निकालपत्र तक्रार दाखल दिनांकः- 8/11/2010 तक्रार नोदणी दिनांकः- 15/11/2010 तक्रार निकाल दिनांकः- 01 /10/2011 कालावधी 10 महिने 16 दिवस जिल्‍हा ग्राहक तक्रार निवारण न्‍यायमंच, परभणी अध्‍यक्ष - श्री.चंद्रकांत बी. पांढरपट्टे, B.Com.LL.B. सदस्‍या सदस्‍या सुजाता जोशी B.Sc.LL.B. सौ.अनिता ओस्‍तवाल M.Sc. कमलकिशोर ओंकारलाल अग्रवाल. अर्जदार वय 51 वर्ष.धंदा.व्‍यापार. अड.एस.एन.वेलणकर. रा.दुर्गेश्‍वरी सिड्स अँड फर्टीलायसर्स. महाराणी लक्ष्‍मीबाई रोड.परभणी. विरुध्‍द मुख्‍य व्‍यवस्‍थापक. गैरअर्जदार. स्‍टेट बँक ऑफ हैद्राबाद.परभणी मुख्‍य शाखा. अड.बी.एन.जोशी. स्‍टेशन रोड,परभणी. ------------------------------------------------------------------------------------ कोरम - 1) श्री.सी.बी.पांढरपट्टे. अध्‍यक्ष. 2) सौ.सुजाता जोशी. सदस्‍या. 3) सौ.अनिता ओस्‍तवाल. सदस्‍या. ------------------------------------------------------------------------------------------------------- गैरअर्जदाराने त्रुटीची सेवा दिल्‍याच्‍या आरोपावरुन अर्जदाराने ही तक्रार दाखल केली आहे. अर्जदाराची थोडक्‍यात तक्रार अशी की, गैरअर्जदाराने जप्‍त केलेली व त्‍यांचे ताब्‍यात असलेली एक माल वाहतुक मोटार गाडी टाटा 407 कंपनीची जिचा क्रमांक MH- 22 / 2935 दिनांक 10/02/2009 रोजी झालेल्‍या लिलावात सर्वात जास्‍त बोली लावुन रक्‍कम रु.3,82,000/- ला गैरअर्जदाराकडून विकत घेतली. गैरअर्जदारांनी पूर्ण रक्‍कम मिळाल्‍यावर दिनांक 11/02/2009 रोजी सदर वाहन आहे त्‍या स्थितीत अर्जदारास सोपविले.अर्जदार एक व्‍यापारी असल्‍याने व माल वाहतुकीसाठीच केवळ सदर वाहन घेतलेले असल्‍याने ताब्‍यात मिळाल्‍यावर लगेच दुरुस्‍ती करता टाकले. अर्जदारास सदर वाहनाच्‍या दुरुस्‍ती करीता एकुण रक्‍कम रु.48,000/- खर्च आला. तदनंतर गैरअर्जदारांनी डिसेंबर 09 अखेर पर्यंत सदर वाहनाचे हस्‍तांतरीत करुन दिले नसल्‍यामुळे दिनांक 09/01/2010 रोजी अर्जदाराने पत्राव्‍दारे सदर वाहन हस्‍तांतरीत करुन न दिल्‍यामुळे होणा-या नुकसानीची कल्‍पना गैरअर्जदारास दिली.पुढे दिनांक 08/09/2010 रोजी गैरअर्जदारांना कायदेशिर नोटीस पाठविली व वाहन खरेदी व दुरुस्‍ती करता झालेला खर्च दररोज होत असलेले नुकसान असे एकुण रक्‍कम रु.2,33,000/-देण्‍याची मागणी गैरअर्जदारांकडे केली, त्‍या नोटीसीस दिनांक 11/10/2010 रोजी गैरअर्जदाराने उत्‍तर पाठविले व वाहन ताब्‍यात दिल्‍यावर परिवहन अधिका-याकडे हस्‍तांतरणाची सर्व कागदपत्रे दिल्‍याचे सांगीतले, परंतु त्‍याच वेळेस क्रमांक 2 बोलीधारक शेख युनुस अब्‍दूल अजीज यांनी दिवाणी दावा क्रमांक 42/2009 परभणी न्‍यायालयात दाखल करुन मनाई हुकूमाची मागणी केली व त्‍या प्रमाणे न्‍यायालयाने दिनांक 13/02/2009 रोजी जैसे थे परिस्थिती ठेवण्‍याचा आदेश दिला.