द्वारा-  श्री. एस. के. कापसे, मा. सदस्‍य 

                                     निकालपत्र

                      दिनांक 27 मार्च 2012

तक्रारदारांची तक्रार थोडक्‍यात खालीलप्रमाणे-

1.                     तक्रारदार विदयार्थी असून त्‍यांनी जाबदेणार क्र.1 यांच्‍याकडून दिनांक 29/8/2007 रोजी रुपये 34,500/- देऊन कॉम्‍पॅक 3424 ए यू लॅपटॉप खरेदी केला. त्‍यास एक वर्षांची वॉरंटी होती. लॅपटॉप खरेदी नंतर तीन ते चार महिन्‍यांनी हँगिंग बिलो 10 टक्‍के व लो बॅटरी बॅकअप या समस्‍या निर्माण झाल्‍या, म्‍हणून तक्रारदारांनी जाबदेणार क्र.2 यांच्‍याकडे दुरुस्‍तीसाठी सदरहू लॅपटॉप दिला. जाबदेणार क्र.2 यांनी लॅपटॉप मधील मदरबोर्ड बदलून दिला व परत समस्‍या निर्माण होणार नाही असे तक्रारदारांना आश्‍वासन दिले. परत मार्च/एप्रिल महिन्‍यात सीडी ड्राईव्‍ह, स्पिकर काम न करणे, स्क्रिन न दिसणे, लो बॅटरी बॅकअप या समस्‍या निर्माण झाल्‍या. लॅपटॉप मध्‍ये हार्डवेअर समस्‍या निर्माण झालेली असतांनाही सदरहू समस्‍या या सॉफटवेअर संदर्भातील आहे असे जाबदेणार क्र.2 यांनी तक्रारदारांना सांगितले. त्‍यानंतर लॅपटॉप दुरुस्‍त करुन, चालू स्थितीमध्‍ये जाबदेणार क्र.2 यांनी तक्रारदारांना तक्रार दाखल करेपर्यन्‍त दिलेला नाही. जाबदेणार यांनी दिलेला लॅपटॉप सदोष होता, वॉरंटी कालावधीतच त्‍यात समस्‍या निर्माण झालेल्‍या असतांनाही त्‍या दूर करुन चालू स्थितीतील लॅपटॉप जाबदेणार यांनी तक्रारदारांना दिलेला नाही, म्‍हणून तक्रारदारांनी दिनांक 26/5/2008 रोजी जाबदेणार यांना नोटीस देऊनही उपयोग झाला नाही म्‍हणून सदरील तक्रार. तक्रारदार जाबदेणार क्र.1 यांच्‍याकडून सदरहू लॅपटॉपच्‍या बदल्‍यात दुसरा नवीन मॉडेलचा लॅपटॉप मागतात, नुकसान भरपाई पोटी रुपये 57,500/-, व्‍याज, तक्रारीचा खर्च व इतर दिलासा मागतात. तक्रारदारांनी शपथपत्र व कागदपत्रे, अंतरिम अर्ज दाखल केला.

2.                     जाबदेणार क्र.1 व 2 यांना मंचाची नोटीस लागूनही गैरहजर. म्‍हणून त्‍यांच्‍याविरुध्‍द मंचाने एकतर्फा आदेश पारीत केला.

