निकालपत्र :- (दि.12/09/2011) (सौ.वर्षा एन.शिंदे,सदस्या) (1) प्रस्तुतची तक्रार स्विकृत करुन सामनेवाला यांना नोटीसीचा आदेश झाला. सामनेवाला त्यांचे वकीलांमार्फत हजर होऊन त्यांनी लेखी म्हणणे दाखल केले आहे. उभय पक्षांचे वकीलांचा अंतिम युक्तीवाद ऐकला. तक्रारदाराचा पशु विमा योजना अंतर्गतचा योग्य व न्याय्य क्लेम नाकारुन सामनेवाला विमा कंपनीने सेवेत त्रुटी ठेवलेमुळे सदरची तक्रार दाखल केली आहे. (2) तक्रारदाराची थोडक्यात तक्रार अशी:- तक्रारदार यांचेकडे सन 2008 मध्ये पाच वर्षे वयाची एच.एफ क्रॉस जातीच सुदृध्द व सशक्त दुध देणारी गाय होती. सदर गाईकरिता तक्रारदार यांनी सामनेवाला क्र.2 एजन्सी मार्फत सामनेवाला क्र.1 यांचेकडे दि.28/03/2008 रोजी 3 वर्षाकरिता पी.टी.डी.(भाकड क्लेम) पॉलीसी केलेली होती. सदर पॉलीसीचा क्र.केओपीआर105678 आहे. सदर पॉलीसीची क्लेम रक्कम रु.14,000/- इतकी आहे. पॉलीसी उतरवतेवेळी पशुवैद्यकीय डॉ.शाम पाटील इचलकरंजी यांनी विमा उतरविलेल्या गायीची वैद्यकीय तपासणी करुन गाय सुदृढ असलेचे प्रमाणपत्र दिलेले आहे. सदर विमा उतरविलेली गाय ही भाकड असलेचे तक्रारदाराच्या लक्षात आलेनंतर तक्रारदाराने योग्य त्या पशुवैद्यकीय पशुवैद्यकीय अधिका-याकडून गाईचे वैद्यकीय परिक्षण करुन घेतले व त्यानंतर डॉक्टरांच्या सल्लयानुसार सदर गायीवर वैद्यकीय उपचार करुन पाहिले तथापि पशुवैद्यकीय अधिका-यांनी सदर विमा उतरविलेली गाय ही भाकड झाली असल्याचे सांगितले. त्यानंतर तक्रारदार यांनी सामनेवाला क्र.2 मार्फत सामनेवाला क्र.1 यांचेकडे दि.20/02/2009 रोजी सदर गाय भाकड असलेमुळे पॉलीसीच्या रक्कमेची मागणी केली असता सामनेवाला क्र.1 यांनी दि.16/7/2009 रोजीच्या पत्राने मुळ पॉलीसी पाठविण्याची विनंती केली. त्यानुसार तक्रारदार यांनी दि.01/08/2009 रोजी रजि.ए.डी.पोष्टाने मूळ पॉलीसी प्रमाणपत्र सामनेवाला क्र.1 यांचेकडे पाठवले आहे. सदर पॉलीसी क्लेम संदर्भात तक्रारदार यांनी सामनेवाला क्र. 1 व 2 यांचेकडे वारंवार चौकशी केली असता त्यांनी उडवाउडवीची उत्तरे दिली. त्यामुळे तक्रारदाराने दि.04/11/2010 रोजी सामनेवाला क्र.1 यांना वकीलामार्फत कायदेशीर नोटीस पाठवली. सदरची नोटीस सामनेवाला यांना मिळूनही त्यांनी क्लेम संदर्भात कोणताही निर्णय कळवलेला नाही. त्यामुळे प्रस्तुतची तक्रार दाखल करणे भाग पडले आहे. सबब तक्रारदाराची तक्रार मंजूर होऊन पॉलीसी रक्कम रु.14,000/-, आर्थिक व मानसिक त्रासापोटी रक्कम रु.10,000/- सामनेवाला