निकालपत्र
निकाल दिनांक – २८/०१/२०२०
(द्वारा अध्‍यक्ष : श्री.विजय चंद्रलाल प्रेमचंदानी)
___________________________________________________________
१. तक्रारकर्त्‍यांनी ग्राहक संरक्षण कायदा १९८६ कलम १२ प्रमाणे सदर तक्रार दाखल केलेली आहे.
२. तक्रारदार यांनी तक्रारीत असे कथन केले आहे की, तक्रारदार हे अहमदनगर येथील रहिवासी असुन त्‍यांचे जुना कापड बाजार येथे वाळींबे मेडिकल अॅण्‍ड जनरल स्‍टोअर्स या नावाने औषध विक्री करण्‍याचा व्‍यवसाय आहे. सदर दुकान तक्रारदाराने भाडे तत्‍वावर घेतलेले असुन ते भाडेकरू आहेत. सदर मिळकतीचे मुळ मालक साकला असुन त्‍यांना तक्रारदार भाडे देत होते. साकला यांनी सदर मिळकत विलास लक्ष्‍मण देवळालीकर यांना विकली असल्‍याने तक्रारदार देवळालीकर यांना भाडे देत होते. त्‍यांनी सदर मिळकत कु.तेजस्विनी मोहनालाल गांधी हीस खरेदी खताने विकली. दरम्‍यानच्‍या काळात तेजस्विनी गांधीने ह्या संपुर्ण जागेचा तक्रारदार यांच्‍याकडुन ताबा मिळावा याकरिता तिने अहमदनगर येथील मे.दिवाणी न्‍यायाधीश, कनिष्‍ठ कोर्ट यांच्‍या कोर्टात कब्‍जे मिळणेकरीता रे.मु.नं. १७८/२०१५ चा दाखल केलेला असुन त्‍यामध्‍ये तिने तक्रारदार हा सदर मिळकतीत भाडेकरी असल्‍याचे मान्‍य केले आहे. सदर दुकानात सामनेवाले यांच्‍याकडुन विद्युत पुरवठा घेतलेला असुन ते येणारे विद्युत देयके नियमितप्रमाणे सामनेवालेकडे भरत आहे. या अनुषंगाने तक्रारदार हे सामनेवाले यांचे ग्राहक आहेत. तक्रारदाराने त्‍याचे वरील नमुद दुकानाची खोटी कागदपत्रे सादर करून विज कनेक्‍शन घेतले असल्‍याबाबतचे आशयाची नोटीस तक्रारदार यांना दिनांक ०४-१०-२०१६ रोजी पाठविली. तक्रारदाराने त्‍या नोटीसला उत्‍तर दिले. परंतु पुन्‍हा सामनेवालेनी तक्रारदाराला त्रास देण्‍याकरीता दिनांक २८-०२-२०१७ रोजी नोटीस पाठविण्‍यात आली व एक दिवसाचे आत विद्युत पुरवठा खंडीत करण्‍यात येईल, अशी सुचना देण्‍यात आली होती. सदर बाब सामनेवालेची तक्रारदाराप्रती न्‍युनतम सेवा दिली असल्‍याने तक्रारदाराने सदर तक्रार मंचासमक्ष दाखल केलेली आहे.
३. तक्रारदाराने तक्रारीत अशी मागणी केली आहे की, सामनेवालेने तक्रारदाराचा विद्युत पुरवठा खंडीत करू नये. तसेच तक्रारदाराला झालेल्‍या मानसिक, शारीरिक त्रासापोटी नुकसान मिळण्‍याचा आदेश व्‍हावा.
४. तक्रारदाराची तक्रार स्विकृत करून सामनेवाले यांना नोटीस काढण्‍यात आली. सामनेवाले यांना नोटीस प्राप्‍त झाल्‍यानंतर प्रकरणात हजर झाले व निशाणी ११ वर त्‍यांची कैफीयत दाखल केलेली आहे. सदर कैफीयतीमध्‍ये सामनेवालेने असे कथन केलेले आहे की, तक्रारदार यांचा तक्रार अर्ज खोटा असुन नाकबुल आहे. सामनेवालेने पुढे असे कथन केले आहे की, तक्रारदार यांनी सामनेवाले यांच्‍याकडे विद्युत पुरवठा घेतेवेळी त्‍यांचे दुकानाचा परवाना तसेच साकला यांचा रूपये १००/- चे स्‍टॅम्‍प पेपरवर योग्‍य तो नमुना टाईप करून दिलेला होता. त्‍यावर विश्‍वास ठेवुन तक्रारदार यांना विद्युत पुरवठा देण्‍यात आला होता. सदरचा विज पुरवठा चुकीच्‍या कागदपत्राचे आधारे दिलेला असल्‍याबाबत सामनेवाले यांना कळविल्‍यानंतर सदरच्‍या कागदपत्रांची शहानिशा करण्‍याकामी तक्रारदारास मुळ कागदपत्र घेवून सामनेवाले यांचे कार्यालयात बोलविले. परंतु तक्रारदार हे सामनेवाले यांच्‍याकडे दाखल केलेले ए-१ फॉर्म सोबत जोडुन दिलेल्‍या कागदपत्रांची पडताळणी करण्‍याबाबत कोणतेही कागदपत्र सामनेवाले कार्यालयात आले नाही. तक्रारदार यांना नियमानुसार नोटीस देऊन संधी दिलेली होती. परंतु ते हजर राहीले नाही. ति-हाईत इसमाने केलेली तक्रार योग्‍य आहे, असे गृहीत धरून तक्रारदार यांना रितसर नोटीस देऊन त्‍यांचा विद्युत त्‍यांचा विद्युत पुरवठा खंडीत करण्‍याबाबत नोटीस देण्‍यात आलेली होती. तक्रारदार यांनी सदर विद्युत पुरवठा व्‍यवसायीक कारणाने घेतलेला असुन तो सामनेवले यांचा ग्राहक होऊ शकत नाही. सदर तक्रार खोट्या कारणाने दाखल करण्‍यात आलेली असुन रद्द करण्‍यात यावी, अशी विनंती करण्‍यात आलेली आहे.
