जिल्‍हा ग्राहक तक्रार निवारण न्‍यायमंच बीड यांचे
तक्रार क्रमांक –143/2011 तक्रार दाखल तारीख –12/09/2011
श्रीमती यमुनाबाई भ्र.रंगनाथ चव्‍हाण
वय 45 वर्षे धंदा शेती व घरकाम .तक्रारदार
रा.करेवाडी ता.परळी (वै.) जि.बीड
विरुध्‍द
1. विभाग प्रमुख,
कबाल इन्‍शुरन्‍स ब्रोकींग सर्व्‍हीस प्रा.लि.
शॉप नं. राज अपार्टमेंट, सिडको,औरंगाबाद. .सामनेवाला
2. शाखा व्‍यवस्‍थापक,
रिलायन्‍स जनरल इन्‍शुरन्‍स कंपनी लि.
19, रिलायन्‍स सेंटर, वालचंद हिराचंद मार्ग,
बेलार्ड इस्‍टेट, मुंबई.
को र म - पी.बी.भट, अध्‍यक्ष
अजय भोसरेकर, सदस्‍य.
तक्रारदारातर्फे :- अँड.ए.एस.पावसे.
सामनेवाला क्र.1 तर्फे ः- स्‍वतः
सामनेवाला क्र.2 तर्फे :- अँड.ए.पी.कूलकर्णी
निकालपत्र
तक्रारदार यांनी प्रस्‍तुतची तक्रार ग्राहक संरक्षण कायदा 1986 कलम 12 प्रमाणे सामनेवाले विरुध्‍द दाखल केली आहे.
तक्रारदाराचे पती रंगनाथ चव्‍हाण यांचा मृत्‍यू दि.01.04.2009 रोजी विहीरीत पडल्‍यामुळे झाला.. सदरची घटना ही अंबाजोगाई ग्रामीण पोलिस स्‍टेशन यांना दिली. त्‍यांनी मृत्‍यूची नोंदणी केली. मयताचा पंचनामा केला, मयताचे शवविच्‍छेदनसाठी वैद्यकीय अधिका-याकडे पाठविले. साक्षीदारांचे सहया घेऊन मयताचे प्रेत तक्रारदाराकडे सोपवले. श्री. रंगनाथ हे व्‍यवसायाने शेतकरी होते. त्‍यांचा प्रस्‍ताव अर्ज तालूका कृषी अधिकारी परळी यांचे मार्फत सामनेवाला क्र.1 व 2 कडे रितसर दाखल केला आहे. परंतु त्‍यांनी विमा रक्‍कम आजपर्यत मंजूर केली नाही. त्‍यांनी सेवेत त्रूटी केल्‍याने तक्रारदारांना आर्थिक, शारीरिक त्रासापोटी रक्‍कम रु.10,000/- व तक्रारीचा खर्च रक्‍कम रु.5,000/- ची मागणी केली आहे.
विनंती की, तक्रारदारास रक्‍कम रु.1,00,000/- 18 टक्‍के व्‍यालासह देण्‍या बाबत आदेश व्‍हावेत. सामनेवाला क्र.2 यांनी विमा दावा सामनेवाला क्र.1 कडे पाठवून त्‍वरीत निर्णय दयावा असे आदेश व्‍हावेत, मानसिक, आर्थिक त्रासापोटी रु.10,000/- व खर्चापोटी रु.5,000/- सामनेवाला यांनी तक्रारदारांना देण्‍या बाबत आदेश व्‍हावेत. सोबत विलंबाचा अर्ज व शपथपत्र दाखल आहे.