3.          जाबदेणार क्र.3 यांनी लेखी जबाब दाखल करुन तक्रारदारांच्‍या मागणीस विरोध दर्शविला. तक्रारदारांनी घेतलेल्‍या लॅपटॉपचे उत्‍पादक आहेत. तक्रारदारांनी लॅपटॉप संदर्भात दिनांक 12/12/2007 रोजी मशिन पॉवर ऑन होत होते परंतू डिसप्‍ले नव्‍हता अशी तक्रार केली होती, जाबदेणार यांनी मदर बोर्ड बदलून तक्रारीचे निराकरण केले होते. तसेच दिनांक 28/4/2008 रोजी तक्रारदारांनी लॅपटॉप आपोआप बंद होत होता अशी तक्रार केली होती, जाबदेणार यांनी परत मदर बोर्ड बदलून तक्रारीचे निराकरण केले होते. याव्‍यतिरिक्‍त तक्रारदारांची तक्रार नव्‍हती. मदर बोर्ड बदलल्‍यानंतर लॅपटॉप चांगले काम करत होता. तक्रारदारांनी नवीन सॉफटवेअर किंवा वॉरंटी मध्‍ये येत नसलेला भाग मागितला असल्‍यामुळे तक्रारदारांकडून जास्‍तीची रक्‍कम मागण्‍यात आलेली असावी. लॅपटॉप मध्‍ये उत्‍पादकिय दोष नव्‍हता, जाबदेणार यांच्‍या सेवेत त्रुटी नाही, एक वर्षांची वॉरंटी आता संपलेली आहे, जाबदेणार क्र.3 यांच्‍यात व रिटेलर मध्‍ये प्रिव्‍हीटी ऑफ कॉन्‍ट्रॅक्‍ट नाही, रिटेरल यांच्‍यावर त्‍यांचे नियंत्रण नाही, तक्रार मुदतीत नाही, तक्रार दाखल करण्‍यास कारण घडलेले नाही, म्‍हणून तक्रार नामंजुर करण्‍यात यावी अशी मागणी जाबदेणार क्र.3 करतात. जाबदेणार क्र.3 यांनी शपथपत्र व कागदपत्रे दाखल केली.

3.                तक्रारदार व जाबदेणार क्र.3 यांनी लेखी युक्‍तीवाद दाखल केला.

4.                उभय पक्षकारांनी दाखल केलेल्‍या कागदपत्रांची मंचाने पाहणी केली. तक्रारदारांनी दाखल केलेल्‍या दिनांक 29/8/2007 च्‍या पावतीचे अवलोकन केले असता तक्रारदारांनी जाबदेणार क्र.1 यांच्‍याकडून दिनांक 29/8/2007 रोजी कॉम्‍प्‍यॅक 3424 ए यू लॅपटॉप रुपये 34,500/- ला खरेदी केला होता, त्‍यास एका वर्षाची वॉरंटी होती ही बाब स्‍पष्‍ट होते. जाबदेणार क्र.3 यांनी लेखी जबाबात मान्‍य केल्‍याप्रमाणे सदरहू लॅपटॉपचे उत्‍पादक आहेत. तक्रारदारांनी दाखल केलेल्‍या जाबदेणार क्र.2 यांच्‍या स्‍पेअर पार्ट रिर्टन टॅग दिनांक 17/12/2007 चे अवलोकन केले असता त्‍यात हँगिंग बिलो 10 टक्‍के व लो बॅटरी बॅकअप या समस्‍या उदभवल्‍याचे नमूद करण्‍यात आलेले आहे. तसेच स्‍टेटस मध्‍ये सिस्‍टीम बोर्ड बदलल्‍याचे नमूद करण्‍यात आलेले आहे. तसेच जाबदेणार क्र.1 यांच्‍या सर्व्हिस रिपोर्ट नं 553 चे अवलोकन केले असता त्‍यात प्रॉब्‍लेम रिर्पोटेड व Action Taken “To be formatted & installed trial OS” असे नमूद करण्‍यात आलेले आहे. तक्रारदारांनी लॅपटॉप खरेदीपासून त्‍यात वॉरंटी कालावधीतच हँगिंग बिलो 10 टक्‍के व लो बॅटरी बॅकअप, सीडी ड्राईव्‍ह, स्पिकर्स, स्‍क्रीन यासंदर्भात समस्‍या निर्माण झाल्‍या होत्‍या. जाबदेणार क्र.3 यांनी लेखी जबाबात मान्‍य केल्‍याप्रमाणे मदर बोर्ड दोन वेळा बदलण्‍यात आला होता. मदर बोर्ड हा लॅपटॉप मधील महत्‍वाचा भाग असतो, वॉरंटी कालावधीतच जाबदेणार क्र.3 यांनी मान्‍य केल्‍याप्रमाणे सदरहू भाग दोन वेळा बदलूनही लॅपटॉप व्‍यवस्थित कार्यरत नव्‍हता ही बाब स्‍पष्‍ट होते. मदर बोर्ड बदलल्‍यानंतरही लॅपटॉप व्‍यवस्थित कार्यरत होता यासंदर्भात जाबदेणार क्र.3 यांनी कोणताही कागदोपत्री पुरावा तसेच तज्ञाचा अहवाल दाखल केलेला नाही, मदरबोर्ड बदलल्‍यानंतर तसेच चालू स्थितीत असलेला लॅपटॉप तक्रारदारांना परत करण्‍यात आलेला होता यासंदर्भातील पुरावा मंचासमोर दाखल करण्‍यात आलेला नाही, यावरुन तक्रारदारांना जाबदेणार क्र.1 यांनी विक्री केलेला लॅपटॉप सदोष होता ही बाब स्‍पष्‍ट होते, जरी जाबदेणार क्र.3 यांच्‍या म्‍हणण्‍यानुसार त्‍यांच्‍यात व रिटेलर मध्‍ये प्रिव्‍हीटी ऑफ कॉन्‍ट्रॅक्‍ट नसला, रिटेलरच्‍या बिझनेसवर त्‍यांचे नियंत्रण नसले तरी देखील तक्रारदारांनी जो लॅपटॉप विकत घेतला होता त्‍याचे उत्‍पादक जाबदेणार क्र.3 असल्‍यामुळे व जाबदेणार क्र.1 यांनी त्‍याची विक्री केलेली होती, जाबदेणार क्र.2 सेवा दिलेली होती, त्‍यामुळे जाबदेणार क्र.1 ते 3 यांनी वैयक्तिकरित्‍या किंवा संयुक्‍तरित्‍या तक्रारदारांना त्‍यांनी मागणी केल्‍याप्रमाणे तक्रारदारांनी विकत घेतलेले रक्‍क्‍म रुपये 34,500/- किंमतीचा कॉम्‍पॅक 3424 ए यू लॅपटॉप मॉडेल ऐवजी तेवढयाच किंमतीचे दुसरे नवीन चालू स्थितीतील लॅपटॉपचे मॉडेल दयावे असे आदेशित करणे न्‍याय होईल असे मंचाचे स्‍पष्‍ट मत आहे. लॅपटॉप अभावी तक्रारदार विदयार्थ्‍यांना निश्चितच शारिरीक, मानसिक व आर्थिक त्रास सहन करावा लागला आहे असे मंचाचे स्‍पष्‍ट मत आहे. तक्रारदारांनी नुकसान भरपाई पोटी रुपये 57,500/- व त्‍यावरील व्‍याजाची मागणी केलेली आहे, परंतू ही मागणी अवास्‍तव आहे, यासंदर्भात तक्रारदारांनी पुरावा दाखल केलेला नाही. यासंदर्भात मंचाने मा. सर्वोच्‍च न्‍यायालयाचा निवाडा 2000 DGLS 1448 चरणसिंह विरुध्‍द हिलींग टच हॉस्पिटल चा आधार घेतला. सदरहू निवाडयात नमूद केल्‍याप्रमाणे “It is for the Consumer Forum to grant compensation to the extent it finds it reasonable, fair and proper in the facts and circumstances of a given case according to established judicial standards where the claimant is able to establish his charge.”  म्‍हणून नुकसान भरपाई व तक्रारीच्‍या खर्चापोटी एकत्रित रक्‍कम रुपये  5,000/- मिळण्‍यास तक्रारदार पात्र आहेत असे मंचाचे मत आहे.

