निकाल
दिनांक- 23.09.2014
(द्वारा- श्री.विनायक रावजी लोंढे, अध्यक्ष)
तक्रारदार गोविंद बलभीमराव काकडे यांनी सदरील तक्रार ग्राहक संरक्षण कायदा 1986 कलम 12 अन्वये सामनेवाला यांनी चुकीचे विद्युत देयक देऊन व मीटर परस्पर काढून नेऊन सेवा देण्यास कसूर केला आहे म्हणून नुकसान भरपाई मिळणेसाठी दाखल केली आहे.
तक्रारदाराची तक्रार थोडक्यात येणेप्रमाणे, तक्रारदार हे सामनेवाला यांचे ग्राहक आहेत. तक्रारदार यांचा ग्राहक क्रमांक 588020409441 असा आहे व विद्युत मीटर क्रमांक 9870881309 असा आहे.तक्रारदार यांची कोणतीही तक्रार नसताना तक्रारदार यांचे जूने मीटर सामनेवाला यांनी तक्रारदाराच्या संमतीविना काढून नेले आहे व नविन विद्युत मीटर बसविले आहे. सदर नविन मीटर बसविल्यानंतर दि.06.12.2013 रोजी मागील विद्युत वापर म्हणून चुकीचे रिडींग दाखवून रक्कम रु.23,510/- चे बिल तक्रारदार यांना देण्यात आले. दि.08.11.2013 रोजी तक्रारदार यांचे विद्युत बिल रु.2,360/- एवढे होते व मागील वीज वापर 34 युनिट असा होता. तक्रारदार यांना चुकीचे बिल देण्यात आल्यानंतर तक्रारदार यांनी सामनेवाला यांच्याकडे तक्रार अर्ज केला व बिल दुरुस्त करुन द्यावे अशी विनंती केली. तसेच सामनेवाला यांना नोटीस पाठविली, सामनेवाला यांनी कोणतीही दखल घेतलेली नाही व नोटीसचे उत्तरही दिले नाही. दि.09.03.2014 रोजी सामनेवाला यांनी तक्रारदार यांचे विद्युत मीटर काढून नेले आहे. तक्रारदार हे वयोवृध्द असून त्यांना शारिरिक व मानसिक त्रास सोसावा लागत आहे. सामनेवाला यांनी कोणत्याही प्रकारची चौकशी न करता तक्रारदार यांना चुकीचे बिल देऊन व मीटर काढून नेऊन द्यावयाच्या सेवेत त्रुटी ठेवलेली आहे. सबब तक्रारदार यांनी सामनेवाला यांना काढून नेलेले मीटर तात्काळ बसवून द्यावे व चुकीचे विद्युत देयक दुरुस्त करुन देण्याचे आदेश व्हावे व तक्रारदार यांना झालेल्या शारिरिक व मानसिक त्रासापोटी नुकसान भरपाई द्यावी अशी विनंती केलेली आहे.
सामनेवाला हे मंचासमोर हजर झाले व त्यांनी निशाणी 15 अन्वये लेखी कैफियत दाखल केली. तक्रारदार हे सामनेवाला यांचे ग्राहक आहे ही बाब मान्य आहे. तक्रारदार यांचे जूने मीटर काढून त्या ठिकाणी नविन मीटर बसविलेले आहे ही बाब मान्य आहे. नविन मीटर बसविण्यासाठी ग्राहकांच्या संमतीची आवश्यकता नाही असे कथन केले आहे. सर्वच ग्राहकांसाठी नविन मीटर बसविण्याची प्रक्रिया झालेली आहे. सामनेवाला यांचे कथन की, तक्रारदाराचे नविन मीटर बसवितांना जूने मीटर मधील साठलेली रिडींग ही 2039 असल्याचे निष्पन्न झाले. तक्रारदाराला एकत्रित युनिटचे बिल रु.23,510/- देण्यात आले. जानेवारी 2014 पर्यंतचे एकूण बिल रु.26,929/- बिलाचा भरणा करणे बाबत तक्रारदार यांना कळविण्यात आले. विद्युत कायदा कलम 56(1) नुसार नोटीस पाठवली. तक्रारदार यांनी बिल न भरल्यामुळे विद्युत पुरवठा बंद करण्यात आला. तक्रारदार यांचे लेखी विनंती वरुन वीज बिल दुरुस्ती बाबत कळविल्यानंतर सामनेवाला यांनी ऑनलाईन बी-80 मार्फत बिलात दुरुस्ती 18 महिन्यात बायफरगेट करुन रु.18,079/- वजावट होऊन रु.14,411/- दुरुस्ती बिल भरण्याबाबत कळवले, तक्रारदार यांनी बिल भरले नाही. तक्रारदार यांच्याकडे नविन सुधारीत एकूण थकीत बिल रक्कम रु.10,282/- बाकी आहे. सदरील थकीत बिल भरणा केल्यास सामनेवाला हे तक्रारदार यांना विद्युत पुरवठा करण्यास तयार आहे. सबब सामनेवाला यांनी तक्रारदार यांची तक्रार रदद करण्यात यावी अशी विनंती केली आहे.