यांचेकडून वसुल होऊन मिळावेत अशी विनंती तक्रारदाराने सदर मंचास केली आहे. (3) तक्रारदाराने आपल्या तक्रारीच्या पुष्टयर्थ सामनेवाला यांनी तक्रारदारास पाठवलेले पत्र, डॉक्टरांनी दिलेले सर्टीफिकेट, सामनेवाला यांचे कॅटल पोस्ट मार्टेम रिपोर्ट व कॅटल व्हॅल्यूएशन रिपोर्ट, कॅटल डेथ सर्टीफिकेट, पशु विम्याबद्दल दाव्याचे प्रमाणपत्र, कॅटल P T D सर्टीफिकेट, व कॅटल पोस्ट P T D रिपोर्ट, ट्रिटमेंट सर्टीफिकेट, तक्रारदाराने सामनेवाला यांना वकीलांमार्फत पाठवलेली नोटीस, सामनेवाला यांना मूळ पॉलीसी पेपर पाठवलेचे पोष्टाची पोहोच पावती इत्यादी कागदपत्रे दाखल केली आहेत. (4) सामनेवाला यांनी दाखल केलेल्या लेखी म्हणणेनुसार तक्रारदाराची तक्रार परिच्छेदनिहाय नाकारली आहे. सामनेवाला यांनी कोणत्याही प्रकारची सेवेमध्ये त्रुटी केलेली नाही म्हणून सदर तक्रार अर्ज मे.मंचात चालणेस पात्र नाही. सामनेवाला आपल्या लेखी म्हणणेत पुढे सांगतात, सामनेवाला यांनी तक्रारदारास दि.15/03/2010 रोजी दावा देय नसलेबाबत कळवलेले आहे. पॉलीसी/कव्हरनोट मधील वर्णन व अन्य कागदपत्रांतील गायीचे वर्णनामध्ये विसंगती आहे. तसेच तक्रारदाराने गायीच्या उपचारासंबंधीत प्रमाणपत्र व संबंधीत औषधांची बीले दाखल केलेली नाहीत. तक्रारदाराची सदर गाय ही विमा पॉलीसी उतरवलेपासून 15 दिवसातच आजारग्रस्त झालेली आहे व विमा पॉलीसीमधील क्र.3 प्रमाणे विमा कंपनी जबाबदार नाही. सबब सामनेवाला विमा कंपनीकडून कोणत्याही प्रकारे सेवेमध्ये त्रुटी राहिलेली नाही. त्यामुळे तक्रारदाराची तक्रार खर्चासह नामंजूर करावी अशी विनंती सामनेवाला यांनी सदर मंचास केली आहे. (5) सामनेवाला यांनी आपल्या लेखी म्हणणेसोबत विमा पॉलीसी व सामनेवाला यांचे पत्र इत्यादी कागदपत्रे दाखल केली आहेत. (6) तक्रारदाराची तक्रार, दाखल कागदपत्रे, सामनेवाला यांचे लेखी म्हणणे, दाखल कागदपत्रे, तक्रारदारचे वकील व सामनेवाला क्र.1 चे वकीलांचा युक्तीवाद इत्यादीचे बारकाईने अवलोकन केले असता पुढील महत्वाचे मुद्दे निष्कर्षासाठी येतात. 1. सामनेवालांनी सेवेत त्रुटी ठेवली आहे काय ? --- होय. 2. काय आदेश ? --- शेवटी दिलेप्रमाणे मुद्दा क्र.1 व 2:- तक्रारदारचे गायीचा विमा सामनेवाला क्र.1 यांचेकडे सामनेवाला क्र.2 मार्फत दि.28/3/2008 रोजी 3 वर्षाकरिता पॉलीसी क्र.