निकालपत्र
तक्रार दाखल दिनांकः- 16/07/2011
तक्रार नोदणी दिनांकः- 19/07/2011 तक्रार निकाल दिनांकः- 09/05/2014
कालावधी 02वर्ष.09महिने.20दिवस.
जिल्हा ग्राहक तक्रार निवारण न्यायमंच, परभणी
अध्यक्ष श्री.पी.पी.निटूरकर.B.Com.LL.B.
सदस्या
सौ.अनिता ओस्तवाल.M.Sc. L.L.B.
---------------------------------------------------------------------------------------------------------
सिताराम पिता सखाराम भुसारे, अर्जदार
वय 35 वर्षे. धंदा.शेती व ऑटो मालक, अॅड.एस.व्हि.पारवे.
रा. नावकी, ता.पुर्णा जि. परभणी.
विरुध्द
1 खान जब्बार पिता मोहम्मद. गैरअर्जदार.
वय 48 वर्षे, धंदा. व्यवसाय, विमा एजंट, अॅड.डी.पी.झुटे.
रा.मकदुम पुरा, युसुफ कॉलणी जवळ, परभणी.
2 बजाज अलायन्झ इन्शुरन्स कंपणी,लि. अॅड.बी.ए.मोदानी.
व्दारा शाखा व्यवस्थापक,
शाखा कार्यालय, दुसरा मजला, राजेंद्र भवन,
एल.आय.सी.बिल्डींग जवळ, अदालत रोड, औरंगाबाद.
______________________________________________________________________
कोरम - 1) श्री.पी.पी.निटूरकर. अध्यक्ष.
2) सौ.अनिता ओस्तवाल. सदस्या.
(निकालपत्र पारित व्दारा.श्री.पी.पी.निटूरकर.अध्यक्ष.)
गैरअर्जदाराने अर्जदाराचा वाहन अपघात नुकसान भरपाई विमादावा मंजूर करण्याचे नाकारुन अर्जदारास सेवेत त्रुटी दिल्याबद्दलची तक्रार आहे.
अर्जदाराची थोडक्यात तक्रार अशी आहे की, अर्जदार हा मौजे नावकी ता.पुर्णा जि. परभणी येथील रहिवाशी असून त्याच्याकडे एक अॅपे पॅजीओ कंपनीचा अॅटो आहे. ज्याचा नोंदणी क्रमांक MH-22-H-594 असा आहे.
अर्जदाराचे म्हणणे की, गैरअर्जदार क्रमांक 1 हा गैरअर्जदार क्रमांक 2 विमा कंपनीचा प्रतिनीधी आहे. गैरअर्जदार क्रमांक 1 अर्जदाराच्या गावी येवुन त्यांनी अर्जदाराच्या सदर अॅटोचा गैरअर्जदार क्रमांक 2 कडे विमा उतरविला व त्यासाठी विम्याची संपुर्ण रक्कम अर्जदाराने गैरअर्जदार क्रमांक 1 ला दिली व पॉलिसीची कव्हरनोट अर्जदारास दिली. सदरचा विमा कालावधी 01/04/2009 ते 31/03/2010 असा होता. व अर्जदार हा गैरअर्जदाराचा ग्राहक आहे.
अर्जदाराचे म्हणणे की, दिनांक 27/05/2009 रोजी रात्री 9 वाजता अर्जदाराच्या सदर अॅटोस इंडीका कार क्रमांक MH-22-H467 ने जोरदार धडक देवुन अपघात झाला. सदरचा अपघात हा पुर्णा ते नांदेड रोडवर गौर ता.पुर्णा शिवारात झाला व सदर अपघातात अर्जदाराच्या अॅटोचे मोठया प्रमाणावर नुकसान झाले. सदर अपघाता बाबत पुर्णा पोलीस स्टेशन येथे गुन्हा नोंद झाला. ज्याचा गुन्हा क्रमांक 89/2009 असा होता.
