ता.25.10.2013

प्रस्‍तुत तक्रार आज उशिर माफीचे अर्जावर व दाखल सुनावणीकामी वादसूचीवर होती. तक्रारदाराचे वकीलांनी दीर्घकाळ युक्‍तीवाद केला. प्रस्‍तुत तक्रारीमध्‍ये तक्रारदाराने तक्रार दाखल करण्‍यास 90 दिवसांचा उशिर झाला असून सदर उशिर माफ करणेबाबत विनंती अर्ज दिला आहे. मूळ तक्रारीमधील विनंतीमध्‍ये विद्युत देयकाचे व्‍याजात झालेल्‍या चुकीच्‍या आकारणीबाबत दाद मागितली आहे. तक्रारदाराने असाही युक्‍तीवाद केला ही प्रस्‍तुत तक्रारदार हे दुसरे सह दिवाणी न्‍यायालय वरिष्‍ठ स्‍तर यांनी विशेष दिवाणी दावा क्र. 813/1996 मध्‍ये पारीत अंतीम आदेश दि. 06/01/2010 चे पूर्णपणे पालन केले असून सदर आदेशाविरुध्‍द कोणत्‍याही न्‍यायालयात अपिल दाखल केलेले नाही. तसेच तक्रारदार यांचेकडे बसविलेले विद्युत मापक हे वाणिज्यिक एल.टी.2 या प्रवर्गात येत असल्‍याने व मूळ तक्रारदार स्‍टरलाईट मेटल रोलींग मिल्‍स प्रा.लि. ही कंपनी कायदयान्‍वये नोंदणीकृत कंपनी असून नफ्याच्‍या उद्देशाने चालविली जात होती. प्रस्‍तुत तक्रारदाराने तक्रारीत वाणिज्‍यीक स्‍वरुपात वापर केलेल्‍या विदयुत बिलाचे आकारणीत अतिरिक्‍त व्‍याज नमूद केल्‍यामुळे सामनेवाले यांचेविरुध्‍द दाद मागितली आहे. दिवाणी न्‍यायालयाच्‍या आदेशाच्‍या पूर्ततेकामी नमूद व्‍याजाची मागणी सामनेवाले यांनी केली आहे. त्‍याची पूर्तता तक्रारदाराने केलेली आहे. तक्रारदाराने दाखल तक्रारीतील दाद व विनंती ही वाणिज्यिक स्‍वरुपाच्‍या देयकाशी संबंधीत असल्‍याने या मंचास सदर तक्रार चालविणेचे अधिकारक्षेत्र नसल्‍याने सदरची तक्रार दाखल करुन घेणे न्‍यायोचित नाही. सबब सदरची तक्रार निकाली काढण्‍यात येते. तक्रारदाराने दाखल केलेला किरकोळ अर्ज निकाली काढण्‍यात आला.