तक्रारदार यांनी तक्रारीसोबत निशाणी 4 अन्वये सामनेवाला यांनी दिलेले बिल, तक्रारदार यांनी दिलेला अर्ज हजर केले आहे. तसेच निशाणी 22 सोबत विद्युत देयके हजर केलेली आहेत. तक्रारदार यांनी स्वतःचे शपथपत्र हजर केले आहे. सामनेवाला यांनी निशाणी 16 सोबत कागदपत्र हजर केलेले आहे. सामनेवाला यांनी तक्रारदार यांना दिलेले विद्युत कायदा कलम 56(1) अन्वये पाठविलेली नोटीस, तक्रारदार यांना पाठविलेले पत्र सोत दुरुस्त विद्युत देयके हजर केलेली आहेत. सामनेवाला यांनी शपथपत्र हजर केले आहे. तक्रारदार यांनी दाखल केलेले कागदपत्र, पुराव्याचे शपथपत्र तसेच सामनेवाला यांनी दाखल केलेले शपथपत्र व पुराव्याचे कागदपत्र याचे अवलोकन केले. तसेच तक्रारदार यांचे वकील श्री.काकडे यांनी युक्तीवाद केला. सामनेवाला यांनी युक्तीवाद केला नाही. न्यायनिर्णयासाठी खालील मुददे उपस्थित होतात.
मुददे उत्तर
1) सामनेवाला यांनी चुकीचे विद्युत देयक देऊन
तक्रारदार यांना द्यावयाच्या सेवेत त्रुटी ठेवलेली आहे,
ही बाब तक्रारदार यांनी शाबीत केली आहे काय? होय.
2) तक्रारदार हे तक्रारीत केलेली मागणी मिळण्यास
पात्र आहे काय? होय.
3) आदेश काय ? अंतिम आदेशाप्रमाणे.
कारणमिंमासा
मुददा क्र.1 व 2 ः- तक्रारदार व सामनेवाला यांच्यामध्ये खालील बाबी विषयी वाद नाही. तक्रारदार हे सामनेवाला यांचा ग्राहक आहे. तक्रारदार यांना दि.06.12.2013 रोजी मागील युनिटचा वापर 2039 दाखवून रक्कम रु.23,510/- चे बिल देण्यात आले. तक्रारदार यांचे जूने मीटर काढून त्या ऐवजी नविन मीटर बसविण्यात आले. तक्रारदार यांनी देयक न भरल्यामुळे नविन मीटर काढून नेण्यात आले. या मंचाने दि.28.03.2014 रोजी निशाणी 5 वर ग्राहक संरक्षण कायदा कलम 13 (3) (ब) प्रमाणे अंतरिम आदेश देऊन नविन बसविलेले मीटर पुर्ववत बसवून विद्युत पुरवठा सुरु करुन द्यावा असे निर्देश दिलेले आहे. तसेच तक्रारदार यांनी विद्युत देयक रक्कम रु.2360/- सामनेवाला यांच्याकडे भरावे असे निर्देश दिलेले आहे.
तक्रारदार यांचे वकील श्री.काकडे यांनी या मंचाचे लक्ष तक्रारदार व सामनेवाला यांनी दाखल केलेल्या विद्युत देयकावर वेधले व असा युक्तीवाद केला की, सामनेवाला यांनी तक्रारदार यांचे जूने मीटर काढून नेतेवेळेस तक्रारदार यांना कोणतीही कल्पना दिली नाही व नविन मीटर बसविल्यानंतर चुकीचे विद्युत देयके देऊन मागील थकबाकी दाखविलेली आहे. सदर थकबाकी दाखवितांना त्याबाबत कोणताही पुरावा या मंचासमोर हजर केला नाही. सामनेवाला यांनी मनमानी पध्दतीने चुकीचे विद्युत देयक देऊन द्यावयाच्या सेवेत त्रुटी ठेवलेली आहे. तसेच त्यांनी पुढे असा युक्तीवाद केला की, सामनेवाला यांनी चुकीच्या बिलाची शहानिशा न करता तक्रारदार यांचे नविन बसविलेले मीटर काढून नेले आहे. त्यामुळे तक्रारदार यांना शारिरिक व मानसिक त्रास झाला आहे.
