निकाल
दिनांक- 02.01.2014
(द्वारा- श्री.विनायक लोंढे, अध्यक्ष)
तक्रारदार सतिष भास्कर गवारे यांनी सदरील तक्रार ग्राहक संरक्षण कायदा 1986 कलम 12 अन्वये सामनेवाला यांनी सेवेत त्रुटी ठेवली आहे, व तक्रारदार यांचेकडून जास्त रक्कम वसूल केली आहे. म्हणून नुकसान भरपाई मिळण्यासाठी दाखल केलेली आहे.
तक्रारदाराची तक्रार थोडक्यात येणेप्रमाणे, तक्रारदार हे धानोरा रोड बीड येथे राहतात. तक्रारदार यांनी सामनेवाला एच.डी.एफ.सी.बँकेकडून कर्ज घेऊन मोटार सायकल विकत घेतलेली आहे.सदरील कर्ज दरमहा रु.985/- प्रमाणे फेडावयाचे होते. तक्रारदार यांनी सामनेवाला यांना त्याचे खाते नं.5692 वरील एकूण 36 चेक सामनेवाला यांना दिले, सामनेवाला यांनी सदरील चेक वेळोवेळी भरुन रक्कम वसूल केलेली आहे. सामनेवाला यांनी तक्रारदार यांना त्रास देण्याच्या उददेशाने व त्याचेकडून जास्त पैसे वसूल करण्याच्या उददेशाने धनादेश मुदतीत वटण्यासाठी टाकलेले नाही. सामनेवाला यांनी तक्रारदार यांचेकडून जास्त रक्कम वसूल केलेली आहे. सामनेवाला यांनी तक्रारदार यांना खोटी नोटीस पाठवून अधिक पैशाची मागणी केलेली आहे. तक्रारदार यांचे खाती रक्कम शिल्लक असतानाही सामनेवाला यांनी धनादेश मुदतीत अनादरीत करण्यासाठी भरलेला नाही. सामनेवाला यांनी तक्रारदार यांचेकडून रु.10,888/- कर्ज रकमेपेक्षा जास्त वसूल केले आहे.तक्रारदार यांनी सामनेवाला यांच्या नोटीसीस उत्तर देऊन ना हरकत प्रमाणपत्र देण्याविषयी कळवले, सामनेवाला यांनी तो देण्यास नकार दिला. संपूर्ण कर्जाची परतफेड झालेली असताना सुध्दा सामनेवाला यांनी अधिक रक्कम मागून तक्रारदार यांना शारिरिक व मानसिक त्रास झालेला आहे. सबब तक्रारदार यांनी सामनेवाला यांच्याकडून रक्कम रु.1,05,888/- मिळावे अशी विनंती केली आहे.
सामनेवाला हे मंचासमोर हजर झाले व निशाणी 6 अन्वये त्यांनी आपले लेखी म्हणणे सदर केले. सामनेवाला यांचे कथन की, या मंचास सदरील तक्रार चालविण्याचा अधिकार नाही. तक्रारदार यांनी तक्रारीत नमुद केलेले सर्व कथन सामनेवाला यांनी नाकारले आहे. सामनेवाला यांचे कथन की, सामनेवाला यांनी तक्रारदार यांना रु.27,200/- चे कर्ज मंजूर केले होते. तक्रारदार यांनी सामनेवाला यांना सर्व कागदपत्र करुन दिलेले आहे.तक्रारदार यांनी दिलेले चेक अनादरीत झालेले आहे. त्यामुळे तक्रारदार थकबाकीदार झालेले आहे.सामनेवाला यांनी तक्रारदार यांच्याकडून ती रक्कम वसूल केलेली आहे, ती रक्कम सदरील चेक अनादरीत झाल्यामुळे वसूल केलेली आहे. सामनेवाला यांनी सेवेत कोणतीही त्रुटी ठेवलेली नाही.सबब तक्रारदार यांची तक्रार रदद करावी अशी विनंती केलेली आहे.
