्‍लेम फॉर्मसह सर्व कागदपत्रे पाठवून विमा कंपनीकडे विमा रकमेची मागणी केली. विमा क्‍लेम सादर केल्‍यानंतर पाठपुरावा करुनही विमा कंपनीने त्‍यांना क्‍लेमबाबत निर्णय न घेता क्‍लेम प्रलंबीत ठेवला. त्‍यामुळे तक्रारदार यांनी प्रस्‍तुत तक्रार दाखल करुन विमा रक्‍कम प्रत्‍येकी रु.25,000/- व्‍याजासह मिळावी आणि मानसिक त्रासापोटी प्रत्‍येकी रु.3,000/- व तक्रार खर्चापोटी प्रत्‍येकी रु.3,000/- मिळावेत, अशी विनंती केली आहे. 4. विमा कंपनीने रेकॉर्डवर म्‍हणणे दाखल केले असून तक्रार अमान्‍य केली आहे. त्‍यांच्‍या म्‍हणण्‍यानुसार गाईच्‍या मृत्‍यूनंतर 24 तासाचे आत विमा कंपनीला कळविण्‍यात आलेले नाही. तसेच त्‍यांच्‍याकडे कोणतेही कागदपत्रे किंवा सूचना प्राप्‍त झालेली नाही. तक्रारदार यांच्‍या गाईस दिलेली विमा पॉलिसी निश्चित अटी व शर्तीस अधीन राहून दिलेली आहे. तसेच अट क्र.3 प्रमाणे असलेल्‍या ‘नो टॅग नो क्‍लेम’ तत्‍वानुसार टॅग दाखल केला नसल्‍यास क्‍लेम देय होऊ शकत नाही. त्‍यांच्‍या सेवेमध्‍ये त्रुटी नाही आणि तक्रारीस कारण घडलेले नाही. शेवटी त्‍यांनी तक्रार रद्द करण्‍याची विनंती केली आहे. 5. तक्रारदार यांची तक्रार, विरुध्‍द पक्ष यांचे म्‍हणणे व दाखल कागदपत्रांचे अवलोकन करता, तसेच युक्तिवाद ऐकल्‍यानंतर निष्‍कर्षासाठी खालील मुद्दे उपस्थित होतात. मुद्दे उत्‍तर 1. विरुध्‍द पक्ष यांनी तक्रारदार यांना त्रुटीयुक्‍त सेवा दिली आहे काय ? होय. 2. तक्रारदार विमा रक्‍कम मिळविण्‍यास पात्र आहेत काय ? होय. 3. काय आदेश ? शेवटी दिल्‍याप्रमाणे. निष्‍कर्ष 6. मुद्दा क्र. 1 ते 3 :- तक्रारदार यांच्‍या गाईचा विमा कंपनीकडे विमा उतरविण्‍यात आल्‍याचे व विमा कालावधीमध्‍ये गाय मृत्‍यू पावल्‍याविषयी विवाद नाही. तक्रारदार यांच्‍या म्‍हणण्‍यानुसार सर्व कागदपत्रांसह विमा क्‍लेम सादर केला असता, विमा कंपनीने क्‍लेम प्रलंबीत ठेवला आणि विमा रक्‍कम दिलेली नाही. 7. विमा कंपनीने प्रामुख्‍याने पॉलिसी अट क्र.3 चा आधार घेत 'नो टॅग नो क्‍लेम' तत्‍वानुसार विमा दावा देय नसल्‍याचे नमूद आहे. वास्‍तविक पाहता, विमा कंपनीस कागदपत्रांसह गाईच्‍या कानातील टॅग प्राप्‍त झालेला नाही, याबाबत तक्रारदार यांच्‍याशी केलेला पत्रव्‍यवहार रेकॉर्डवर दाखल नाही. तसेच पोस्‍टमार्टेम रिपोर्टमध्‍ये टॅग क्रमांक