श्री. मिलींद केदार, सदस्‍य यांचे आदेशांन्‍वये. - आ दे श - (पारित दिनांक : 05/01/2011) 1. तक्रारकर्त्‍याने सदर तक्रार ग्रा.सं.का.चे कलम 12 अंतर्गत दाखल केलेली असून तक्रारकर्त्‍याची थोडक्‍यात तक्रार अशी आहे की, त्‍याने गैरअर्जदार क्र. 1 कडे दि.10.07.2009 रोजी माहिती अधिकार अधिनियम कलम 6 अंतर्गत माहिती प्राप्‍त करण्‍याकरीता अर्ज केला होता व त्‍या अनुषंगाने आवश्‍यक शुल्‍क भरले होते. परंतू गैरअर्जदार क्र. 1 ने 04.08.2009 रोजी तक्रारकर्त्‍याला माहिती देण्‍यास नकार देण्‍यासंबंधीचे पत्र पाठविले. तसेच चुकीची व खोटी माहिती तक्रारकर्त्‍याला दिल्‍याचे तक्रारकर्त्‍याचे म्‍हणणे आहे. दि.10.08.2009 रोजी गैरअर्जदार क्र. 2 कडे त्‍याबाबत अपील केले. त्‍यानीही माहिती दिली नाही. अपील निरस्‍त झाले असल्‍यामुळे उभय गैरअर्जदारांनी सेवेत दिल्‍याने सदर तक्रार मंचासमोर दाखल केल्‍याचे तक्रारकर्त्‍याचे म्‍हणणे आहे. विविध शिर्षकांतर्गत तक्रारकर्त्‍याने रु.5,00,000/- ची मागणी केलेली आहे. 2. सदर तक्रारीचा नोटीस गैरअर्जदारावर बजावण्‍यात आला. गेरअर्जदाराने नोटीस प्राप्‍त होताच तक्रारीस लेखी उत्‍तर दाखल केले. 3. आपल्‍या लेखी उत्‍तरात गैरअर्जदारांनी, दुसरे अपील न करता मंचाकडे दावा दाखल केला असल्‍याने तक्रार खारीज करण्‍याची मागणी केलेली आहे. सदर तक्रार बनावट व खोटी असल्‍याचे म्‍हटले आहे. तक्रारकर्त्‍याचे दुसरे अपील खारीज झाले असल्‍याचे नमूद करुन त्‍यांनी तक्रारकर्त्‍याचे सर्व म्‍हणणे नाकारले असून तक्रारकर्त्‍याला माहिती पुरविल्‍याचे नमूद केले. त्‍यामुळे सदर तक्रार खारीज करण्‍याची मागणी केली. 4. सदर प्रकरण मंचासमोर युक्‍तीवादाकरीता दि.27.12.2010 रोजी आले असता मंचाने उभय पक्षांचा युक्‍तीवाद ऐकला. तसेच उभय पक्षांनी दाखल केलेल्‍या दस्‍तऐवजांचे अवलोकन केले असता मंच खालील निष्‍कर्षाप्रत आले. -निष्‍कर्ष- 5. तक्रारकर्त्‍याने माहिती अधिकार अधिनियम अंतर्गत दि.10.07.2009 रोजी अर्ज केला होता ही बाब उभय पक्षांच्‍या कथनावरुन स्‍पष्‍ट होते. तसेच तक्रारीसोबत दाखल दस्‍तऐवज क्र. 1 वरुन स्‍पष्‍ट होते आणि त्‍याकरीता शुल्‍क भरल्‍याचे उभय पक्षांच्‍या कथनावरुन स्‍पष्‍ट होत असल्‍यामुळे तक्रारकर्ता हा मा. राष्‍ट्रीय ग्राहक आयोगाच्‍या न्‍याय निवाडयानुसार ‘ग्राहक’ या संज्ञेत मोडत असल्‍याचे मंचाचे मत आहे. 