(मंचाचा निर्णय : श्री. विजय प्रेमचंदानी - मा. अध्‍यक्ष यांचे आदेशांन्‍वये)

1.          तक्रारकर्त्‍याने विरुध्‍द पक्षाविरुध्‍द ग्राहक संरक्षण अधिनियम, 1986 च्‍या कलम 12 अन्‍वये प्रस्‍तुत तक्रार दाखल केलेली आहे. तक्रारकर्त्‍याने विरुध्‍द पक्ष कंपनीकडून दि.06.08.2015 ला Redmi 28GB White Mobil रु.5,999/- ला खरेदी केला होता. त्‍या मोबाईलमध्‍ये 15 दिवसांतच बिघाड आल्‍यामुळे तक्रारकर्त्‍याने नागपूर सर्व्‍हीस सेंटरमध्‍ये दि.16.09.2015 रोजी दुरुस्‍ती करीता दिला. सदर मोबाईलची वारंटी कालावधी हा एक वर्षाचा असुन त्‍यानंतर तो मोबाईल आणण्‍याकरीता तक्रारकर्ता नागपूर सर्व्‍हीस सेंटरमधे दि.03.10.2015 रोजी गेला व त्‍या सेंटरमधून मोबाईल परत घेतला. मोबाईल चेक करतांना सदर मोबाईल नादुरुस्‍त स्थितीत तक्रारकर्त्‍यास दिसुन आला. त्‍यामुळठे तो मोबाईल दुरुस्‍त करुन द्यावा किंवा नवीन मोबाईल कंपनीकडून मागवून देण्‍याची विनती केली असता मोबाईल सेंटरने असे सांगितले की, आमचे सर्व्‍हीस सेंटर कंपनीने बंद केलेले आहे. त्‍यामुळे ते तक्रारकर्त्‍यास सर्व्‍हीस देऊ शकत नाही व नकार दिला.  सर्व्‍हीस सेंटरने तक्रारकर्त्‍यास सुचविले की, मोबाईल दुरुस्‍त करण्‍याकरीता कंपनीकडे ई-मेल पाठवा म्‍हणजे कंपनीचे सर्व्‍हीस एजंट येतिल व त्‍यानंतर मोबाईल दुरुस्‍त करुन मिळेल. तक्रारकर्त्‍याने दि.15.10.2015 रोजी कंपनीकडे ई-मेल पाठविला परंतु त्‍यावर कंपनीकडून कोणतेही उत्‍तर आले नाही. सदर बाब विरुध्‍द पक्ष क्र. 1 ते 3 व्‍दारे तक्रारकर्त्‍यास सेवेत न्‍यूनता दर्शविली असल्‍यामुळे सदर तक्रार मंचासमक्ष दाखल करण्‍यांत आली. 

2.      तक्रारकर्त्‍याने तक्रारीत अशी प्रर्थना केली आहे की, विरुध्‍द पक्षाने खरेदी केलेला मोबाईल परत घेऊन नवीन देण्‍यांत यावा, तसेच तक्रारकर्त्‍याला झालेल्‍या शारीरिक, मानसिक व आर्थीक त्रासाचा व तक्रारीच्‍या खर्चापोटी नुकसान भरपाई मिळण्‍याबाबत आदेश व्‍हावा.

3.        तक्रारकर्त्‍याची तक्रार स्विकृत करुन विरुध्‍द पक्षांना नोटीस काढण्‍यांत आला, विरुध्‍द पक्ष क्र.1 व 3 यांना पाठविलेली  नोटीस ‘घेण्‍यांस नकार’, या शे-यासह परत. विरुध्‍द पक्ष क्र. 2 यांना नोटीस प्राप्‍त झाली परंतु ते प्रकरणात हजर झाले नाही. म्‍हणून दि.04.12.2016 व 25.04.2016 रोजी विरुध्‍द पक्ष क्र. 1 ते 3 यांचे विरुध्‍द प्रकरण ‘एकतर्फी’, चालविण्‍याचा आदेश मंचाने निशाणी क्र.1 वर पारित केलेला आहे.

4.          तक्रारकर्त्‍याची तक्रार व दाखल दस्‍तावेज यांचे सुक्ष्‍म अवलोकन केले असता मंचासमक्ष खालिल मुद्दे विचारार्थ घेण्‍यांत आले.                                                                                                                                     

                        मुद्दे                                                              निष्‍कर्ष                                 

1. तक्रारकर्ता विरुध्‍द पक्षांची ग्राहक आहे काय ?               होय.

2. विरुध्‍द पक्षांनी तक्रारकर्त्‍याप्रती न्‍यूनतापूर्ण व्‍यवहार

       अनुचित व्‍यापार व अनुचित व्‍यापार प्रथेची

      अवहेलना केली आहे काय ?                                होय.

