जिल्‍हा ग्राहक तक्रार निवारण मंच, सोलापूर.

ग्राहक तक्रार क्रमांक : 624/2009.

                                                                 तक्रार दाखल दिनांक : 19/11/2009.     

                                                                तक्रार आदेश दिनांक :26/04/2011.   

भिमराव महादेव पुजारी, वय 60 वर्षे, व्‍यवसाय : काही नाही,

रा. संजय गांधी नगर नं.2, झोपडपट्टी, विजापूर नाका, सोलापूर.              तक्रारदार

                        विरुध्‍द

कर्मचारी भविष्‍य निधी कार्यालय, उपक्षेत्रीय भविष्‍य निधी कार्यालय,

द्वारा : आयुक्‍त, भविष्‍यनिधी, 165, अ, रेल्‍वे लाईन, सुरवसे टॉवर,

सोलापूर – 413 001.                                                 विरुध्‍द पक्ष

       गणपुर्ती  :-   सौ. संगिता एस. धायगुडे,  अध्‍यक्ष

                      सौ. प्रतिभा प्र. जहागिरदार, सदस्‍य

                  सौ. संजीवनी एस. शहा, सदस्‍य

          तक्रारदार यांचेतर्फे अभियोक्‍ता :  पी.एल. देशमुख

          विरुध्‍द पक्ष यांचेतर्फे अभियोक्‍ता : एस.एस. कालेकर

आदेश

सौ. संगिता एस. धायगुडे, अध्‍यक्ष यांचे द्वारा :-

1.     प्रस्‍तुत तक्रारीमध्‍ये तक्रारदार यांनी उपस्थित केलेला विवाद थोडक्‍यात असा आहे की, ते लक्ष्‍मी-विष्‍णू टेक्‍स्‍टाईल मीलमध्‍ये नोकरीत होते आणि सन 2006 मध्‍ये ते व्‍यवस्‍थापन बंद झाल्‍यामुळे त्‍यांची सेवा समाप्‍त झाली. ते विरुध्‍द पक्ष यांचे सदस्‍य असून त्‍यांचा खाते क्र.एम.एच./एस.एल.पी./348/15392 आहे. त्‍यांचे नियत वयोमान सेवानिवृत्‍त वय पूर्ण झालेले आहे. तसेच लक्ष्‍मी-विष्‍णू टेक्‍स्‍टाईल मील व्‍यवस्‍थापन अवसायनात गेलेले आहे. त्‍यामुळे त्‍यांना प्रॉव्‍हींडट फंडाची रक्‍कम मिळणे आवश्‍यक आहे. त्‍यांनी जरुर कागदपत्रांसह विरुध्‍द पक्ष यांच्‍याकडे अर्ज सादर केला आहे. दि.31/3/1992 रोजी त्‍यांचे विरुध्‍द पक्ष यांच्‍याकडे रु.29,409/- जमा होते. तसेच सन 1995 पर्यंत तक्रारदार यांचा व कंपनीचा हिस्‍सा विरुध्‍द पक्ष यांच्‍याकडे जमा आहे. तक्रारदार यांनी प्रस्‍तुत तक्रारीद्वारे सदर रक्‍कम व्‍याजासह मिळावी आणि मानसिक व शारीरिक त्रासापोटी रु.25,000/- व तक्रार खर्च रु.2,000/- मिळावा, अशी विनंती केली आहे.

2.    विरुध्‍द पक्ष यांनी रेकॉर्डवर म्‍हणणे दाखल केले असून तक्रार अमान्‍य केली आहे. त्‍यांच्‍या म्‍हणण्‍यानुसार तक्रारदार यांनी त्‍यांचा क्‍लेम एम्‍प्‍लॉयर मार्फत दाखल केलेला नाही आणि तो कंपनीने साक्षांकीत केलेला नाही. मीलचे काम दि.31/3/1995 पासून बंद पडले आणि तेव्‍हांपासून त्‍यांना प्रॉव्‍हीडंट फंडाची रक्‍कम प्राप्‍त झालेली नाही. तक्रारदार यांची जमा असलेली रक्‍कम व्‍याजासह देण्‍याचे त्‍यांचे कर्तव्‍य आहे, परंतु तक्रारदार यांनी क्‍लेम फॉर्म सांक्षाकनाची कार्यवाही करणे गरजेचे आहे. त्‍यांच्‍या सेवेमध्‍ये त्रुटी नसल्‍यामुळे तक्रार रद्द करण्‍याची त्‍यांनी विनंती केली आहे.

