जिल्हा ग्राहक तक्रार निवारण मंच, सोलापूर यांचे समोर.
तक्रार क्रमांक:-301/2015
दाखल दिनांक:-14/07/2015
आदेश दिनांक:-31/03/2016
निकाल कालावधी:-0वर्षे08म17दि
श्री.राजकुमार कमलाकर गर्जे,वय 59,धंदा-सेवानिवृत्त,
रा.घोंगडे वस्ती,सोलापूर. ...तक्रारकर्ता/अर्जदार
विरुध्द
1)मा.आयुक्त सो,
सोलापूर महानगरपालिका,सोलापूर.
2)व्यवस्थापक,परिवहन उपक्रम व वाहन व्यवहार,
सोलापूर महानगरपालिका,सोलापूर. ...विरुध्दपक्ष /गैरअर्जदार
उपस्थिती:-श्री.मिलिंद बी.पवार(हिरुगडे),अध्यक्ष
श्री.ओंकारसिंह जी.पाटील,सदस्य
सौ.बबिता एम.महंत-गाजरे,सदस्या
अर्जदारतर्फे विधिज्ञ :-एस.एस.मचाले
विरुध्दपक्ष:- विनाकैफियत
-: निकालपत्र:-
(पारीत दिनांक:-31/03/2016)
मा.श्री.ओंकारसिंह जी.पाटील,सदस्य यांचेव्दार:-
1. तक्रारदार यांचेद्वारे उपस्थित वादविषय थोडक्यात असा आहे की, ते विरुध्दपक्ष क्र.2 परिवहन उपक्रमामध्ये ‘चालक’ पदावर नोकरी करीत होते आणि दि.30/04/2015 रोजी सेवानिवृत्त झाले आहेत. त्यांच्या सेवा कालावधीमध्ये ते भविष्य निर्वाह निधीचे सभासद होते आणि त्या योजनेमध्ये त्यांच्या जमा रकमेपैकी विरुध्द पक्ष क्र.2 यांच्याकडून रु.1,37,572/- येणे आहेत. सातत्याने मागणी करुनही विरुध्द पक्ष क्र.2 यांनी प्रस्तुत रक्कम देण्याकरिता दखल घेतलेली नाही. उपरोक्त वादविषयाचे अनुषंगाने तक्रारदार यांनी विरुध्द पक्ष यांच्याकडून रु.1,37,572/- रक्कम द.सा.द.शे. 18 टक्के व्याज दराने मिळावी आणि रु.10,000/- नुकसान भरपाई देण्याचा विरुध्द पक्ष यांना आदेश करण्यात यावा, अशी विनंती केली आहे.
2. विरुध्द पक्ष यांना उचित संधी देऊनही त्यांनी लेखी उत्तर सादर केले नाही. त्यामुळे त्यांच्या विरुध्द विनाकैफियत चौकशीचे आदेश पारीत करुन सुनावणी पूर्ण करण्यात आली.
3. तक्रारदार यांची तक्रार व दाखल कागदपत्रांचे अवलोकन केले असता तक्रारीमध्ये उपस्थित वादविषयाचे निवारणार्थ खालील मुद्दे उपस्थित होतात.
मुद्दे उत्तर
1.विरुध्द पक्ष यांनी तक्रारदार यांना त्रुटीयुक्त सेवा
दिली आहे काय ? होय
2. तक्रारदार भविष्य निर्वाह निधीची रक्कम मिळण्यास
पात्र आहेत काय ? होय
3. काय आदेश ? अंतिम आदेशाप्रमाणे
कारण मिमांसा
4. मुद्दा क्र.1 व 2 :- अभिलेखावर दाखल कागदपत्रांचे अवलोकन केले असता, तक्रारदार हे विरुध्द पक्ष क्र. 2 यांच्या आस्थापनेवर ‘चालक’ पदावर कार्यरत होते, असे निदर्शनास येते. तक्रारदार यांच्या वाद कथनाप्रमाणे सेवानिवृत्तीनंतर त्यांना देय असणारी भविष्य निर्वाह निधीची रक्कम विरुध्द पक्ष यांनी अदा केलेली नाही. तक्रारदार यांनी माहिती अधिकार कायद्यांतर्गत मिळविलेल्या माहितीमध्ये भविष्य निर्वाह निधीची रक्कम रु.1,37,572/- दर्शवलेली आहे आणि तक्रारदार यांच्या वाद कथनाप्रमाणे विरुध्द पक्ष क्र. 2 यांच्याकडून रु.1,37,572/- येणे आहेत.
