निकाल
दिनांक- 11.10.2013
(द्वारा- श्रीमती मंजूषा चितलांगे, सदस्‍य)
तक्रारदार जगन्‍नाथ किशनराव शिंदे यांनी सदरील तक्रार ग्राहक संरक्षण कायदा 1986 कलम 12 अन्‍वये सामनेवाला यांनी सेवा देण्‍यामध्‍ये त्रुटी ठेवल्‍याबाबत नुकसान भरपाई मिळण्‍यासाठी दाखल केलेली आहे.

तक्रारदाराची तक्रार थोडक्‍यात खालीलप्रमाणे, तक्रारदार यांनी सामनेवाला क्र.1 कडून डिवाईन कंपनीचा पंप मोटार नं.79-5 एच.पी.10 रक्‍कम रु.14,750/- देऊन खरेदी केला. या कंपनीचे परळी येथील एजंट भगवान इलेक्‍ट्रीक स्‍टोअर्स यांनी कॅश मेमोवर सदर पंपाची एक वर्षाची गॅरंटी दिलेली आहे. उत्‍पादक मार्फत मिळणारे गॅरंटी कार्ड एजंटाने कँश मेमोसोबत खरेदीदारास दिले नाही. सदर मोटार तक्रारदाराने दि.26.06.2012 रोजी खरेदी केली आहे, त्‍याचा गॅरंटीचा कालावधी दि.26.06.2012 ते 25.06.2013 असा आहे.

सदर पंप हा गॅरंटी कालावधीच्‍या अगोदर म्‍हणजे दि.10.06.2013 रोजी बिघडल्‍यामुळे तक्रारदार यांनी सामनेवाला यांना तोंडी कल्‍पना दिली असता, सामनेवाला यांनी तुम्‍ही सदर मोटार काढून आणा असे म्‍हटल्‍यानंतर तक्रारदाराने त्‍यांची शेतातील पाण्‍याची गरज लक्षात घेऊन सदर पंप दि.11 जून 2013 रोजी गणेश इलेक्‍ट्रीकल तडोळी येथील श्रीमंत सातभाई यांचेकडून मोटार काढून घेऊन सदर मोटार सामनेवाला यांच्‍या दुकानवर नेऊन दिली असता तक्रारदाराकडे सामनेवाला यांनी रु.1,000/- द्या व गॅरंटी प्रमाणे दुसरी मोटार घेऊन जा असे सांगितले. त्‍यानंतर सामनेवाला यांनी तक्रारदारास गॅरंटीप्रमाणे नविन मोटार न देता सदर मोटार नांदेड येथे पाठवून दुरुस्‍त करुन दिली. तक्रारदाराने सदर मोटार बोअरमध्‍ये चालू केली असता ती मोटार फक्‍त सहा तास चालली.

तक्रारदाराने दुस-यांदा परत सादीक मेकॅनिक यांच्‍याकडून पंप काढला असता मोटार बॉडीमध्‍ये कनेक्‍शन फॉल्‍ट निघाला. म्‍हणून सदर पंप बंद पडला.त्‍यानंतर सदर मेकॅनिककडून तक्रारदाराने मोटार कनेक्‍शनमध्‍ये फॉल्‍ट निघाल्‍यामुळे त्‍याची दुरुस्‍ती करुन घेतली. सामनेवाला यांना तक्रारदाराने त्‍याचे शेतामध्‍ये येऊन पाहण्‍याची विनंती केली असता त्‍यांनी उडवाउडवीची उत्‍तरे दिली.

सामनेवाला यांनी तक्रारदाराची दिशाभूल व फसवणूक केलेली आहे. त्‍यामुळे तक्रारदारास शारिरिक व मानसिक त्रास झाला आहे. गॅरंटीच्‍या कालावधीत सदर मोटार बिघडल्‍यामुळे नविन मोटार देणे क्रमप्राप्‍त असताना मोटार दिली नाही. म्‍हणून तक्रारदाराची तक्रार ही खर्चासह मंजूर करण्‍यात यावी अशी विनंती केली आहे.

