निकाल
दिनांक- 09.10.2013
(द्वारा- श्री.विनायक रावजी लोंढे, अध्यक्ष )
तक्रारदार राजेंद्र रामनाथ झोडगे यांनी सदरील तक्रार ग्राहक संरक्षण कायदा 1986 कलम 12 अन्वये सामनेवाले यांनी सेवेत कसूर केला आहे म्हणून नुकसान भरपाई मिळण्यास दाखल केली आहे.
तक्रारदाराची तक्रार थोडक्यात अशी की,तक्रारदार हे शासनमान्य वर्ग-1 चे गुत्तेदार आहेत. तक्रारदार यांनी सन 2007 मध्ये महिंद्रा कंपनीची स्कार्पिओ वाहन खरेदी केले. सदरील वाहनाचा विमा सामनेवाले विमा कंपनीकडे काढलेला आहे. तक्रारदार यांचे वाहनाचा क्रमांक एम.एच.-23-सी-4545 असा आहे.दि.09.07.2012 रोजी तक्रारदार यांनी सदरील वाहन आपले राहत्या घरी लावले होते. दि.10.07.2012 रोजी सकाळी तक्रारदार यांना वाहन चोरी गेल्याचे निदर्शनास आले. तक्रारदार यांनी सदर वाहनाचा शोध घेतला परंतु वाहन मिळून आले नाही. दि.11.07.2012 रोजी तक्रारदार यांनी वाहन चोरी गेल्या बाबत शिवाजी नगर पोलिस स्टेशन बीड येथे रितसर तक्रार नोंदविली. पोलिसांनी गुन्हा रजिस्ट्रर नंबर 134/2012 नोंदविला. पोलिसांनी घटनास्थळाचा पंचनामा केला व जाबजवाब घेतले. शिवाजी नगर पोलिस स्टेशन बीड यांनी सदरील गुन्हयाचा सर्वतोपरी तपास केला पंरतु सदर वाहन व गुन्हेगार मिळून आले नाही. सबब, दि.14.10.2012 रोजी शिवाजी नगर पोलिस स्टेशन बीड यांनी अ फायनल वर्गात अखरी रिपोर्ट समरी मंजूरी होणे बाबत मा.मुख्य न्यायदंडाधिकारी वर्ग-1 न्यायालय बीड यांचेकडे पाठविला.
तक्रारदार यांचे चोरीस गेलेले वाहनाचा सामनेवाला विमा कंपनीकडे विमा उतरविलेला होता. दि..21.10.2011 ते 21.10.2012 या कालावधीत विमा पॉलिसी वैध होती. सदर पॉलिसी काढताना सामनेवाले यांनी सदर वाहनाची किंमत म्हणजे रु.5,24,400/- इतकी धरुन त्यावर विमा हप्ता घेतलेला आहे. तक्रारदार यांनी सामनेवाला कडे वाहन चोरीस गेले असल्याने नुकसान भरपाई मिळावी म्हणून सर्व कागदपत्राची पुर्तता केली. सामनेवाले यांनी दि.14.10.2012 रोजी तक्रारदार यांना पत्र पाठवून क्लेम पूर्ण करणे करिता कागदपत्रे सादर करण्याचे सुचविले व वाहनाची किंमत आयडीव्ही ही रक्कम रु.5,24,400/- नसून रु.4,14,950/-इतके आहे असे कळविले. तक्रारदार यांनी सामनेवाला यांना सदर वाहनाची किंमत आयडीव्ही रक्कम रु.5,24,400/- गृहीत धरुन विमा रक्कम दयावी असे कळविले व त्याचप्रमाणे दरमहा रु.25,000/- मानसिक व शारीरिक त्रासापोटी नुकसान भरपाई मागितली. सामनेवाले यांनी सदर वाहनाची किंमत कमी करण्यास कोणतेही ठोस कारण दाखवले नाही. सामनेवाले यांची कृती बेकायदेशीर आहे व सेवेत त्रूटी ठेवली आहे. सबब, तक्रारदार यांनी सदरील तक्रार विम्याची रक्कम रु.5,24,400/- व मानविक व शारीरिक त्रासापोटी रक्कम रु.50,000/- वेळेत रक्कम न दिल्यामुळे झालेली रक्कम रु.1,00,000/- ची मागणी केली आहे.
