श्रीमती गीता बडवाईक, सदस्या यांचे आदेशांन्वये.
-आदेश-
(पारित दिनांक : 04.10.2012)
1. तक्रारकर्त्याने प्रस्तुत तक्रार ग्राहक संरक्षण कायद्याचे कलम 12 अन्वये दाखल केली असून, तक्रारकर्त्यांच्या तक्रारीचा आशय असा आहे की, त्यांनी गैरअर्जदार क्र. 2 यांचेकडून मौजा मानकापूर, प्लॉट क्र. 8, ख.क्र.57/2 मधील नवरत्न अपार्टमेंट्स या ईमारतीतील गाळा क्र. बी-4, टाईप बी, पहिला माळ्यावरील घेण्याचा करार दि.27/04/1998 रोजी केला. गैरअर्जदार क्र. 1 यांनी या व्यवहारास ना हरकत प्रमाणपत्र दिले.
गैरअर्जदार क्र. 2 यांनी सदर गाळा हा गैरअर्जदार क्र. 1 यांचेकडून दि.12.03.1993 च्या करारानुसार रु.1,63,914/- मध्ये घेण्याचे निश्चित केले होते. परंतू पुढे गाळ्याची उर्वरित रक्कम देण्यास गैरअर्जदार क्र. 2 हे असमर्थ ठरल्याने त्यांनी तो तक्रारकर्त्यास विकला. तक्रारकर्त्याने करारानुसार एल आय सी हाऊसिंग फायनांसची रक्कम रु.1,15,000/-, जी गैरअर्जदार क्र. 2 ने कर्ज म्हणून घेतली होती, ती अदा केली. गैरअर्जदार क्र. 1 ला रु.25,000/- द्यावयाचे होते. तसेच गैरअर्जदार क्र. 2 ला द्यावयाची रक्कमही रु.16,288.70 तक्रारकर्ता त्यांना द्यावयास तयार आहे, परंतू गैरअर्जदार क्र. 1 अद्यापही गाळ्याचे बांधकाम पूर्ण करुन देत नाहीत. अर्धवट बांधकाम असल्याने तेथे राहणे शक्य नव्हते, म्हणून तक्रारकर्त्याने अपूर्ण बांधकाम पूर्ण केले व त्याकरीता त्यांना रु.41,210/- खर्च आला. सदर रक्कम ही गैरअर्जदार क्र. 1 ला द्यावयाच्या रकमेपेक्षा जास्त असल्याने, तक्रारकर्त्याने त्याचेकडून कोणतीही रक्कम न घेता गैरअर्जदार क्र. 1 ने गाळ्याचे विक्रीपत्र करुन देण्याची मागणी केली. वारंवार पत्रव्यवहारही केला. परंतू गैरअर्जदार क्र. 1 ने गाळ्याचे विक्रीपत्र करुन दिले नाही. सदर इमारतीमधील सर्व गाळेधारकांना गेरअर्जदार क्र. 1 ने विक्रीपत्र करुन दिलेले आहेत. त्यामुळे तक्रारकर्त्याला मानसिक त्रास होत असल्याने, त्यांनी मंचासमोर सदर तक्रार दाखल करुन, वादग्रस्त गाळ्याचे विक्रीपत्र गैरअर्जदार क्र. 2 यांनी रु.16,288.70 घेऊन करुन द्यावे, गैरअर्जदार क्र. 1 ने नोंदणी व्यतिरिक्त कुठलाही खर्च न आकारता विक्रीपत्र करुन द्यावे, गैरअर्जदार क्र. 1 ने केलेल्या अवास्तव मागणीमुळे झालेल्या मानसिक त्रासाच्या भरपाईबाबत रु.20,000/- मिळावे आणि तक्रारीचा खर्च मिळावा अशा मागण्या केलेल्या आहेत. आपल्या तक्रारीचे पुष्टयर्थ तक्रारकर्त्याने एकूण 23 दस्तऐवज दाखल केलेले आहेत व ते पृ.क्र. 10 ते 51 वर दाखल आहेत.
2. सदर तक्रारीची नोटीस गैरअर्जदार क्र. 1 व 2 यांना पाठविली असता, त्यांनी तक्रारीस लेखी उत्तर दाखल केले.