तक्रारदार यांनी तक्रारीसोबत निशाणी 4 अन्वये लोन अकाऊंटचा उतारा दाखल केला आहे, तसेच सामनेवाला यांनी दिलेली नोटीस व त्यावरील उत्तर, सामनेवाला यांनी तक्रारदार यांचेकडून वेळोवेळी वसूल केलेल्या रकमेच्या पावत्या हजर केलेल्या आहेत. सामनेवाला यांनी निशाणी 7 सोबत दस्त दाखल केलेले आहे त्यामुळे कराराची कॉपी तक्रारदार यांचेकर्ज खात्याचा उतारा, चेक अनादरीत झाल्याबाबतच्या पावत्या हजर केलेल्या आहेत. तक्रारदार यांनी स्वतःचे शपथपत्र दाखल केले आहे. सामनेवाला यांनी त्यांचे सक्षम अधिका-यांचे शपथपत्र दाखल केले आहे. तक्रारदार यांचे वकील श्री.चंदनशिव व सामनेवाला यांचे वकील श्री.धांडे यांचा युक्तीवाद ऐकला. न्यायनिर्णयासाठी खालील मुददे उपस्थित होतात.
मुददे उत्तर 1) सामनेवाला यांनी तक्रारदार यांचेकडून जास्त
रक्कम वसूल करुन सेवेत त्रुटी ठेवली आहे,
ही बाब तक्रारदार यांनी शाबीत केली आहे काय? होय.
2) तक्रारदार हे तक्रारीत नमुद केलेली नुकसान
भरपाई मिळण्यास पात्र आहे काय? होय. 3) आदेश काय? अंतिम आदेशाप्रमाणे.
कारणमिमांसा
मुददा क्र.1 ते 3 ः- तक्रारदार यांनी दाखल केलेला पुरावा व कागदपत्र तसेच सामनेवाला यांनी दाखल केलेले शपथपत्र व कागदपत्र याचे अवलोकन केले असता तक्रारदार यांनी सामनेवाला बँकेकडून मोटार सायकल खरेदी करण्यासाठी कर्ज रु.27,200/- कर्ज काढलेले आहे,त्या कर्जाची फेड दरमहा रक्कम रु.985/- या प्रमाणे 36 हप्त्यात करावयाची होती.
तक्रारदार यांच्या वकीलानी असा युक्तीवाद केला की, तक्रारदार यांचे खाती रक्कम जमा असतानाही सामनेवाला यांना दिलेला चेक त्यांनी मुदतीत बँकेत भरला नाही व चेक अनादरीत झाला आहे असू सांगून तक्रारदार यांचेकडून जास्त रक्कम वसूल केलेली आहे. तसेच संपूर्ण रक्कम वसूल झालेली असतना सुध्दा तक्रारदार यांना नोटीस पाठवून जास्त रक्कम मिळण्याच्या हेतुने अजून कर्ज बाकी आहे याबाबत कळवलेले आहे. सदरील कृती ही सेवेत त्रुटी ठेवणारी आहे. तक्रारदार यांना मानसिक व शारिरिक त्रास झालेला आहे म्हणून तक्रारीत मागणी केलेली नुकसान भरपाई तक्रारदार हे मिळण्यास पात्र आहे.
सामनेवाला यांचे वकील श्री.धांडे यांनी असा युक्तीवाद केला की, सामनेवाला यांनी दाखल केलेल्या कागदपत्राचे अवलोकन केले असता तक्रारदार यांनी दिलेले काही चेक अनादरीत झाले. तक्रारदाराच्या खाती पुरेशी रक्कम नसल्यामुळे हप्त्याची रक्कम मिळाली नाही. त्यामुळे तक्रारदार यांनी स्वतः ती रक्कम सामनेवाला बँकेत भरलेली आहे व त्यासाठी आवश्यक ते लागणारे चार्जेस हे तक्रारदाराकडून वसूल करण्यात आले आहे, त्यामुळे तक्रारदार यांचेकडून जास्त रक्कम वसूल केली आहे असे म्हणता येणार नाही. सामनेवाला यांनी कोणतीही सेवेत त्रुटी ठेवलेली नाही. म्हणून तक्रारदार यांची तक्रार रदद करण्यात यावी.
