(मंचाचा निर्णय: श्रीमती जयश्री येंडे - सदस्या यांचे आदेशांन्वये)
-// आ दे श //-
(पारित दिनांक : 29/12/2011)
1. प्रस्तुत तक्रार तक्रारकर्त्याने ग्राहक संरक्षण कायदा 1986 च्या कलम 12 अंतर्गत गैरअर्जदारां विरुध्द मंचात दि.13.09.2010 रोजी दाखल केली असुन प्रस्तुत
तक्रारीचे थोडक्यात स्वरुप खालिल प्रमाणे :-
2. प्रस्तुत प्रकरणातील तक्रारकर्त्याचे म्हणण्यानुसार त्याने गैरअर्जदारांकडून दि.30.01.2009 रोजी ‘होंडा युनिकॉन’, हे दुचाकी वाहन एकूण रक्कम रु.62,807/- एवढया मोबदल्यात खरेदी केले होते. तक्रारकर्त्याच्या मते सुरवातीपासुनच सदर वाहनात प्रचंड धुर निघू लागला म्हणून तक्रारकर्त्याने त्याबाबतची तक्रार गैरअर्जदारांकडे केली असता सदर वाहन महिन्याभरात सुरळीत चालेल असे गैरअर्जदारांनी सांगितले. म्हणून तक्रारकर्त्याने सदर वाहनावा वापर सुरु केला, परंतु दुस-या सर्व्हीसिंगनंतरही सदरचा दोष दुर झाला नाही. सदर वाहनाचे कॉम्प्रेसरमधे बिघाड निर्माण होऊन वाहन योग्य पध्दतीने चालन नव्हते, तक्रारकर्त्याने जुन-2009 मधे तिस-या सर्व्हीसिंगकरीता गैरअर्जदारांकडे नेले, परंतु वाहनातील दोष दुर झाला नाही. गैरअर्जदारांनी सदरच्या वाहनात उत्पादित दोष आहे असा निष्कर्ष काढून सदरचे वाहन बदलवुन देऊ असे आश्वासन देऊनही आज पावेतो वाहन बदलवुन दिले नाही, ही गैरअर्जदारांची कृति सेवेतील कमतरता आहे.
3. मंचामार्फत गैरअर्जदारांना नोटीस बजावण्यांत आली असता ते मंचात हजर झाले असुन त्यांनी आपला लेखी जबाब खालिल प्रमाणे दिलेला आहे...
गैरअर्जदारांच्या कथनानुसार तक्रारकर्त्याने सदर वाहन त्यांचेकडून खरेदी केल्याचे मान्य केले परंतु तक्रारकर्त्याचे इतर आरोप अमान्य केलेले आहे. गैरअर्जदारांच्या कथनानुसार सदरच्या वाहनात उत्पादित दोष नव्हता, तक्रारकर्त्याने तिन्ही तारखांना वाहन नियमीत सर्व्हीसिंगकरीता गैरअर्जदारांकडे नेले होते, त्यामुळे त्याचे जॉब कार्ड जतन करुन ठेवण्यांत आले नाही. वास्तविक तक्रारकर्त्याने त्याच्या वाहन पुस्तिकेतील सर्व्हीस रेकॉर्ड शीटमधे नोंद करावयास हवी होती, कारण सदर वाहनावर वारंटी दिलेली असते. तक्रारकर्त्याने सदरचे वाहन अटी व शर्तींनुसार योग्यरितीने न हाताळल्यामुळे वाहनात दोष निर्माण झाला व त्यामुळे देखील तक्रारकर्ता वारंटीचा हकदार नाही.
4. सदर वाहनाचा कॉम्प्रेसर योग्यरितीने काम करत नसल्याबाबतची तक्रार तक्रारकर्त्याने प्रथमतः दि.01.02.2010 रोजी केलेली आहे, त्यानंतर तक्रारकर्त्याचे संपूर्ण समाधान झाल्यानंतर सदर वाहनाची डिलेव्हरी देण्यांत आली. वरील सर्व बाबी लक्षात घेता त्यांचे सेवेत कमतरता नसल्याचे नमुद केलेले असुन सदर तक्रार खारिज करण्याची मंचास विनंती केलेली आहे.
5. सदर तक्रार मंचासमक्ष मौखिक युक्तीवादाकरीता दि.09.12.2011 रोजी आली असता दोन्ही पक्षांचे वकील हजर त्यांचा युक्तिवाद ऐकण्यांत आला. तक्रारीसोबत दाखल केलेल्या दस्तऐवजांचे अवलोकन केले असता मंच खालील प्रमाणे निष्कर्षाप्रत पोहचले.