           वरील विवेचनावरुन व दाखल कागदपत्रांवरुन खालीलप्रमाणे आदेश पारीत करण्‍यात येत आहे-

                            :- आदेश :-

[1]    तक्रार अंशत: मान्‍य करण्‍यात येत आहे.

[2]    जाबदेणार क्र.1 ते 3 यांनी वैयक्तिकरित्‍या आणि संयुक्तिकरित्‍या रक्‍क्‍म रुपये 34,500/- किंमतीचे कॉम्‍पॅक 3424 ए यू लॅपटॉप मॉडेल ऐवजी तेवढयाच किंमतीचे दुसरे नवीन चालू स्थितीतील लॅपटॉपचे मॉडेल वॉरंटी कालावधीसह आदेशाची प्रत प्राप्‍त झाल्‍यापासून सहा आठवडयांच्‍या आत दयावा.

[2]    जाबदेणार क्र.1 ते 3 यांनी वैयक्तिकरित्‍या आणि संयुक्तिकरित्‍या तक्रारदारांना नुकसान भरपाई व तक्रारीच्‍या खर्चापोटी 5,000/- आदेशाची प्रत प्राप्‍त झाल्‍यापासून सहा आठवडयांच्‍या आत अदा करावी.

      आदेशाची प्रत उभय पक्षकारांना नि:शुल्‍क पाठविण्‍यात यावी.