या मंचासमोर दाख्ाल केलेले सर्व कागदपत्राचे व पुराव्याचे अवलोकन केले असता असे निदर्शनास येते की, तक्रारदार यांनी घेतलेल्या कर्जाचे हप्ते दरमहा रु.985/- या प्रमाणे भरावयाचे होते. कागदपत्राचे अवलोकन केले असता असे निदर्शनास येते की, तक्रारदार यांनी दिलेले चेक नं.12937, 12938, 12940 12934, 12936, 12939 हे तक्रारदाराच्या खाती पुरेशी रक्कम नसल्यामुळे अनादरीत झालेले आहे. सदरील चेक अनादरीत झाल्यानंतर तक्रारदार यांनी त्या चेकची रक्कम बँकेत तक्रारीसोबत दाखल केलेल्या पावत्याप्रमाणे भरलेली निदर्शनास येते. सदरील चेक अनादरीत झाल्यामुळे साहजिकच तक्रारदार यांना करारात ठरल्याप्रमाणे जास्त रक्कम कर्ज खाती भरावी लागली आहे, म्हणून सामनेवाला यांनी सेवेत त्रुटी ठेवली आहे असे म्हणता येणार नाही. संपूर्ण कागदपत्रावरुन असे निदर्शनास येते की, तक्रारदार यांनी सामनेवाला यांचेकडून घेतलेल्या कर्जाची संपूर्ण रकमेची फेड केलेली आहे. तक्रारदार यांचेकडून सामनेवाला यांना कोणतेही कर्ज फेड घेणे राहिलेले नाही. तक्रारदार यांचे कथन की, संपूर्ण रक्कम भरलेली असताना सुध्दा सामनेवाला यांनी एनओसी दिलेली नाही.सामनेवाला यांना दिलेली नोटीस, तक्रारदार यांनी दिलेले उत्तर व इतर दस्ताचे अवलोकन केले असता ही बाब निदर्शनास येते की, सामनेवाला यांना संपूर्ण कर्जाची रक्कम मिळालेली असताना सुध्दा मोटार सायकलच्या संबंधित असलेली कागदपत्र व एनओसी तक्रारदार यांना द्यावयास पाहिजे होती, सदरील कृती ही सामनेवाला यांनी केलेली दिसत नाही. म्हणून तक्रारदार हे कर्जाची संपूर्ण रक्कम मिळाली असल्यामुळे सामनेवाला यांचेकडून ना हरकत प्रमाणपत्र मिळण्यास पात्र आहे व ते देण्याची जबाबदारी सामनेवाला यांची आहे. म्हणून मुददा क्र.1 व 2 चे उत्तर होकारार्थी देण्यात येते.
सबब, मंच खालीलप्रमाणे आदेश देत आहे.
आदेश 1) तक्रारदाराची तक्रार अंशतः मंजूर करण्यात येते.
2) सामनेवाला यांना आदेश देण्यात येतो की, त्यांनी तक्रारदार यांना मोटार सायकलचे कागदपत्र व ना हरकत प्रमाणपत्र आदेश
मिळाल्यापासून 30 दिवसाचे आत द्यावे.
3) सामनेवाला यांना आदेश देण्यात येतो की, त्यांनी तक्रारदार यांना
झालेल्या मानसिक व शारिरिक त्रासापोटी रक्कम रु.2,000/- व
तक्रारीचा खर्च रु.1,000/-द्यावे.
4) ग्राहक संरक्षण कायदा 1986 चे अधिनियम 2005 मधील कलम
20 (3) प्रमाणे तक्रारीतील सदस्यांचे संच तक्रारदाराला परत
करावेत.
श्रीमती मंजूषा चितलांगे, श्री.विनायक लोंढे,
सदस्य अध्यक्ष