जिल्‍हा ग्राहक तक्रार निवारण मंच, सोलापूर.

ग्राहक तक्रार क्रमांक : 655/2010.

                                                                तक्रार दाखल दिनांक: 02/12/2010.     

                                                                तक्रार आदेश दिनांक :26/04/2011.   

सौ. रंजना पांडुरंग बनकर, वय 40 वर्षे, व्‍यवसाय : शेती,

रा. मु.पो. खुडस, ता. माळशिरस, जि. सोलापूर.                तक्रारदार

                        विरुध्‍द

1. रिलायन्‍स जनरल इन्‍शुरन्‍स कं. लि.,

   रा. रिलायन्‍स सेंटर, वालचंद हिराचंद मार्ग,

   बालार्ड इस्‍टेट, मुंबई – 400 038.

2. रिलायन्‍स जनरल इन्‍शु. कं.लि.,

   रा. एच.डी.एफ.सी. बँकेच्‍या वर, लकी चौक, सोलापूर.              विरुध्‍द पक्ष

               गणपुर्ती  :-  सौ. संगिता एस. धायगुडे,  अध्‍यक्ष

                                सौ. प्रतिभा प्र. जहागिरदार, सदस्‍य

                    सौ. संजीवनी एस. शहा, सदस्‍य

                   तक्रारदार यांचेतर्फे विधिज्ञ :  पी.पी. कुलकर्णी

                   विरुध्‍द पक्ष यांचेतर्फे विधिज्ञ : विदुला राव

आदेश

सौ. संगिता एस. धायगुडे, अध्‍यक्ष यांचे द्वारा :-

1.     तक्रारदार यांची थोडक्‍यात अशी तक्रार आहे की, ते शेतीसह दुग्‍धव्‍यवसाय करतात. त्‍यांच्‍या घरगुती होस्‍टर्न जातीच्‍या गाईचा विरुध्‍द पक्ष (संक्षिप्‍त रुपामध्‍ये ‘विमा कंपनी’) यांच्‍याकडे रु.20,000/- चा विमा उतरविण्‍यात आलेला आहे. विमा पॉलिसी क्र.1702-06-3012-000001/3024 व गाईच्‍या कानातील बिल्‍ला क्र.55674 आहे. दि.6/7/2007 रोजी त्‍यांची गाय आजारी पडली आणि वैद्यकीय उपचार करुनही दि.9/7/2007 रोजी गाय मृत्‍यू पावली. गाईचे पोस्‍टमार्टेम करुन सर्व कागदपत्रांसह विमा क्‍लेम सादर केला असता, क्‍लेम प्रलंबीत ठेवला आणि अप्रत्‍यक्षरित्‍या विमा कंपनीने तो नाकारला आहे. त्‍यामुळे तक्रारदार यांनी प्रस्‍तुत तक्रार दाखल करुन विमा रक्‍कम रु.20,000/- व्‍याजासह मिळावी आणि मानसिक त्रासापोटी रु.10,000/- व तक्रार खर्चापोटी रु.5,000/- मिळावेत, अशी विनंती केली आहे.

2.    विमा कंपनीने रेकॉर्डवर म्‍हणणे दाखल केले असून तक्रार अमान्‍य केली आहे. त्‍यांच्‍या म्‍हणण्‍यानुसार तक्रारदार यांची गाय दि.9/7/2007 रोजी मृत्‍यू पावली असून पॉलिसीच्‍या अटी व शर्तीप्रमाणे त्‍यांनी 24 तासाचे आत कळविले नाही. तसेच त्‍यांना तक्रारदार यांच्‍याकडून आवश्‍यक कागदपत्रे किंवा सूचना प्राप्‍त झालेली नाही. तसेच अट क्र.3 प्रमाणे गाईच्‍या कानातील टॅग जमा न केल्‍यास ‘नो टॅग नो क्‍लेम’ तत्‍वानुसार क्‍लेम देय होत नाही.  त्‍यांच्‍या सेवेमध्‍ये त्रुटी नाही. शेवटी त्‍यांनी तक्रार खर्चासह रद्द करण्‍याची विनंती केली आहे.

3.    तक्रारदार यांची तक्रार, विरुध्‍द पक्ष यांचे म्‍हणणे व दाखल कागदपत्रांचे अवलोकन करता, तसेच युक्तिवाद ऐकल्‍यानंतर निष्‍कर्षासाठी खालील मुद्दे उपस्थित होतात.

