गणपुर्ती  :-  सौ. संगिता एस. धायगुडे,  अध्‍यक्ष

                                सौ. प्रतिभा प्र. जहागिरदार, सदस्‍य

                    सौ. संजीवनी एस. शहा, सदस्‍य

                   तक्रारदार यांचेतर्फे अभियोक्‍ता :  जी.बी. सरवदे

                   विरुध्‍द पक्ष यांचेतर्फे अभियोक्‍ता : आर.एम. कोनापुरे

आदेश

सौ. संगिता एस. धायगुडे, अध्‍यक्ष यांचे द्वारा :-

1.     तक्रारदार यांची थोडक्‍यात अशी तक्रार आहे की, ते व्‍यवसायाने शेतकरी असून दुग्‍धव्‍यवसायाकरिता त्‍यांनी घेतलेल्‍या जर्शी गाईचा विरुध्‍द पक्ष (संक्षिप्‍त रुपामध्‍ये 'विमा कंपनी') पॉलिसी नं.1702-06-3012-000001 अन्‍वये दि.21/3/2007 ते 20/3/2010 कालावधीकरिता रु.30,000/- रकमेचा विमा उतरविण्‍यात आलेला आहे. गाईचा टॅग नं.39786 असा आहे. दि.4/12/2009 रोजी त्‍यांची गाय आजारी पडली आणि उपचार चालू असताना दि.5/12/2009 रोजी मृत्‍यू पावली आहे. त्‍यानंतर गाईचे पोस्‍टमार्टेम व पंचनामा करुन फोटो काढण्‍यात आले. तसेच विमा कंपनीकडे कागदपत्रांसह रीतसर अर्ज केला असून पोस्‍टमार्टेमचे फोटो डिजीटल मिक्‍सींग असल्‍याच्‍या कारणास्‍तव त्‍यांना विमा क्‍लेम नाकारण्‍यात आला. त्‍यामुळे तक्रारदार यांनी विमा रकमेसह नुकसान भरपाईपोटी एकूण रु.63,000/- विमा कंपनीकडून मिळावेत, अशी विनंती केलेली आहे.

2.    विमा कंपनीने रेकॉर्डवर म्‍हणणे दाखल केले असून तक्रार अमान्‍य केली आहे. त्‍यांच्‍या म्‍हणण्‍यानुसार तक्रारदार यांच्‍या गाईचा दि.5/12/2009 रोजी मृत्‍यू झाला असून पोस्‍टमार्टेम फोटोग्राफ डिजीटल मिक्‍सींगद्वारे काढण्‍यात आलेले आहेत. तक्रारदार यांचा हेतू फसवणुकीचा आहे. ते विमा नुकसान भरपाई देण्‍यास जबाबदार नाहीत आणि त्‍यांच्‍या सेवेमध्‍ये त्रुटी नाही. शेवटी त्‍यांनी तक्रार खर्चासह रद्द करण्‍याची विनंती केली आहे.

3.    तक्रारदार यांची तक्रार, विरुध्‍द पक्ष यांचे म्‍हणणे व रेकॉर्डवर दाखल कागदपत्रांचे अवलोकन करता, तसेच युक्तिवाद ऐकल्‍यानंतर निष्‍कर्षासाठी खालील मुद्दे उपस्थित होतात.

            मुद्दे                              उत्‍तर

1. विरुध्‍द पक्ष यांनी तक्रारदार यांना त्रुटीयुक्‍त सेवा

     दिली आहे काय ?                                                                            होय.

2. तक्रारदार विमा रक्‍कम मिळविण्‍यास पात्र आहेत काय ?               होय.

3. काय आदेश ?                                      शेवटी दिल्‍याप्रमाणे.