सदर दाव्‍यात अर्जदारही प्रतिवादी क्रमांक 2 होते,नंतर दिनांक 27/04/2010 रोजी दावा खारीज झाला.त्‍यानंतर सर्व कागदपत्रे परिवहन अधिका-याकडे दिल्‍याचे गैरअर्जदारांने नमुद केले आहे. वास्‍तविक पाहता अर्जदारांनी लिलावाची पूर्ण रक्‍कम भरली असतांना त्‍याच दिवशी कागदपत्राची पूर्ण पुर्तता करुन हस्‍तांतरण करुन दिले असते तर दिवाणी दावा / मनाई हुकूम इ.चा प्रश्‍नच उपस्थित झाला नसता पूर्ण रक्‍कम भरुन देखील अर्जदाराच्‍या नावे सदरचे वाहन हस्‍तांतरीत करुन न दिल्‍याने व्‍यवहार हा पूर्ण झालेला नाही व सदरचे वाहन वापरता न आल्‍यामुळे अर्जदाराचे आर्थीक नुकसान झालेले आहे.म्‍हणून अर्जदाराने मंचासमोर तक्रार दाखल करुन गैरअर्जदाराने वाहन दुरुस्‍ती करीता आलेला खर्च रक्‍कम रु.48,000/- व वाहन न वापरता आल्‍यामुळे दररोज रु.500/- प्रमाणे आजपर्यंतचे नुकसान रु.3,15,000/- व पुढील नुकसान अशी एकुण रु. 3,63,000/- नुकसान भरपाई 12 टक्‍के व्‍याजासह अर्जदारास द्यावी मानसिक त्रासापोटी रक्‍कम रु. 15,000/- व तक्रारीच्‍या खर्चापोटी रक्‍कम रु. 5000/- अर्जदारास द्यावे व वाहनाचे हस्‍तांतरणाचे आदेश द्यावेत अशा मागण्‍या मंचासमोर केल्‍या आहेत. अर्जदाराने तक्रार अर्जासोबत शपथपत्र नि.2 वर व पुराव्‍यातील कागदपत्र नि.4/1 ते नि.4/5 व नि.21/1 ते नि.21/3 मंचासमोर दाखल केली. मंचाची नोटीस गैरअर्जदारास तामील झाल्‍यानंतर गैरअर्जदाराने लेखी निवेदन नि.12 वर दाखल करुन अर्जदाराचे क‍थन बहूतअंशी अमान्‍य केले आहे.गैरअर्जदाराचे म्‍हणणे असे की,अर्जदाराने सदरचे वाहन व्‍यावसायीक कारणासाठी विकत घेतलेले असल्‍यामुळे त्‍याला मंचासमोर दाद मागण्‍याचा अधिकार नाही.तसेच दिनांक 11/02/2009 रोजी अर्जदाराने पूर्ण रक्‍कम भरली त्‍याच वेळेस त्‍याला विक्री प्रमाणपत्र, हस्‍तांतरासाठी आवश्‍यक असलेले फॉर्म क्रमांक 29/30 सह्या करुन देण्‍यात आले होते.त्‍यामुळे सदरचे वाहन स्‍वतःच्‍या नावावर करुन घेण्‍याची जबाबदारी अर्जदाराची आहे.पुढे सदरचे वाहन आहे त्‍या परिस्थितीत विक्री करण्‍यात येईल असे स्‍पष्‍टपणे लिलावात नमुद करण्‍यात आले होते.त्‍यामुळे वाहनाची दुरुस्‍ती करीता आलेला खर्च देण्‍यास गैरअर्जदार बांधील नाही.पुढे शेख युनुस याने दिवाणी वादपत्र क्रमांक 42/2009 सदरील वाहना बाबत दिवाणी न्‍यायालय व स्‍तर परभणी येथे दाखल केले होते.