नि.1 खालील आदेश

द्वारा – मा. श्रीमती भारती सं. सोळवंडे, अध्यक्ष

1.         जाबदार पतसंस्था ही महाराष्ट्र सहकार कायद्यांतर्गत नोंदणीकृत बँक आहे. कोरेगांव येथील शिवनेरी सहकारी बँक लि. कोरेगाव ही बँक जाबदार बँकेमध्ये विलीन झाली आहे. त्यामुळे शिवनेरी सहकारी बँक लि. कोरेगाव या बँकेची सर्व देणी-घेणी याची सर्व जबाबदारी ही जाबदार बँकेची आहे.  त्यानुसार शिवनेरी सहकारी बँक लि. कोरेगाव या बँकेत असलेल्या शेअर्स गुंतवणुकीची रक्कम परत करणे हे जाबदार बँकेचे कर्तव्याचा भाग आहे.  तक्रारदार यांनी शिवनेरी सहकारी बँक लि. कोरेगाव या बँकेमध्ये शेअर्सपोटी काही रक्कम गुंतविलेली आहे.  त्याचा सविस्तर तपशील तक्रारअर्ज कलम 2 मध्ये तक्रारदारांनी नमूद केला आहे. सदर गुंतवणुकीपोटी रक्कम रु.1,85,600/- तक्रारदार यांना येणे आहे.  तक्रारदारांनी दि. 22/1/2022 रोजी जाबदार यांना लेखी पत्र देवून तक्रारदारांचे सभासदत्व रद्द करुन शेअर्सची रक्कम परत करणेची विनंती केली.  परंतु जाबदार यांची त्याची दखल घेतली नाही.  तक्रारदार यांनी जाबदार बॅकेस अनेक वेळा संधी देवूनही जाबदार बँकेने तक्रारदार यांना शेअर्सची रक्कम परत करणेस टाळाटाळ केली आहे.  म्हणून तक्रारदारांनी जाबदार यांना दि. 31/5/2023 रोजी वकीलामार्फत नोटीस पाठविली.  सदर नोटीसीस जाबदार यांनी दि. 17/6/2023 रोजी खोटया आशयाचे उत्तर देवून तक्रारदार यांना शेअर्सची रक्कम परत करणेबाबत खोटी कारणे नमूद केली आहेत.  म्हणून तक्रारदारांनी प्रस्तुतची तक्रार दाखल केली आहे.  सबब, तक्रारदारांची शेअर्सची रक्कम परत मिळावी, मानसिक त्रासापोटी रक्कम रु.50,000/- व अर्जाचा खर्च रु. 15,000/- परत मिळावा अशी मागणी तक्रारदाराने केली आहे.

2.    तक्रारदारांनी तक्रारअर्जाचे पुष्ठयर्थ शपथपत्र, कागदयादीसोबत श्री अशोक जाधव यांचे नावचे कुलमुखत्यारपत्र, शिवनेरी सहकारी बँक लि. कोरेगाव या बँकेचे नाव बदललेबाबतचे आदेशाची प्रत, शेअर्स गुंतवणुकीची प्रमाणपत्र, तक्रारदार यांनी जाबदार यांना दिलेल्या पत्राची व नोटीसीची प्रत, जाबदार बँकेने नोटीसीस दिलेले उत्तर, जाबदार बँकेच्या संचालक मंडळाची यादी इ. कागदपत्रे दाखल केली आहेत.

3.    सदरकामी तक्रारदारतर्फे ॲड अमजद इक्बाल खान यांचा दाखलपूर्व युक्तिवाद ऐकला. तसेच दाखल कागदपत्रांचे अवलोकन केले.

4.    तक्रारदाराचे तक्रारअर्जातील कथन पाहता तक्रारदारांनी जाबदार बँकेकडून शेअर्सच्या रकमेची मागणी केली आहे.  परंतु तक्रारदार यांचेकडे जाबदार बँकेचे शेअर्स असलेने तक्रारदार हे सदर बँकेचे भागधारक होतात आणि ग्राहक संरक्षण कायद्यातील तरतुदींनुसार भागधारक हा ग्राहक होत नाही.  तक्रारदारांनी जाबदार बँकेस मोबदला देवून वस्तू किंवा सेवा विकत घेतली अशी तक्रारदारांची तक्रार नाही.  या बाबीचा विचार करता, तक्रारदार हे ग्राहक संरक्षण कायद्यातील तरतुदींप्रमाणे ग्राहक होत नाहीत असे या आयोगाचे स्पष्ट मत आहे.

5.    तक्रारदार क्र.1 ते 5 हे एकाच कुटुंबातील आहेत.  त्यांनी जाबदार बँकेचे शेअर्स खरेदी केले आहेत.  सबब, तक्रारदार यांचा जाबदार बँकेशी असलेला संबंध हा Touching to the business of society असलेने तक्रारदारांची तक्रार या आयोगासमोर चालणेस पात्र नाही असे या आयोगाचे स्पष्ट मत आहे.

6.    वरील सर्व बाबींचा विचार करता, प्रस्तुतची तक्रार या आयोगासमोर चालणेस पात्र नाही या निष्कर्षाप्रत हे आयोग येत आहे.  सबब, खालीलप्रमाणे आदेश करण्यात येतो. 

आदेश

1. तक्रारदाराची तक्रार या आयोगासमोर चालणेस पात्र नसलेने, प्रस्तुत वादविषयाबाबत योग्य त्या न्यायालयात दाद मागणेचा तक्रारदाराचा हक्क अबाधित ठेवून, प्रस्तुतची तक्रार दाखल करुन घेण्यापूर्वीच फेटाळण्यात येते.
2. खर्चाबाबत आदेश नाहीत.