तक्रारदार ह्यांनी प्रस्‍तूत तक्रार ग्राहक संरक्षण कायदा 1986 च्‍या कलम 12 अन्‍वये मंचासमक्ष दाखल केली आहे.

 

तक्रारदार व्‍यवसायाने वकील असुन त्‍यांची गैरअर्जदाराविरुध्‍द तक्रार अशी आहे की, गैरअर्जदार हे टाटा व फिएट कंपनीच्‍या गाडया दुरुस्‍तीचे काम करतात व त्‍यांचे जायका मोटर्स या नावाचे दुरुस्‍ती केन्‍द्र आहे. तक्रारदार मागील एक ते दिड वर्षापासुन आपली कार गैरअर्जदाराकउुन दुरुस्‍त करुन घेत होते.

 

तक्रारदाराने दिनांक 17/4/2008 रोजी गैरअर्जदाराकडे कार दुरुस्‍त करण्‍यास टाकली असता गाडीचा इलेक्‍ट्रोफॅन काम करीत नव्‍हता ज्‍यामुळे गाडीचे इंजीन गरम होत होते. तसेच कुलंटची टाकी गळत होती.  इलेक्‍ट्रोफॅन दुरुस्‍त होवू शकत नाही त्‍यामुळे फॅन बदलण्‍याशिवाय पर्याय नाही असे गैरअर्जदाराने सांगीतल्‍यामुळे त्‍याचे सांगण्‍यावर विश्‍वास ठेवुन तक्रारदार इलेक्‍ट्रोफॅन बदलविण्‍यास तयार झाला. त्‍याप्रमाणे गैरअर्जदाराने दुसरे दिवशी तक्रारदाराची कार ठीक झाली म्‍हणुन वापस केली व दुरुस्‍तीपोटी रुपये 5,967/- एवढे रक्‍कम आकारली व जुना इलेक्‍ट्रोफॅन सुध्‍दा तक्रारदारास परत केला.

 

तक्रारदार काही दिवसांनी गाडीत असलेली एलपीजी गॅस किट ची तपासणी करण्‍यास त्‍यांचे ओळखीच्‍या मेकॅनिककडे गेला असता गैरअर्जदाराने तक्रारदारास खराब झाला म्‍हणुन जो इलेक्‍ट्रोफॅन बदलवुन दिला होता तो दुरुस्‍त करण्‍याबाबत विचारले असता मेकॅनिकने इलेक्‍ट्रोफॅन खराब झाला असेल तरी दुरुस्‍त करता येतो असे सांगीतल्‍याने तक्रारदाराने जुना इलेक्‍ट्रोफॅनची तपासणी करण्‍यास सांगीतले असता तो बिलकुल ठिक आहे व त्‍यात काहीही बिघाड नाही व बॅटरीवर इलेक्‍ट्रोफॅन सुरु करुन दाखविला. हे लक्षात आल्‍यावर तक्रारदाराने गैरअर्जदारास चुकीचा सल्‍ला दिला म्‍हणुन दिनांक 10/10/2008 रोजी कायदेशिर नोटीस दिली. नोटीस मिळताच गैरअर्जदाराने तक्रारदारास दुरध्‍वनीकरुन जुना इलेक्‍ट्रोफॅन बसवून देण्‍याचे कबुल केले परंतु बदवुन दिलेल्‍या इलेक्‍ट्रोफॅनचे पैसे परत करण्‍यास नकार दिला. वेळोवेळी तक्रारदाराने पैसे परत करण्‍याची मागणी केली परंतु गैरअर्जदाराने दाद दिली नाही म्‍हणुन तक्रारदाराने ही तक्रार दाखल करुन ती द्वारे इलेक्‍ट्रोफॅनची किंमत व इतर खर्च मिळुन रुपये 10,000/- मिळावे. मानसिक व शारिरिक त्रासापोटी रुपये 10,000/- व तक्रारीचे खर्चापोटी रुपये 5,000/- मिळावे अशी मागणी केली.

 

 

 

सदर प्रकरणात गैरअर्जदार यांना नोंदणीकृत डाकेद्वारे नोटीस पाठविण्‍यात आली.  नोटीस मिळुन गैरअर्जदार हजर झाले व त्‍यांनी आपला लेखी जवाब दाखल केला.

