जिल्‍हा ग्राहक तक्रार निवारण न्‍याय मंच,जळगाव यांचे समोर. . . . .
तक्रार क्रमांक 1609/2008
तक्रार दाखल करण्‍यात आल्‍याची तारीखः-04/12/2008.
तक्रार निकाली काढणेत आली तारीखः- 30/11/2013.
1. श्रीमती सुनिताबाई विलास कापुरे,
उ.व.सज्ञान, धंदाः घरकाम,
2. प्रशांत विलास कापुरे
उ.व.अज्ञान, धंदाः शेतमजुरी,
3. नितीन विलास कापुरे,
उ.व.अज्ञान, धंदाः शेतमजुरी,
रा.फरकांडे, ता.एरंडोल, जि.जळगांव. .......... तक्रारदार.
विरुध्‍द
नॅशनल इंन्‍शुरन्‍स कंपनी लि, तर्फे शाखाधिकारी,
साईबाबा मार्केट, केळकर मार्केट जवळ, जळगांव,
ता.जि.जळगांव. ......... विरुध्‍द पक्ष
कोरम-
श्री.विश्‍वास दौ.ढवळे अध्‍यक्ष
श्रीमती पुनम नि.मलीक सदस्‍या.
तक्रारदार तर्फे श्री.सतीश तुकाराम पवार वकील.
विरुध्‍द पक्ष तर्फे श्री.एस.व्‍ही.देशमुख वकील.
निकालपत्र
श्री.विश्‍वास दौ.ढवळे, अध्‍यक्षः शेतकरी व्‍यक्‍तीगत अपघात विमा योजनेअंतर्गत विमाधारक मृत्‍यु झाल्‍यानंतर त्‍याचा विमा क्‍लेम देण्‍याचे नाकारुन दिलेल्‍या सेवेतील त्रृटी दाखल प्रस्‍तुत तक्रार अर्ज तक्रारदाराने या मंचासमोर दाखल केलेला आहे.
2. तक्रारदार यांची थोडक्‍यात अशी तक्रार आहे की,
तक्रारदार क्र. 1 चे पती विलास लोटन कापुरे यांचे दि.12 ऑक्‍टोंबर,2006 रोजी विहिरीत पडून पाण्‍यात बुडून अपघाती निधन झाले. तक्रारदार क्र. 1 ही मयत विलास लोटन कापुरे यांची विधवा पत्‍नी असुन तक्रारदार क्र. 2 व 3 ही त्‍यांची अपत्‍ये आहेत. मयत विलास लोटन कापुरे यांचे नावावर मौजे फरकांडे,ता.एरंडोल,जि.जळगांव येथे शेती होती व ते शेती वहीवाटदार होते. शासन निर्णय क्र.एनएआयएस 1204/सी आर 166/11-अ दि.5 जानेवारी,2005 नुसार शेतक-याचा अपघाती मृत्‍यु झाल्‍यास रु.1,00,000/- नुकसान भरपाई विरुध्‍द पक्षाने द्यावायाची आहे. तक्रारदार हिने योग्‍य त्‍या कागदपत्रांसह विमा रक्‍कम मागणीसाठी तहसिलदार, एरंडोल यांचेमार्फत फॉर्म भरुन पाठविला असता तसेच विरुध्‍द पक्षाचे मागणीनुसार कागदपत्र पुरविले असतांनाही विमा कंपनीने तक्रारदारास विमा रक्‍कम देण्‍यास टाळाटाळ करुन सदोष सेवा दिलेली आहे. सबब विमा क्‍लेमपोटी रु.1,00,000/-, मानसिक त्रासापोटी रु.25,000/- तसेच मंजुर रक्‍कमेवर द.सा.द.शे.18 टक्‍के प्रमाणे व्‍याज मिळावे व तक्रार अर्जाचा खर्च मिळावा अशी विनंती तक्रारदार यांनी केलेली आहे.
3. सदरची तक्रार दाखल करुन, विरुध्‍द पक्ष यांना ग्राहक संरक्षण कायदा, 1986 चे कलम 13(1) ब प्रमाणे नोटीस काढण्‍यात आली.
4. विरुध्‍द पक्ष यांनी याकामी म्‍हणणे दाखल केलेले असुन तक्रारदाराची तक्रार परिच्‍छेदनिहाय नाकारलेली आहे. मयत हा शेतकरी असल्‍याचा व त्‍याचा अपघाती मृत्‍यु झाल्‍याचा मजकुर खोटा असुन तो विरुध्‍द पक्षास मान्‍य नाही. मयत हा पाण्‍यात बुडून मरण पावला हे म्‍हणणे पुर्णपणे खोटे व लबाडीचे आहे. पोस्‍ट मार्टम मध्‍ये रिपोर्ट दिलेला नसुन व्हिसेरा केमिकल अनालायझरकडे पाठविल्‍याचे व रिपोर्ट येईपावेतो वैद्यकीय मत रिझर्व ठेवल्‍याबाबत स्‍पष्‍टपणे नमुद आहे. अशा परिस्थितीत मयताचा मृत्‍यु पाण्‍यात बुडून झाला हे म्‍हणणे पुर्णपणे खोटे व लबाडीचे आहे. तक्रारदाराने अगोदर आय.सी.आय.सी.आय लोंम्‍बार्ड जनरल इंन्‍शुरन्‍स कंपनीला पार्टी केले व त्‍यानंतर विरुध्‍द पक्षास याकामी सामील केले त्‍यामुळे तक्रारदाराची केलेली मागणी ही बेकायदेशीर आहे. सबब तक्रारदाराची नुकसान भरपाई मागणी खर्चासह रद्य करण्‍यात यावी व तक्रार अर्जाचे खर्चादाखल विरुध्‍द पक्षास रु.10,000/- तक्रारदाराकडुन मिळावेत अशी विनंती विरुध्‍द पक्षाने केलेली आहे.
