तक्रार क्र. 246/2015.

                      तक्रार दाखल दि.14-10-2015.

                            तक्रार निकाली दि.12-04-2016. 

श्री. दत्‍ता कृष्‍णा माने,

रा. चाहूर, पो.कृष्‍णानगर,

सातारा.                                      ....  तक्रारदार

         विरुध्‍द

1. जिजामाता महिला सहकारी बँक लि.,सातारा तर्फे

   संस्‍थापक चेअरमन, अँड.वर्षा माडगुळकर,

2. व्‍हा.चेअरमन, डॉ. संजिवनी पिंगळे,

3. संचालिका, प्रा.सौ.सुनिता माने,

4. संचालिका, सौ. सुजाता भुजबळ,

5. संचालिका, श्रीमती प्रमला ठकार,

6. संचालिका, सौ. निता कणसे,

7. संचालिका, सौ. मेघा कुलकर्णी,

8. संचालिका, सौ. लता गायकवाड,

9. संचालिका, सौ. लिला निसाळकर,

10. संचालिका, सौ. रोहीणीदेवी लाळे,

11. संचालिका, शरयू उंडाळे,

12. संचालिका, श्रीमती पवित्रा तपासे,

13. संचालिका, सौ संध्‍या लिपारे,

सर्व रा. व्‍दारा जिजामाता महिला सहकारी बँक लि.,सातारा

एल.जी. 2-3, 45-46, राजधानी टॉवर्स,

329, यादोगोपाळ पेठ, राजवाडा, सातारा.                   ....  जाबदार

                  तक्रारदारातर्फे –अँड.सौ.शर्मीला शिवाजीराव शिंदे.

                  जाबदार क्र.1 ते 13 – एकतर्फा.                                                                 

                        न्‍यायनिर्णय  

सदर न्‍यायनिर्णय मा.सौ.सविता भोसले, अध्‍यक्षा यानी पारित केला

1.   तक्रारदाराने सदरचा तक्रारअर्ज ग्राहक संरक्षण कायदा कलम 12 नुसार दाखल केला आहे.  तक्रारअर्जातील थोडक्‍यात कथन खालीलप्रमाणे-

       तक्रारदार हे चाहूर, पो.कृष्‍णानगर, सातारा येथील कायमस्‍वरुपी रहिवासी आहेत. जाबदार क्र.1 हे जिजामाता महिला सहकारी बँक लि. सातारा चे संस्‍थापक/चेअरमन असून जाबदार क्र. 2 ही व्‍हाईस चेअरमन व 3 ते 13 या संचालिका आहेत. जाबदार बँक ही सहकार कायद्याप्रमाणे स्‍थापन झालेली सहकारी पतसंस्‍था असून तिचे कार्यक्षेत्र सातारा जिल्‍हा आहे. तसेच  ग्राहकांकडून ठेवी स्विकारणे व कर्ज वाटप करणे व त्‍यातून तफा कमवणे अशा उद्देशाने स्‍थापन झाली आहे.  तक्रारदार व त्‍यांची आई मुक्‍ताबाई कृष्‍णा माने यांनी संयुक्‍तपणे त्‍यांच्‍या भविष्‍यातील अडीअडचणींकरीता तसेच मुलांच्‍या शैक्षणिक, कौटुंबिक गरजा भागविणेकरिता जाबदार बँकेत मुदत ठेव पावती क्र. 97438 रक्‍कम रु.9,00,000/- दि.13/9/2013 ते दि 13/12/2015 या कालावधीसाठी गुंतविलेली होती व आहे.  सदरची ठेवपावती ही तक्रारदार व त्‍यांची आई कै. मुक्‍ताबाई कृष्‍णा माने यांचे संयुक्‍तीक नावे आहे.  तक्रारदार यांची आई मुक्‍ताबाई कृष्‍णा माने यांचे निधन झालेले आहे. व तक्रारदार हेच त्‍यांचे वारस आहेत. 