 

गैरअर्जदाराने आपले लेखी जवाबात गैरअर्जदाराची सर्व विपरित विधाने नाकबुल केली व पुढे असे नमुद केले की, तक्रारदाराची कार जेव्‍हा गैरअर्जदाराकडे दुरुस्‍तीकरिता आली तेव्‍हा इलेक्‍ट्रोफॅनची वाइडिंग ही लूज झाल्‍यामुळे फॅन काम करीत नव्‍हता, गाडीचे इंजिन गरम होत होते व कुलंटची टाकी गळत होती. इलेक्‍ट्रोफॅन बदलविणे हाच एकमेव उपाय होता. तक्रारदाराच्‍या गाडीतील इलेक्‍ट्रोफॅन बदलवुन दिल्‍याने तक्रारदाराची गाडी व्‍यवस्थीत सुरु आहे. तक्रारदाराच्‍या गाडीची एलपीजी किट अधिकृत आहे व इलेक्‍ट्रोफॅन खराब झाल्‍यास तो दुरुस्‍त करता येतो ही बाब अमान्‍य केली.

 

गैरअर्जदार पुढे असे नमुद करतात की, इलेक्‍ट्रोफॅनचे दोन प्रकार असतात परमनंट फेल्‍यूअर ज्‍यामध्‍ये इलेक्‍ट्रोफॅन अजिबात फिरत नाही किंवा फिरला तरी योग्‍य वेळी फिरेलच असे नाही. इंटरमिटंट फेल्‍युअर ज्‍यात इलेक्‍ट्रोफॅन अधुन मधुन फिरतो. परंतु त्‍यामुळे इंजिनाच्‍या तापमानावर त्‍याचा काहीही परिणाम होत नाही. परमनंट फेल्‍यूअर व इंटरमिटंट फेल्‍यूअर मधे फॅन बदलणे हाच एक उपाय असतो. कारण इंटरमिटिंट मध्‍ये जरी फॅन सुरु होत असला तरी तो योग्‍य गतीने व त्‍या प्रमाणात फिरत नाही त्‍यामुळे इंजीनाचे तापमान वाढत जावुन इंजीनला नुकसान पोहोचू शकते.

 

तक्रारदाराच्‍या कारचा इलेक्‍ट्रोफॅन 18/4/2008 रोजी बदलला व ही तक्रार दिनांक 4/6/2011 रोजी दाखल केली आहे. त्‍यामुळे सदर तक्रार ही कालबाहय असून खारीज होण्‍यास पात्र आहे. तक्रारदाराने इलेक्‍ट्रोफॅन व्‍यवस्थित काम करतो किंवा नाही याबाबत कुठल्‍या तज्ञांचा अहवाल दाखल केलेला नाही. तक्रारदाराची कार कंपनीच्‍या नियमाप्रमाणे दुरुस्‍त करण्‍यात आलेली आहे. व ती व्‍यवस्‍थीत चालु आहे. यास्‍तव तक्रारदाराची तक्रार खारीज करावी अशी विनंती केली

 

तक्रारदाराने आपली तक्रार प्रतिज्ञालेखावर दाखल केली असुन, दस्‍तऐवज यादीनुसार एकुण 3 कागदपत्रे दाखल केलीत. गैरअर्जदाराने आपला लेखी जवाब शपथपत्रावर दाखल केला. तक्रारदाराने प्रतिउत्‍तर दाखल केले.

 

तक्रारदार व गैरअर्जदार यांचे वकील हजर. तक्रारदाराने लेखी युक्तिवाद दाखल केला.  त्‍यांचा युक्तिवाद ऐकला

     

