जिल्‍हा ग्राहक तक्रार निवारण मंच, सोलापूर.

ग्राहक तक्रार क्रमांक : 230/2010.

                                                                     तक्रार दाखल दिनांक :07/05/2010.   

                                                                     तक्रार आदेश दिनांक : 10/05/2011.   

सुमन दगडू घागरे, वय 66 वर्षे, व्‍यवसाय : घरकाम,

रा. मु.पो. मोहोळ, ता. मोहोळ, जि. सोलापूर.                          तक्रारदार

                        विरुध्‍द

मॅनेजर, रिलायन्‍स जनरल इन्‍शुरन्‍स कंपनी, शाखा सोलापूर.               विरुध्‍द पक्ष

                        कोरम :-  सौ. संगिता एस. धायगुडे,  अध्‍यक्ष

                     सौ. संजीवनी एस. शहा, सदस्‍य

                        तक्रारदार यांचेतर्फे विधिज्ञ :  व्‍ही.व्‍ही. नागणे

                        विरुध्‍द पक्ष यांचेतर्फे विधिज्ञ : विदुला आर. राव

आदेश

सौ. संगिता एस. धायगुडे, अध्‍यक्ष यांचे द्वारा :-

1.     प्रस्‍तुत तक्रारीमध्‍ये तक्रारदार यांनी उपस्थित केलेला विवाद थोडक्‍यात असा आहे की, विरुध्‍द पक्ष (संक्षिप्‍त रुपामध्‍ये ‘विमा कंपनी’) यांच्‍या पशु विमा योजनेनुसार त्‍यांच्‍या होस्‍टर्न जातीच्‍या गाईचा दि.30/3/2007 रोजी पॉलिसी क्र.1702-06-3012-000001/5873 अन्‍वये तीन वर्षाकरिता विमा उतरविला आहे. विमा कंपनीने त्‍यांच्‍या गाईस बिल्‍ला क्रमांक 31808 दिला. विमा कंपनीच्‍या कर्मचा-यांनी तो बिल्‍ला व्‍यवस्थित न बसविल्‍यामुळे गळून पडला आणि त्‍याबाबत विमा कंपनीस दि.6/8/2007 रोजी लेखी पत्राद्वारे कळवून नवीन बिल्‍ला बसविण्‍याची विनंती केली. दि.20/8/2008 रोजी त्‍यांची गाय मयत झाली. त्‍यानंतर त्‍यांनी कायदेशीर कागदपत्रांची पुर्तता करुनही विमा रक्‍कम देण्‍यास टाळाटाळ करण्‍यात येत आहे. त्‍याबाबत अभियोक्‍त्‍यांमार्फत नोटीस पाठविली असता, ‘नो टॅग नो क्‍लेम’ असे उत्‍तर देऊन विमा दावा नाकारला. त्‍यामुळे तक्रारदार यांनी प्रस्‍तुत तक्रारीद्वारे विमा रक्‍कम रु.20,000/- व्‍याजासह मिळावी आणि मानसिक त्रासापोटी रु.50,000/- व खर्चापोटी रु.5,000/- मिळावेत, अशी विनंती केली आहे.

2.    विमा कंपनीने रेकॉर्डवर म्‍हणणे दाखल केले असून तक्रार अमान्‍य केली आहे. त्‍यांच्‍या म्‍हणण्‍यानुसार निश्चित अटी व शर्तीस अधीन राहून त्‍यांनी विमा पॉलिसी जारी केलेली आहे. पॉलिसीच्‍या अट क्र.3 नुसार टॅग तुटलेल्‍या अवस्‍थेत सादर केल्‍यास विमा क्‍लेम देय नाही. त्‍या कारणामुळे तक्रारदार यांना विमा रक्‍कम देय नाही आणि त्‍याप्रमाणे दि.21/3/2009 च्‍या पत्राद्वारे कळविले आहे. त्‍यांच्‍या सेवेमध्‍ये त्रुटी नसल्‍यामुळे शेवटी त्‍यांनी तक्रार खर्चासह रद्द करण्‍याची विनंती केली आहे.

3.    तक्रारदार यांची तक्रार, विरुध्‍द पक्ष यांचे म्‍हणणे व दाखल कागदपत्रांचे अवलोकन करता, तसेच युक्तिवाद ऐकल्‍यानंतर निष्‍कर्षासाठी खालील मुद्दे उपस्थित होतात.