6. तक्रारकर्त्‍याने गैरअर्जदार क्र.1 यांचेकडून माहिती अधिकार अधिनियम अंतर्गत 10.07.2009 रोजी अर्ज केला होता व त्‍यानुसार गैरअर्जदार क्र. 1 यांनी तक्रारकर्त्‍याला दि.04.08.2009 रोजी पत्र लिहून माहिती दिली ही बाब तक्रारकर्त्‍याने दाखल केलेले दस्‍तऐवज क्र. 2 वरुन स्‍पष्‍ट होते. परंतू सदर माहिती चुकीची व खोटी असल्‍यामुळे तक्रारकर्त्‍याने गैरअर्जदार क्र. 2 ह्यांचेकडे 10.08.2009 रोजी अपील केले. ही बाबसुध्‍दा तक्रारकर्त्‍याने दाखल केलेले दस्‍तऐवज क्र. 3 वरुन स्‍पष्‍ट होते. सदर अपीलामध्‍ये गैरअर्जदार क्र. 2 यांनी 07.09.2009 रोजी आदेश पारित करुन सदर अपील निरस्‍त केले. तक्रारकर्त्‍याने तक्रारीत नमूद केले आहे व ही बाबसुध्‍दा तक्रारकर्त्‍याने दाखल केलेल्‍या दस्‍तऐवज क्र. 4 वरुन स्‍पष्‍ट होते. वरील सर्व बाबींचा विचार करता तक्रारकर्त्‍याने गैरअर्जदार क्र. 1 यांचेकडे दि.10.07.2009 रोजी माहिती अधिकार अधिनियम अंतर्गत अर्ज केला होता व त्‍या अनुषंगाने 04.08.2009 ला गैरअर्जदार क्र. 1 यांनी माहिती पुरविली म्‍हणजेच 30 दिवसाच्‍या आत माहिती पुरविली होती. त्‍यामुळे गैरअर्जदार क्र. 1 ह्यांनी सेवेत त्रुटी केली असल्‍याचे मंचाचे निदर्शनास येत नाही. गैरअर्जदार क्र. 1 यांनी पुरविलेली माहिती अपूरी व खोटी असल्‍यामुळे गैरअर्जदार क्र. 2 यांचेकडे दि.10.08.2009 रोजी अपील केले होते व त्‍यावर गैरअर्जदार क्र. 2 ने 07.09.2009 रोजी आदेश पारित करुन अपील निरस्‍त केले. त्‍यामुळे गैरअर्जदार क्र. 2 यांनी सेवेत कोठेही त्रुटी केल्‍याचे दिसत नाही. तक्रारकर्त्‍याचे दुसरे अपीलसुध्‍दा खारीज झाल्‍याचे दस्‍तऐवजावरुन स्‍पष्‍ट होते. 7. मंचाचे कार्यक्षेत्रामध्‍ये फक्‍त जर माहिती देणा-या व्‍यक्‍तीने कायद्यानुसार विहित मुदतीत 30 दिवसाच्‍या आत माहिती दिली नसेल तर सेवेत त्रुटी होते व अशा परिस्थितीत फक्‍त मंच तक्रारकर्ता किंवा ग्राहकास सेवेतील त्रुटीकरीता नुकसान भरपाई, शारिरीक व मानसिक त्रासाकरीता आवश्‍यक व न्‍यायोचित रक्‍कम देऊ शकते. परंतू सदर प्रकरणामध्‍ये दोन्‍ही गैरअर्जदारांनी तक्रारकर्त्‍याचे माहिती अर्ज व अपीलीय अर्जाची माहिती अधिकार अधिनियम 2005 अंतर्गत निकाली काढीत असतांना 30 दिवसाच्‍या आत निकाली काढले आहे. त्‍यामुळे त्‍यांच्‍या सेवेत कोणतीही त्रुटी नाही. तक्रारकर्त्‍याच्‍या म्‍हणण्‍यानुसार गैरअर्जदार क्र. 1 ने चुकीची खोटी माहिती दिली. परंतू सदर बाब सिध्‍द केलेली नाही. माहिती ही चूक आहे की बरोबर आहे हे ठरविण्‍याचा अधिकार मंचाचे कार्यक्षेत्रात येत नाही. त्‍यामुळे तक्रारकर्त्‍याची सदर तक्रार खारीज करण्‍यात येते. वरील सर्व निष्‍कर्षाच्‍या आधारे मंच खालीलप्रमाणे आदेश पारित करीत आहे. -आदेश- 1) तक्रारकर्त्‍याची तक्रार खारीज करण्‍यात येते. 2) उभय पक्षांनी आप-आपला खर्च सोसावा. (मिलिंद केदार) (विजयसिंह राणे) सदस्‍य अध्‍यक्ष
| | [HONABLE MR. MILIND KEDAR] MEMBER[HONABLE MR. V.N.RANE] PRESIDENT | | 