सामनेवाला क्र.1 यांनी त्‍यांचा खुलासा दि.22.11.2011 रोजी दाखल केला. खुलाशात श्री.रंगनाथ टोपा चव्‍हाण रा.करेवाडी ता.परळी वैजनाथ यांचा अपघात दि.13.02.2009 रोजी झाला. त्‍यांचा दावा दि.6.7.2009 रोजी अपूर्ण कागदपत्र उदा. तहसीलदाराचे प्रमाणपत्र, मृत्‍यू प्रमाणपत्र, 6-डी इत्‍यादी अपूर्ण कागदपत्रासह मिळाला. सदरचा दावा हा रिलायन्‍स जनरल इन्‍शूरन्‍स कंपनी कडे दि.15.1.2010 रोजी अंतिम निर्णयासाठी पाठविला. निर्णय अद्यापही आलेला नाही.
सामनेवाला क्र.2 यांनी त्‍यांचा खुलासा दि.3.1.2012 रोजी दाखल केला. खुलाशात तक्रारीतील सर्व आक्षेप नाकारलेले आहेत. सदरचा दावा हा विलंबाने सामनेवालाकडे पाठविला आहे. तक्रारदारांनी सर्व कागदपत्रे दिले असल्‍याचे रेकार्ड वरुन दिसत नाही. आक्षेपित अपघाताला एक वर्षाचे कालावधीपेक्षा जास्‍त कालावधी झाला त्‍यात कागदपत्रही अपूर्ण आहेत ती वेळेत मिळाली नाहीत म्‍हणून तक्रार मूदतबाहय आहे. तक्रारदारास तक्रार दाखल करण्‍यास कोणतेही कारण घडलेले नाही. तक्रार खर्चासह रदद करण्‍यात यावी.
तक्रारदाराची तक्रार, दाखल कागदपत्रे, तक्रारदाराचे शपथपत्र, सामनेवाला क्र. 1 व 2 यांचा खुलासा,शपथपत्र, यांचे सखोल वाचन केले.
तक्रारदाराचे विद्वान वकील श्री.पावसे व सामनेवाला यांचे विद्वान वकील श्री.ए.पी.कूलकर्णी यांचा यूक्‍तीवाद ऐकला.
तक्रारीतील सर्व कागदपत्रे पाहता तक्रारदारांचे पती श्री.रंगनाथ चव्‍हाण यांचा विहीरीत पडून दि.01.04.2009 रोजी झाला आहे. त्‍या बाबत ग्रामीण पोलिस स्‍टेशनला माहीती देण्‍यात आलेली आहे. पोलिसांनी मयताचे शवविच्‍छेदन करण्‍यात आलेले आहे. त्‍यात मृत्‍यूचे निदान पाण्‍यात बूडून मृत्‍यू असे नमूद आहे.
सामनेवाला क्र.1 ने सर्व कागदपत्राची पूर्तता झाल्‍यानंतर सामनेवाला क्र. 2 कडे सदरचा प्रस्‍ताव दि.15.1.2010 रोजी पाठविला आहे.
सदरचा प्रस्‍ताव सामनेवाला क्र.2 यांना मिळाल्‍या बाबत सामनेवाला क्र.2 चे खुलाशात कोणताही उल्‍लेख नाही. याउलट सामनेवाला क्र.2 यांचा यूक्‍तीवाद की, सामनेवाला क्र.1 यांनी कागदपत्र पाठविल्‍यांचा कोणताही पुरावा दाखल केलेला नाही. सामनेवाला क्र.2 यांचे खुलाशात दि.3.1.2012 रोजी दाखल झालेला आहे. दि.15.1.2010रोजी सर्व कागदपत्रासह प्रस्‍ताव पाठविल्‍यानंतर सदरचा प्रस्‍ताव अपूर्ण कागदपत्र असल्‍याबाबत सामनेवाला क्र.2 यांचे कोणतेही पत्र नाही किंवा कागदपत्र मागणी करण्‍यात आलेले नाही. तसेच सामनेवाला क्र.2 यांनी त्‍यावर अंतिम निर्णय का घेतला नाही याबाबतचा कोणताही समर्पक खुलासा नाही.त्‍यामुळे सामनेवाला यांनी तक्रारदाराचा दावा परिपत्रकानुसार 30 दिवसाचे आंत मंजूर न करुन तक्रारदारांना दयावयाचे सेवेत कसूर केल्‍याची बाब स्‍पष्‍ट होते.
