निकालपत्र
निकाल दिनांक – ०४/१२/२०१९
(द्वारा मा.सदस्या : श्रीमती.चारु विनोद डोंगरे)
___________________________________________________________
१. तक्रारदार ही मु.गुंजाळवाडी पो.राजापूर, ता.संगमनेर जि. अहमदनगर येथील रहिवासी आहे. तक्रारदार हिने सामनेवाले पद्मावती ऑटोमोबॉईल्स, संगमनेर यांच्याकडुन हिरो डयुट स्कुटी, चेसीस नं.एम.बी.एल.आय.एफ. १६ इ एस.जी.जी.जे.२३४८, इंजीन नं.जे.एफ.३३ ए.ए.जी.जी.जे.३२९४ अश वर्णनाची गाडी खरेदी केली. या कालावधीमध्ये मा.सर्वोच्च न्यायालयाने दिलेल्या आदेशानुसार बी.एस.३ गाड्या ३१ मार्च नंतर विकण्यास बंदी केली. त्यामुळे त्यांची विक्री व्हावी म्हणुन हिरो कंपनीने बी.एस.३ गाडयावर रूपये १४,०००/- ची सवलत दिली. ही स्किम पद्मावती शोरूमने दिनांक ३०-०३-२०१७ ते ३१-०३-२०१७ दोन दिवस चालु केली. सदरच्या गाडीची मुळ किंमत ६३,८३१/- रूपये अशी होती. तक्रारदार यांनी दिनांक २८-०३-२०१७ रोजी शोरूमध्ये जाऊन पावती क्र.७६०३ नुसार रूपये ५,०००/- जमा केले व त्यानंतर दिनांक २९-०३-२०१७ रोजी पावती क्र.१३२०७ नुसार रक्कम रूपये ३०,८३१/- असे एकुण रक्कम रूपये ३५,८३१/- जमा केले आहे. तसेच तक्रारदार हिला गाडीची मुळ किंमतीमधुन डिस्काऊंट रूपये १४,०००/- व फ्रि इन्शुरन्सचे रूपये १,७२७/- वजा करून रक्कम रूपये १२,२७३/- दिनांक १०-०४-२०१७ रोजी जमा करण्याचे ठरले.
२. दिनांक ०८-०४-२०१७ रोजी वरील शोरूमध्ये श्रीरामपुर येथील आर.टी.ओ. साहेब यांनी सदर गाडीचे कागदपत्र तपासुन गाडी पासींग कागदपत्रावर स्वाक्षरी केली. सदरचे पासिंगचे कागदपत्र सामनेवाले यांच्या मॅनेजरकडे पुन्हा जमा करून घेतले. तक्रारदार यांची कागदोपत्री खरेदी दिनांक ३१-०३-२०१७ तसेच इन्शुरन्स कागदपत्रे, टॅक्स इनव्हॉईस फॉर्मवर फॉर्म नं.२९ वर दिनांक ३१-०३-२०१७ असे स्पष्ट नमुद आहे. त्या कारणाने रक्कम रूपये १४,०००/- एवढा डिस्काऊंट मिळणेसाठी तक्रारदार पात्र आहे. वरील सर्व बाबी शोरुमचे मॅनेजर यांनी डिस्काऊंटची रक्कम रूपये १४,०००/-, मोफत इन्शुरन्सचे रूपये १,७२७/- जमा करण्यास नकार दिला असुन पुर्ण रक्कम रूपये २८,०००/- जमा करण्यास सांगितले. प्रत्यक्षात तक्रारदार यांनी सामनेवाले यांना रूपये १२,२७३/- एवढी रक्कम देणे बाकी आहे व ती रक्कम देण्यास तक्रारदार तयार आहे. वरील सर्व परिस्थिती पाहता सामनेवाले यांनी तक्रारदार यांची फसवणुक केलेली असुन डिस्काऊंट व फ्री इन्शुरन्स अशी एकुण रक्कम रूपये १५,७२७/- देण्यास टाळाटाळ केली आहे, तसेच गाडीचे कागदपत्र सामनेवाले यांचे ताब्यात आहे. तक्रारदार हे गाडीची उर्वरीत रक्कम डिस्काऊंट व इन्शुरन्स मिळुन रूपये १२,२७३/- जमा करण्यास तयार आहे. परंतु सामनेवाले यांनी कोणताही प्रस्ताव दिला नाही. म्हणुन तक्रारदर हिने तक्रार दाखल करून तक्रारीतील परिच्छेद क्रमांक १० प्रमाणे मागणी केली आहे.