सामनेवाले विमा कंपनी यांस मंचाची नोटीस मिळाली व ते मंचासमोर हजर होऊनही त्यांनी लेखी जवाब दाखल केला.सामनेवाले यांनी सदर चोरीस गेलेले वाहनाचा त्यांचेकडे विमा उतरविलेला आहे व तो वैध आहे ही बाब मान्य केलेली आहे.सामनेवाले यांचे कथन की, विमा कंपनीने आयडीव्ही ही वाहनाची किंमत रु.5,24,400/- ही चूकीने नोंदलेली आहे. सामनेवाले यांचे कथन की, सदरील वाहनाचे आयडीव्ही किमत रु.4,14,950/- एवढा येतो. त्या बाबत विमा कंपनीने तक्रारदार यांना संमती देण्यासाठी पत्र पाठविले व क्लेम तडजोउ करण्यास सांगितले. सामनेवाला यांनी असे कथन केले की, वाहनाचे योग्य व वाजवी किंमत रक्कम रु.4,14,950/- एवढी होती व त्या रक्कमेस सामनेवाला क्लेम सेंटलमेंट करण्यास तयार होते परंतु तक्रारदार हे तयार झाले नाही. त्यामुळे तक्रारदार हे अधिक नुकसान भरपाई मागण्यास पात्र नाहीत. सामनेवाले यांचे कथन की, सदरील वाहन 2007 मध्ये घेतलेले आहे. वाहनाचा वयाचा विचार करता आयडीव्ही किंमत ही रु.4,14,950/- योग्य व वाजवी आहे. सबब, सामनेवाला यांनी तक्रारदाराची तक्रार रदद करण्यात यावी अशी विनंती केली आहे.
तक्रारदार यांनी स्वतःचे शपथपत्र पुरावाकामी दाखल केले आहे. तसेच वाहन चोरी गेल्या बाबत फिर्याद, घटनास्थळ पंचनामा, समरी रिपोर्ट,इन्शुरन्स पॉलिसी, सामनेवाला यांना दिलेले पत्र, नोटीस, सामनेवाले यांनी तक्रारदार यांना पाठविलेले पत्र दाखल केले आहे. सामनेवाला यांनी पुरावाकामी शपथपत्र दाखल केले आहे. तसेच कव्हर नोट, मोटार विमा प्रपोजल फॉर्म दाखल केला आहे. तक्रारदार यांनी दाखल केलेले कागदपत्र, पुरावा तसेच सामनेवाला यांनी दाखल केलेले शपथपत्र व पुरावा यांचे अवलोकन केले असता न्याय निर्णयासाठी खालील मुददे उपस्थित होतात.
मुददे उत्तर
1. सामनेवाला यांनी तक्रारदार यांना सेवा देण्यास त्रूटी
ठेवली आहे हे तक्रारदार शाबीत करतात काय ? होय.
2. तक्रारदार हे तक्रारीत मागणी केलेली रक्कम मिळण्यास
पात्र आहेत काय ? होय,अंशतः
3. आदेश काय ? अंतिम आदेशाप्रमाणे.
कारणमिंमासा
मुददा क्र.1 ते 3 ः-
तक्रारदार व सामनेवाले यांना खालील बाबी मान्य केल्या आहेत. तक्रारदार हे स्कॉपीओ वाहन नंबर एम.एच.-23-सी-4545 यांचे मालक आहेत. सदरील वाहनाचा सामनेवाला विमा कंपनीकडे विमा काढलेला होता. दि.09.07.2012 रोजी रात्री सदरील वाहन तक्रारदार यांचें घराचे समोरुन चोरीस गेले. तक्रारदार यांनी शिवाजी नगर पोलिस स्टेशन बीड येथे वाहन चोरी गेल्या बाबत दि.11.07.2012 रोजी खबर नोंदविली. सदर चोरी गेलेले वाहन पोलिसांनी शोध घेऊनही सापडले नाही.