     तक्रारदार यांचे कुटूंबाचे आर्थिक गरजांसाठी तसेच मुलांच्‍या शिक्षणासाठी, औषधोपचारासाठी पैशाची नितांत गरज आहे. त्‍यामुळे वरील कारणास्‍तव तक्रारदार आर्थिक अडचणींचे निवारण करणेकामी जाबदार बँकेत ठेवलेल्‍या मुदत ठेव मुदतपूर्व झालेल्या व्‍याजासह मागणी केली असता जाबदार व त्‍यांचे कर्मचारी वेगवेगळी कारणे सांगून तक्रारदारास ठेवीची रक्‍कम व त्‍यावरील होणा-या व्‍याजासह रक्‍कम आरोग्‍यासंबंधी महत्‍वाच्‍या गरजेसाठी देण्‍याची टाळाटाळ केली. जाबदार यांनी वेळोवेळी सतत मागणी करुनही रक्‍कम देण्‍याची टाळाटाळ केल्‍याने वकीलामार्फत रजि.ए.डी.ने नोटीस देवून रक्‍कम मागणी केली तरीही जाबदार यांचेकडून तक्रारदार यांना रक्‍कम मिळालेली नाही.  प्रस्‍तुत मुदत ठेवीची रक्‍कम मुदत संपल्‍यानंतर व्‍याजासह जाबदाराने तक्रारदार यांना देणे बंधनकारक होते व आहे.  परंतू तक्रारदाराने प्रस्‍तुत मुदत ठेवीची मुदत संपलेनंतर ठेवरकमेची व्‍याजासह जाबदार यांचेकडे मागणी केली असता जाबदार यांनी रक्‍कम देणेस टाळाटाळ केली व आजअखेर तक्रारदार यांना ठेवीची रक्‍कम अदा केलेली नाही.  त्‍यामुळे जाबदाराने तक्रारदाराला सदोष सेवा पुरविली आहे. जाबदार यांचेकडून सदर मुदत ठेव खात्‍यावरील रक्‍कम व्‍याजासह वैयक्‍तीक व संयुक्तिकरित्‍या वसूल होऊन मिळावी व तक्रार अर्जाचा खर्च मिळावा म्‍हणून तक्रारदाराने प्रस्‍तुत तक्रार अर्ज मे मंचात दाखल केला आहे. 

2.   तक्रारदाराने प्रस्‍तुत कामी जाबदार यांचेकडून वैयक्तिक व संयुक्तिकरित्‍या  मुदत ठेव पावती क्र. 97438 ठेव रक्‍कम रु.9,00,000/- दि.30/9/2015 अखेर मुदत ठेवीवरील नमूद व्‍याजदराप्रमाणे होणारी एकूण रक्‍कम रु.11,30,384/- (रुपये अकरा लाख तीस हजार तिनशे चौ-याऐंशी मात्र)  व प्रस्‍तुत रक्‍कम प्रत्‍यक्ष वसूल होवून मिळेपर्यंत सदर रकमेवर अर्ज दाखल तारखेपासून द.सा.द.शे. 18 टक्‍के दराने जाबदारांकडून व्‍याजासह वसूल होवून मिळावी व तक्रारदारास झाले मानसिक व शारिरीक त्रासापोटी नुकसानभरपाई म्‍हणून रक्‍कम रु.25,000/- व तक्रार अर्जाचा खर्च रक्‍कम रु.10,000/- जाबदार यांचेकडून मिळावा अशी विनंती तक्रारदाराने या कामी केली आहे.

3.  तक्रारदाराने प्रस्‍तुत कामी नि. 2 कडे तक्रार अर्जाचे पृष्‍ठयर्थ अँफीडेव्‍हीट नि.5 चे कागदयादीसोबत नि.5/1 कडे जाबदार बँकेत ठेवलेल्‍या मुदत ठेव पावती क्र.97438 ची झेरॉक्‍सची सत्‍यप्रत, नि.5/2 कडे तक्रारदारांची आई कै. मुक्‍ताबाई कृष्‍णा माने यांचे मृत्‍यू प्रमाणपत्राची प्रत, नि. 5/3 कडे जाबदार यांना ठेवीची रक्‍कम मागणीसाठी रजि.ए.डी.ने.पाठविलेली नोटीसची स्‍थळप्रत, नि. 24 चे कागदयादीसोबत संचालक मंडळाची यादी, नि.25 कडे सरतपासाचे अँफीडेव्‍हीट, नि.26 कडे तक्रारदारांनी पुराव्‍याचे शपथपत्र दाखल केले आहेत तोच लेखी युक्‍तीवाद समजणेत यावा अशी पुरसीस इत्‍यादी कागदपत्रे तक्रारदाराने याकामी दाखल केली आहे.   

4.  प्रस्‍तुत कामी जाबदार क्र. 1 ते 13  यांना मंचाने काढलेली नोटीस लागू झालेनंतर जाबदार क्र. 1 ते 3 यांना मंचाची नोटीस लागू  होऊनसुध्‍दा ते मे मंचात गैरहजर राहीलेने व त्‍यांनी त्‍यांचे म्‍हणणे दाखल न केलेमुळे त्‍यांचेविरुध्‍द नि. 1 वर  दि.9/12/2015 व दि.2/2/2016 रोजी एकतर्फा आदेश पारीत झालेला आहे.  त्‍यामुळे जाबदार क्र. 1 ते 13 यांनी तक्रारदाराचे तक्रार अर्जातील कोणते‍ही कथन खोडून काढलेले नाही.  सबब प्रस्‍तुतचे प्रकरण जाबदार क्र. 1 ते 13 यांचेविरुध्‍द एकतर्फा चालविणेत आले.