३. सामनेवाले यांना नोटीस पाठविण्यात आली. त्यानंतर ते वकिलामार्फत प्रकरणात हजर झाले. मात्र त्यांनी त्यांची लेखी कैफीयत दाखल केली नाही. त्यामुळे निशाणी १ वर त्यांचेविरूध्द विना कैफीयत तक्रार चालविण्याचा आदेश पारीत करण्यात आला.
४. तक्रारदार हिने दाखल केलेले केलेले कागदपत्र, तसेच त्यांनी केलेला युक्तिवाद यावरून न्यायनिर्णयासाठी खालील मुद्दे उपस्थित होतात व त्यांचे उत्तर आम्ही सकारण खालील विवेचनाप्रमाणे देत आहोत.
अ.नं. | मुद्दे | निष्कर्ष |
(१) | तक्रारदार ही सामनेवालेंची ग्राहक आहेत काय ? | होय |
(२) | सामनेवाले यांनी सेवेत त्रुटी दिली आहे काय ? | नाही |
(३) | आदेश काय | अंतिम आदेशा प्रमाणे |
कारणमिमांसा
५. मुद्दा क्र. (१) : तक्रारदार ही मु.गुंजाळवाडी पो.राजापूर, ता.संगमनेर जि. अहमदनगर येथील रहिवासी आहे. तक्रारदार हिने सामनेवाले पद्मावती ऑटोमोबॉईल्स, संगमनेर यांच्याकडुन हिरो डयुट स्कुटी, चेसीस नं.एम.बी.एल. आय.एफ. १६ इ एस.जी.जी.जे.२३४८, इंजीन नं.जे.एफ.३३ ए.ए. जी. जी.जे.३२९४ अश वर्णनाची गाडी खरेदी केली. या कालावधीमध्ये मा.सर्वोच्च न्यायालयाने दिलेल्या आदेशानुसार बी.एस.३ गाड्या ३१ मार्च नंतर विकण्यास बंदी केली. त्यामुळे त्यांची विक्री व्हावी म्हणुन हिरो कंपनीने बी.एस.३ गाडयावर रूपये १४,०००/- ची सवलत दिली. ही स्किम पद्मावती शोरूमने दिनांक ३०-०३-२०१७ ते ३१-०३-२०१७ या कालावधीची होती, असे तक्रारदार हिने कथन केले आहे. सदर गाडीची मुळ किंमत ६३,८३१/- रूपये अशी होती. तक्रारदार यांनी दिनांक २८-०३-२०१७ रोजी शोरूमध्ये जाऊन पावती क्र.७६०३ नुसार रूपये ५,०००/- जमा केले व त्यानंतर दिनांक २९-०३-२०१७ रोजी पावती क्र.१३२०७ नुसार रक्कम रूपये ३०,८३१/- असे एकुण रक्कम रूपये ३५,८३१/- जमा केले आहे. त्याबाबतचे दस्तऐवज तक्रारदार हिने प्रकरणात दाखल केलेले आहेत. सदर पावत्या नि.३/१० व ३/११ वर दाखल आहेत. यावरुन स्पष्ट होते की, तक्रारदार व सामनेवाले यांच्यामध्ये ग्राहक व विक्रेता असे नातेसंबंध निर्माण झाले. सबब मुद्दा क्र.१ चे उत्तर होकारार्थी देण्यात येत आहे.
६. मुद्दा क्र. (२) : तक्रारदार हिने मा.सर्वोच्च न्यायालयाने दिलेल्या आदेशानुसार बी.एस.३ गाड्या ३१ मार्च नंतर विकण्यास बंदी केली. त्यामुळे त्यांची विक्री व्हावी म्हणुन हिरो कंपनीने बी.एस.३ गाडयावर रूपये १४,०००/- ची सवलत दिली. ही बाब स्पष्ट करणेसाठी तक्रारदार हिने प्रकरणात सदर कालावधीचे टॅक्स इनव्हॉईस दाखल केल आहे. त्यावर रूपये १४,०००/- एवढा डिस्काउंट कमी केल्याचे नमुद आहे. सदरहु वाहनाची मुळ किंमत ६३,८३१/- रूपये अशी होती, असे तक्रारीत कथन केले. तक्रारदार हिने पावती क्रमांक ७६०३ व ७६३१ नुसार एकुण रक्कम रूपये ३५,८३१/- सामनेवालेकडे भरले. वाहनाच्या मुळ किंमतीत डिस्काउंट रक्कम रूपये १४,०००/- व इन्शुरन्सची रक्कम रूपये १,७२७/- एवढी जादा रक्कम रूपये १२,२७३/- तक्रारदार हिने सामनेवालेकडे भरावयाचे होते, असे तक्रारीत कथन केले. परंतु याबाबत कागदोपत्री पुरावा प्रकरणात दाखल नाही. तक्रारदाराला डिस्काऊंटची रक्कम ही वजा करण्याचे तक्रारदार व सामनेवाले यांच्यामध्ये ठरले होते, ही बाब स्पष्ट करणारे दस्त दाखल नाही. तसेच तक्रारदार हिने कथन केले की, दिनांक ३१-०३-२०१७ रोजी तिचे वाहनाची श्रीरामपुर येथील आर.टी.ओ. साहेब यांनी सदर गाडीचे कागदपत्र तपासुन गाडी पासींग कागदपत्रावर स्वाक्षरी केली. परंतु ते कागदपत्र सामनेवाले यांनी तक्रारदाराला दिले नाही.