3.    तक्रारदार यांची तक्रार, विरुध्‍द पक्ष यांचे म्‍हणणे व दाखल कागदपत्रांचे अवलोकन करता, तसेच युक्तिवाद ऐकल्‍यानंतर निष्‍कर्षासाठी खालील मुद्दे उपस्थित होतात.

            मुद्दे                              उत्‍तर

1. विरुध्‍द पक्ष यांनी तक्रारदार यांना त्रुटीयुक्‍त सेवा

     दिली आहे काय ?                                                                            होय.

2. तक्रार भविष्‍य निर्वाह निधीची रक्‍कम मिळविण्‍यास

   पात्र आहेत काय ?                                                                                      होय.

3. काय आदेश ?                                     शेवटी दिल्‍याप्रमाणे.

निष्‍कर्ष

4.    मुद्दा क्र. 1 ते 3 :- तक्रारदार यांचे विरुध्‍द पक्ष यांच्‍याकडे प्रॉव्‍हीडंट फंड खाते क्र.015392 असल्‍याविषयी विवाद नाही. सदर खात्‍यावरील जमा रक्‍कम तक्रारदार यांना मिळणे आवश्‍यक असल्‍याविषयी विवाद नाही. तसेच तक्रारदार कार्यरत असलेली मील लिक्‍वीडेशनमध्‍ये निघाल्‍यामुळे तक्रारदार हे कार्यमुक्‍त झाल्‍याविषयी विवाद नाही. प्रामुख्‍याने, विरुध्‍द पक्ष यांच्‍या म्‍हणण्‍यानुसार तक्रारदार यांनी त्‍यांचा क्‍लेम एम्‍प्‍लॉयर मार्फत दाखल केलेला नाही आणि तो कंपनीने साक्षांकीत केलेला नसल्‍याचे नमूद केले आहे.

5.    निर्विवादपणे, तक्रारदार कार्यरत असलेली मील बंद आहे. त्‍यामुळे त्‍यांचा क्‍लेम एम्‍प्‍लॉयरमार्फत पाठविणे कसे शक्‍य होईल ? हे स्‍पष्‍ट होत नाही. तसेच अशाप्रकारचे क्‍लेम पाठविण्‍याची व साक्षांकीत करण्‍याची कार्यवाही कशी करावी ? याबाबत विरुध्‍द पक्ष यांनी कोणतीही कायदेशीर तरतूद मंचाच्‍या निदर्शनास आणून दिलेली नाही. तक्रारदार हे भविष्‍य निर्वाह निधीची रक्‍कम व्‍याजासह मिळविण्‍यास पात्र असल्‍याचे मान्‍य असताना केवळ तांत्रिक बाबी समोर करुन त्‍यांना देय रकमेपासून वंचित ठेवणे अनुचित ठरते, या मतास आम्‍ही आलो आहोत.

6.    विरुध्‍द पक्ष यांनी तक्रारदार यांना भविष्‍य निर्वाह निधीची जमा रक्‍कम न देऊन निश्चितच सेवेमध्‍ये त्रुटी केलेली आहे. सबब, तक्रारदार हे त्‍यांच्‍या खात्‍यावर जमा असलेली रक्‍कम विरुध्‍द पक्ष यांच्‍या वेळोवेळी प्रचलित असलेल्‍या व्‍याज दरासह  मिळविण्‍यास पात्र ठरतात.

7.    शेवटी आम्‍ही खालील आदेश देत आहोत.

आदेश

      1. विरुध्‍द पक्ष यांनी तक्रारदार यांना भविष्‍य निर्वाह निधी खाते क्र.015392 वर जमा असलेली रक्‍कम भ.नि.नि. च्‍या वेळोवेळी प्रचलित असलेल्‍या व्‍याज दरासह या आदेशाच्‍या प्राप्‍तीपासून तीस दिवसाचे आत द्यावी.

      2. विरुध्‍द पक्ष यांनी तक्रारदार यांना तक्रार खर्चापोटी प्रत्‍येकी रु.1,000/- या आदेशाच्‍या प्राप्‍तीपासून तीस दिवसाचे आत द्यावेत.

      3. विरुध्‍द पक्ष यांनी उपरोक्‍त आदेशाची अंमलबजावणी नमूद मुदतीत न केल्‍यास मुदतीनंतर एकूण देय रक्‍कम द.सा.द.शे. 12 टक्‍के व्‍याज दराने अदा करावी.

 (सौ. संगिता एस. धायगुडे÷)

अध्‍यक्ष

(सौ. प्रतिभा प्र. जहागिरदार)                                 (सौ. संजीवनी एस. शहा)

          सदस्‍य                                            सदस्‍य

        जिल्‍हा ग्राहक तक्रार निवारण मंच, सोलापूर.

                          ----00----

(संविक/स्‍व/21411)