( आदेश पारित व्दारा –श्री शेखर पी मुळे,  मा.अध्‍यक्ष )

    - आदेश -

     (पारित दिनांक–  19 जानेवारी 16)_­­­

1. ग्राहक सरंक्षण कायदा 1986चे कलम 12 खाली तक्रारकर्त्याने विरुध्‍द पक्षाकडुन त्यांचे ट्रकचा झालेल्या अपघाताबद्दल विमा नुकसान भरपाईची मागणी केली आहे.
2. तक्राकर्त्याची थोडक्यात तक्रार अशी आहे की, तक्रारकर्ता हे टाटा कंपनीच्या टिप्पर क्रं. एमएच-31 सीबी 5485 चे मालक आहे. त्या ट्रकचा विमा दिनांक 27/3/2009 ते 26/3/2010 या कालावधीकरिता काढला होता.विरुध्‍द पक्ष क्रं.1 व 2 हे आयसीआयसीआय लोंबार्ड मोटर इंन्श्‍युन्स कंपनीचे अनुक्रमे प्रदान व क्षेत्रीय कार्यालय आहे. दिनांक 21/9/2009 ला त्या ट्रकला अपघात झाला व त्यात त्यांचे नुकसान झाले. घटनेची खबर पोलीस स्‍टेश्‍नला देण्‍यात आली. पुढे घटनास्‍थळ पंचनामा केला. त्यानंतर घटनेची खबर विरुध्‍द पक्ष क्रं.2 ला देण्‍यात आली. विरुध्‍द पक्ष क्रं.2 ने झालेल्या नुकसानीबद्दल ट्रकची तपासणी केल्यानंतर कायदेशीर योग्य नुकसान भरपाई देण्‍याची मंजूरी दर्शविली परंतु नुकसान भरपाई दिली नाही. तक्रारकर्त्याने नंतर स्वतःचे खर्चाने ट्रक दुरुस्त केला. विरुध्‍द पक्ष क्रं.2 ने दिनांक 19/12/2009 चे पत्रान्वये कळविले की ते  1,70,000/- देण्‍यास तयार आहे. परंतु त्याला दुरुस्‍तीकरिता 6,13,884/-इतका खर्च आला होता व तेवढया रक्कमेची मागणी केली. विरुध्‍द पक्षाने देण्‍यास नकार दिला. दिनांक 17/9/2012 ला विरुध्‍द पक्षाला कायदेशीर नोटीस पाठविण्‍यात आली होती त्यांनी नोटीसचे उत्तर दिले नाही व मागीतलेली रक्कम दिली नाही. अशा प्रकारे विरुध्‍द पक्षाने अनुचित व्यापारी प्रथेचा अवलंब केला व सेवेत कमतरता ठेवली. सबब या तक्रारीव्दारे तक्रारकर्त्याने रुपये 6,13,884/-, 18 टक्के व्याजासह मागीतले आहे.  
3. विरुध्‍द पक्षाला मंचातर्फे नोटीस पाठविण्‍यात आली नोटीस मिळुन विरुध्‍द पक्ष मंचात हजर झाले व नि.10 प्रमाणे लेखी उत्तर दाखल करुन तक्रारीतील मजकूर नाकबुल केला. तक्रारकर्त्याची ट्रक्टरवरील मालकी आणि ट्रॅक्टरचा विमा याव्यतिरिक्त तक्रारीतील सर्व मजकूर नाकबुल केला आहे. जवाबानुसार तक्रारकर्त्याने महत्वाच्या बाबी लपवून ठेवुन तक्रार दाखल केली आहे. विरुध्‍द पक्षाचे हे मान्य केले आहे की, त्यांनी 1,70,000/- देण्‍याची तयारी दर्शविली होती. तसेच घटनेची खबर पोलीसांना देण्‍यास विलंब झालेला होता आणि ही तक्रार दाखल करण्‍यास कुठलेही कारण घडले नव्हते. त्यांचे सेवेत कुठलीही कमतरता नव्हती किंवा अनुचित व्यापारी प्रथेचा अवलंब केल्या गेला नव्हता. तसेच तक्रार दाखल करण्‍यास बराच विलंब झाल्याने ती मुदतबाह्य झाली आहे यासर्व कारणावरुन तक्रार खारीज करण्‍याची विनंती करण्‍यात आली.
4. दोन्ही पक्षांनी काही दस्‍तऐवज दाखल केले आहे व आपला लेखी युक्तीवाद दाखल केला आहे. तक्रारकर्ता व त्यांचे वकील ब-याय काळापासून गैरहजर आहे. अनेक संधी देऊनही ते उपस्थित न झाल्याने विरुध्‍द पक्षाचे वकीलांचा तोंडी युक्तीवाद एैकण्‍यात आला. तक्रार व दाखल दस्‍तऐवजांचे अवलोकन करता खालीलप्रमाणे निष्‍कर्ष देण्‍यात येतो.

