तक्रारदार गैरहजर, त्‍यांचे प्रतिनिधी वकील श्रीमती शर्मिला हजर.

सदर तक्रार दिनांक 25/08/2015 रोजी स्विकृत करण्‍यात आली असून सामनेवालेंविरुध्‍द डाक देय पोस्‍टाने नोटीस बजावणी परतीची तारीख 19/10/2015 रोजी नेमण्‍यात आली होती. सर्व सामनेवाले यांना डाकदेय पोस्‍टाने पाठविलेल्‍या नोटीसचा लिफापा त्‍यांचा पत्‍ता माहिती नाही या कारणास्‍तव दिनांक 20/06/2016 रोजीच परत आलेला आहे. तरीही तक्रारदार व त्‍यांच्‍या वकीलांनी सामनेवाले यांचा नविन पत्‍ता शोधून त्‍या पत्‍त्‍यावर तक्रारीची नोटीस बजावणीकामी कोणत्‍याही प्रकारचे प्रयत्‍न केले नसल्‍याचे कागदपत्रंवरुन स्‍पष्‍ट झाले.

सबब जेव्‍हा नोटीस पत्‍ता अपूर्ण किंवा पत्‍त्‍यात नमूद केलेली व्‍यक्‍ती मिळून आली नाही, किंवा पत्‍ता सोडून गेले या कारणास्‍तव  परत आल्‍यानंतर 30 दिवसात नविन पत्‍ता देऊन नोटीस बजावणीकामी तक्रारदारांनी तजवीज करणे क्रमप्राप्‍त आहे. परंतु सदर कायद्याच्‍या तत्‍वाला तक्रारदार व त्‍यांच्‍या वकीलांनी त्‍यांना माहिती असलेल्‍या कारणास्‍तव हरताळ फासलेला दिसतो.

या उपरही तक्रारदार व त्‍यांच्‍या वकीलांना सामनेवाले यांचेवर तक्रारीची नोटीस बजावणीकामी प्रामाणिक इच्‍छा राहीली असती तर त्‍यांनी जाहिर नोटीस किंवा पर्यायी नोटीस सामनेवाले यांचेवर बजावणीकामी प्रयत्‍न केले असते. परंतु गेल्‍या चार वर्षापेक्षा जास्‍त कालावधीत वरीलप्रमाणे त्‍यांनी एकही प्रयत्‍न केलेला दिसत नाही. त्‍यामुळे  तक्रारदारांनी या मंचाचा अमूल्‍य वेळ वर नमूद केलेल्‍या कारणास्‍तव वाया घालवलेला दिसतो. सदरची बाब इतर पक्षकार जे न्‍यायासाठी या मंचात येतात त्‍यांच्‍यावर अन्‍याय करणारी आहे. म्‍हणून नोटीसची बजावणी 4 किंवा जास्‍त वर्षाच्‍या कालवधीची मुदत घेऊनही न केल्‍याने सदर तक्रार आज रोजी त्‍या कारणास्‍तव रद्द केलेली आहे.