(आदेश पारीत व्दारा-श्री.विजय सी.प्रेमचंदानी-मा.अध्यक्ष)
1. तक्रारकर्ता यांनी सदरील तक्रार कलम 12 ग्राहक संरक्षण कायदा 1986 अन्वये दाखल केली आहे.
2. तक्रारकर्ताने तक्रारीत असे कथन केलेले आहे की, तक्रारकर्ता यांनी सामनेवालाकडून विज पुरवठा घेतलेला असून सामनेवाला यांनी दिनांक 23.02.2016 रोजी विज देयक रक्कम रु.15,310/- इतके पाठविले व त्यावर एकुण विज वापर 2229 इतके युनिटस् दाखविले आहे. त्या संदर्भात तक्रारकर्ताने सामनेवालाकडे तक्रार केली. परंतु त्यांनी त्यावर कोणतीही त्वरीत लक्ष दिले नाही. अखेरीस तक्रारकर्ताने दिनांक 09.03.2016 रोजी सामनेवालाकडे लेखी तक्रार केली. त्याची दखल घेऊन सामनेवालाने तक्रारकर्तास दिनांक 11.03.2016 रोजी रक्कम रुपये 15,310/- रुपयाचे बिल कमी करुन रक्कम रुपये 4,710/- चे विज बिल दिले व ते भरण्यास सांगितले. परंतु तक्रारकर्ता यास पुर्वी कधीही एका महिन्याचे बिल रक्कम रुपये 4,710/- रुपयाचे आलेले नव्हते. परंतु तक्रारकर्तास सदर रक्कम एकरकमी भरणे शक्य नाही असा अर्ज सामनेवालाकडे केला. सामनेवाला यांनी तक्रारकर्तास मार्च व एप्रिल 2015 ची विज देयके पाठविली नाहीत. त्यामुळे तक्रारकर्ता हे बिलांची मागणी करण्यासाठी व चौकशी करण्यासाठी गेले असता, सामनेवाला यांनी “ तुमचे पैसे आमचेकडे जमा असून त्यामधून पुढील विजबिले वजा होतील व त्यानंतर पुन्हा तुम्हाला विज बिल पाठविले जाईल, ” अशा रितीने सामनेवाला यांनी मार्च 2015 पासून पुढे आठ महिने विज बिल पाठविले नाही. सामनेवाला यांनी त्यानंतर दिनांक 21.12.2015 रोजीचे विज बिल पाठविले. त्यावर विज मिटर बदलले असल्याचे नमुद केले आहे. सदर रक्कम रु.190/- चे बिल तक्रारकर्ता यांनी सामनेवालाकडे जमा केले आहे. सामनेवालाने विज मिटर काढून नेलेले नाही अथवा बदललेले नाही. असे असूनही विज मिटर बदलले असल्याचे सांगून रक्कम रुपये 190/- घेतले आहेत. अशा रितीने सामनेवाला यांनी तक्रारकर्ताप्रति अनुचित व्यवहार प्रथेचा अवलंब केलेला आहे. तक्रारकर्ता यांनी दिनांक 23.02.2016 रोजीच्या बिलामध्ये रक्कम रुपये 2150.02 इतके विजशुल्क आकारले असून इंधन समायोजन आकार रु.1039.96 इतका केला आहे. तक्रारकर्ताने प्रत्यक्षात सर्व बिले आदा केलेली आहेत. सबब सदर एकुण रक्कम रुपये 3,189/- मान्य व कबुल नाही. सबब विज देयक चुकीचे असल्याने सामनेवालाने दिनांक 15 मार्च 2016 रोजी तक्रारकर्तास नोटीस पाठवून रक्कम रुपये 10,242.16 विज बिलाची मागणी केली व ते बिल न भरल्यास विद्युत पुरवठा खंडीत करण्याची धमकी दिली. म्हणून तक्रारकर्ताने सदर तक्रार मंचासमक्ष दाखल केलेली आहे.