-// नि ष्क र्ष //-
6. तक्रारकर्त्याने निर्विवादपणे गैरअर्जदारांकडून दि.30.01.2009 रोजी ‘होंडा युनिकॉन’, हे दुचाकी वाहन एकूण रक्कम रु.62,807/-(वाहनाचे मुल्य + इतर चार्जेस) एवढया मोबदल्यात खरेदी केले होते.
7. तक्रारकर्त्याच्या मते सदर वाहन घेतल्यापासुन त्यातून धुर निघत होता. दि.24.02.2009, 05.04.2009 आणि 20.06.2009 रोजीच्या सर्व्हीसिंगमधे देखील सदरचा दोष दूर झाला नाही. तिस-या सर्व्हीसिंगच्यावेळेस कॉम्प्रेसर ठिक काम करत नसल्याबाबत गैरअर्जदारांना सांगण्यांत आले होते व शेवटी दि.03.02.2010 रोजी सदरचे वाहन बंद पडले. गैरअर्जदारांच्या मते सदर वाहनात उत्पादकीय दोष नव्हता, तसेच वाहन नियमीतपणे सर्व्हीसिंगकरता आणण्यांत आलेले होते. या मंचाने गैरअर्जदारांना सदरचे ‘जॉब कार्ड’, दाखल करण्याचा आदेश दिला असता त्यांनी नियमीत सर्व्हीसिंग करण्यांत आलेल्या वाहनाचे ‘जॉब कार्ड’, जतन करुन न ठेवता नष्ट केल्या जाते असे सांगून ते सादर करण्यांस असमर्थता दर्शविली.
8. वाहन खरेदी केल्यावर एक वर्षाच्या आत वाहनाच्या सर्व्हीसिंग संबंधीचे ‘जॉब कार्ड’, जतन न करता नष्ट करणे ही बाब प्रचलित पध्दत बघता पटण्यासारखी नाही. तसेच वाहना संबंधीचे ‘जॉब कार्ड’, जतन करुन न ठेवता ते नष्ट करणे ही गैरअर्जदारांचे सेवेतील कमतरता आहे.
9. तक्रारकर्त्यास गैरअर्जदारांनी पाठविलेल्या दि.06.05.2011 रोजीचे पत्राचे अवलोकन केले असता सदर वाहना संबंधीची तक्रारकर्त्याची तक्रार होती असे दिसुन येते. एवढेच नव्हे तर तक्रारकर्त्याने तक्रारीत पान क्र.35 वर दाखल केलेले दि.01.02.2010 रोजीचे जॉब कार्डमधे देखील “Compressor Week”, असे नमुद केलेले आहे.
10. वरील सर्व बाबी लक्षात घेता वाहनाच्या कॉम्प्रेसरमधे दोष निर्माण झालेला होता व तो वारंटी कालावधीत होता, त्यामुळे तो विनामुल्य दुरुस्त करुन देण्याची जबाबदारी ही गैरअर्जदारांची आहे, असे मंचाचे मत आहे.
11. तक्रारकर्त्याचे वाहनामधे उत्पादकीय दोष असल्यामुळे सदरचे वाहन बदलवुन देण्याची तक्रारकर्त्याची मागणी पुराव्या अभावी मान्य करता येणार नाही.
वरील सर्व वस्तुस्थिती पाहता हे मंच खालिल प्रमाणे आदेश पारित करीत आहे.
-// अं ति म आ दे श //-
1. तक्रारकर्त्याची तक्रार अंशतः मंजूर करण्यांत येते.
2. गैरअर्जदारांना आदेश देण्यांत येतो की, त्यांनी तक्रारकर्त्यास ‘होंडा युनिकॉन’, या दुचाकी वाहनातील दोष दुरुस्त करुन द्यावेत. तसेच सदर दोष दुरुस्त होत नसल्यास संबंधीत पार्ट बदलवुन द्यावा, याकरीता गैरअर्जदारांनी तक्रारकर्त्यास कुठलेही शुल्क आकारु नये.
3. गैरअर्जदारांनी तक्रारकर्त्यास झालेल्या मानसिक व शारीरिक त्रासापोटी रु.5,000/- व तक्रारीच्या खर्चापोटी रु.3,000/- अदा करावे.
4. वरील आदेशाची अंमलबजावणी गैरअर्जदारांनी आदेशाची साक्षांकीत प्रत मिळाल्याचे दिनांकापासुन 30 दिवसांचे आंत करावी.