(आदेश पारीत व्दारा- श्रीमती.चारु वि.डोंगरे, मा.सदस्या)
1. तक्रारदार यांनी सदरील तक्रार ग्राहक सरंक्षण कायदा 1986 कलम 12 अन्वये सामनेवाला यांनी द्यावयाचे सेवेत त्रुटी ठेवली आहे. म्हणून नुकसान भरपाई मिळणेसाठी दाखल केलेली आहे.
2. तक्रारदार यांची तक्रार थोडक्यात येणे खालील प्रमाणेः-
तक्रारदार हा राहणार रहेमतनगर संगमनेर ता.संगमनेर जि.अहमदनगर येथील रहिवासी आहे. तक्रारदार यांनी जि.प.अहमदनगर व पोट तुकडी तालुके पंचायत समिती श्रीरामपूर पैकी मौजे वडाळा महादेव ग्रामपंचायत हद्दीतील शेती प्लॉट मिळकत गट नं.98/1 एकूण क्षेत्र 00.35 हे.आर आकार पैकी विक्री करावाचे क्षेत्र 00.05 आर आकार ज्याची चतुः सिमा
पुर्वेस- लिहून देणार यांची उर्वरित मिळकत
दक्षिणेस- पवार यांची मिळकत
पश्चिमेस- बाबरिया यांची मिळकत
उत्तरेस- रस्ता ओढा व त्या पलिकडे शिंदे यांची मिळकत.
अशी चतुःसिमा असलेली शेती प्लॉट खरेदी करण्यासाठी जाब देणार हिचे मालकीची मिळकतीपैकी 00.05 आर कायमस्वरुपी खरेदी देण्याचे ठरवून तसा साठे खताचा दस्त दिनांक 26 ऑगस्ट,2015 रोजी नोटरी साहेब यांचेसमोर नोंदवून दिला. सदरहू मिळकतीचा सौदा रक्कम रु.12,51,000/- रुपयाला ठरला होता. त्यानुसार तक्रारदार यांनी सदरहू मिळकतीची किंमत रु.12,51,000/- सामनेवाला यांना वेळोवेळी दिलेले आहेत. सदरची रक्कम पुर्ण मिळालेनंतर सामनेवाला हिने साठेखताचा दस्त करुन दिलेला आहे. सदरची मिळकत ही शेत जमीन असल्याने खरेदी खत काही तांत्रिक अडचणीमुळे मा.सब रजिस्ट्रार श्रीरामपूर यांचसमोर होऊ शकले नाही. सदर मिळकतीचे खरेदी खताचे साठेखत साक्षीदाराचे समक्ष करुन दिलेले आहे. व सदरची मिळकत बिगर शेती झाल्यानंतर अथवा शेती प्लॉट जागेचे व्यवहार झालेनंतर सामनेवाला ही खरेदी खत करुन देण्याचे ठरले होते.
3. सामनेवाला हिने तक्रारदार यास साठेखत करुन दिल्यानंतर गेले दोन वर्षात सदरची शेतजमीन बिगर शेती करण्यासाठी कोणताही प्रयत्न केले नाहीत. सामनेवाला हे तक्रारदार यांचे नातेवाईक असल्याने तक्रारदाराने तिचेवर विश्वास ठेवला. परंतू मार्च,2018 मध्ये तक्रारदारास असे समजले की, सामनेवाला ही संपुर्ण नमुद मिळकत परस्पर त्रयस्त इसमास विक्री करण्याचे तयारीत आहेत, त्याबाबत तक्रारदार हिने सामनेवाला हिस विचारण केली असता तिने उडवा उडवीचे उत्तर दिले व खरेदी खत करुन देण्याची मागणी केली असता, तिने दिनांक 31.03.2018 रोजी नकार दिला. तसेच तक्रारदाराकडून घेतलेले पैसे परत करण्यासही नकार दिला. त्यामुळे तक्रारदारास सदरील तक्रार मंचात दाखल करुन त्यांनी परीच्छेद क्र.8. प्रमाणे मागणी केली केली आहे.
4. सदरच्या तक्ररीची नोटीस सामनेवालास प्राप्त होऊनही ते प्रकरणात हजर झाले नाहीत. त्यामुळे त्यांचे विरुध्द निशाणी 1 वर एकतर्फा चालविण्याचा आदेश पारीत करणेत आला.
5. तक्रारदार यांनी दाखल केलेले कागदपत्र, शपथपत्र व त्यांचे वकील श्री.इनामदार यांनी केलेला युक्तीवाद यावरुन न्याय निर्णयासाठी खालील मुद्दे उपस्थित होतात.
| मुद्दे | उत्तर |
1. | सदरची तक्रार या मंचाच्या कार्यक्षेत्रात येते काय.? | .....नाही. |
2. | तक्रारदार नमुद मागणी मिळण्यास पा्रत ठरतो काय.? | ... नाही. |
3. | आदेश काय ? | ...अंतीम आदेशानुसार. |
का र ण मि मां सा
6. मुद्दा क्र.1 व 2 ः- तक्रारदार हा रहेमतनगर ता.संगमनेर जि.अहमनगर येथील रहिवासी असून त्यांनी तक्रारीमध्ये कथन केल्याप्रमाणे सामनेवाला हिचेकडून तिच्या शेत जमीनीच्या मिळकतीपैकी 00.05 आर असे क्षेत्र खरेदी करण्यासाठी दिनांक 26.08.2015 रोजी नोटरी समोर साठेखत केले आहे. सदरहू साठे खत तक्रारदाराने प्रकरणात दाखल केलेले आहे. तक्रारदार यांनी सदरची मिळकतीचा सौदा 12,51,000/- रुपयास केलेला आहे व त्याप्रमाणे रक्कम सामनेवाला हिला दिलेली आहे असे कथन केले. साठेखतामध्ये मिळकतीचे रकमेबाबत नोंद आहे. पुढे तक्रारदाराने असे कथन केले की, काही तांत्रिक अडचणीमुळे खरेदीखत झाले नाही व सामनेवाला हिला तक्रारदाराने वेळोवेळी खरेदीखत करुन मागितले व त्यास सामनेवाला हिने नकार दिला व रक्कम परत देण्यासाठी नकार दिला. व सदरची मिळकत परस्पर विक्री करण्याचे तयारीत आहे असे तक्रारदाराचे कथन आहे. संपुर्ण तक्रारीचे अवलोकन केले असता मंचाचे असे निदर्शनास आले की, सदरची तक्रार ही या मंचासमक्ष चालू शकत नाही. सदरचा वाद हा दिवाणी स्वरुपाचा आहे. या मंचास सदरचे वादाविषयीची तक्रार चालविण्याचे अधिकार नाही. त्यामुळे तक्रारदाराने योग्य त्या मंचात तक्रार दाखल करावी व मागणी करावी. सबब मुद्दा क्र.1 व 2 चे उत्तर नकारार्थी देण्यात येते.
7. मुद्दा क्र.3 – मुद्दा क्र.1 व 2 चे विवेचनावरुन मुद्दा क्र.3 चे उत्तरार्थ खालील प्रमाणे अंतिम आदेश पारीत करण्यात येत आहे.
- अं ति म आ दे श -
1) तक्रारदार यांची तक्रार नामंजूर करण्यात येत आहे.
2) तक्रारकर्ता यांनी योग्य त्या मंचात तक्रार दाखल करावी.
3) या आदेशाची प्रत उभय पक्षकार यांना निःशुल्क दयावी.
4) या प्रकरणाची “ ब ” व “ क ” फाईल तक्रारकर्तास परत दयावी.