3. तक्रारकर्ताने तक्रारीत अशी मागणी केली आहे की, दिनांक 23.02.2016 रोजीचे सामनेवालाने विज बिल दुरुस्त करुन द्यावे. तसेच दिनांक 21.12.2015 रोजीच्या विज बिलामध्ये आकारलेली रक्कम रुपये 190/- तक्रारकर्तास परत करावी. सामनेवालाने योग्य रितीने मिटर रिडींग घेणेबाबत सामनेवालास आदेश व्हावेत. तक्रारकर्ताला झालेल्या शारीरीक व मानसिक त्रासापोटी व नुकसान भरपाई तसेच तक्रारीचा खर्च सामनेवालाकडून मिळण्याचा आदेश व्हावा.
4. तक्रारकर्ताची तक्रार स्विकृत करुन सामनेवाला यांना नोटीस काढण्याचे आदेश पारीत करण्यात आले. सदरहू नोटीस प्राप्त झाल्यावर सामनेवाला प्रकरणात हजर झाले. परंतू त्यांनी कैफियत प्रकरणात दाखल केली नाही. सबब सामनेवाला यांचेविरुध्द निशाणी 1 वर सदर प्रकरण कैफियतीशिवाय चालविण्याचा आदेश पारीत करण्यात आला.
5. तक्रारकर्ताची दाखल तक्रार, दस्तावेज तसेच निशाणी 21 वर शपथपत्र व दस्तावेज, तक्रारकर्ताचा लेखी युक्तीवाद व सामनेवालाचा तोंडी युक्तीवादावरुन मंचासमक्ष खालील मुद्दे विचारार्थ येतात.
| मुद्दे | उत्तर |
1. | तक्रारकर्ता हा सामनेवालाचा “ग्राहक” आहे काय.? | ... होय. |
2. | सामनेवाला यांनी तक्रारकर्तास न्युनत्तम सेवा दर्शविलेली आहे काय. ? | ... होय. |
3. | आदेश काय ? | ...अंतीम आदेशानुसार. |
का र ण मि मां सा
6. मुद्दा क्र.1 – तक्रारकर्ता यांनी सामनेवालाकडून विज पुरवठा घेतलेला आहे. त्याचा ग्राहक क्रमांक 162240000148 असा आहे. ही बाब उभय पक्षकारांना मान्य असून तक्रारकर्ता हे सामनेवालाचे “ग्राहक” आहेत असे सिध्द होते. सबब मुद्दा क्र.1 चे उत्तर होकारार्थी नोंदविण्यात येते.
7. मुद्दा क्र.2 – तक्रारकर्ताने तक्रारीत सामनेवालाविरुध्द असे आरोप लावलेले आहेत की, दिनांक 21.12.2015 चे विज देयकामध्ये विज मिटर न देता तक्रारकर्ताकडून रक्कम रु.190/- घेण्यात आलेले आहेत. परंतू तक्रारकर्ताने दाखल निशाणी 8 वर दस्त क्र.8/1, 8/3 याची पडताळणी करताना असे दिसून येते की, तक्रारकर्ताचे विज मिटर देयक दिनांक 23.02.2015 रोजी मध्ये मिटर क्र.7501115458 असा आहे. व दिनांक 21.12.2015 रोजी तक्रारकर्ताचे वित मिटर देयकावर मिटर क्र.7614703592 असा आहे. याअर्थी तक्रारकर्ताचे मिटर बदलेले होते. यात सामनेवालाची कोणतीही अनुचित व्यवहार प्रथेची अवलंबना केलेली नाही असे निदर्शनास येते. दिनांक 23.02.2016 रोजीचे विज देयकाची पडताळणी करताना असे दिसून आले की, तक्रारकर्ताचा 15,300.10 रुपयाचे देयक देण्यात आले आहे. व सदर देयकामध्ये चालू रिडींग 2200 युनिटस् असे