तक्रारदार गैरहजर. विरुध्‍द पक्षातर्फे वकील श्रीमती मालिनी राय हजर. त्‍यांचा विलंब माफीच्‍या  अर्जावर यु‍क्तिवाद ऐकण्‍यात आला. तक्रारदाराने दाखल केलेला अर्ज व त्‍यावरील विरुध्‍द पक्षाच्‍या  जवाबाचे अवलोकन केले असता असे निदर्शनास आले की सदरहू तक्रारीतील वादासंबंधी तक्रारीस कारण दिनांक 30 डिसेंबर, 2017 रोजी सुरु झाल्‍याचे दिसून येते. त्‍यामुळे तक्रारदाराने ही तक्रार दिनांक 30 डिसेंबर, 2019 पर्यत दाखल करावयास पाहिजे होती. तक्रारदाराने त्‍यांची तब्‍येत खराब होती व त्‍यानंतर कोविड-19 चा लॉकडाऊन होता त्‍यामुळे मुदतीत तक्रार दाखल न केल्‍याचे म्‍हटले आहे. वास्‍तविक पाहता कोविड लॉकडाऊनचा कालावधी दिनांक 16.03.2020 पासून सुरु झाला व त्‍या अनुषंगाने मा.सर्वोच्‍च न्‍यायालयाने ज्‍या तक्रारीची मुदत 16.03.2020 ते 28 फेब्रवारी, 2022 या दरम्‍यान संपलेली आहे त्‍यांनाच फक्‍त कोविड काळामधील मुदती संबंधी दिलासा दिलेला होता.

      तक्रारदाराने सदरहू अर्ज हा दिनांक 14 ऑक्‍टोबर, 2022 रोजी दाखल केल्‍याचे दिसून येते. तक्रारदाराने 30 डिसेंबर, 2019 ते 16 मार्च, 2020 या दरम्‍यान तक्रार का दाखल केली नाही याबाबत कुठलाही दिवसागणिक खुलासा त्‍यांच्‍या अर्जामध्‍ये केला नाही वा तसा कुठलाही पुरावा अभिलेखावर दाखल केला नाही. त्‍यामुळे तक्रारदाराचा विलंब माफीचा अर्ज नामंजूर करण्‍यात येतो. परिणामी तक्रारदाराची तक्रार क्र.CC/242/2022 मुदतबाहय ठरत असल्‍याने खारीज करण्‍यात येते.