आदेश

मा. अध्‍यक्ष, श्री. सचिन शिंपी यांच्‍या आदेशान्‍वये -

       तक्रारकर्त्‍याने विरुध्‍द पक्षाकडून दि. 30.09.2021 रोजी ऑनलाईन द्वारे रुपये 2800/-  चे शूजची मागणी केली होती. दि. 01.10.2021 रोजी विरुध्‍द पक्षाने आदेशाप्रमाणे शूज तक्रारकर्त्‍याला पाठविले होते,  परंतु ते योग्‍य प्रकारे फिट बसत नसल्‍यामुळे सदरचे शूज विरुध्‍द पक्षाला परत केल्‍यानंतर विरुध्‍द पक्षाने शूजची रक्‍कम रुपये 2800/- तक्रारकर्त्‍याला परत केली नाही, म्‍हणून तक्रारकर्त्‍याने प्रस्‍तुतची तक्रार दाखल केली होती.  त्‍यानंतर दि. 10.03.2022 रोजी तक्रारकर्त्‍याने पुरसीस दाखल करुन नमूद केले की, दि. 28.12.2021 रोजी त्‍याला शूज ची रक्‍कम प्राप्‍त झाली होती, ही बाब दि. 30.02.2022 रोजी पासबुक प्रिंट केल्‍यानंतर तक्रारकर्त्‍याला सदरची बाब लक्षात आली. परंतु तक्रारकर्त्‍याला नुकसानभरपाई रक्‍कम रुपये 5000/- मिळण्‍याकरिता प्रस्‍तुत  प्रकरण चाल‍वावयाचे आहे.

       तक्रारकर्त्‍याला विरुध्‍द पक्षाकडून ऑनलाईन द्वारे मागणी केल्‍याप्रमाणे दि. 01.10.2021 रोजी शूज प्राप्‍त झाले होते परंतु सदरचे शूज योग्‍य प्रकारे फिट बसत नसल्‍याच्‍या कारणाने तक्रारकर्त्‍याने ते शूज विरुध्‍द पक्षाला परत केलेले आहे. त्‍यानंतर दि. 28.12.2021 रोजी प्रोसेस करुन केवळ 2 महिन्‍यात विरुध्‍द पक्षाने रक्‍कम दिल्‍याचे रेकॉर्डवर तक्रारकर्त्‍याने स्‍वतः दाखल केलेले आहे. दि. 28.01.2022 रोजी प्रस्‍तुत तक्रार दाखल केलेली आहे.

       प्रत्‍यक्षात तक्रारकर्त्‍याला तक्रार दाखल करण्‍यापूर्वीच विरुध्‍द पक्षाकडून शूजची रक्‍कम प्राप्‍त झालेली असतांना देखील त्‍याबाबत वस्‍तुस्थिती जाणून न घेता तक्रारकर्त्‍याने प्रस्‍तुत तक्रार दाखल केलेली आहे. त्‍यामुळे तक्रारकर्त्‍याच्‍या तक्रारीत कोणतीही तथ्‍य नसल्‍याने प्रस्‍तुत तक्रार खारीज करण्‍यात येते.

       सबब खालीलप्रमाणे अंतिम आदेश पारित.

अंतिम आदेश

1. तक्रारकर्त्‍याला विरुध्‍द पक्षाकडून शूजची रक्‍कम प्रस्‍तुत तक्रार दाखल करण्‍यापूर्वीच प्राप्‍त झाल्‍याने प्रस्‍तुत तक्रारीतील वाद संपुष्‍टात आल्‍याने प्रस्‍तुत तक्रार खारीज करण्‍यात येते.  
2. उभय पक्षांना आदेशाची प्रथम प्रत निशुल्‍क द्यावी.