नमूद असल्‍यामुळे निश्चितच तो विमा कंपनीकडे सादर केलेला असावा, या निर्णयाप्रत आम्‍ही आलो आहोत. त्‍यानंतर तक्रारदार यांनी 24 तासाचे आत कळविले नसल्‍याचे विमा कंपनीने नमूद केले आहे. परंतु वरिष्‍ठ आयोगाच्‍या निर्णयांनुसार क्‍लेमची माहिती वेळेमध्‍ये न दिल्‍यास त्‍या कारणास्‍तव विमा कंपनीस विमेदाराचा क्‍लेम नाकारता येणार नाही, असे तत्‍व विषद केलेले आहे. 8. तक्रारदार यांनी रेकॉर्डवर विमा पॉलिसी, विमा दावा प्रपत्र, पोस्‍टमार्टेम रिपोर्ट, वेटर्नरी सर्टिफिकेट, इ. कागदपत्रे दाखल केलेली आहे. सदर कागदपत्रांचे बारकाईने अवलोकन करता, विमा पॉलिसीमध्‍ये नमूद असणा-या टॅग क्रमांकाची गाय मृत्‍यू पावल्‍याचे स्‍पष्‍टपणे निदर्शनास येते. रेकॉर्डवर उपलब्‍ध असलेली कागदपत्रे विमा क्‍लेम सेटल करण्‍यास विमा कंपनी कशी असमर्थ ठरते ? याचे उचित स्‍पष्‍टीकरण देण्‍यात आलेले नाही. आमच्‍या मते, सदर कागदपत्रे तक्रारदार यांची विमा संरक्षीत गाय मृत्‍यू पावल्‍याचे सिध्‍द करण्‍यास पुरेशी आहेत. वरील सर्व विवेचनावरुन विमा कंपनीने तक्रारदार यांचा विमा क्‍लेम अयोग्‍य व अनुचित कारणास्‍तव प्रलंबीत ठेवून व त्‍या अनुषंगाने विमा रक्‍कम न देऊन सेवेत त्रुटी केलेली आहे. सबब, तक्रारदार हे गाईंच्‍या विम्‍याची रक्‍कम तक्रारदार दाखल तारखेपासून द.सा.द.शे. 9 टक्‍के व्‍यास दरासह मिळविण्‍यास पात्र ठरतात, या अंतीम निर्णयाप्रत आम्‍ही आलो आहोत. 9. शेवटी आम्‍ही खालील आदेश देत आहोत. आदेश 1. विरुध्‍द पक्ष विमा कंपनीने तक्रारदार यांना प्रत्‍येकी विमा रक्‍कम रु.25,000/- दि.19/1/2011 पासून द.सा.द.शे. 9 टक्‍के व्‍याज दराने या आदेशाच्‍या प्राप्‍तीपासून तीस दिवसाचे आत द्यावी. 2. विरुध्‍द पक्ष विमा कंपनीने तक्रारदार यांना तक्रार खर्चापोटी प्रत्‍येकी रु.1,000/- या आदेशाच्‍या प्राप्‍तीपासून तीस दिवसाचे आत द्यावेत. 3. विरुध्‍द पक्ष विमा कंपनीने उपरोक्‍त आदेशाची अंमलबजावणी नमूद मुदतीत न केल्‍यास मुदतीनंतर एकूण देय रक्‍कम द.सा.द.शे. 12 टक्‍के व्‍याज दराने अदा करावी. (सौ. संजीवनी एस. शहा) (सौ. संगिता एस. धायगुडे÷) सदस्‍य अध्‍यक्ष जिल्‍हा ग्राहक तक्रार निवारण मंच, सोलापूर. ----00---- (संविक/स्‍व/4511)
| | [HONABLE MRS. Sanjeevani S. Shah] MEMBER[HONABLE MRS. Sangeeta S. Dhaygude] PRESIDENT | | 