निष्‍कर्ष

4.    मुद्दा क्र. 1 ते 3 :- रेकॉर्डवर दाखल पॉलिसीचे अवलोकन करता, तक्रारदार यांच्‍या गाईचा पॉलिसी नं.1702-06-3012-000001 अन्‍वये दि.21/3/2007 ते 20/3/2010 कालावधीकरिता रु.30,000/- रकमेचा विमा उतरवल्‍याचे निदर्शनास येते. विमा कंपनीने प्रामुख्‍याने पोस्‍टमार्टेम फोटो हे डिजीटल मिक्‍सींग असल्‍यामुळे त्‍यामागे फसवणुकीचा हेतू असल्‍याचे कारण देऊन विमा कंपनीने तक्रारदार यांचा क्‍लेम नाकारलेला आहे.

5.    तक्रारदार यांनी मयत गाईचे डिजीटल मिक्‍सींग फोटो दाखल केल्‍याच्‍या कारणावरुन विमा कंपनीने क्‍लेम नाकारला आहे. त्‍यामागील कारण देताना तक्रारदार यांचा हेतू फसवणुकीचा असल्‍याचे त्‍यांनी नमूद केलेले आहे. वास्‍तविक पाहता, विमा कंपनीने डिजीटल फोटो दिल्‍यामुळे क्‍लेममध्‍ये कशाप्रकारे बनावटपणा निर्माण झाला ? किंवा त्‍यांची कशी फसवणूक झाली ? हे सिध्‍द करण्‍यासाठी कोणतीही विश्‍वनसनिय कागदपत्रे मंचापुढे सादर केलेली नाहीत. उचित पुराव्‍याअभावी तक्रारदार यांचा क्‍लेम खोटा असल्‍याचे ग्राह्य धरता येत नाही. तसेच रेकॉर्डवर दाखल पोस्‍टमार्टेम रिपोर्ट, वेटर्नरी स‍र्टिफिकेट, ट्रीटमेंट सर्टिफिकेट, पंचनामा, ग्रामपंचायत व दुध उत्‍पादक संस्‍थेचे दाखले इ. चे अवलोकन करता, तक्रारदार यांची विमा संरक्षीत गाय मृत्‍यू पावल्‍याचे सिध्‍द होते. अशा परिस्थितीत, विमा कंपनीने तक्रारदार यांचा क्‍लेम अत्‍यंत तांत्रिक कारणामुळे नाकारल्‍याचे स्‍पष्‍ट होते. विमा कंपनीने तक्रारदार यांचा क्‍लेम अयोग्‍य व अनुचित कारणास्‍तव नाकारुन सेवेत त्रुटी केल्‍यामुळे तक्रारदार हे गाईच्‍या विम्‍याची रक्‍कम रु.30,000/- क्‍लेम नाकारल्‍याच्‍या तारखेपासून द.सा.द.शे. 9 टक्‍के व्‍याज दरासह मिळविण्‍यास पात्र ठरतात.

6.    शेवटी आम्‍ही खालील आदेश देत आहोत.

आदेश

      1. विरुध्‍द पक्ष विमा कंपनीने तक्रारदार यांना विमा रक्‍कम रु.30,000/- क्‍लेम नाकारल्‍याच्‍या तारखेपासून द.सा.द.शे. 9 टक्‍के व्‍याज दराने या आदेशाच्‍या प्राप्‍तीपासून तीस दिवसाचे आत द्यावी.

      2. विरुध्‍द पक्ष विमा कंपनीने तक्रारदार यांना तक्रार खर्चापोटी रु.1,000/- या आदेशाच्‍या प्राप्‍तीपासून तीस दिवसाचे आत द्यावेत. 

      3. विरुध्‍द पक्ष विमा कंपनीने उपरोक्‍त आदेशाची अंमलबजावणी नमूद मुदतीत न केल्‍यास मुदतीनंतर एकूण देय रक्‍कम द.सा.द.शे. 12 टक्‍के व्‍याज दराने अदा करावी.

 (सौ. संगिता एस. धायगुडे÷)

अध्‍यक्ष

(सौ. प्रतिभा प्र. जहागिरदार)                              (सौ. संजीवनी एस. शहा)

          सदस्‍य                                           सदस्‍य

  जिल्‍हा ग्राहक तक्रार निवारण मंच, सोलापूर.

                    ----00----

(संविक/स्‍व/1910)