अर्जदाराचे म्हणणे की, सदर अपघाता मध्ये अर्जदाराच्या अॅटोचे फार मोठया प्रमाणात नुकसान झाले. त्याने सदर अॅटो दुरुस्तीसाठी सहारा अॅपे मोटार्स वसमतरोड परभणी येथे आणला जे की, सदर अॅटोचे डिलर आहेत. सदर अॅटो गॅरेज मध्ये आणल्यानंतर सदर अपघाता बाबत गैरअर्जदारांना माहिती दिली, त्यानुसार विमा कंपनीचे सर्व्हेअर तेथे आले व सदर वाहनाची पहाणी केली व सदर अॅटोची दुरुस्ती अर्जदाराने करुन घेतली व गैरअर्जदाराकडे वाहन अपघात नुकसान भरपाई मिळणेसाठी विमा कंपनीकडे क्लेमफॉर्म भरुन दिला व त्यासोबत आवश्यक ती सर्व कागदपत्रे जोडली होती.
अर्जदाराचे म्हणणे की, सदरचा अॅटोच्या दुरुस्तीसाठी स्पेअर पार्टचा खर्च 24,437/- व लेबर चार्जेस 3000/- व तसेच चेसीस थ्रोव्हींग व कलरींगसाठी 5,500/- आणि लतीफ गॅस वेल्डींग परळी येथे 13,800/- एवढचा खर्च आला. एकुण खर्च 46,737/- व अॅटोच्या दुरुस्तीसाठी प्रवास भाडे खर्च व इतर खर्च एकुण 55,000/- रु. खर्च आला.
अर्जदाराचे म्हणणे की, अर्जदाराने सदर अॅटोची दुरुस्ती झाल्यानंतर गैरअजदाराकडे क्लेमफॉर्म व त्यासोबत वर नमुद केलेल्या खर्चाच्या मुळ पावत्या गैरअर्जदाराकडे दाखल केल्या तसेच सर्व पोलीस पेपर्स क्लेमफॉर्म क्लेम सॅटीसफॅक्शन कम डिस्चार्ज व्हाऊचर सही करुन आर.सी. बुक, ड्रायव्हींग लायसेंस, दुरुस्तीचे इस्टीमेट इ. आवश्यक ती सर्व कागदपत्रे विमा कंपनीच्या सर्व्हेअर मार्फत गैरअर्जदार क्रमांक 2 कडे दाखल केली.
अर्जदाराचे म्हणणे की, गैरअर्जदार क्रमांक 2 ने दिनांक 17/07/2009 च्या पत्राव्दारे अर्जदारास कागदपत्राची मागणी केली. सदर कागदपत्राची पुर्तता अर्जदाराने पूर्वीच केली होती.
अर्जदाराचे म्हणणे की, सदर विम्यादाव्या बाबत अर्जदाराने दिनांक 07/06/2011 रोजी गैरअर्जदार क्रमांक 2 कडे जाऊन चौकशी केली असता, त्यांनी असे सांगीतले की, तुमचा विमादावा फेटाळण्यात आलेला आहे. म्हणून सदरची तक्रार दाखल करणे भाग पडले. गैरअर्जदाराने अर्जदारास सेवेत त्रुटी दिली आहे व मंचास विनंती केली आहे की, सदरचा तक्रार अर्ज मंजूर करुन गैरअर्जदारास आदेश करावा की, अर्जदाराचा अॅटो क्रमांक MH-22-H-594 चे अपघात नुकसान भरपाई म्हणून 55,000/- रु. अर्जदारास द्यावेत, तसेच मानसिक त्रासापोटी 10,000/- रु. व तक्रार अर्ज खर्चापोटी 2000/- रु. द.सा.द.शे. 12 टक्के दराने अपघात झाल्या तारखे पासून गैरअर्जदाराने अर्जदारास द्यावेत.
तक्रार अर्जाच्या पुष्टयार्थ अर्जदाराने नि.क्रमांक 2 वर आपले शपथपत्र दाखल केले आहे.
अर्जदाराने पुराव्या बाबत नि.क्रमांक 5 वर 15 कागदपत्राच्या यादीसह 15 कागदपत्रे दाखल केली आहेत. ज्यामध्ये FIR, Spot Panchanama, Driving License, R.C.Book, Covrnote, Policy, Estimate Sahara Motors, Copy Of Claim, Claim Intimation Letter, Copy of Bill, Labor Charges, Coloring Charges, Receipt of Latif Gas welding Parli, copy of insurance Co. इ. कागदपत्रे दाखल केली आहेत.