5. विरुध्द पक्ष यांनी अभिलेखावर लेखी उत्तर दाखल केलेले नाही. तसेच त्यांनी तक्रारदार यांच्या तक्रारीचे किंवा दाखल कागदपत्रांचे खंडन करण्याचा प्रयत्न केलेला नाही. त्यामुळे न्यायाचे दृष्टीने तक्रारदार यांच्याद्वारे दाखल कागदपत्रे पुराव्याकरिता ग्राह्य धरण्यात येतात.
6. तक्रारदार यांचे वादकथन व दाखल कागदपत्रांवरुन विरुध्द पक्ष क्र.2 यांनी भविष्य निर्वाह निधीची देय व संपूर्ण रक्कम तक्रारदार यांना अदा केलेली नाही, हे ग्राह्य धरावे लागते. विरुध्द पक्ष क्र.2 हे कर्मचा-यांचे भविष्य निर्वाह निधी खाते स्वत: अद्ययावत ठेवून भविष्य निर्वाह निधीची वर्गणी कपात करतात. कर्मचारी भविष्य निर्वाह निधीची जमा होणारी रक्कम कर्मचा-यांच्या सेवानिवृत्तीनंतर परत करणे त्यांचे कर्तव्य व जबाबदारी आहे. विरुध्द पक्ष क्र.2 यांनी तक्रारदार यांना भविष्य निर्वाह निधीची रक्कम अदा केलेली नाही आणि प्रस्तुत कृत्य ‘सेवेतील त्रुटी’ ठरते. तक्रारदार हे विरुध्द पक्ष क्र.2 यांच्या आस्थापनेवर नोकरी करीत होते. भविष्य निर्वाह निधीबाबत विरुध्द पक्ष यांच्या जबाबदा-या व कर्तव्याचा विचार करता मा.सर्वोच्च न्यायालयाने व मा.राष्ट्रीय आयोगाने दिलेल्या अनेक निवाडयातील न्यायिक प्रमाण विचारात घेतले असता प्रस्तुत वादविषय मंचाचे अधिकारकक्षेत येतो. विरुध्द पक्ष क्र.2 यांनी तक्रारदार यांना भविष्य निर्वाह निधीची रक्कम अदा न करुन सेवेमध्ये त्रुटी केलेली आहे आणि विरुध्द पक्ष क्र.2 यांच्याकडून देय असणारी भविष्य निर्वाह निधीची रक्कम रु. 1,37,572/- सेवानिवृत्तीच्या तारखेपासून व्याजासह मिळवण्यास पात्र आहेत. प्रकरणामध्ये विरुध्द पक्ष यांनी लेखी उत्तर व उचित कागदपत्रे दाखल केलेले नाही. त्यामुळे यदाकदाचित तक्रारदार यांनी तक्रार दाखल केल्यानंतर विरुध्द पक्ष यांनी तक्रारदार यांच्या मागणीप्रमाणे देय रकमेपैकी काही रक्कम अदा केली असल्यास त्या रकमेची वजावट करणे योग्य व संयुक्तिक ठरेल. उपरोक्त विवेचवनावरुन आम्ही मुद्दा क्र.1 व 2 चे उत्तर होकारार्थी देऊन शेवटी खालीलप्रमाणे आदेश देत आहोत.
:-आदेश-:
1. विरुध्द पक्ष क्र. 2 यांनी तक्रारदार यांना भविष्य निर्वाह निधीची देय रक्कम रु.1,37,572/- द्यावी. तसेच संपूर्ण रक्कम अदा होईपर्यंत प्रस्तुत रकमेवर दि.01/05/2015 पासून द. सा. द. शे. 9 टक्के दराने व्याज द्यावे.
2. प्रस्तुत तक्रार दाखल केल्यानंतर विरुध्द पक्ष क्र.2 यांनी उपरोक्त रकमेपैकी काही रक्कम तक्रारदार यांना अदा केली असल्यास त्याची वजावट करण्यात यावी.
3. विरुध्द पक्ष क्र. 2 यांनी तक्रारदार यांना तक्रार खर्चापोटी रु.1,000/- द्यावेत.
4. विरुध्द पक्ष क्र. 2 यांनी प्रस्तुत आदेशाची अंमलबजावणी आदेश प्राप्तीपासून 30 दिवसाचे आत करावी.
5. उभय पक्षकारांना आदेशाची प्रथम प्रत नि:शुल्क पुरवण्यात यावी.
(सौ.बबिता एम.महंत-गाजरे) (श्री.ओंकारसिंह जी.पाटील) (श्री.मिलिंद बी.पवार(हिरुगडे)
सदस्या सदस्य अध्यक्ष
जिल्हा ग्राहक तक्रार निवारण मंच, सोलापूर.
शिंलि03003160