सदर प्रकरणात न्‍यायालयाने दिनांक 13/02/2009 रोजी जैसे थे ठेवण्‍याचा आदेश दिला होता.अर्जदारास सदर प्रकरणात प्रतिवादी असताना देखील हजर झाला नाही.तदनंतर वादपत्र खारीज झाले त्‍या संदर्भातील कागदपत्र अर्जदारास दिलेली होती अर्जदाराने विनाकारण गैरअर्जदारा विरुध्‍द चुकीची व खोटी तक्रार दाखल केलेली असल्‍यामुळे अर्जदाराची तक्रार विशेष खर्चासह खारीज करण्‍याची विनंती गैरअर्जदाराने मंचासमोर केली आहे. गैरअर्जदारान लेखी निवेदना सोबत शपथपत्र नि.13 व पुराव्‍यातील कागदपत्र नि.19/1 वर मंचासमोर दाखल केले. दोन्‍ही पक्षांच्‍या कैफियतीवरुन खालील मुद्दे उपस्थित होतात. मुद्दे. उत्‍तर 1 गैरअर्जदाराने अर्जदारास त्रुटीची सेवा दिल्‍याचे शाबीत झाले आहे काय ? होय. 2 अर्जदार कोणती दाद मिळण्‍यास पात्र आहे ? अंतिम आदेशा प्रमाणे. कारणे मुद्दा क्रमांक 1 व 2 अर्जदाराने गैरअर्जदाराकडून लिलावात सदर वाहनाची खरेदी केली होती अर्जदाराने दिनांक 11/02/2009 पूर्ण रक्‍कम भरुन देखील त्‍यास सदर वाहनाचे हस्‍तांतरणासाठी लागणारे कागदपत्र गैरअर्जदाराने दिले नाही.अशी थोडक्‍यात अर्जदाराची तक्रार आहे. हस्‍तांतरणासाठीचे आवश्‍यक कागदपत्रे देण्‍याची मागणी अर्जदाराने गैरअर्जदाराकडे केल्‍याचे दिसते. (नि.3/3 व नि.4/4) यावर गैरअर्जदाराचे म्‍हणणे असे की, दिनांक 11/02/2009 रोजी विक्री प्रमाणपत्र,हस्‍तांतरण फॉर्म व त्‍यासाठी आवश्‍यक असलेली कागदपत्र देवुन वाहनाचा ताबा देण्‍यात आला होता परंतु अर्जदारास हस्‍तांतरणासाठी आवश्‍यक असणारे कागदपत्र दिले होते या संदर्भातील कोणताही पुरावा मंचासमोर दाखल करण्‍यात आलेला नाही.जर गैरअर्जदाराने कागदपत्र दिले असते तर त्‍याच वेळेस अर्जदाराने सदरचे वाहन हस्‍तांतरीत करुन घेण्‍यासाठीची कारवाई केली असती, परंतु अर्जदारास आवश्‍यक कागदपत्र देण्‍यात आलेले नव्‍हते असेच यावरुन मानावे लागेल.अर्जदाराने नि.21/3 वर सदर वाहनाचे RTO नोंदणी प्रमाणपत्राची सत्‍यप्रत लावली आहे.त्‍याचे अवलोकन केले असता त्‍यास दिनांक 24/03/2011 रोजी RTO चे नोंदणी पत्र मिळाल्‍याचे दिसते.याचा अर्थ गैरअर्जदाराने अर्जदारास विलंबाने आवश्‍यक कागदपत्र दिले.वास्‍तविक पाहता गैरअर्जदाराने सदरचे वाहन अर्जदारास विक्री केले त्‍याच वेळेस किंवा फारतर 30 दिवसांच्‍या आत हस्‍तांतरणासाठीचे कागदपत्र द्यावयास हवे होते ते न देवुन गैरअर्जदाराने नक्‍कीच अर्जदारास त्रुटीची सेवा दिल्‍याचे मंचाचे मत आहे.म्‍हणून मुद्दा क्रमांक 1 चे उत्‍तर होकारार्थी देण्‍यात आले. आता प्रश्‍न उरतो तो फक्‍त अर्जदार कोणती व किती नुकसान भरपाई मिळण्‍यास पात्र आहे.