दाखविलेले आहे. एकुण युनिटचा वापर 2199 असे दाखविलेले आहे. व सदर देयक कमी करुन तक्रारकर्तास 4,710/- रुपये प्रोव्हीजनल देयक असे लिहून तक्रारकर्तास भरण्यास सांगितले. परंतू सदर रक्कम कशी कमी करण्यात आली याचे कोणतेही स्पष्टीकारण सामनेवालाने प्रकरणात सादर केलेले नाही. त्यांनी त्यांचे बचाव पक्षात कैफियत सादर केली नाही. तक्रारकर्ता यांनी निशाणी 8/1, 8/3, 8/4 व दाखल दस्तावरुन असे दिसून येते की, तक्रारकर्ताचे मिटर रिडींगची नोंद दस्त क्र.8/3 व 8/4 वर दर्शविण्यात येते. तरीसुध्दा दस्त क्र.8/5 प्रमाणे तक्रारकर्ताला विज देयक रक्कम न भरल्यामुळे विज पुरवठा खंडीत करण्याबाबत नोटीस पाठविण्यात आलेली आहे असे निदर्शनास येते. सामनेवालाने प्रकरणात कोणताही पुरावा किंवा त्यांचे बचाव पक्षात कैफियत दाखल केलेली नसल्याने तक्रारकर्ताने तक्रारीत सामनेवाला विरुध्द लावलेले आरोप सामनेवाला यांचे विरुध्द सिध्द होत आहेत. व तक्रारकर्ताने दाखल दस्तावरुन असे सिध्द होते की, सामनेवालाने तक्रारकर्ताचे वापरलेले विज देयकाचे मिटरवरुन रिडींग घेण्यात आले नाही ही बाब सामनेवालाने तक्रारकर्ताप्रति न्युनत्तम सेवा दर्शविते व मिटर रिडींग नसतांनाही सामनेवालाने विज देयक पाठविण्यात आले आहे ही बाब अनुचित व्यवहार प्रथेची अवलंबना दर्शविते व सिध्द होते. सबब मुद्दा क्र.2 चे उत्तर होकारार्थी नोंदविण्यात येते.
8. मुद्दा क्र.3 - मुद्दा क्र.1 व 2 चे विवेचनावरुन खालील प्रमाणे अंतिम आदेश पारीत करण्यात येत आहे.
- अं ति म आ दे श –
1. तक्रारकर्ताची तक्रार अंशतः मंजूर करण्यात येते.
2. सामनेवाला नं.1 व 2 यांनी व्यक्तीगत व संयुक्तीकरित्या तक्रारकर्तास दिलेल्या दिनांक 23.02.2016 रोजीचे विज देयक तक्रारकर्तानी वापरलेल्या विज युनिटस् प्रमाणे दुरुस्त करुन तक्रारकर्तास द्यावे.
3. सामनेवाला नं.1 व 2 यांनी व्यक्तीगत व संयुक्तीकरित्या तक्रारकर्ताचे विज मिटरचे रिडींग योग्य नियमाप्रमाणे घ्यावे.
4. सामनेवाला नं.1 व 2 यांनी व्यक्तीगत व संयुक्तीकरित्या तक्रारकर्ताला झालेल्या शारीरीक व मानसिक त्रासापोटी रक्कम रु.10,000/- (रक्कम रु.दहा हजार फक्त) व तक्रारीचा खर्च रक्कम रु.5,000/- (रक्कम रु.पाच हजार फक्त ) तक्रारकर्ताला द्यावे.
5. वरील नमुद आदेशाची पुर्तता सामनेवाला नं.1 व 2 यांनी व्यक्तीगत व संयुक्तीकरित्या आदेशाची प्रत मिळण्यापासून 30 दिवसाचे आत करावी.
6. या आदेशाची प्रथम प्रत उभय पक्षकार यांना निःशुल्क देण्यात यावी.
7. तक्रारकर्ता यांना या प्रकरणाची “ब” व “क” फाईल परत करावी.