5.   वर नमूद तक्रारदार यांनी दाखल केले तक्रार अर्ज व सर्व कागदपत्रांचे अवलोकन करुन मे.मंचाने प्रस्‍तुत कामी प्रस्‍तुत तक्रारीचे निराकरणार्थ खालील मुद्दयांचा  विचार केला-

अ.क्र.            मुद्दा                                      उत्‍तर

1.  तक्रारदार हे जाबदारांचे ग्राहक आहेत काय?                    होय.

2.  जाबदार यांनी तक्रारदाराना सदोष सेवा पुरवली आहे काय?        होय.

3.  अंतिम आदेश काय?                                  खालील नमूद

                                                       केलेप्रमाणे.

विवेचन

मुद्दा क्र.1 व 2-

6.      वर नमूद मुद्दा क्र.1 व 2 चे उत्‍तर आम्‍ही होकारार्थी देत आहोत. कारण-

प्रस्‍तुत तक्रारदाराने जाबदार बँकेमध्‍ये मुदत ठेव पावती क्र. 97438 वरील ठेव रक्‍कम रु.9,00,000/- दि.13/9/2013 ते दि.13/12/2015 या कालावधीकरीता गुंतविली होती व आहे.  मुदतपूर्व मागणीप्रमाणे दि.30/9/2015 अखेर मुदत ठेवीवरील नमूद व्‍याजदराप्रमाणे होणारी एकूण रक्‍कम रु.11,30,384/- (रुपये अकरा लाख तीस हजार तिनशे चौ-याऐंशी मात्र)) इतकी रक्‍कम देय होती व आहे. प्रस्‍तुत मुदत ठेव पावतीची सत्‍यप्रत याकामी तक्रारदाराने नि.5 चे कागदयादीसोबत नि.5/1 कडे दाखल केली आहे.  म्‍हणजेच तक्रारदार हे जाबदार यांचे ग्राहक आहेत व होते हे स्‍पष्‍ट होते.  तक्रारदाराने याकामी नि. 24 सोबत नि. 24/1 कडे  जाबदार बँकेच्‍या संचालक मंडळाची यादी दाखल केलेली आहे.  प्रस्‍तुत ठेवींची मुदत संपणेपूर्वी तक्रारदाराने जाबदार यांचेकडे रकमेची व्‍याजासह मागणी केली असता जाबदाराने रक्‍कम देणेस टाळाटाळ केली व रक्‍कम तक्रारदाराला अदा केली नाही  हे तक्रारदाराचे कथन योग्‍य व विश्‍वासार्ह वाटते कारण प्रस्‍तुत कामी जाबदार क्र. 1 ते 13 हे नोटीस मिळूनही मंचात हजर राहीले नाहीत म्‍हणून त्‍यांचेविरुध्‍द एकतर्फा आदेश पारीत झाला आहे.  जाबदार क्र. 1 ते 13 यांना मंचाची नोटीस मिळूनही ते गैरहजर राहीले व त्‍यांनी तक्रारदाराचे तक्रार अर्जातील कोणतेही कथन नाकारलेले नाही अथवा खोडून काढलेले नाही हे स्‍पष्‍ट होत आहे.  त्‍यामुळे तक्रारदाराने त्‍यांच्‍या वरील मुदत ठेव पावतीची व्‍याजासह रक्‍कम मुदतीनंतर तक्रारदाराने जाबदारांकडे वारंवार मागणी करुनही जाबदारांनी अदा केलेली नाही हे स्‍पष्‍ट सिध्‍द होत आहे.  त्‍यामुळे जाबदार यांनी तक्रारदार यांना सदोष सेवा पुरविली आहे असे आमचे स्‍पष्‍ट मत आहे. सबब आम्‍ही मुद्दा क्र. 1 व 2 चे उत्‍तर होकारार्थी दिलेले आहे.