3. अंतिम आदेश काय ?                                    अंतिम आदेशाप्रमाणे.

   - // कारणमिमांसा //-

   5.          मुद्दा क्र.1 बाबतः-  तक्रारकर्त्‍याने विरुध्‍द पक्ष क्र.1 कंपनीचा मोबाईल विरुध्‍द पक्ष क्र.2 मार्फत खरेदी केला होता व विरुध्‍द पक्ष क्र.3 यांना दुरुस्‍तीकरीता दिला होता. म्‍हणून तक्रारकर्ता विरुध्‍द पक्षांचा ‘ग्राहक’, आहे हे सिध्‍द होते. सबब मुद्दा क्र. 1 चे उत्‍तर होकारार्थी नोंदविण्‍यांत आलेला आहे. 

   6.     मुद्दा क्र.2 बाबतः- तक्रारकर्त्‍याने विरुध्‍द पक्ष क्र.1 कंपनीचा घेतलेला मोबाईल  विरुध्‍द पक्ष क्र.3 ला दुरुस्‍तीकरीता दिलेला होता आणि त्‍यांनी तो दुरुस्‍त करुन दिला नाही. तसेच तक्रारकर्त्‍याने विरुध्‍द पक्ष क्र. 1 ला सदर मोबाईल दुरुस्‍त करण्‍याकरीता ई-मेलही पाठविला होता, ही बाब तक्रारकर्त्‍याने दाखल केलेल्‍या दस्‍तावेजांवरुन सिध्‍द होते व त्‍याची विरुध्‍द पक्ष क्र. 1 यांनी कोणतीही दखल घेतली नाही. विरुध्‍द पक्ष क्र.1 यांनी तक्रारकर्त्‍याला मोबाईल विकला होता ही बाब तक्रारकर्त्‍याने दाखल केलेल्‍या दस्तावेजांवरुन सिध्‍द होते. विरुध्‍द पक्ष क्र.1 ने तक्रारकर्त्‍याला न्‍युनतम दर्जाचा मोबाईल विरुध्‍द पक्ष क्र.2 मार्फत विकला होता. सबब विरुध्‍द पक्ष क्र. 1 व 2 यांनी तक्रारकर्त्‍यास अनुचित व्‍यापार प्रथेची अवहेलना केल्‍याचे सिध्‍द होते. विरुध्‍द पक्ष क्र.3 यांनी सदर मोबाईल दि.16.09.2015 ला दुरुस्‍त करुन दिला होता, परंतु त्‍यांनी मोबाईलची दुरुस्‍ती योग्‍य रितीने केली नसल्‍याने तक्रारकर्त्‍याप्रती न्‍युनतापूर्ण सेवा दिल्‍याचे दिसुन येते. तक्रारकर्त्‍याव्‍दारे विरुध्‍द पक्ष क्र.1 ला पाठविलेल्‍या नोटीसची कोणतीही दखल न घेतल्‍याने विरुध्‍द पक्ष क्र. 1 यांनी तक्रारकर्त्‍याप्रती  न्‍यूनतम सेवा दिल्‍याचे सिध्‍द होते. म्‍हणून मुद्दा क्र. 2 चे उत्‍तर होकारार्थी नोंदविलेले आहे.

   7.     मुद्दा क्र.3 बाबतः- मुद्दा क्र.1 व 2 चे विवेचनावरुन तक्रारकर्त्‍याची तक्रार अंशतः स्‍वरुपाम मान्‍य करण्‍यांत येते. सबब खालिल प्रमाणे अंतिम आदेश पारित करण्‍यांत येतो. 

   -// अंतिम आदेश  //-

   1.    तक्रारकर्त्‍याची तक्रार अंशतः मंजूर करण्‍यांत येते.

   2.    विरुध्‍द पक्ष क्र.1 व 2 यांनी तक्रारकर्त्‍यास मोबाईलची किंमत रु.5,999/- परत

         करावी.

   3.    विरुध्‍द पक्ष क्र. 1 ते 3 यांनी तक्रारकर्त्‍यास झालेल्‍या शारीरिक, मानसिक व

       आर्थीक त्रासापोटी नुकसान भरपाई रु.5,000/- आणि तक्रारीच्‍या खर्चापोटी

       रु.2,500/- अदा करावी. 

   4.  विरुध्‍द पक्ष क्र. 1 ते 3 यांनी वरील आदेशाची अंमलबजावणी व्‍यक्तिगत किंवा

        संयुक्‍तरित्‍या आदेशाची प्रत मिळाल्‍याचे दिनांकापासुन 30 दिवसांचे आंत

      करावी.

   5.  उभय पक्षास सदर आदेशाची प्रथम प्रत निशुल्‍क द्यावी.

   6.   तक्रारकर्त्‍याला प्रकरणाची ‘ब’ व ‘क’ फाईल परत करावी.