            मुद्दे                              उत्‍तर

1. विरुध्‍द पक्ष यांनी तक्रारदार यांना त्रुटीयुक्‍त सेवा

     दिली आहे काय ?                                                                            होय.

2. तक्रारदार विमा रक्‍कम मिळविण्‍यास पात्र आहेत काय ?               होय.

3. काय आदेश ?                                      शेवटी दिल्‍याप्रमाणे.

निष्‍कर्ष

4.    मुद्दा क्र. 1 ते 3 :- तक्रारदार यांच्‍या गाईचा विमा कंपनीकडे विमा उतरविण्‍यात आल्‍याचे व विमा कालावधीमध्‍ये गाय मृत्‍यू पावल्‍याविषयी विवाद नाही. तक्रारदार यांच्‍या म्‍हणण्‍यानुसार सर्व कागदपत्रांसह विमा क्‍लेम सादर केला असता, विमा कंपनीने क्‍लेम प्रलंबीत ठेवला आणि अप्रत्‍यक्षरित्‍या विमा कंपनीने नाकारलेला आहे.

5.    विमा कंपनीने प्रामुख्‍याने पॉलिसी अट क्र.3 चा आधार घेत 'नो टॅग नो क्‍लेम' तत्‍वानुसार विमा दावा देय नसल्‍याचे नमूद आहे. तसेच तक्रारदार यांनी 24 तासाचे आत कळविले नसल्‍याचे विरुध्‍द पक्ष यांनी नमूद केले आहे. वरिष्‍ठ आयोगाच्‍या निर्णयांनुसार क्‍लेमची माहिती वेळेमध्‍ये न दिल्‍यास त्‍यामुळे क्‍लेम नाकारता येऊ शकत नाही.

6.    तक्रारदार यांनी रेकॉर्डवर विमा पॉलिसी, विमा दावा प्रपत्र, पोस्‍टमार्टेम रिपोर्ट, वेटर्नरी सर्टिफिकेट, पंचनामा इ. कागदपत्रे दाखल केलेली आहे. सदर कागदपत्रांचे बारकाईने अवलोकन करता, विमा पॉलिसीमध्‍ये नमूद असणा-या टॅग क्रमांकाची गाय मृत्‍यू पावल्‍याचे स्‍पष्‍टपणे निदर्शनास येते. रेकॉर्डवर उपलब्‍ध असलेली कागदपत्रे विमा क्‍लेम सेटल करण्‍यास विमा कंपनी कशी असमर्थ ठरते ? याचे उचित स्‍पष्‍टीकरण देण्‍यात आलेले नाही. आमच्‍या मते, सदर कागदपत्रे तक्रारदार यांची विमा संरक्षीत गाय मृत्‍यू पावल्‍याचे सिध्‍द करण्‍यास पुरेशी आहेत. वरील सर्व विवेचनावरुन विमा कंपनीने तक्रारदार यांचा विमा क्‍लेम अयोग्‍य व अनुचित कारणास्‍तव नाकारुन सेवेत त्रुटी केल्‍यामुळे तक्रारदार हे गाईंच्‍या विम्‍याची रक्‍कम तक्रारदार दाखल तारखेपासून द.सा.द.शे. 9 टक्‍के व्‍यास दरासह मिळविण्‍यास पात्र ठरतात.

7.    शेवटी आम्‍ही खालील आदेश देत आहोत.

आदेश

      1. विरुध्‍द पक्ष यांनी तक्रारदार यांना विमा रक्‍कम रु.20,000/- दि.2/12/2010 पासून द.सा.द.शे. 9 टक्‍के व्‍याज दराने या आदेशाच्‍या प्राप्‍तीपासून तीस दिवसाचे आत द्यावी.

      2. विरुध्‍द पक्ष यांनी तक्रारदार यांना तक्रार खर्चापोटी रु.1,000/- या आदेशाच्‍या प्राप्‍तीपासून तीस दिवसाचे आत द्यावेत.

      3. उपरोक्‍त नमूद रक्‍कम विहीत मुदतीत न दिल्‍यास तेथून पुढे विरुध्‍द पक्ष यांनी द.सा.द.शे. 12 टक्‍के दराने व्‍याज द्यावे.

 (सौ. संगिता एस. धायगुडे÷)

अध्‍यक्ष

(सौ. प्रतिभा प्र. जहागिरदार)                              (सौ. संजीवनी एस. शहा)

          सदस्‍य                                           सदस्‍य

  जिल्‍हा ग्राहक तक्रार निवारण मंच, सोलापूर.

                    ----00----

(संविक/स्‍व/28411)