तसेच तक्रारदाराचे सदरील वाहन पासींग करण्याची किती रक्कम होती व ती पासींग सामनेवाले यांनी करून द्यावयाची, याबाबत तक्रारीत कथन केलेले नाही व तसा कागदोपत्री पुरावा दाखल केलेला नाही. त्यामुळे गाडी पासींग करून देण्याची जबाबदारी सामनेवालेंची होती, ही बाब स्पष्ट होत नाही व दाखल टॅक्स इनव्हॉईस मध्ये रजिस्ट्रेशन चार्जेस नमुद नाही. तसेच तक्रारदाराने स्वतः तक्रारीत कथन केले की, मा.सर्वोच्च न्यायालयाने दिलेल्या आदेशानुसार बी.एस.३ गाड्या ३१ मार्च नंतर विकण्यास बंदी केली. त्यामुळे तक्रारदाराने जे वाहन खरेदी केले ते ३१ मार्च पुर्वी केलेले आहे. तसेच गाडी पासींग करून देणे व पासींग रकमेबाबत कोणताही दस्तऐवज नमुद नाही. त्यामुळे सदरचे वाहनाची पासींग सामनेवाले यांनी करून देणे व त्यांना जबाबदार ठरविणे संयुक्तिक नाही, या निष्कर्षाप्रत हे मंच येत आहे. तक्रारदाराने हिने स्वतः कथन केले आहे की, सामनेवालेकडे त्यांनी वाहनाची संपुर्ण रक्कम भरलेली नाही, ती रक्कम भरण्यास तयार असल्याचे तक्रारीत कथन केले. मात्र रजिस्ट्रेशन कुणी करायचे याबाबत कागदपत्र दाखल नाहीत. सामनेवाले हे तक्रारीत हजर झाले मात्र लेखी कैफीयत दाखल केली नाही, त्यामुळे तक्रारीत त्याचे स्पष्टीकरण आले नाही. मात्र तक्रारदाराने केलेल्या कथनामध्ये तक्रारदार हिने सामनेवालेकडुन वाहन खरेदी केले ही बाब स्पष्ट होते. परंतु वाहनाचे पासींग करून देणेविषयीची बाब स्पष्ट होत नाही. त्यामुळे तक्रारदार हिने तक्रारीत केलेले मागणी संयुक्तिक नाही, या निष्कर्षाप्रत हे मंच येत आहे. सामनेवाले यांनी तक्रारदाराचे वाहन नोंदणीकरून कागदपत्रे तक्रारदार यांचे ताब्यात देणेविषयीची बाब स्पष्ट झालेली नाही म्हणुन सदरचे मागणीसंबंधी सामनेवाले यांना जबाबदार धरता येणार नाही व सामनेवाले यांनी तक्रारदार हिला सेवेत त्रुटी दिली, ही बाब मंचासमक्ष स्पष्ट झाली नाही. सबब मुद्दा क्र.२ चे उत्तर नकारार्थी देण्यात येत आहे.
७. मुद्दा क्र. (३) : मुद्दा क्रमांक १ वरील विवेचनावरून खालीलप्रमाणे आदेश पारीत करण्यात येत आहे.
आदेश
| १. तक्रारकर्ताची तक्रार खारीज करण्यात येत आहे. |
| २. उभय पक्षकार यांनी तक्रारीचा खर्च स्वतः सहन करावा. |
| ३. या आदेशाची प्रथम प्रत उभय पक्षकार यांना नि:शुल्क देण्यात यावी. |
| ४. तक्रारकर्ता यांना या प्रकरणाची ‘’ब’’ व ‘’क’’ फाईल परत करावी. |