तक्रार अर्जास लेखी निवेदन सादर करण्यासाठी मंचातर्फे गैरअर्जदाराना नोटीसा काढण्यात आल्या.
गैरअर्जदार क्रमांक 1 वकिला मार्फत मंचासमोर हजर व नि.क्रमांक 34 वर आपला लेखी जबाब सादर केला, त्यात त्यांचे असे म्हणणे आहे की, सदरची तक्रार ही खोटी व बनावटी आहे व ती खारीज होणे योग्य आहे. अर्जदाराने त्याचा अॅटो क्रमांक MH-22-H-594 हा गैरअर्जदार क्रमांक 2 कडे विमाकृत केला होता व सदर विम्याचा कालावधी 01/04/2009 ते 31/03/2010 होता, हे बरोबर आहे.
अर्जदाराच्या सदर अॅटोस अपघात झाला होता, हे मला व्यक्तीशः माहिती नाही. अर्जदारास मी कसल्याहली प्रकारची सेवेत त्रुटी दिली नाही. विना कारण मला प्रस्तुत प्रकरणात पार्टी केले आहे. म्हणून मंचास विनंती केली आहे की, सदरचा तक्रार अर्ज 10,000/- रु. खर्च आकारुन गैरअर्जदार क्रमांक 1 विरुध्द प्रकरण खारीज करण्यात यावे.
गैरअर्जदार क्रमांक 2 विमा कंपनी वकीला मार्फत मंचासमोर हजर व नि.क्रमांक 14 वर आपला लेखी जबाब सादर केला, त्यात त्यांचे असे म्हणणे आहे की, सदरची तक्रार ही खोटी व बनावटी आहे व ती खारीज होणे योग्य आहे. अर्जदाराच्या तक्रारी प्रमाणे त्याचा अॅटोचा अपघात दिनांक 27/05/2009 रोजी झाला होता व सदर अपघाताची माहिती अर्जदाराने पोलीस स्टेशनला 1 दिवस उशीरा दिली व गैरअर्जदार क्रमांक 2 यांना सुध्दा घटनेची माहिती उशीरा दिली घटनेची सुचना मिळाल्यानंतर विमा कंपनीने I.R.D.A. नियुक्त सर्व्हेअरची नियुक्ती करुन त्यांच्याकडून वाहनाच्या नुकसानीचा अहवाल मागवीला. विमा कंपनीने अर्जदारास वारंवार सुचना देवुनही अर्जदाराने कागदपत्राची पुर्तता केली नाही.
विमा कंपनीचे म्हणणे की, अर्जदाराने सदरचा अॅटो हे स्वतःच्या वापरासाठी घेतला होता, तसेच अर्जदाराने गैरअर्जदार विमा कंपनीकडून घेतलेली विमा पॉलिसी Private Car Package ची पॉलिसी होती. तरी सुध्दा घटनेच्या वेळी अर्जदाराने हे वाहन व्यापारी उपयोगासाठी म्हणजेच अवैध प्रवासी वाहतूकीसाठी वापरले जे या विमा पॉलिसीच्या अटीचे उल्लंघन होते व त्यामुळे अर्जदाराचा विमादावा विमा कंपनीने योग्य ते कारण दर्शवुन नामंजूर केला आहे.
विमा कंपनीचे म्हणणे की, सदर अपघाताची माहिती मिळाल्यानंतर विमा कंपनीने सर्व्हेअर नियुक्त करुन वाहनाचे किती नुकसान झाले होते, ही माहिती मागवीली होती व त्याप्रमाणे सर्व्हेअर रिपोर्ट प्रमाणे अर्जदाराच्या अॅटोचे 21,979/- रु. चे नुकसान झाले होते.
विमा कंपनीचे म्हणणे की, सदरचा अपघात हा 27/05/2009 रोजी झाला व अर्जदाराने प्रस्तुत तक्रार 15/07/2011 रोजी दाखल केली आहे जे की, मुदतबाहय आहे. आम्ही अर्जदारास कसल्याही प्रकारची सेवेत त्रुटी दिली नाही. म्हणून मंचास विनंती केली आहे की, सदरची तक्रार अर्जदारास 10,000/- रु. खर्च आकारुन खारीज करण्यात यावी.