5. तक्रारदार यांची तक्रार, त्‍यांनी दाखल केलेले कागदपत्रे, विरुध्‍द पक्ष यांचे लेखी म्‍हणणे, व उभयतांचा युक्‍तीवाद इत्‍यादीचे सुक्ष्‍म अवलोकन केले असता न्‍यायनिवाडयासाठी पुढील मुद्ये उपस्थित होतात व त्‍याची उत्‍तरे आम्‍ही सकारण खालीलप्रमाणे देत आहोत.
मुद्ये उत्‍तर.
1. तक्रारदार हे विरुध्‍द पक्षांचे ग्राहक आहेत काय ? होय.
2. विमा कंपनीने तक्रारदारास सेवा देण्‍यात त्रुटी केली
आहे काय ? होय.
3. तक्रारदार कोणता अनुतोष मिळणेस पात्र आहे अंतीम आदेशानुसार
6. मुद्या क्र. 1 - तक्रारदार हे विरुध्‍द पक्षाचे ग्राहक होतात काय, याबाबत तक्रारदाराने तक्रार अर्जातुन ती मयत विलास लोटन कापुरे ची पत्‍नी असल्‍याचे कथन केलेले असुन नि.क्र.3 लगत दाखल वारस दाखल्‍याचे अवलोकन करता मयत विलास लोटन कापूरे यास पत्‍नी सुनिताबाई विलास कापूरे, मुले अनुक्रमे प्रशांत विलास कापूरे, नितीन विलास कापुरे हे वारस असल्‍याचे स्‍पष्‍ट होते. यास्‍तव तक्रारदाराचे पती हे विरुध्‍द पक्षाचे ग्राहक होते व ग्राहक संरक्षण कायदा,1986 च्‍या कलम 2(1)(ब)(v) च्‍या तरतुदीनुसार मयत ग्राहकाचे वारस म्‍हणुन तक्रारदार हे विरुध्‍द पक्षाचे ग्राहक ठरतात. यास्‍तव मुद्या क्र.1 चा निष्‍कर्ष आम्‍ही होकारार्थी देत आहोत.
7. मुद्या क्र. 2 - विरुध्‍द पक्ष यांनी याकामी हजर होऊन तक्रारदाराने विरुध्‍द पक्षाकडे विम्‍याची रक्‍कम मागणी केल्‍याचा कुठलाही दस्‍तऐवज दाखल केलेला नसल्‍याने त्‍यांची विमा क्‍लेम देण्‍याची जबाबदारी येत नाही तसेच मयताचे पोष्‍ट मार्टम रिपोर्ट मध्‍ये मयताचा मृत्‍यु कशामुळे झाला याचे स्‍पष्‍टीकरण दिलेले नसल्‍याने माचा मृत्‍यु नेमका कशामुळे झाला हे सिध्‍द झालेले नसल्‍याने व तक्रारदाराचा तक्रार अर्ज मुदतीत नसल्‍याने या सर्व कारणास्‍तव तक्रारदाराचा विमा क्‍लेम रद्य होण्‍यास पात्र आहे असे लेखी म्‍हणणे व युक्‍तीवादातुन प्रतिपादन केलेले आहे.