या मंचाने तक्रारदार यांनी दाखल केलेले सर्व दस्त काळजीपूर्वक वाचले. तक्रारदार यांना दि.06.12.2013 रोजी जे विद्युत देयके देण्यात आली त्याचा कालावधी दि.15.10.2013 ते 15.11.2013 असा दर्शविला आहे व एकूण थकबाकी रक्कम रु.21,139/- अशी दर्शविलेली आहे. दि.15.09.2013 ते 15.10.2013 या कालावधीतील बिल याचे अवलोकन केले असता विद्युत बिल रक्कम रु.2360/- अशी दर्शविलेली आहे. तक्रारदार यांनी वापरलेले युनिट याचे अवलोकन केले. सामनेवाला यांनी असे कथन केले आहे की, जूने मीटर काढून नेले त्यावेळेस तक्रारदार यांनी वापरलेले युनिट हे थकबाकीत दाखवून बिल दिलेले आहे. सदरील बाबी सिध्द करण्यासाठी सामनेवाला यांनी या मंचासमोर कोणताही दस्त हजर केला नाही. जूने मीटर काडून नेताना त्याची रिडींग व तक्रारदार यांनी वापरलेले युनिट हे तक्रारदाराच्या निदर्शनास आणून देऊन व तसे बिल तक्रारदार यांना देऊन जूने मीटर काढून नेले असते तर सामनेवाला यांचे कथन ग्राहय धरता आले असते. सामनेवाला यांनी तसे न करता परस्पर मीटर काढून नेले व नविन मीटर बसवून दिले. व तदनंतर विद्यूत देयकामध्ये मागील बाकी दर्शविली ही बाब प्रथमदर्शनी चुकीची आहे. नविन मीटर रिडींगप्रमाणे तक्रारदार यांना बिल देणे अभिप्रेत होते, तसे न करता सामनेवाला यांनी चुकीचे विद्युत देयक देऊन सेवा देण्यात त्रुटी ठेवली आहे. सामनेवाला यांनी नविन बसविलेले मीटर तक्रारदार यांना नोटीस देऊन काढून नेलेले आहे. थकलेल्या बिलाविषयी वाद उपस्थित केलेला होता व त्याबाबत योग्य तो निर्णय घेऊनच नविन बसविलेले मीटर काढून नेणे उचित झाले असते. तसे न करता नविन बसविलेल्या मीटरची कोणतीही थकबाकी नसताना सामनेवाला यांनी तक्रारदार यांचे मीटर काढून नेले, सदरील बाब ही सेवेत त्रुटी दर्शविणारी आहे. त्यामुळे तक्रारदार यांना शारिरिक व मानसिक त्रास झालेला आहे. सामनेवाला यांनी तक्रारदार यांना द्यावयाच्या सेवेत त्रुटी ठेवलेली आहे. सामनेवाला यांनी तक्रारदार यांना दिलेले चुकीचे बिल रदद होणेस पात्र आहे व तक्रारदार यांचे मीटर पुनर्स्थापित करण्याचे आदेश देणे योग्य वाटते. सबब मुददा क्र.1 व 2 चे उत्तर होकारार्थी देण्यात येते.
सबब, मंच खालीलप्रमाणे आदेश देत आहे.
आदेश
1) निशाणी क्र.5 वर दिलेला अंतरिम आदेश हे मंच कायम करत
आहे.
2) सामनेवाला यांना आदेश देण्यात येतो की त्यांनी, तक्रारदार
यांनी विद्युत देयकाची रक्कम रु.2360/- भरणा केल्यानंतर
तक्रारदाराचा विद्युत पुरवठा पुर्ववत सुरु करुन द्यावा.
3) सामनेवाला यांना आदेश देण्यात येतो की, तक्रारदार यांनी
वापरलेल्या युनिटप्रमाणे तक्रारदार यांना देयके देण्यात यावी.
4) सामनेवाला यांनी तक्रारदार यांना झालेल्या मानसिक
व शारिरिक त्रासापोटी नुकसान भरपाई रु.1,000/- (अक्षरी
रुपये एक हजार फक्त) व तक्रारीच्या खर्चापोटी रु.500/-
(अक्षरी रुपये पाचशे) दयावेत.
5) ग्राहक संरक्षण कायदा 1986 चे अधिनियम 2005 मधील
कलम 20 (3) प्रमाणे तक्रारीतील सदस्यांचे संच तक्रारदाराला
परत करावेत.
श्रीमती मंजूषा चितलांगे, श्री.विनायक लोंढे,
सदस्य अध्यक्ष
जिल्हा ग्राहक तक्रार निवारण मंच, बीड.