सामनेवाला क्र.1 यांना नोटीस बजावण्‍यात आली. व त्‍यांना मंचात हजर राहता येत नसल्‍यामुळे त्‍यांनी पोस्‍टाद्वारे आपले लेखी म्‍हणणे सादर केलेले आहे. त्‍यांच्‍या कथनेनुसार तक्रारदाराने दि.26.06.2012 रोजी डिवाईन कंपनीचा पंप मोटार नं. 79-5 एच.पी.10 खरेदी केला आहे ही बाब मान्‍य आहे. त्‍यासोबत गॅरंटी कार्ड दिलेले नाही ही बाब मान्‍य केली नाही.तसेच तक्रारदाराकडून मी रक्‍कम रु.1,000/- मागितलेली नाही, असे नमुद केले आहे. तक्रारदार यांनी कुठलीही रक्‍कम न दिल्‍यामुळे पावती देण्‍याची गरज नाही. सदर मोटार ही सिंगल फेसींग झाल्‍यामुळे जळण्‍याचा संभव असतो आणि या कारणामुळे कदाचित मोटार जळाली असेल. तसेच सादीक मेकॅनिक यांनी चुकीचे कनेक्‍शन केल्‍यामुळे मोटार बंद पडली आहे. वायरचे कनेक्‍शन मोटार सोबत येत नसतात व ते पुन्‍हा जोडावे लागतात. सदर मोटार बंद पडण्‍यास माझी कोणतीही चुक नाही. सदर मोटारचा वापर सध्‍या चालू आहे.त्‍यामुळे नविन मोटार देण्‍याचा प्रश्‍न उदभवत नाही. मी अपंग असल्‍यामुळे स्‍वतः कोर्टात हजर राहू शकत नाही. तक्रारदार याला कोणतीही सेवा देण्‍यात त्रुटी ठेवलेली नाही म्‍हणून सदरील तक्रार ही खारीज करण्‍यात यावी.

सामनेवाला क्र.2 यांना नोटीस बजावण्‍यात आली तरी सुध्‍दा सामनेवाला क्र.2 हे मंचासमोर हजर झाले नाही. म्‍हणून सदर प्रकरण हे त्‍यांच्‍याविरुध्‍द एकतर्फा चालविण्‍याचा आदेश झालेला आहे.

तक्रारदार यांनी दाखल केलेले कागदपत्र तसेच सामनेवाला यांचे शपथपत्र व तक्रारदार यांचा युक्‍तीवाद याचे अवलोकन केले असता त्‍यावरुन न्‍यायनिर्णयासाठी खालील मुददे उपस्थित होतात.

मुददे उत्‍तर 1) तक्रारदार यांना सामनेवाला यांनी सेवा देण्‍यास त्रुटी ठेवली आहे, ही बाब सिध्‍द केली आहे काय? होय.
2) आदेश काय ? अंतिम आदेशाप्रमाणे.

कारणमिमांसा
मुददा क्र.1 व 2 ः- तक्रारदार यांनी पुराव्‍याकामी आपले शपथपत्र दाखल केले आहे. तसेच सामनेवाला क्र.1 कडून खरेदी केलेली मोटार पंपची पावती तक्रारीसोबत दाखल केली. सादीक मेकॅनिक यांच्‍याकडून पंप दुरुस्‍त करुन घेतल्‍याची पावती, तसेच श्री गणेश इलेक्‍ट्रीकल यांच्‍याकडून पंप काढून पंप बसविल्‍याची मजूरी मिळाल्‍याची पावती दाखल केली आहे.
तक्रारदाराचे कथन असे की, तक्रारदार यांनी सामनेवाला क्र.1 कडून डिवाईन कंपनीचा मोटार पंप खरेदी केला आहे. सदर मोटार पंपची एक वर्षाची गॅरंटी होती. सदर मोटार पंप गॅरंटीच्‍या कालावधीत बिघाड झाल्‍यामुळे त्‍याची कल्‍पना तक्रारदार यांनी सामनेवाला यांना दिली. सामनेवाला यांनी सदर मोटार तक्रारदारास दुरुस्‍त करुन दिली असता, सदर मोटार ही बोअरमध्‍ये फक्‍त सहा तास चालली. तक्रारदार याने सादीक मेकॅनिककडून दुरुस्‍त करुन घेतली. श्री गणेश इलेक्‍ट्रीकल्‍स यांचेकडून परत दुरुस्‍त करुन घेतली आहे.