8. तक्रारदाराने तक्रार अर्जासोबत नि.क्र.3 लगत क्‍लेम फार्म, दाखला, नमुना क्र.10, तहसिलदार यांना दिलेले पत्र, वारसाचा दाखला, घटनास्‍थळ पंचनामा, अडव्‍हान्‍स डेथ सर्टीफीकेट, शव विच्‍छेदनासाठी पाठविलेचा अहवाल, मरणोत्‍तर पंचनामा, अकस्‍मात मृत्‍युची खबर, पहीली खबर, पोस्‍ट मार्टेम रिपोर्ट, खाते उतारा, 7/12 उतारा, मयताचा शाळा सोडल्‍याचा दाखला, मृत्‍यु प्रमाणपत्र, रेशनकार्ड, जमीनीची नोंदवही इत्‍यादी कागदपत्रांच्‍या छायाप्रती दाखल केलेल्‍या आहेत. वरील सर्व कागदपत्रांचे बारकाईने अवलोकन करता तक्रारदार क्र. 1 चे पती विलास लोटन कापुरे हे विहीरीत पडून पाण्‍यात बुडून मृत्‍यु झाल्‍याचे स्‍पष्‍ट होते असे असतांनाही केवळ पोष्‍ट मार्टम रिपोर्ट मध्‍ये मयताचा व्‍हीसेरा हा केमिकल अनालायसेस करिता पाठविला असल्‍याचे नमुद करुन तो तपासणी होऊन आल्‍यावर रिपोर्ट दिला जाईल असे मत नोंदविले आहे. तसेच तक्रारदाराने शेतकरी अपघात विमा योजनेअंतर्गत विहीत नमुन्‍यातील क्‍लेम फॉर्म भरुन दिलेला असल्‍याचे नि.क्र.3/1 लगत दाखल प्रतीवरुन स्‍पष्‍ट होते. तसेच सदरचा क्‍लेम हा तक्रारदार यांनी तहसिलदार,एरंडोल मार्फत सादर केल्‍याचे तक्रार अर्जात कथन केलेले असुन नि.क्र.3/2 लगत तहसिलदार,एरंडोल यांचेकडे आवश्‍यक ते कागदपत्र पाठविले बाबतचे पत्राची प्रतही दाखल केलेली आहे. विरुध्‍द पक्ष विमा कंपनीने केवळ पोस्‍ट मार्टम रिपोर्ट मध्‍ये मृत्‍युचे कारण नमुद नसल्‍याचे कारणाचा फायदा घेऊन तक्रारदार सारख्‍या खेडयात राहणा-या शेतक-याच्‍या विधवा पत्‍नीस सेवा देतांना अक्षम्‍य दिरंगाई व सेवेत त्रृटी केल्‍याचे निष्‍कर्षाप्रत आम्‍ही येत आहोत. सबब मुद्या क्र. 2 चे उत्‍तर आम्‍ही होकारार्थी देत आहोत.
9. मुद्या क्र. 3 - तक्रारदाराने याकामी तक्रार अर्जातुन विमा रक्‍कम रु.1,00,000/-, मानसिक त्रासापोटी रु.25,000/- अशी एकुण रक्‍कम रु.1,25,000/- द.सा.द.शे.18 टक्‍के व्‍याजासह मिळावेत व तक्रार अर्जाचा संपुर्ण खर्च मिळावा अशी विनंती केलेली आहे. विरुध्‍द पक्ष यांनी तक्रारदाराचा विमा क्‍लेम नाकारुन सेवेत त्रृटी केलेली आहे. परिणामी शासन निर्णयाप्रमाणे रु.1,00,000/- विमा रक्‍कम मिळण्‍यास तक्रारदार पात्र ठरतात. कोणतेही संयुक्‍तीक कारणाशिवाय विमा दावा नाकारल्‍यामुळे रक्‍कम रु.1,00,000/- वर प्रस्‍तुत तक्रार अर्ज दाखल तारखेपासुन द.सा.द.शे.9 टक्‍के व्‍याज मिळण्‍यास तक्रारदार पात्र आहेत असे आमचे मत आहे. तक्रारदाराने मानसिक त्रासापोटी रु.25,000/- मागणी केली आहे तथापी आमचे मते तक्रारदार हे मानसिक त्रासापोटी रु.15,000/- व तक्रार अर्जाचा खर्च रु.3,000/- मिळणेस आमचे मते पात्र आहेत. सबब वरिल विवेचनावरुन आम्‍ही खालीलप्रमाणे आदेश देत आहोत.
आ दे श
1. तक्रारदाराचा तक्रार अर्ज अंशतः मंजुर करण्‍यात येतो.
2. विरुध्‍द पक्ष नॅशनल इंन्‍शुरन्‍स कंपनी लि यांना आदेशीत करण्‍यात येते की, त्‍यांनी तक्रारदार यांना शेतकरी व्‍यक्‍तीगत अपघात विमा योजनेअंतर्गत रक्‍कम रु.1,00,000/-(अक्षरी रक्‍कम रु.एक लाख मात्र) तक्रार दाखल दि.04/12/2008 पासुन द.सा.द.शे.9 टक्‍के व्‍याजासह या आदेशाच्‍या प्राप्‍तीपासुन 30 दिवसांचे आंत द्यावेत.
3. विरुध्‍द पक्ष नॅशनल इंन्‍शुरन्‍स कंपनी लि यांना आदेशीत करण्‍यात येते की, त्‍यांनी तक्रारदार यांना मानसिक त्रासा दाखल रु.15,000/- (अक्षरी रक्‍कम रु.पंधरा हजार मात्र ) व तक्रार अर्जाचा खर्च रु.3,000/- (अक्षरी रु.तीन हजार मात्र ) या आदेशाच्‍या प्राप्‍तीपासुन 30 दिवसांचे आंत द्यावेत.
ज ळ गा व
दिनांकः- 30/11/2013.
( श्रीमती पुनम नि.मलीक ) (श्री.विश्‍वास दौ.ढवळे )
सदस्‍या अध्‍यक्ष
जिल्‍हा ग्राहक तक्रार निवारण न्‍यायमंच,जळगांव.
