निकालपत्र :- (दि.27/06/2011) (सौ.वर्षा एन.शिंदे,सदस्या) (01) प्रस्तुतची तक्रार स्विकृत करुन सामनेवाला यांना नोटीसीचा आदेश झाला. सामनेवाला त्यांचे वकीलांमार्फत हजर होऊन त्यांनी लेखी म्हणणे दाखल केले आहे. उभय पक्षकारांचे वकीलांचा अंतिम युक्तीवाद ऐकला. सदरची तक्रार सामनेवाला विमा कंपनीने तक्रारदाराचा योग्य व न्याय क्लेम नाकारुन सेवेत त्रुटी ठेवल्यामुळे दाखल करणेत आली आहे. (02) तक्रारदाराची थोडक्यात तक्रार अशी:- अ) सामनेवाला कंपनी ही विमा कंपनी असून सामनेवाला क्र.2 ही विकास संस्था आहे. सामनेवाला क्र.2 मार्फत सामनेवाला क्र.1 यांचेकडे तक्रारदारचे पतीचा जनता अपघात योजनेअतंर्गत (JPA) समुह विमा उतरविलेला होता. सदर पॉलीसीचा क्र.161600हा आहे. तक्रारदाराचे पतीचा मृत्यू दि.31/10/2008 रोजी विहीरीवर पाणी आणणेसाठी गेला असता पाय घसरून पडून झाला आहे. सदरचा मृत्यू अपघाती असलेने योग्य त्या कागदपत्रांसहीत सामनेवालांकडे क्लेम मागणी केलेला आहे. तदनंतरही सामनेवाला क्र.1यांचे हेरॉल्ड इन्व्हेस्टीगेटर यांनी दि.07/02/2009 चे पत्रानुसार मागणी केलेल्या कागदपत्रांची पूर्तता केलेली आहे. तरीही सामनेवाला यांनी क्लेम रक्कम दिलेली नाही. सबब दि.24/09/2010 रोजी वकील नोटीस पाठवली. सदर नोटीस लागू होऊनही त्यास उत्तर दिले नाही. सामनेवाला यांनी तक्रारदाराचा योग्य न्याय क्लेम देणेस टाळाटाळ करुन सेवात्रुटी केली आहे.त्यामुळे प्रस्तुतची तक्रार मे. मंचात दाखल करणे भाग पडले आहे. सबब तक्रारदाराची तक्रार मंजूर करुन पॉलीसीची रक्कम रु.1,00,000/- दि.31/10/2008 पासून द.सा.द.शे.18 टक्के व्याजाप्रमाणे मिळावेत तसेच मानसिक त्रासापोटी रक्कम रु.25,000/- सामनेवालांकडून मिळावेत अशी विनंती तक्रारदाराने सदर मंचास केली आहे. (03) तक्रारदाराने आपल्या तक्रारीच्या पुष्टयर्थ सामनेवाला यांचे दि.06/11/2008 चे अस्सल पत्र, हेरॉल्ड इन्व्हेस्टीगेटर यांचे दि.07/02/2009 चे अस्सल पत्र, दि.01/11/2008 चे फॉर्म बी पोलीस अहवाल, शवविच्छेदन अहवाल, मरणोत्तर पंचनामा, पंचनामा, वर्दी जबाब, दि.15/09/2009 चा मृत्यू दाखला, दि.24/09/2010 चे सामनेवाला यांना पाठविलेली वकील नोटीस व त्याची पोहोच इत्यादीचे सत्यप्रती दाखल केली आहेत. (04) सामनेवाला यांनी दाखल केलेल्या लेखी म्हणणेनुसार तक्रारदाराची तक्रार पूर्णत: नाकारलेली आहे. सामनेवाला विमा कंपनीने दि.17/06/2009 रोजीच संपूर्ण रक्कम रु.1,00,000/-चा धनादेश कोल्हापूर जिल्हा मध्यवर्ती सह. बॅक अकौन्ट वेणूताई चव्हाण विकास मर्या.