केओपीआर105678 अन्वये उतरविलेला होता. सदर विमा संरक्षीत रक्कम ही रु.14,000/- इतकी होती वसदरची विमा पॉलीसी ही पीटीडी (भाकड क्लेम पॉलीस) होती. सदर पॉलीसी उतरवितेवेळी पशुवैद्य डॉ. शाम पाटील यांनी संपूर्ण तपासणी केलेनंतरची उतरविलेली होती. प्रस्तुत गाय ही भाकड आहे हे तक्रारदाराचे लक्षात आलेवर पशुवैद्यकीय अधिका-यांकडून तिच्यावर उपचार करुनही सदर गाय भाकड झालेचे त्यांनी सांगितले. त्यामुळे दि.20/02/2009 क्लेमची मागणी केली असता दि.16/07/2009 चे पत्रान्वये सामनेवाला यांनी मूळ पॉलीसी पाठवणेची विनंती केली त्यानुसार दि.01/08/2009 रोजी मूळ पॉलीसी रजि.ए.डी.ने सामनेवाला क्र.1 यांना पाठवून दिली. मात्र सदर क्लेमबाबत कोणतीही कार्यवाही न केलेने दि.04/11/2010 रोजी वकील नोटीस पाठवलेचे दिसून येते ही वस्तुस्थिती तक्रारदाराने दाखल केलेल्या कागदपत्रांवरुन निर्विवाद आहे. तरीही सामनेवालांनी क्लेमबाबत कोणताही निर्णय दिलेला नाही ही सामनेवालांची सेवेतील त्रुटी आहे. सामनेवालांचे वकीलांनी युक्तीवादाच्या वेळेस पॉलीसी मान्य केलेली आहे. तसेच कागदपत्रेही मान्य केलेली आहेत. सामनेवाला यांनी आपल्या लेखी म्हणणेमध्ये दि.15/03/2010 रोजी दावा देय नसलेबाबतचे प्रतिपादन केले आहे. त्यासंदर्भात एक पत्रही दाखल केलेले आहे. मात्र सदर पत्र तक्रारदारास प्राप्त झालेबाबतचा कोणताही पुरावा दाखल केलेला नाही. कारण दि.04/11/2010 रोजी तक्रारदाराचे वकीलांनी क्लेम निर्णित करणेबाबत नोटीस पाठवलेली आहे. तसेच नमुद गाय ही पॉलीसी उतरविलेपासून 15 दिवसांचे आत आजारी झालेचे नमुद केले आहे.मात्र सामेनवाला यांचे वकीलांनी युक्तीवादाच्या वेळेस पॉलीसी उतरवलीपासून 15 दिवसांनतर लगेच म्हणजे 17 दिवसांनी भाकड झालेचे प्रतिपादन केले आहे याची न्यायिक नोंद या मंचाने घेतली आहे. वरील विस्तृत विवेचानाचा विचार करता सामनेवालांच्या पॉलीसीच्या अटी व शर्ती प्रमाणे नमुद गाय पॉलीसी उतरविलेपासून 15 दिवसांमध्ये भाकड झालेली नसून ती 15 दिवसानंतर भाकड झालेली आहे. त्यामुळे तक्रारदार विमा पॉलीसी प्रमाणे रक्कम रु.14,000/- व्याजासह मिळणेस पात्र आहे. आदेश 1) तक्रारदाराची तक्रार मंजूर करण्यात येते. 2) सामनेवाला विमा कंपनीने तक्रारदारास पॉलीसीप्रमाणे असलेली रक्कम रु.14,000/- (रु.दहा हजार फक्त) अदा करावी. सदर रक्कमेवर दि.15/03/2010 पासून ते संपूर्ण रक्कम मिळेपर्यंत द.सा.द.शे.9 टक्के प्रमाणे व्याज अदा करावे. 3) सामनेवाला यांनी तक्रारदारास तक्रारीच्या खर्चापोटी रु.1,000/-(रु.एक हजार फक्त) अदा करावेत.
| [HONABLE MRS. Mrs.V.N.Shinde] MEMBER[HONABLE MR. Mr.M.D.Deshmukh] PRESIDENT | |