3. गैरअर्जदार क्र. 1 यांनी आपल्या लेखी उत्तरात तक्रारकर्त्याने रु.1,15,000/- दिले व रु.25,000/- खरेदीच्या वेळेस द्यावयाचे होते ही बाब मान्य करुन इतर कथन अमान्य केले. त्यांच्या मते सदर इमारतीचे बांधकाम विकासकाने पूर्ण न केल्याने, त्यांनी पुढे ते बांधकाम पूर्ण केले व तक्रारकर्ते वगळून सर्व गाळेधारकांनी त्याबाबत रु.30,000/- ही रक्कम दिली आहे. तसेच अनेक खर्चादाखल रु.86,725/- ही रक्कम व्याजासह घेणे असल्याचे गैरअर्जदार क्र. 1 ने लेखी उत्तरात नमूद केले आहे.
4. गैरअर्जदार क्र. 2 यांनी लेखी उत्तरामध्ये करारामध्ये गैरअर्जदार क्र. 1 यांनी ना हरकत दिलेली आहे व रु.16,286.70 दिल्यास विक्रीपत्र करुन देण्यात येईल. नोंदणीकृत करारानुसार गेरअर्जदार क्र. 1 यांनी गाळ्याचे विक्रीपत्र करुन देण्यास जबाबदार आहे. त्यामुळे गैरअर्जदार क्र. 2 यांची त्यात कुठलीही जबाबदारी नाही असे नमूद करुन सदर तक्रार खारीज करण्याची मागणी केली.
5. तक्रारकर्त्यांनी प्रतिज्ञालेख दाखल करुन, कराराचे परिच्छेद क्र. 7 मध्ये असे नमूद केले आहे की, रु.1,40,000/- दिल्यानंतर, गैरअर्जदार क्र. 2 व तक्रारकर्ते सर्व प्रकारच्या देण्यातून मुक्त होतील. त्याप्रमाणे रु.1,15,000/- चा धनादेश तक्रारकर्त्यांनी त्यांना दिला. उर्वरित रु.25,000/- 03.06.1998 पूर्वी द्यावयाचे होते असाही उल्लेख सदर परिच्छेदात केलेला आहे. गाळ्याचा ताबापत्र वा ताबा घेतांना काही बांधकाम अपूर्ण अवस्थेत होते. त्याबाबत गैरअर्जदार क्र. 1 यांना कळविले होते. बांधकाम तक्रारकर्त्याने स्वखर्चाने पूर्ण केलेले आहे व त्याकरीता त्यांना रु.41,210/- खर्च आल्याने, उर्वरित रक्कम रु.25,000/- देण्याचा प्रश्न उरत नाही. गैरअर्जदार क्र. 1 ने मागणी केलेली रक्कम या गैरअर्जदार क्र. 2 ने पूर्वीच बिल्डरला अदा केलेले आहेत. गैरअर्जदार क्र. 1 यांची मागणी ही अवास्तव व अवाजवी आहे. गैरअर्जदार क्र. 1 ने तक्रारकर्त्याला विक्रीपत्र करुन द्यावे आणि तक्रारकर्त्याच्या इतर मागण्या मंजूर करण्याची मागणी त्यांनी केली.
6. सदर प्रकरण युक्तीवादाकरीता आल्यावर, मंचाने उभय पक्षांचा युक्तीवाद त्यांच्या वकिलांमार्फत ऐकला. तसेच प्रकरणात दाखल दस्तऐवज व प्रतिज्ञापत्र यांचे अवलोकन केले असता मंचासमोर पुढील प्रश्न उपस्थित होते. तक्रारकर्त्याची तक्रार मान्य होण्यास पात्र आहेत काय ?