५. तक्रारदाराने दाखल केलेली तक्रार, दस्‍तऐवज सामनेवालेने दाखल केलेला जबाब, तक्रारदाराचा शपथपत्र पुरावा व तोंडी युक्तिवाद ऐकला असता मंचासमक्ष खालीलप्रमाणे कारणमिमंसेवरून आदेश पारीत करण्‍यात येत आहे.
अ.क्र. | मुद्दे | निष्‍कर्ष |
१. | तक्रारदार हे सामनेवालेंचे ग्राहक आहेत काय ? | होय |
२. | सामनेवालेने तक्रारदाराला न्‍युनतम सेवा दिलेली आहे काय ? | होय |
३. | आदेश काय ? | अंतीम आदेशाप्रमाणे |
कारणमिमांसा
मुद्दा क्र.१ -
६. तक्रारदार यांनी सामनेवाले क्र.१ चे दुकानाकरीता विद्युत पुरवठा घेतला होता, यात कोणताही वाद नाही. तसेच तक्रारदार हे सामनेवालेंचे विद्युत पुरवठा/ विद्युत देयक यांचा भरणा नियमितपणे करत होते, या बाबी विषयीसुध्‍दा कोणताही वाद नाही. सामनेवालेने तक्रारदाराला दिलेला सदर विद्युत पुरवठा इतर कोणालाही दिलेला नसुन सदर विद्युत पुरवठा व्‍यापाराकरीती होता, हे ग्राह्य धरता येत नाही, म्‍हणुन तक्रारदार हे सामनेवालेचे ग्राहक आहे, हे सिध्‍द होते. म्‍हणुन मुद्दा क्रमांक १ चे उत्‍तर होकारार्थी नोंदविण्‍यात येत आहे.
मुद्दा क्र.२ -
७. सामनेवालेने तक्रारदाराला ति-हाईत इसमाचे तक्रारीवरून नोटीस दिली व त्‍याचे उत्‍तर तक्रारदाराने दिनांक १४-१०-२०१६ रोजी सामनेवालेला दिले ही, बाब तक्रारदाराने दाखल केलेल्‍या निशाणी क्रमांक २ दस्‍त क्रमांक ३ वरून सिध्‍द होत आहे. तरीसुध्‍दा सामनेवालेने तक्रारदाराचा विद्युत पुरवठा खंडीत करण्‍याची सुचना दिली, ही बाब सामनेवालेची तक्रारदाराप्रती न्‍युनतम सेवा दर्शविते व सिध्‍द होते. म्‍हणुन मुद्दा क्रमांक २ चे उत्‍तर होकारार्थी नोंदविण्‍यात येत आहे.
मुद्दा क्र.३ -
८. मुद्दा क्र.१ व २ चे विवेचनावरून खालीलप्रमाणे अंतीम आदेश पारीत करण्‍यात येत आहे.
आदेश
१. तक्रारदाराची तक्रार अंशतः मंजूर करण्‍यात येत आहे. |
२. सामनेवालेने तक्रारदाराचा विद्युत पुरवठा दिनांक २८-०२-२०१७ रोजी दिलेल्‍या नोटीसप्रमाणे खंडीत करून नये. |
३. सामनेवाले यांनी तक्रारदाराला शारीरिक व मानसिक त्रासाबद्दल रूपये २,५००/- (अक्षरी दोन हजार पाचशे मात्र) द्यावेत. |
४. वर नमुद रक्‍कम सामनेवालेने तक्रारदाराचे विद्युत देयकामध्‍ये जमा रक्‍कम म्‍हणुन समाविष्‍ट करावी. |
५. वर नमूद आदेशाची पुर्तता सामनेवाले यांनी आदेशाची प्रत मिळण्‍यापासून ३० दिवसाच्‍या आत करावी. |
६. या आदेशाची प्रथम प्रत उभय पक्षकार यांना निःशुल्‍क देण्‍यात यावी. |
७. तक्रारदार यांना या प्रकरणाची ‘’ब’’ व ‘’क’’ फाईल परत करावी. |