विलंबाचे संदर्भात तक्रारदाराचे पती दि.1.4.2009 रोजी मयत झालेला आहे. त्‍यांचा प्रस्‍ताव सामनेवाला क्र.1 कडे दि.6.7.2009 रोजी कागदपत्रासह पाठविण्‍यात आला. त्‍यातील कागदपत्राची अपूर्णतेची वर नमूद केल्‍याप्रमाणे पूर्तता करण्‍यात आली आहे. सामनेवाला क्र.2 विमा कंपनीकडे दि.15.1.2010 रोजी पाठविण्‍यात आले. या संदर्भात दि..6.7.2009 रोजी सामनेवाला क्र.1 ला प्रस्‍ताव मिळाला व दि.12.9.2011 रोजी तक्रार दाखल केलेली आहे. विमा प्रस्‍ताव अद्यापही सामनेवाला क्र.2 च्‍या स्‍तरावर प्रंलबित आहे. तो नाकारण्‍यात आलेला नाही. त्‍यामुळे तक्रारदारास विलंब झाला असे म्‍हणणे येत नाही. सदरचा विलंब हा तक्रारदाराकडून झालेला नसून कागदपत्र दाखल करण्‍याकरिता तक्रारदाराकडून जरी विलंब झाला तरी दि.15.1.2010 पासून तो सामनेवाला क्र.2 कडे निर्णयासाठी प्रलंबित आहे. वर नमूद केल्‍याप्रमाणे सामनेवाला क्र.2 यांनी या बाबत निर्णयाची कोणतीही कारवाई केलेली नाही. त्‍यामुळे सदर प्रकरणात तक्रार दाखल करण्‍यास विलंब झाला असे म्‍हणणे उचित होणार नाही असे न्‍यायमंचाचे मत आहे. त्‍यामुळे विलंबाचा याठिकाणी प्रश्‍नच येत नाही.
सबब, मंच खालील प्रमाणे आदेश पारीत करीत आहे.
आदेश
1. तक्रार अंशतः मंजूर करण्‍यात येते.
2. सामनेवाला क्र.2 यांना आदेश देण्‍यात येतो की, तक्रारदारांना रक्‍कम
रु.1,00,000/- (अक्षरी एक लाख फक्‍त) आदेश मिळाल्‍यापासून
एक महिन्‍याचे आंत अदा करावी.
3. सामनेवाला क्र.2 यांना आदेश देण्‍यात येतो की,वरील रक्‍कम मूदतीत
न दिल्‍यास वरील रक्‍कमेवर द.सा.द.शे. 9 टक्‍के दराने व्‍याज तक्रार
दाखल दि.11.01.2011 पासून पूर्ण रक्‍कम पदरीपडेपर्यत सामनेवाला
क्र.2 जबाबदार राहतील.
4. सामनेवाला क्र.2 यांना आदेश देण्‍यात येतो की, मानसिक त्रासाची
रक्‍कम रु.5000/-(अक्षरी रु.पाच हजार फक्‍त) व तक्रारीच्‍या खर्चाची
रककम रु.3000/-(अक्षरी रु.तिन हजार फक्‍त) आदेश प्राप्‍तीपासून
30 दिवसांचे आंत अदा करावी.
5. ग्राहक संरक्षण कायदा- 1986, अधिनियम 2005 मधील कलम-20
(3) प्रमाणे तक्रारीतील सदस्‍यांचे संच तक्रारदाराला परत करावेत.
(अजय भोसरेकर) (पी.बी.भट)
सदस्‍य अध्‍यक्ष
जिल्‍हा ग्राहक तक्रार निवारण मंच, बीड