या तक्रारीसंबंधी महत्‍वाची बाब व पुरावा कमिशनर यांचा अहवाल आहे. तक्रारदाराने गैरअर्जदाराचे म्हणण्‍याप्रमाणे खराब झालेला पंखा हा प्राचार्य शासकीय औद्योगीक प्रशिक्षण संस्‍था, नागपूर यांचेकडे कमिशनर म्‍हणुन तपासणी करिता पाठविण्‍यात आला होता. त्‍यांचा अहवाल त्‍यांनी पाठविला आहे व त्‍यांचे म्‍हणण्‍याप्रमाणे दोन्‍ही पक्षकारांचे उपस्थितीत सदर ईलेक्ट्रिोफॅनची (इंजीन कुलींग फॅन ) ची तपासणी केली असता तो पुर्ण क्षमतेने फिरला व त्‍यांची फिरण्‍याची स्थिती योग्‍य होती. सदर फॅन तपासणी दरम्‍यान योग्‍य स्थिती व स्‍वरुपात होता त्‍या अहवालावर गैरअर्जदाराने कोणत्‍याही प्रकारे उत्‍तर दिलेले नाही. त्‍यामुळे ही बाब निर्वीवाद सिध्‍द झालेली आहे की, तक्रारदाराचे वाहनाचा पंखा हा नादुरुस्‍त झालेला नव्‍हता आणि असे असुन गैरअर्जदाराने तो नादुरुस्‍त झालेला आहे असे सांगुन तक्रारदारकडुन त्‍यासंबंधी रक्‍कम घेतली आणि त्‍यामुळे उपरोक्‍त गैरअर्जदाराचा जो काही बचाव या तक्रारीसंबंधी आहे तो पुर्णपणे चुकीचा आहे असे मंचाचे मत झालेले आहे. गैरअर्जदाराने जी सेवा दिली ती उघडपणे त्रुटीपुर्ण आहे. व गैरअर्जदाराने अनुचित व्‍यापारी प्रथेचा अवलंब केलेला आहे ही बाब स्‍पष्‍ट आहे.

 

गैरअर्जदाराचा जो मुदतीसंबंधीचा आक्षेप, हा या तक्रारीत पुर्णतः चुकीचा आहे कारण तक्रारदाराने त्‍यांचे फसवणुकीबद्दल जेव्‍हा माहीती मिळाली तेव्‍हा त्‍यांनी गैरअर्जदारास नोटीस दिली व तेथुन या तक्रारीला कारण घडलेले आहे.

 

गैरअर्जदाराने हे मान्‍य केलेले आहे की, तक्रारदाराकडुन सदर फॅन जो खराब झालेला होता तो दुरुस्‍त होवू शकत नाही त्‍यामुळे फॅन बदलण्‍याशिवाय पर्याय नाही. (जो आता चुकीचा होता असे स्‍पष्‍ट झालेले आहे) व तक्रारदाराने रुपये 5967/-दिले व त्‍यांचेकडुन वाहन परत आणले. त्‍यामुळे तक्रारादारास ही रक्‍कम मिळणे क्रमप्राप्‍त आहे व त्‍यांना जो मानसिक त्रास झाला त्‍याबद्दल नुकसान भरपाई मिळण्‍यास पात्र आहे. वरील सर्व परिस्थिती विचारात घेता आम्‍ही खालीलप्रमाणे आदेश पारित करीत आहोत. 

1.     तक्रारदाराची तक्रार अंशतः मंजूर करण्‍यात येते.

2.    गैरअर्जदाराने रुपये 5967/- एवढी रक्‍कम तक्रारदारास ती घेतल्‍याची तारीख 18/4/2008 पासुन रक्‍कमेच्‍या प्रत्‍यक्ष अदायगीपावेतो द.सा.द.शे. 9 टक्‍के व्‍याज दराने मिळुन येणारी रक्‍कम आदेश प्राप्‍त झाल्‍यापासुन 30 दिवसाचे आत द्यावी. 

3.    तक्रारदारास मानसिक त्रासापोटी रुपये 3,000/- (केवळ तीन हजार रुपये) आणि तक्रारीचा खर्च म्‍हणुन रुपये 1,000/- (केवळ एक हजार रुपये) असे एकुण 4,000/-रुपये गैरअर्जदाराने द्यावे.

      वरील आदेशाचे पालन गैरअर्जदार यांनी आदेशाची प्रत प्राप्‍त झाल्‍यापासुन 30 दिवसांचे आत करावे. न पेक्षा 9 टक्‍के ऐवजी गैरअर्जदार वरील रक्‍कमेवर 12 टक्‍के व्‍याज देय लागतील.