-निष्कर्ष-
7. मंचाने तक्रारीमध्ये दाखल थकीत रकमेचे समायोजन केलेले दस्तऐवजाचे अवलोकन केले असता, तक्रारकर्ता हा गैरअर्जदार क्र. 2 ला काहीही देणे लागत नाही. ना हरकत प्रमाणपत्र व विक्रीच्या करारनाम्याच्या प्रतीचे अवलोकन केले असता, तक्रारकर्ता रु.25,000/- गैरअर्जदार क्र. 1 यांना देणे लागतो. परंतू गैरअर्जदार क्र. 1 ने तक्रारकर्त्याच्या वादग्रस्त गाळ्याचे सार्वजनिक सोईचे व काही अपूर्ण राहिलेली कामे पूर्ण न केल्याने तक्रारकर्त्याला त्या स्वखर्चाने पूर्ण करुन घ्याव्या लागले आणि त्याकरीता त्यांना रु.42,210/- इतका खर्च आला. सदर बाब खोटी असल्याबाबत गैरअर्जदार क्र. 1 यांनी नाकारली नाही. केवळ त्यांनी वेगवेगळया शिर्षकाखाली रकमेची मागणी केलेली आहे. गैरअर्जदार क्र. 1 यांना जर रक्कम गाळे धारकाकडून घ्यावयाची होती तर त्यांनी ना हरकत प्रमाणपत्र कसे काय दिले. तसेच विक्रीच्या करारनाम्यामध्ये या रकमा कुठेही नमूद केलेल्या नाही व मंचासमोर तक्रार दाखल झाल्यानंतर लेखी उत्तरामध्ये या रकमा घेणे असल्याचा उल्लेख केलेला आहे. दस्तऐवजातील पत्रांच्या प्रतीचे अवलोकन केले असता तक्रारकर्त्याने बराच काळ बांधकाम पूर्ण करण्याबाबत व विक्रीपत्राची मागणी करण्याबाबत गैरअर्जदार क्र. 1 यांना विनवण्या केलेल्या आहेत. अपूर्ण बांधकामाबाबत, विक्रीपत्राबाबत तक्रारकर्त्याने वारंवार गैरअर्जदार क्र. 1 यांचेशी पत्रव्यवहार करुन तगादा लावलेला आहे, परंतू गैरअर्जदार क्र. 1 यांनी त्यास दाद दिली नाही. गैरअर्जदार क्र. 1 यांची ही कृती मंचाला रास्त वाटत नाही. त्यामुळे तक्रारकर्त्याची तक्रार मंजूर होण्यास पात्र आहे असे मंचाचे मत आहे.
8. तक्रारकर्त्याला विक्रीच्या करारनाम्याप्रमाणे जी रक्कम द्यावयाची होती त्यापैकी रु.25,000/- अदा करावयाचे राहिले होते. परंतू गाळ्याचे अपूर्ण बांधकाम तक्रारकर्त्याने पूर्ण केलेले असल्याने व त्यादाखल झालेला खर्च या रकमेपेक्षा अधिक असल्याने मंचाचे मते तक्रारकर्ता गैरअर्जदार क्र. 1 यांना काही देणे लागत नाही. त्यामुळे वादग्रस्त गाळ्याचे विक्रीपत्र गैरअर्जदार क्र. 1 यांनी तक्रारकर्त्याला करुन देणे योग्य राहील. विक्रीपत्राचा खर्च हा तक्रारकर्त्याने करावा. तसेच गैरअर्जदार क्र. 1 यांनी तक्रारकर्त्याला इतक्या कालावधीपर्यंत गाळ्याचे विक्रीपत्र करुन न दिल्याने, तक्रारकर्ता हा गाळ्याच्या वैधानिक हक्कापासून वंचित राहिला. त्यामुळे त्याला मानसिक व शारिरीक त्रास सहन करावा लागला, म्हणून तक्रारकर्ता सदर त्रासाची भरपाई व तक्रारीचा खर्च मिळण्यास पात्र आहे असे मंचाचे मत आहे.
उपरोक्त निष्कर्षावरुन व उपलब्ध कागदपत्रांवरुन मंच सदर प्रकरणी खालीलप्रमाणे आदेश पारित करीत आहे.
-आदेश-
1) तक्रारकर्त्याची तक्रार अंशतः मंजूर करण्यात येते.
2) गैरअर्जदार क्र. 1 यांना आदेश देण्यात येतो की, त्यांनी मौजा मानकापूर, प्लॉट क्र. 8, ख.क्र.57/2 मधील नवरत्न अपार्टमेंट्स या ईमारतीतील पहिल्या माळ्यावरील गाळा क्र. बी-4, टाईप बी चे विक्रीपत्र तक्रारकर्त्याला करुन द्यावे. विक्रीपत्राचा खर्च तक्रारकर्त्याने सोसावा.
3) गैरअर्जदार क्र. 1 यांनी तक्रारकर्त्याला मानसिक व शारिरीक त्रासाबाबत भरपाई म्हणून रु.5,000/- व तक्रारीच्या खर्चाबाबत रु.2,000/- द्यावे.
4) गैरअर्जदार क्र. 2 यांच्याविरुध्दची तक्रार खारिज करण्यात येते.
5) सदर आदेशाची अंमलबजावणी गैरअर्जदार क्र. 1 यांनी आदेशाची प्रत मिळाल्यापासून 30 दिवसाचे आत करावी.