     जाबदार यांनी तक्रारदार यांना मुदतीनंतर ठेवीची रक्‍कम व्‍याजासह अदा करणे बंधनकारक असूनही जाबदाराने प्रस्‍तुत ठेवीची रक्‍कम तक्रारदारास अदा केलेली नाही ही सेवेतील त्रुटीच आहे असे या मंचाचे स्‍पष्‍ट मत आहे.  सबब जाबदार क्र. 1 ते 13 यांना वैयक्तिक व संयुक्‍तीकपणे तक्रारदाराला मुदत ठेव पावतीची रक्‍कम पावतीवर नमूद व्‍याजदराने होणा-या  व्‍याजासह तक्रारदारास अदा करणेसाठी Co-operative corporate veil  नुसार जबाबदार धरणेत येते.  सबब प्रस्‍तुत कामी आम्‍ही मा.उच्‍च न्‍यायालय मुंबई यांचे रिट पिटीशन क्र.117/2011- मंदाताई संभाजी पवार विरुध्‍द स्‍टेट बँक ऑफ महाराष्‍ट्र या न्‍यायनिवाडयाचा व त्‍यातील दंडकांचा आधार घेतला आहे. 

7.  सबब आम्‍ही प्रस्‍तुत कामी खालीलप्रमाणे अंतिम आदेश पारित करीत आहोत-

                           -ः आदेश ः-

1.  तक्रारदाराचा तक्रार अर्ज अंशतः मंजूर करणेत येतो.

2.   जाबदार क्र. 1 ते 13 यांना वैयक्तिक व संयुक्‍तीकपणे तक्रारदाराला मुदत ठेव पावती क्र. 97438 वरील रक्‍कम रु.9,00,000/-(रुपये नऊ लाख मात्र) ठेव ठेवले तारखेपासून मुदत संपले तारखेपर्यंत पावतीवर नमूद व्‍याजदराने होणा-या व्‍याजासह तसेच अर्ज दाखल तारखेपासून रक्‍कम प्रत्‍यक्ष हाती पडेपर्यंत नियमाप्रमाणे होणा-या व्‍याजासह तक्रारदारास अदा करणेस जबाबदार धरणेत येते.

3.   जाबदार क्र. 1 ते 13 यांनी वैयक्तिक व संयुक्‍तीकपणे तक्रारदाराला मुदत ठेव पावती क्र. 97438 वरील रक्‍कम रु.9,00,000/-(रुपये नऊ लाख मात्र) ठेव ठेवले तारखेपासून मुदत संपले तारखेपर्यंत पावतीवर नमूद व्‍याजदराने होणा-या व्‍याजासह रक्‍कम अदा करावी.

4.   जाबदार क्र. 1 ते 13 यांनी वैयक्तिक व संयुक्‍तीकपणे तक्रारदाराला मुदत ठेव पावती क्र. 97438 वरील रक्‍कम रु.9,00,000/- (रुपये नऊ लाख मात्र) मुदत संपले तारखेपासून रक्‍कम तक्रारदाराचे प्रत्‍यक्ष हाती पडेपर्यंत द.सा.द.शे. 6 टक्‍के व्‍याजदराने होणा-या व्‍याजासह रक्‍कम अदा करावी.

5.   तक्रारदाराला झाले मानसिक त्रासापोटी रक्‍कम रु.10,000/-(रुपये दहा हजार मात्र)  जाबदार क्र. 1 ते 13 यांना वैयक्तिक व संयुक्‍तीकपणे तक्रारदाराला मुदत तक्रारदारांना  अदा करावेत

6.   अर्जाचा खर्च रक्‍कम रु.5,000/- (रुपये पाच हजार मात्र) जाबदार क्र. 1 ते 13 यांना वैयक्तिक व संयुक्‍तीकपणे तक्रारदाराला मुदत क्रारदारांना  अदा करावेत

7.   वरील सर्व आदेशाचे पालन आदेश पारित तारखेपासून 45 दिवसात जाबदार क्र. 1 ते 13 यांना वैयक्तिक व संयुक्‍तीकपणे तक्रारदाराला मुदत तक्रारदारांना  अदा करावेत.

8.  आदेशाची पूर्तता विहीत मुदतीत न केलेस तक्रारदाराला ग्राहक संरक्षण

कायद्यातील कलम 25 किंवा 27 नुसार वसुलीची प्रक्रिया करणेची मुभा राहील.

9.  सदरचा न्‍यायनिर्णय खुल्‍या मंचात जाहीर करणेत आला.

10. सदर न्‍यायनिर्णयाच्‍या सत्‍यप्रती उभय पक्षकाराना विनामूल्‍य पाठवणेत   याव्‍यात.

ठिकाण- सातारा.

दि.12-04-2016.

        (सौ.सुरेखा हजारे)  (श्री.श्रीकांत कुंभार)   (सौ.सविता भोसले)

           सदस्‍या           सदस्‍य            अध्‍यक्षा.

               जिल्‍हा ग्राहक तक्रार निवारण मंच, सातारा.