शाखा कपिलेश्वर यांचेमार्फत तक्रारदार यांना दिलेला आहे. प्रस्तुत दावा रक्कम फुल अॅन्ड फायनल सॅटीसफॅक्शन म्हणून स्विकारुन तशी पावतडिस्चार्ज व्हौचरवर लिहून दिलेले आहे. नमुद धनादेश क्रमांक 37414 ची रक्कम स्विकारुनही तक्रारदार यांनी एकदा केरबा विठू हातकर यांचे नांवे असले 161600/47/2008/3541 च्या दाव्याची रक्कम घेऊनही पश्चात बुध्दीने पुनश्च दावा दाखल केलेला आहे. त्याच अपघाताखाली एकदा रक्कम स्विकारलेनंतर पुनश्च: रक्कम मागणेचा अधिकार तकारदारास नाही. सबब सामनेवाला यांनी कोणतीही सेवात्रुटी केलेली नाही. सबब तक्रारदाराचा तक्रार अर्ज खर्चासह नामंजूर करणेत यावा. तसेच सामनेवाला यांना झालेल्या मानसिक त्रासापोटी रक्कम रु.5,000/- सामनेवाला यांना तक्रारदाराने देणेबाबत हुकूम व्हावा अशी विंनती सामनेवाला यांनी सदर मंचास केली आहे. (05) सामनेवाला यांनी आपले म्हणणेच्या पुष्टयर्थ, डिस्चार्ज व्हौचर, हेरॉल्ड इन्व्हेस्टीगेटर यांचा रिपोर्ट व अर्जदार यांचे पत्र इत्यादी कागदपत्रे दाखल केली आहेत. (06) तक्रारदाराची तक्रार, दाखल कागदपत्रे, सामनेवालांचे लेखी म्हणणे व उभय पक्षकारांच्या वकीलांचा युक्तीवाद इत्यादीचे बारकाईने अवलोकन केले असता महत्वाचे मुद्दे निष्कर्षासाठी येतात. 1) सामनेवाला विमा कंपनीने सेवेत त्रुटी ठेवली आहे काय? -- नाही. 2) काय आदेश? -- शेवटी दिलेप्रमाणे मुद्दा क्र.1 व 2:- तक्रारदाराने मागणी केलेले क्लेम पॉलीसी क्र.161600/47/2008/3541 अंतर्गत धनादेशाव्दारे रक्कम रु.1,00,000/- दावा रक्कम मिळालेली आहे. त्याबाबतचे डिस्चार्ज व्हौचर प्रस्तुत प्रकरणी दाखल असून त्यावर नमुद विकास संस्था व तक्रारदाराचे सहया आहेत. सबब प्रस्तुत पॉलीसी अंतर्गतची रक्कम तक्रारदारास मिळालेली आहे ही वस्तुस्थिती निर्विवाद आहे. सामनेवाला वकीलांचा युक्तीवाद ऐकूण घेतलेनंतर तक्रारदाराचे वकीलांनी उशिरा येऊन युक्तीवाद केलेला आहे. सदर युक्तीवादाच्या वेळी प्रस्तुत सामनेवाला कंपनीकडे नमुद तक्रारदाराचे पतीचा शेतकरी व्यक्तीगत अपघात योजनेअतंर्गत याच सामनेवाला कंपनीकडे विमा उतरविला असलेमुळे नजरचुकीने शेतकरी अपघात विमा योजने अंतर्गत उतरविलेल्या पॉलीसीचा रक्कम मागणी करण्याऐवजी जनता व्यक्तीगत अपघात योजनेअंतर्गत क्लेमची मागणी केलेचे प्रतिपादन केलेले आहे. याचा विचार करता प्रसतुत तक्रारीतील कथने ही पूर्णत: 161600 बाबत असून सदर पॉलीसी अंतर्गतची रक्कम तक्रारदारास मिळालेमुळे व पुन्हा त्याचा पॉलीसी अंतर्गत त्याच रक्कमेची मागणी केलेमुळे सामेनवाला यांनी नकार दिलेला आहे. सबब यामध्ये सामनेवाला यांची कोणतीही सेवात्रुटी दिसून येत नाही या निष्कर्षाप्रत हे मंच येत आहे व खालीलप्रमाणे आदेश पारीत करीत आहे. आदेश 1) तक्रारदाराची तक्रार नामंजूर करण्यात येते. 2) खर्चाबाबत कोणतेही आदेश नाहीत.
| [HONABLE MRS. Mrs.V.N.Shinde] MEMBER[HONABLE MR. Mr.M.D.Deshmukh] PRESIDENT | |