                    -//- निष्‍कर्ष -//-

5. विरुध्‍द पक्षाने असा प्राथमिक आक्षेप घेतला आहे की, ही तक्रार दाखल करण्‍यास विलंब झालेला असुन ती मुदतबाह्य आहे व या मुद्दयावर ती खारीज करण्‍यात यावी. विरुध्‍द पक्षाने याच मुद्दयावर तक्रार खारीज करण्‍यासाठी नि. क्रं.10 प्रमाणे एक अर्ज दिला होता. जो या आदेशाव्दारे निकाली काढण्‍यात येत आहे. विरुध्‍द पक्षाचे म्‍हणण्‍यानुसार तक्रारकर्त्याला दि.19/12/2009 ला एक पत्र देऊन कळविण्‍यात आले की रु.1,70,000/- चा धनादेश कोणाच्या नावे जारी करण्‍यात यावा त्यांचे नाव विरुध्‍द पक्षाला कळवावे. हे पत्र तक्रारकर्त्याला मिळाले होते आणि त्याची प्रत त्यांनी अभिलेखावर दाखल केली आहे. परंतु त्यांनी विरुध्‍द पक्षाला धनादेश कोणाच्या नावे जारी करावा ते कळविले नाही. विरुध्‍द पक्षाने पुढे असे नमुद केले की, ट्रक चा अपघात दिनांक 21/9/2009 झाला व त्या दिनांकापासुन ही तक्रार दोन वर्षाचे आत दाखल करावयास हवी होती. परंतु तक्रारकर्त्याने ऑगस्ट -2012 मधे दाखल केली व अशा प्रकारे ती मुदतबाहय आहे. पुढे असे नमुद केले आहे की, तक्रार दाखल करण्‍याकरिता 2 वर्षाची मुदत जरी 19/12/2009 पासुन धरली, ज्यादिवशी विरुध्‍द पक्षाने तक्रारकर्त्याला रुपये 1,70,000/- देण्‍याचे कळविले होते, तर त्या दिनांकापासुन तक्रार 18/12/2011 कींवा त्याआधी दाखल करावयास हवी होती.
6. विरुध्‍द पक्षाचे या युक्तीवादाशी आम्ही काही अंशी सहमत आहोत. तक्रार दाखल करण्‍यास दोन वर्षाचा कालावधी दिनांक 21/9/2009 म्‍हणजे त्यादिवशी अपघात घडला तेव्हा पासून सुरु होतो या युक्तीवादाशी आम्ही सहमत नाही. कारण ही तक्रार विमा अंतर्गत विमाकृत वाहनाला झालेल्या अपघातबद्दल नुकसानभरपाई न दिल्याने उद्भवली आहे. त्यामुळे ही तक्रार दाखल करण्‍यास कारण त्यादिवशी घडले ज्या‍दिवशी विरुध्‍द पक्षाने तक्रारकर्त्याने मागीतलेली रक्कम देण्‍यास नकार दिला. ही वस्‍तुस्थिती आहे की, विरुध्‍द पक्ष रुपये 1,70,000/- देण्‍यास तयार झाले होते व त्यांनी तक्रारकर्त्याला ज्या इसमाला रक्कम पाठवायची होती त्याचे नाव कळविण्‍यास सांगीतले होते. त्यादिवशी म्‍हणजे दि. 19/12/2009 ला ही तक्रार दाखल करण्‍यास सर्वप्रथम कारण घडले. कारण त्या दिवशी तक्राकत्याला पहिल्यांदा माहित झाले की विरुध्‍द पक्ष त्यांनी मागीतलेली रक्कम रुपये 6,13,884/- देण्‍यास तयार नाही. त्यामुळे तक्रारीला 19/12/2009 पासुन दोन वर्षाचे आत म्‍हणजे 19/12/2011 पर्यत दाखल करण्‍याची मुदत होती. परंतु अगोदरच सांगीतल्याप्रमाणे ही तक्रार ऑगस्ट- 2012 मधे दाखल करण्‍यात आली म्‍हणुन ती मुदतबाह्य आहे.
7. वरील कारणास्तव ही तक्रार मुदतबाह्य असल्याने खारीज होण्‍यास पात्र आहे. सबब खालीलप्रमाणे आदेश देण्‍यात येतो.

7.

                    -  अं ती म  आ दे श  -

1.  या तक्रारीत नि.क्रं.9 वरील विरुध्‍द पक्षाने तक्रार खारीज करण्‍याचा अर्ज मंजूर    

 करण्‍यात येतो.

2.  तक्रारकर्त्याची तक्रार मुदतबाहय असल्याने खारीज करण्‍यात येते.
3. खर्चाबद्दल आदेश ना‍ही.
4. आदेशाच्‍या प्रती उभयपक्षकरांना नि:शुल्क पाठविण्‍यात याव्या.