लेखी जबाबाच्या पुष्टयार्थ विमा कंपनीने नि.क्रमांक 17 वर आपले शपथपत्र दाखल केले आहे.
गैरअर्जदार विमा कंपनीने पुराव्याबाबत नि.क्रमांक 16 वर 7 कागदपत्राच्या यादीसह 7 कागदपत्रे दाखल केली आहेत, ज्यामध्ये Copy Of Policy, Bill Check Report, Notice, Notice, Receipt, Policy holder manual, Affidavit इ. कागदपत्रे दाखल केली आहेत.
दोन्ही बाजुंच्या कैफियतीवरुन निर्णयास उपस्थित होणारे मुद्दे खालील प्रमाणे आहेत.
मुद्दे. उत्तर.
1 गैरअर्जदार क्रमांक 2 विमा कंपनीने अर्जदाराच्या अॅटो क्रमांक
MH-22-H-594 चे अपघातात झालेली नुकसान भरपाई
देण्याचे नाकारुन अर्जदारास सेवेत त्रुटी दिली आहे काय ? होय.
2 आदेश काय ? अंतिम आदेशा प्रमाणे.
कारणे.
मुद्दा क्रमांक 1.
अर्जदार हा अॅटो (अॅपे पॅजीओ ) क्रमांक MH-22-H-594 चा मालक आहे. ही बाब अर्जदाराने दाखल केलेल्या नि.क्रमांक 5/4 वरील आर.सी. बुकच्या प्रतीवरुन सिध्द होते.
अर्जदाराने सदरचा अॅटो गैरअर्जदार क्रमांक 2 कडे विमाकृत केला होता व सदर विम्याचा कालावधी 01/04/2009 ते 31/03/2010 पर्यंत वैध होता. ही बाब अर्जदाराने दाखल केलेल्या नि.क्रमांक 5/5 वरील पॉलिसीच्या कव्हरनोट वरुन सिध्द होते. तसेच सदरची बाब नि.क्रमांक 5/6 वर दाखल केलेल्या गैरअर्जदार क्रमांक 2 ने जारी केलेल्या पॉलिसीच्या प्रतीवरुन सिध्द होते.
अर्जदाराच्या सदर अॅटोचा दिनांक 27/05/2009 रोजी पुर्णा ते नांदेड रोडवर गौर शिवारात इंडीका कार क्रमांक MH-22- 467 ला समोरासमोर धडक बसून अपघात झाला होता. ही बाब अर्जदाराने दाखल केलेल्या नि.क्रमांक 5/1 वरील पूर्णा पोलीस स्टेशनच्या क्राईम नं. 89/2009 च्या एफ. आय.आर. प्रतीवरुन तसेच नि.क्रमांक 5/2 वर दाखल केलेल्या घटनास्थळ पंचनाम्याच्या प्रतीवरुन सिध्द होते.
अर्जदाराने सदर अपघात झाल्यानंतर त्याच्या अॅटोस अपघातात झालेली नुकसान भरपाई मिळावी, म्हणून गैरअर्जदार क्रमांक 2 विमा कंपनीकडे विमादावा दाखल केला होता. ही बाब अर्जदाराने दाखल केलेल्या नि.क्रमांक 5/8 वरील Motor Insurance Claim Form च्या प्रतीवरुन सिध्द होते. व सदरचा विमादावा गैरअर्जदार क्रमांक 2 विमा कंपनीस मिळाला होता, ही बाब नि.क्रमांक 5/13 वरील कागदपत्रावरुन दिसून येते.
सदर अर्जदाराच्या विमादाव्या बाबत विमा कंपनीने लेखी जबाबात म्हंटले की, विमा कंपनीने मागणी केलेल्या कागदपत्राची पुर्तता अर्जदाराने केली नाही व तसेच अर्जदाराने सदरचे वाहन पॉलिसीच्या अटीचे उल्लंघन करुन प्रवासी वाहतूकी करीता वाहन भाडे तत्वावर वापरल्यामुळे विमा कंपनीने अर्जदाराचा विमादावा नाकारला. हे विमा कंपनीचे म्हंणणे मंचास योग्य वाटत नाही. कारण विमा कंपनीस विमादाव्या सोबत आवश्यक ती कागदपत्रे अर्जदाराने दाखल केली होती, असे अर्जदाराने मंचासमोर शपथेवर सांगीतले आहे.
