आदेश पारीत व्‍दाराः श्री. अविनाश वि. प्रभुणे, मा. सदस्‍य.

          सदर तक्रार ग्राहक संरक्षण कायदा 1986 चे कलम 12 अन्वये विरुध्‍द पक्षांच्‍या सेवेतील त्रुटिबाबत दाखल केलेली आहे. सदर तक्रारीतील तक्रारकर्त्‍याच्‍या तक्रारीचा आशय खालीलप्रमाणे.

1.       तक्रारकर्त्‍याने विरुध्‍द पक्ष क्र.1 ते 4 यांचेकडून प्‍लॉट नं.7 व 8, प्रत्‍येकी क्षेत्रफळ 1200 चौ.फूट, खसरा नं.198/2 व 198/3, तह. हिंगणा, जिल्‍हा नागपूर येथे एकूण रु.2,00,000/- ला खरेदी करण्‍याचा करारनामा दि.22.12.2014 रोजी केला. सदर करारनात्‍यानुसार तक्रारकर्त्‍याने विरुध्‍द पक्षांना वेळोवेळी एकूण रु.1,35,000/- दिल्‍याचे नमुद केले. परंतु विरुध्‍द पक्षांना वारंवार विनंती करुनही ते प्‍लॉटचे विक्रीपत्र करुन देण्‍यांस टाळाटाळ करीत असल्‍याचे निदर्शनास आल्‍यानंतर त्‍यांना दि.28.09.2018 रोजी कायदेशिर नोटीस बजावण्‍यांत आली. तरीही विरुध्‍द पक्षांनी तक्रारकर्त्‍यास प्‍लॉटचे कायदेशिर विक्रीपत्र करुन न दिल्‍यामुळे नाईलाजास्‍तव सदर तक्रार आयोगात दाखल करावी लागली.

2.          प्रस्‍तुत प्रकरण दि.02.01.2019 रोजी आयोगासमोर दाखल झाल्‍यानंतर दि.14.01.2019 रोजी तक्रार स्विकृत करुन विरुध्‍द पक्षांना नोटीस काढण्‍याचा आदेश पारीत केला. त्‍यानंतर तक्रारकर्त्‍याचे वकीलांनी दि.05.09.2019 रोजी आयोगास तडजोड होत असल्‍याचे सांगितले, तेव्‍हापासुन जवळपास 19 तारखा होऊनही उभय पक्ष आयोगासमक्ष हजर झाले नाहीत व आपसी तडजोड झाल्‍याबाबत कुठलाही दस्‍तावेज दाखल केला नाही. पण उभय पक्ष कायम गैरहजर रहात असल्‍याने दोन्‍ही पक्षांत आपसी तडजोड झालेली असावी त्‍यामुळे तक्रारकर्त्‍यास तक्रार पुढे चालविण्‍यास स्‍वारस्‍य नसल्‍याचे आयोगाचे मत आहे. तसेच अशा प्रकारच्‍या प्रकरणामध्‍ये आयोगाचा बहूमुल्‍य वेळ वाया घालविणे योग्‍य नसल्‍याचे आयोगाचे मत आहे. सबब तक्रारकर्त्‍याची तक्रार नस्‍तीबध्‍द करण्‍यांत येते.

                      - //  अंतिम आदेश  // -

(1)   तक्रारकर्त्‍याची तक्रार नस्‍तीबध्‍द करण्‍यात येते.

(2)   खर्चाबद्दल कुठलाही आदेश नाही.

(3)   उभय पक्षकारांना आदेशाची प्रत निःशुल्‍क पाठविण्‍यात यावी.