सामनेवाले यांचे वकिलांनी असा यूक्तीवाद केला की,सदरील वाहन हे 2007 साली विकत घेतले आहे. सदरील वाहनाचा आयडीव्ही किंमत रु.5,24,400/- नसून रु.4,14,950/- एवढी आहे. त्यामुळे तक्रारदार हे फक्त रु.4,14,950/- मिळण्यास पात्र आहेत. सामनेवाला यांचे वकिलांनी पुढे असा यूक्तीवाद केला की, सदरील वाहनाची विमा पॉलिसी दि.21.10.2011 ते 20.10.2012 या कालावधीची होती. तक्रारदार यांनी चूकीने आयडीव्ही किंमत रु.5,24,400/- दाखवली. कार्यालयातील कर्मचा-याने जास्त कामाचा बोजा असल्यामुळे सदरील बाब पाहिली नाही. त्यामुळे तक्रारदार हे रु.5,24,400/- मिळण्यास पात्र नाहीत. तक्रारदार यांचे वकिलांनी असा यूक्तीवाद केला की, आयडीव्ही लिहीण्याची जबाबदारी विमा कंपनीची आहे. विमा कंपनीने वाहनाची किंमत रु.5,24,400/- इतकी धरुन त्यावर विम्याची रक्कम घेतलेली आहे. त्यामुळे आता विमा कंपनीस त्या रक्कमेपेक्षा कमी रक्कम देणे लागते असे म्हणता येणार नाही. तक्रारदार यांचे वकिलांनी त्यांचें यूक्तीवादाचे समर्थनार्थ मा.राष्ट्रीय आयोग, नवी दिल्ली यांनी 02.09.2012 रोजी दिलेल्या न्यायनिवाडयाचा आधार घेतला आहे. सदरील तक्रारीमध्ये विमा पॉलिसीमध्ये वाहनाची पॉलिसी रक्कम रु.5,53,850/- दाखवली होती. सदरील वाहन चोरीस गेले होते. मा.राष्ट्रीय आयोगाने तक्रारदार यांना विमा पॉलिसीमध्ये दाखवलेली रक्कम देण्याचे निर्देश दिले.
तक्रारदार व सामनेवाले यांचे पुराव्याचे अवलोकन केले. तक्रारदार यांनी सामनेवाले यांचेकडे चोरी गेलेल्या वाहनाचा विमा उतरविलेला होता व सामनेवाला यांनी सदरील वाहनाची किंमत आयडीव्ही रक्कम रु.5,24,400/- दाखवलेली होती. त्यावर विमा हप्त्याच्या रक्कमेची आकारणी केली होती व तक्रारदार यांनी ती भरली आहे. त्यामुळे सदरील विमा कंपनी मध्ये जेवढी किंमत वाहनाची धरलेली आहे तेवढी मिळण्यास तक्रारदार पात्र आहेत. सबब, तक्रारदार सदर वाहनाची किंमत म्हणजे आयडीव्ही रु.5,24,400/- मिळण्यास पात्र आहेत. तसेच तक्रारदार यांना झालेल्या मानसिक व शारीरिक त्रासापोटी रक्कम रु.5,000/- व तक्रारीचा खर्च रक्कम रु.3,000/- मिळण्यास पात्र आहेत.
मुददा क्र.1 व 2 चे उत्तर होकारार्थी देण्यात येते.
सबब, मंच खालील प्रमाणे आदेश पारीत करीत आहे.
आदेश
1. तक्रारदाराची तक्रार मंजूर करण्यात येते.
2. सामनेवाले यांना आदेश देण्यात येतो की, तक्रारदार यांना वाहनाच्या
विम्याची रक्कम रु.5,24,400/- (अक्षरी रुपये पाच लाख चोविस हजार
चारशे फक्त) निकाल कळाल्यापासून 30 दिवसांचे आंत दयावेत.
सदरील रक्कम 30 दिवसांचे आंत न दिल्यास त्यावर द.सा.द.शे. 9
टक्के व्याज तक्रार दाखल दि.01.03.2013 पासून संपुर्ण रक्कम
मिळेपर्यत दयावे.
3. सामनेवाले यांना आदेश देण्यात येतो की, तक्रारदारयांना मानसिक व
शारीरिक त्रासापोटी रक्कम रु.5,000/- व दाव्याच्या खर्चापोटी रक्कम
रु.3000/- दयावेत.
4. ग्राहक संरक्षण कायदा 1986 चे अधिनियम 2005 मधील कलम 20
(3) प्रमाणे तक्रारीतील सदस्यांचे संच तक्रारदाराला परत करावेत.
श्रीमती मंजुषा चितलांगे श्री.विनायक लोंढे
सदस्य अध्यक्ष
जिल्हा ग्राहक तक्रार निवारण मंच, बीड.