या बाबतचा अर्जदाराने सदर वाहन दुरुस्‍तीसाठी आलेला खर्च रक्‍कम रु. 48,000/- देण्‍याची मागणी तक्रार अर्जातून केलेली आहे,परंतु सदरचे वाहन हे लिलावात विकत घेतलेले असल्‍यामुळे व जैसे थे त्‍या परिस्थितीत विकत घेण्‍याची अट लिलावात असल्‍याचे गैरअर्जदाराचे म्‍हणणे आहे.व ते योग्‍य आहे बँकेचा काही वाहन खरेदी विक्रीचा व्‍यवसाय नाही.त्‍यामुळे लिलावात अर्जदाराने बोली लावुन सदरचे वाहन खरेदी केलेली असल्‍यामुळे त्‍याच्‍या दुरुस्‍तीसाठी आलेला खर्च गैरअर्जदाराकडून वसुल करता येणार नाही. तदनंतर अर्जदाराने वाहन वापरात न आल्‍यामुळे होणारी नुकसान भरपाई रक्‍कम रु. 3,63,000/- मागीतली आहे,परंतु यांच्‍या पृष्‍टयर्थ कोणताही पुरावा मंचासमोर दाखल केलेला नाही त्‍यामुळे काल्‍पनिक नुकसान भरपाई अर्जदारास देता येणार नाही. सदरच्‍या प्रकरणाचा निकाल Limited issue चा विचार करुनच देण्‍यात आल्‍यामुळे अर्जदारास हस्‍तातंरणासाठीचे कागदपत्र वेळेवर दिले नसल्‍याचा मुद्दा विचारार्थ घेण्‍यात आलेला आहे. अर्जदाराने मंचासमोर 3 Citation दाखल केले आहे. 1) 2003 (2) C.P.R. 356 Delhi. IMP. Point – Jurisdiction of consumer forum is not bared when there was deficiency in service in a case where property was purchased in auction. 2) 2004 (2) C.P.R. – 579 – Orissa Non Delivery of R.C. Book on sale of vehicle by a department amounts to deficiency in service. 3) 2010 (4) C.P.R. – 220 (U.P.) IMP. Points. In normal course aviation proceeding must be given finality within 30 days from the date of auction unless there is coqnet reasons to delay. या सर्व मा.वरिष्‍ठ न्‍यायालयाने व्‍यक्‍त केलेल्‍या मतांचा आधार ही सदर प्रकरणाचा निकाल देताना घेण्‍यात आलेला आहे.म्‍हणून सर्व बाबींचा सारासार विचार करुन आम्‍ही खाली प्रमाणे आदेश पारीत करीत आहोंत. आदेश 1 अर्जदाराचा तक्रार अर्ज अंशतः मंजूर करण्‍यात येत आहे. 2 गैरअर्जदारांने निकाल कळाल्‍यापासून 30 दिवसांच्‍या आत सेवात्रुटी पोटी व त्‍या अनुषंगाने होणा-या मानसिक त्रासापोटी रक्‍कम रु.2,500/- व तक्रारीच्‍या खर्चापोटी रक्‍कम रु.1,500/- अर्जदारास द्यावे. 3 दोन्‍ही पक्षांना आदेशाच्‍या प्रती मोफत पुरवाव्‍यात. सौ. अनिता ओस्‍तवाल सौ.सुजाता जोशी श्री. सी.बी. पांढरपटटे सदस्‍या सदस्‍या अध्‍यक्ष.
| | [HONABLE MRS. Sujata Joshi] Member[HONABLE MR. JUSTICE C. B. Pandharpatte] PRESIDENT[HONABLE MRS. Anita Ostwal] Member | | 