तसेच विमा कंपनीचे लेखी जबाबात म्हंणणे की, अपघाताची माहिती अर्जदाराकडून मिळाल्यानंतर विमा कंपनीने सर्व्हेअर नियुक्त करुन वाहन नुकसानीचा अहवाल मागविला, त्याप्रमाणे अर्जदाराच्या अॅटोचे 21,979/- रु. चे नुकसान झाले होते. व ही बाब विमा कंपनीने दाखल केलेल्या नि.क्रमांक 16/2 वरील Bill Check Report च्या प्रतीवरुन सिध्द होते.
केवळ अर्जदाराने कागदपत्रे दाखल केले नाही व अर्जदाराने सदरचे वाहन प्रवासी वाहतूकीसाठी वापरले, म्हणून अर्जदाराचा विमादावा विमा कंपनीने नाकारणे मंचास योग्य वाटत नाही. अशा परिस्थिती मध्ये विमा कंपनीने अर्जदाराचा विमादावा Bill Check Report प्रमाणे 21,979/- रु. च्या 75 % प्रमाणे Non Standard Basis वर 16,485/- रु. मंजूर करणे आवश्यक होते असे मंचास वाटते.
याबाबत मा. राष्ट्रीय आयोग दिल्ली याने 2013 CPR 462 (N.C.) New India Assurance Co. Ltd. V/s Smt. Malti Revision Petition No. 3793/2007 या प्रकरणात म्हंटले आहे की, If there is any breach of warranty or condition of policy including limitation as to use, complainant is entitled to get 75 % of admissible claim on non standard basis. सदरचा निकाल प्रस्तुत प्रकरणास तंतोतंत लागु पडतो.
अर्जदाराचे म्हणणे की, सदर अपघाता मध्ये त्याच्या अॅटोचे 55,000/- रु. चे नुकसान झाले होते, हे म्हणणे मंचास योग्य वाटत नाही. कारण या बद्दल अर्जदाराने कोणताही कागदोपत्री ठोस पुरावा मंचासमोर आणला नाही वा संबंधीताचे शपथपत्र मंचासमोर दाखल केले नाही.
गैरअर्जदार क्रमांक 1 यांचा सदर प्रकरणात कांहीही संबंध नाही, म्हणून गैरअर्जदार क्रमांक 1 विरुध्द प्रस्तुतचे प्रकरण खारीज करण्यात येते.
निश्चित विमा कंपनीने अर्जदारास त्याच्या अॅटोस अपघातात झालेली नुकसान भरपाई म्हणून Non Standard basis प्रमाणे 16,485/- रु. अर्जदारास न देवुन अर्जदारास सेवेत त्रुटी दिली आहे, असे मंचाचे ठाम मत आहे. म्हणून मुद्दा क्रमांक 1 चे होकारार्थी उत्तर देवुन मंच खालील प्रमाणे आदेश पारीत करीत आहे.
आदेश
1 अर्जदाराचा तक्रार अर्ज अंशतः मंजूर करण्यात येत आहे.
2 गैरअर्जदार क्रमांक 2 विमा कंपनीने आदेश तारखे पासून 30 दिवसाच्या आत
अर्जदाराच्या अॅटो क्रमांक MH-22-H- 594 ला अपघातात झालेली नुकसान
भरपाई म्हणून रु. 16,485/-/- फक्त ( अक्षरी रु. सोळाहजार चारशे पंच्याएैंशी
फक्त ) अर्जदारास द्यावेत.
4 गैरअर्जदाराने अर्जदारास तक्रार अर्जाच्या खर्चापोटी रु. 1,000/- फक्त ( अक्षरी
रु. एकहजार फक्त ) आदेश मुदतीत द्यावे.
3 आदेशाच्या प्रती पक्षकारांना मोफत पुरवाव्यात.
सौ.अनिता ओस्तवाल. श्री. पी.पी.निटूरकर
मा.सदस्या. मा.अध्यक्ष.