            मुद्दे                                 उत्‍तर

1. विरुध्‍द पक्ष यांनी तक्रारदार यांना त्रुटीयुक्‍त सेवा

     दिली आहे काय ?                                                                              होय.

2. तक्रारदार विमा रक्‍कम मिळविण्‍यास पात्र आहेत काय ?            होय.

3. काय आदेश ?                                       शेवटी दिल्‍याप्रमाणे.

निष्‍कर्ष

4.    मुद्दा क्र. 1 ते 3 :- तक्रारदार यांच्‍या गाईचा विमा कंपनीकडे विमा उतरविण्‍यात आल्‍याचे व विमा कालावधीमध्‍ये गाय मृत्‍यू पावल्‍याविषयी विवाद नाही. तसेच गाईच्‍या मृत्‍यूनंतर दाखल केलेला विमा क्‍लेम विमा कंपनीने नामंजूर केल्‍याविषयी विवाद नाही.

5.    विमा कंपनीने प्रामुख्‍याने पॉलिसी अट क्र.3 चा आधार घेत 'नो टॅग नो क्‍लेम' तत्‍वानुसार विमा दावा नामंजूर करण्‍यात येत असल्‍याचे नमूद आहे. वास्‍तविक पाहता, तक्रारदार यांनी दि.6/8/2007 च्‍या पत्राद्वारे त्‍यांच्‍या गाईच्‍या कानातील टॅग हरविल्‍यामुळे नवीन टॅग बसविण्‍याची विनंती केलेली आहे. निर्विवादपणे जनावराची ओळख पटविण्‍यासाठी संबंधीत जनावराच्‍या कानामध्‍ये टॅग बसविण्‍यात येतो. त्‍यामुळे विमा संरक्षीत गाईची ओळख बिल्‍ल्‍याच्‍या आधारे कायम राहण्‍यासाठी विमा कंपनीने नवीन टॅग बसविण्‍याची कार्यवाही झाली काय ? किंवा कसे ? हे स्‍पष्‍ट केलेले नाही. आमच्‍या मते, गाईच्‍या कानातील टॅग हरविल्‍यानंतर नवीन टॅग बसविण्‍याची कार्यवाही पूर्ण करुन घेणे विमा कंपनीवर बंधनकारक होते आणि सदरचे कर्तव्‍य त्‍यांनी पूर्ण केले नसल्‍याचे निदर्शनास येते.

6.    अशा परिस्थितीत, तक्रारदार यांचा विमा क्‍लेम अनुचित व तथ्‍यहीन कारणास्‍तव नाकारुन विमा कंपनीने सेवेमध्‍ये त्रुटी केल्‍याचे सिध्‍द होते आणि तक्रारदार विमा रक्‍कम रु.20,000/- क्‍लेम नाकारल्‍याच्‍या तारखेपासून द.सा.द.शे. 9 टक्‍के व्‍याज दराने मिळविण्‍यास पात्र ठरतात, या मतास आम्‍ही आलो आहोत. शेवटी आम्‍ही खालील आदेश देत आहोत.

आदेश

      1. विरुध्‍द पक्ष यांनी तक्रारदार यांना विमा रक्‍कम रु.20,000/- दि.21/3/2009 पासून द.सा.द.शे. 9 टक्‍के व्‍याज दराने या आदेशाच्‍या प्राप्‍तीपासून तीस दिवसाचे आत द्यावी.

      2. विरुध्‍द पक्ष यांनी तक्रारदार यांना तक्रार खर्चापोटी रु.1,000/- या आदेशाच्‍या प्राप्‍तीपासून तीस दिवसाचे आत द्यावेत.

      3. उपरोक्‍त नमूद रक्‍कम विहीत मुदतीत न दिल्‍यास तेथून पुढे विरुध्‍द पक्ष यांनी द.सा.द.शे. 12 टक्‍के दराने व्‍याज द्यावे.

 (सौ. संजीवनी एस. शहा)                                         (सौ. संगिता एस. धायगुडे÷)

सदस्‍य                                                                    अध्‍यक्ष

          जिल्‍हा ग्राहक तक्रार निवारण मंच, सोलापूर.

                          ----00----

 (संविक/6511)