सामनेवाला यांचे कथन असे की, त्‍यांनी तक्रारदारास मोटार खरेदी करताना गॅरंटी कार्ड दिलेले आहे. सदर मोटार ही गॅरंटीच्‍या कालावधीत बिघाड झाल्‍यामुळे दुरुस्‍त करुन देण्‍यासाठी कसल्‍याही प्रकारची रक्‍कम मागितली नाही. सदर मोटार ही मेकॅनिककडून दुरुस्‍त करुन घेतल्‍यामुळे व सिंगल फेसींगमुळे जळाली असेल, मोटार ही चालू परिस्थितीत असल्‍यामुळे नविन मोटार देण्‍याचा प्रश्‍न उदभवत नाही.

तक्रारदाराने दाखल केलेले कागदपत्र, त्‍यांनी स्‍वतः केलेला युक्‍तीवाद याचे अवलोकन केले. तसेच सामनेवाला यांनी जबाब व्‍यतिरिक्‍त कोणताही असा पुरावा दाखल केलेला नाही. तक्रारदाराने दाखल केलेले कागदपत्र याचे अवलोकन केले असता असे निदर्शनास येते की, तक्रारदाराने सामनेवाला क्र.1 कडून डिवाईन कंपनीचा मोटार पंप खरेदी केला आहे, ही बाब तक्रारदाराने दाखल केलेल्‍या पावतीवरुन सिध्‍द होते. सदर पावतीवर मोटार पंपची एक वर्षाची गॅरंटी राहील असे नमुद केलेले आहे, असे असताना सुध्‍दा सामनेवाला क्र.1 यांनी तक्ररदारास व्‍यवस्थित मोटार दुरुस्‍त करुन दिली नाही. म्‍हणून तक्रारदारास दुस-यांदा परत मोटार पंप दुरुस्‍त करुन घ्‍यावा लागला. त्‍यांनी दाखल केलेल्‍या सादीक मेकॅनिक यांच्‍या पावतीवरुन तसेच गणेश इलेक्‍ट्रीकल्‍स यांच्‍या पावतीवरुन ही बाब सिध्‍द होते की, तक्रारदाराने दोनदा मोटार पंप दुरुस्‍त करण्‍यासाठी खर्च केला आहे .त्‍यामुळे तक्रारदारास आर्थिक नुकसान झालेले आहे.

वर नमुद केलेला पुरावा व जबाब याचे अवलोकन केले असता मंचाचे असे मत आहे की, सामनेवाला क्र.1 यांनी तक्रारदारास सेवा देण्‍यामध्‍ये त्रुटी ठेवली आहे. त्‍यामुळे तक्रारदारास शारिरिक व मानसिक त्रास झालेला आहे. म्‍हणून तक्रारदार यांनी केलेली मागणी विचारात घेऊन तक्रारदार हे सामनेवाला क्र.1 कडून रक्‍कम रु.2500/-मोटार दुरुस्‍तीपोटी नुकसान भरपाई मिळण्‍यास पात्र आहे. तसेच मानसिक व शारिरिक त्रासापोटी आणि तक्रारीच्‍या खर्चापोटी रु.1,000/- मिळण्‍यास पात्र आहे. म्‍हणून मुददा क्र.1 चे उत्‍तर होकारार्थी देण्‍यात येते.
सबब, मंच खालीलप्रमाणे आदेश देत आहे.
आदेश 1) तक्रारदाराची तक्रार मंजूर करण्‍यात येते.
2) सामनेवाला क्र.1 यांना आदेश देण्‍यात येतो की, तक्रारदारास रक्‍कम
रु.2500/- मोटार दुरुस्‍तीपोटी खर्च म्‍हणून निकाल कळाल्‍यापासून
30 दिवसाच्‍या आत द्यावे.
3) सामनेवाला क्र.1 यांनी, तक्रारदारास झालेल्‍या मानसिक, शारिरिक
त्रासापोटी व तक्रारीचा खर्च रु.1,000/-द्यावे.
4) ग्राहक संरक्षण कायदा 1986 चे अधिनियम 2005 मधील कलम
20 (3) प्रमाणे तक्रारीतील सदस्‍यांचे संच तक्रारदाराला परत
करावेत.

श्रीमती मंजूषा चितलांगे, श्री.विनायक लोंढे,
सदस्‍य अध्‍यक्ष